Ukuthetha Ngolweyiseko

XA UMNTU ethetha ngolweyiseko, abanye bayabona ukuba akayithandabuzi loo nto ayithethayo. Ulweyiseko olunjalo lwabonakala kubulungiseleli bukaPawulos. Xa wayebhekisa kumakholwa aseTesalonika, wabhala esithi: “Iindaba ezilungileyo esizishumayelayo azibangakho kuni ngantetho yodwa kodwa . . . nolweyiseko olunamandla.” (1 Tes. 1:5) Ulweyiseko lwabonakala kwindlela awayethetha ngayo nakwindlela awayephila ngayo. Ulweyiseko olunamandla lufanele lubonakale nakwindlela esizibeka ngayo iinyaniso zeBhayibhile.

Ukubonisa ulweyiseko akufani nokunamathela kwizimvo zakho, ukuqiniseka ngezinto ekungekho bungqina ngazo, okanye ukuba nekratshi. Kunoko, xa umntu obonisa ulweyiseko ethetha ngezinto ezikwiLizwi likaThixo, uthetha ngendlela ebonisa ukholo olomeleleyo.—Heb. 11:1.

Izihlandlo Zokuvakalisa Ulweyiseko. Kubalulekile ukuthetha ngolweyiseko xa ukubulungiseleli basentsimini. Abantu badla ngokuyiphawula indlela othetha ngayo njengesigidimi sakho. Bayayiva indlela ovakalelwa ngayo ngokwenene ngaloo nto uyithethayo. Ulweyiseko lwakho lunokubonisa, nangaphezu kwamazwi odwa, ukuba unento ebalulekileyo ofuna ukuyithetha.

Kukho imfuneko yokuvakalisa ulweyiseko naxa uthetha namanye amakholwa. Umpostile uPetros wabhala incwadi yakhe yokuqala ephefumlelweyo ukuze ‘akhuthaze yaye anikele ubungqina bokuba ngokwenene obu bububele obungasifanelanga bukaThixo.’ Xa wayesenjenjalo, wabongoza abazalwana bakhe esithi: “Yimani niqinile.” (1 Pet. 5:12) Xa wayebhalela ibandla laseRoma, umpostile uPawulos wavakalisa ulweyiseko olwaba yingenelo kulo. Wabhala esithi: “Ndeyisekile kukuba nakufa nabomi nazingelosi narhulumente nazinto zilapha ngoku nazinto zizayo namandla nakuphakama nabunzulu naso nasiphi na esinye isidalwa aziyi kuba nako ukusahlula eluthandweni lukaThixo olukuye uKristu Yesu iNkosi yethu.” (Roma 8:38, 39) UPawulos wabhala ngendlela eyeyisayo naxa wayethetha ngemfuneko yokushumayela kwabanye, kwaye inzondelelo yakhe kuloo msebenzi yabonisa ngokucacileyo ukuba wayeyisekile ngokubaluleka kwawo. (IZe. 20:18-21; Roma 10:9, 13-15) Ulweyiseko olunjalo lufanele lubonakale nakubadala abangamaKristu namhlanje njengoko befundisa ngokusuka kwiLizwi likaThixo.

Ebudeni bamaxesha ofundisiso nangamanye amaxesha, kufuneka abazali bathethe ngolweyiseko xa bexubusha izinto zokomoya nabantwana babo. Oku kufuna ukuba abazali bamthande ngokusuka entliziyweni uThixo kunye neendlela zakhe. Emva koko ke baya kuthetha ngolweyiseko olusuka entliziyweni nabantwana babo, “kuba umlomo uthetha ngokuphuphuma kwentliziyo.” (Luka 6:45; Dut. 6:5-7) Ukuba nolweyiseko olunjalo kuya kushukumisela abazali ukuba bamisele umzekelo ‘wokholo olungenaluhanahaniso.’—2 Tim. 1:5.

Kubaluleke gqitha ukuthetha ngolweyiseko xa kufuneka uphendule ngonqulo lwakho. Umntwana ofunda naye esikolweni, umfundisi-ntsapho okanye umntu osebenza naye unokumangaliswa kukuba ungatheleli kwimibhiyozo ethile. Impendulo eqinisekileyo nelungiselelwe kakuhle inokumnceda akuhlonele ukuma kwakho okusekelwe eBhayibhileni. Kuthekani ukuba kukho umntu okurhwebeshela kwihambo ephosakeleyo—ukunganyaniseki, ukusebenzisa kakubi iziyobisi, okanye ukuziphatha okubi ngokwesini? Kubalulekile ukulikhupha litsole elokuba akuyi kuyenza loo nto kwaye ayikho imigudu enokukweyisela ukuba utshintshe kweso sigqibo. Oku kufuna ukuba uthethe ngolweyiseko xa ukhaba eso sicelo. Xa wayexhathisa umfazi kaPotifare owayefuna ukuziphatha kakubi naye, uYosefu wathetha ngokuqiniseka esithi: “Ndingathini ukwenza obu bubi bukhulu kangaka ndize eneneni ndone kuThixo?” Xa lo mfazi wakhondozayo, wasaba kuloo ndlu.—Gen. 39:9, 12.

Indlela Olubonakaliswa Ngayo Ulweyiseko. Amazwi owasebenzisayo anokwenza lukhulu ekudluliseleni ulweyiseko lwakho. Kangangezihlandlo eziliqela uYesu watshayelela iingongoma ezibalulekileyo ngokuthi: “Inene, inene, ndithi kuwe.” (Yoh. 3:3, 5, 11; 5:19, 24, 25) Ulweyiseko lukaPawulos lwabonakaliswa ngamabinzana anjengelithi “ndeyisekile kukuba,” “ndiyazi yaye ndeyisekile kwiNkosi uYesu,” “ndinyanisile xa nditshoyo, andixoki.” (Roma 8:38; 14:14; 1 Tim. 2:7) Ngokuphathelele ukuzaliseka kwelizwi lakhe, maxa wambi uYehova waphefumlela abaprofeti bakhe ukuba bathethe amazwi agxininisayo, njengathi, “uya kuba yinyaniso nakanjani na.” (Hab. 2:3) Xa ubhekisela kwezi ziprofeto, unokusebenzisa isigama esifanayo. Ukuba ukholose ngoYehova kunokuba uthembe isiqu sakho yaye ukuba uthetha ngentlonelo nabanye, amabinzana abonisa ulweyiseko olufanayo aya kubonisa ukuba ukholo lwakho lomelele.

Ulweyiseko lunokuboniswa ngozimiselo nangokucinezela kwakho amagama. Izimbo zobuso, izimbo zomzimba kunye nendlela owenza ngayo izinto ziba negalelo kuloo nto, nangona zisenokwahluka ngandlel’ ithile kumntu ngamnye. Kwanokuba ungumntu oneentloni okanye othuleyo indalo, xa weyiseke ngokwenene ukuba oko ukuthethayo kuyinyaniso nokuba abanye kufuneka bekuvile, ulweyiseko lwakho luya kubonakala.

Kakade ke, naziphi na iimbonakaliso zolweyiseko esizenzayo zimele zibe zezokwenene. Ukuba abantu banokuqonda ukuba senza inkwalambisa kunokuba sithethe ngokusuka entliziyweni, basenokuvakalelwa kukuba isigidimi sethu asibalulekanga. Ngoko ke, eyona nto ibaluleke ngaphezu kwayo yonke enye into yile, yiba nguwe. Kuxhomekeka ukuba bangaphi abaphulaphuli bakho, kusenokufuneka uphakamise ilizwi kwaye ulicinezele ngaphezu kokuba uqhele ukwenza. Kodwa ke injongo yakho ifanele ibe kukuthetha ngokunyaniseka nangendlela oqhele ukuthetha ngayo.

Izinto Ezinceda Ekuvakaliseni Ulweyiseko. Ekubeni ulweyiseko lwakho lubandakanya indlela ovakalelwa ngayo ngombandela wakho, kubalulekile ukulungiselela kakuhle. Ukukhuphela nje umbandela owuthabatha kwimpapasho uze uwucengceleze akwanelanga. Kufuneka uwuqonde kakuhle loo mbandela uze ukwazi ukuwuchaza ngawakho amazwi. Umele weyiseke ngokupheleleyo ukuba uyinyaniso nokuba loo nto uyithethayo ibalulekile kubaphulaphuli bakho. Oku kuthetha ukuba xa ulungiselela intetho yakho, ucinga ngeemeko nangezinto abasenokuba sele bezazi ngaloo mbandela okanye indlela abasenokuvakalelwa ngayo ngawo.

Kulula ukuba abanye baluve ulweyiseko lwakho xa intetho yakho ityibilika. Ngoko ke, ukongezelela ekulungiseleleni umbandela ofanelekayo, zibhokoxe ekuwunikeleni. Nikela ingqalelo ekhethekileyo kwiinxalenye zombandela wakho ezifuna uzimiselo olungakumbi ukuze uzidlulisele ungaxhomekekanga kakhulu kumanqaku akho. Ungalibali nokuthandazela intsikelelo kaYehova kwimigudu yakho. Ngale ndlela ‘uThixo uya kukomeleza’ ukuba uthethe ngendlela ebonisa ukuba weyisekile ukuba isigidimi sakho siyinyaniso kwaye sibalulekile.—1 Tes. 2:2.