Yimani Ngokuqinileyo Ningahexi
‘Usoloko enithandazela, ukuze ekugqibeleni nime ngokuqinileyo ningahexi kuko konke ukuthanda kukaThixo.’—KOLOSE 4:12.
1, 2. (a) Yintoni eyaphawulwa ngabantu bangaphandle ngamaKristu okuqala? (b) Incwadi yabaseKolose iwubonisa njani umdla wothando?
ABALANDELI bakaYesu babenomdla onzulu kwabo babenqula nabo. UTertullian (owayengumbhali ngenkulungwane yesibini neyesithathu yeXesha Eliqhelekileyo) wachaza ngobubele ababebubonisa kwiinkedama, kumahlwempu nakwabalupheleyo. Obo bungqina bothando oluboniswa ngezenzo babachukumisa abo babengengomakholwa kangangokuba abanye bathi ngaloo maKristu, ‘Khawubone indlela athandana ngayo.’
2 Incwadi yabaseKolose ibonisa loo mdla wothando awayenawo umpostile uPawulos neqabane lakhe uEpafra ngabazalwana noodade baseKolose. UPawulos wababhalela esithi: UEpafra ‘usoloko enithandazela, ukuze ekugqibeleni nime ngokuqinileyo ningahexi kuko konke ukuthanda kukaThixo.’ Ebudeni bowama-2001, umxholo wonyaka wamaNgqina kaYehova uya kuba uthatyathwe kula mazwi akumaKolose 4:12: “Nime ngokuqinileyo ningahexi kuko konke ukuthanda kukaThixo.”
3. Ziziphi izinto ezimbini ezathandazelwa nguEpafra?
3 Unokubona ukuba imithandazo kaEpafra ngenxa yabo wayebathanda yayiziinkalo ezimbini: (1) ukuze ‘ekugqibeleni beme ngokuqinileyo’ baze (2) beme ‘bangahexi kuko konke ukuthanda kukaThixo.’ Le nkcazelo iye yafakwa eZibhalweni ukuze kungenelwe thina. Ngoko zibuze, ‘Yintoni ekufuneka ndiyenze mna ukuze ekugqibeleni ndime ngokuqinileyo ndingahexi kuko konke ukuthanda kukaThixo? Yaye xa ndisenjenjalo, uya kuba yintoni umphumo?’ Makhe sibone.
Zabalazela ‘Ukuma Ngokuqinileyo’
4. AbaseKolose kwakufuneka ‘baqine’ ngayiphi ingqiqo?
4 UEpafra wayenomnqweno onyanisekileyo wokuba abazalwana noodade wabo baseKolose ‘ekugqibeleni beme ngokuqinileyo.’ Ibinzana elasetyenziswa nguPawulos, eliguqulelwe apha ngokuthi “ngokuqinileyo,” linokuthetha ukugqibelela, ukukhula ngokupheleleyo, okanye ukuqola. (Mateyu 19:21; Hebhere 5:14; Yakobi 1:4, 25) Mhlawumbi uyazi ukuba ukubhaptizwa kukabani njengeNgqina likaYehova akuthethi kuthi sele engumKristu okhule ngokupheleleyo. UPawulos wabhalela abase-Efese, ababehlala ngakwintshona yaseKolose, esithi abalusi nabafundisi mabazame ukunceda ‘bonke bafikelele kubunye bokholo nakulwazi oluchanileyo loNyana kaThixo, ekukhuleleni ebudodeni obupheleleyo, kumlinganiselo wobukhulu bokuzala kukaKristu.’ Kwenye indawo uPawulos wabongoza amaKristu ukuba abe ‘ngakhule ngokupheleleyo emandleni okuqonda.’—Efese 4:8-13; 1 Korinte 14:20.
5. Sinokukwenza njani ukuba ngabaqinileyo kube lolona sukelo luphambili?
5 Ukuba abanye eKolose babengekakhuli ngokupheleleyo ngokomoya, okanye babengekaqoli, kwakufuneka bazibekele olo sukelo. Ngaba akufanele kube njalo nanamhlanje? Enoba sabhaptizwa kumashumi eminyaka eyadlulayo okanye sisandul’ ukubhaptizwa kutshanje, ngaba sinokubona ngokucacileyo ukuba siye senza inkqubela kwindlela esiqiqa ngayo nakwiimbono zethu? Ngaba siyayiqwalasela imigaqo yeBhayibhile ngaphambi kokuba senze izigqibo? Ngaba imibandela enokuthanani noThixo nezilangazelelo zebandla ibaluleke ngakumbi ebomini bethu, kunokuba yenziwe nje ngamabona-ndenzile? Asinakuthetha ngazo zonke iindlela esinokubonisa ngazo ukukhula ngokupheleleyo, kodwa khawuphawule le mizekelo mibini.
6. Kukweyiphi inkalo anokuthi ubani akwazi ukukhulela emfezekweni, njengoko noYehova enjalo?
6 Umzekelo wokuqala: Masithi sikhulele kwindawo enobuhlanga okanye apho abantu babathiyileyo abantu besinye isizwe, uhlanga, okanye ummandla. Ngoku siyazi ukuba uThixo akakhethi buso nokuba nathi asifanele sikhethe ubuso. (IZenzo 10:14, 15, 34, 35) Ebandleni lethu okanye kwisiphaluka sethu, kukho abantu bolunye uhlanga, ibe ngenxa yoko sikunye nabo. Ukanti, sizicinezela ukusa kuwuphi umkhamo iimvakalelo okanye izikrokro ezingafanelekanga ngabantu bolo hlanga? Ngaba ‘sinochuku,’ sikhawuleza sicinge into engafanelekanga ukuba umntu wolo hlanga uyasona okanye uyasidelela ngento nje engenamsebenzi? Zibuze, ‘Ngaba kufuneka ndiphucule ngakumbi ukuze ndibe nembono kaThixo yokungabi namkhethe?’
7. Ukuba ngumKristu opheleleyo kunokuquka ukuba naziphi iimbono ngabanye?
7 Umzekelo wesibini: Ngokuvisisana namaFilipi 2:3, asifanele senze ‘nanye into ngokusukuzana okanye ngokuzigwagwisa, kodwa ngokuthobeka kwengqondo, sibagqala abanye njengabongamileyo kunathi.’ Siqhuba njani kule nkalo? Mntu ngamnye unobuthathaka bakhe nezinto anobuchule kuzo. Ukuba ngaphambili sasikhawuleza ukubona ubuthathaka babanye abantu, ngaba siye senza inkqubela, asisalindelanga ukuba phantse babe ‘ngabagqibeleleyo’? (Yakobi 3:2) Ngoku, ngaphezu kunanini na ngaphambili, ngaba siyakwazi ukubona—nkqu nokukhangela—iindlela abanye abongame ngayo? ‘Ndimele ndivume ukuba lo dade unomonde kunam.’ ‘Lowaa unokholo olomelele ngakumbi.’ ‘Xa ndithetha ngokuphandle, ufundisa bhetele kunam.’ ‘Ukwazi ngakumbi kunam ukuwubamba umsindo wakhe.’ Mhlawumbi abanye baseKolose kwakufuneka benze uphuculo kule nkalo. Ngaba siyalwenza thina?
8, 9. (a) UEpafra wayebathandazela ukuba ‘beme’ ngokuqinileyo ngayiphi ingqiqo abaseKolose? (b) ‘Ukuma ngokuqinileyo’ kwakuquka ntoni ngokuphathelele ikamva?
8 UEpafra wathandazela abaseKolose ukuba ‘beme ngokuqinileyo.’ Ngokucacileyo, uEpafra wayethandaza kuThixo ukuba abaseKolose babe ngamaKristu apheleleyo, aqolileyo, nakhule ngokupheleleyo, baze ‘beme,’ okanye bahlale benjalo.
9 Asinakucinga ukuba mntu ngamnye oba ngumKristu, kwanalowo uqolileyo, uya kuhlala enjalo. UYesu wathi unyana kaThixo owayeyingelosi ‘akazange eme enyanisweni.’ (Yohane 8:44) Yaye uPawulos wakhumbuza abaseKorinte ngabathile ababekhonza uYehova ngaphambili kangangethuba elithile baza emva koko bayeka. Walumkisa abazalwana abathanjiswe ngomoya esithi: “Lowo ucinga ukuba umile makalumke angawi.” (1 Korinte 10:12) Oku kubethelela oko kuthethwa ngako kumthandazo wokuba abaseKolose ‘ekugqibeleni beme ngokuqinileyo.’ Bakuba beqinile, bekhule ngokupheleleyo, kwakufuneka baqhubeke benjalo, bangarhwaqeleli emva, batyhafe okanye baphambuke. (Hebhere 2:1; 3:12; 6:6; 10:39; 12:25) Ngaloo ndlela babeya ‘kuqina’ ngomhla wokuhlolwa kwabo nokunconyelwa kwabo okokugqibela.—2 Korinte 5:10; 1 Petros 2:12.
10, 11. (a) Nguwuphi umzekelo awasimisela wona uEpafra ngokubhekisele emthandazweni? (b) Ngokuvisisana noko kwenziwa nguEpafra, sisiphi isigqibo ongathanda ukusenza?
10 Sele sikuxubushile ukubaluleka kokukhankanya abanye ngamagama xa sithandaza, simcele ngokungqalileyo uYehova ukuba abancede, abathuthuzele, abasikelele aze abaphe umoya oyingcwele. Yayinjalo imithandazo kaEpafra xa wayethandazela abaseKolose. Yaye sinako—eneneni sifanele—sifumane icebiso elibalulekileyo ngezinto esimele sizithethe kuYehova ngeziqu zethu xa sithandaza. Ngokungathandabuzekiyo, simele sicele uncedo lukaYehova ukuze nathi ngokwethu ‘ekugqibeleni sime ngokuqinileyo.’ Ngaba wenjenjalo?
11 Kutheni ungayichazi imeko yakho emthandazweni? Thetha noThixo ngenqanaba osele ukhule wafikelela kulo ekubeni ‘ngoqinileyo,’ okhule ngokupheleleyo, oqolileyo. Mbongoze ukuba akuncede uqonde iinkalo ekusafuneka ukhule kuzo ngokomoya. (INdumiso 17:3; 139:23, 24) Ngokungathandabuzekiyo, zikho iinkalo ezinjalo. Ngoko, kunokuba oku kukudimaze, yenza isibongozo esicacileyo kuThixo, ucele uncedo ngokungqalileyo ukuba wenze inkqubela. Kwenze oku ngokuphindaphindiweyo. Eneneni, kutheni ungazenzeli isigqibo sokuba kule veki izayo uya kukuthandazela ngokungakumbi ukuba ‘ekugqibeleni ume ngokuqinileyo.’ Yaye zimisele ukukwenza ngakumbi oko njengoko uqwalasela umxholo wonyaka. Xa uthandaza, nikela ingqalelo kutyekelo olunokukwenza ubuyele umva, udimazeke, okanye uphambuke kwinkonzo kaThixo nendlela onokukuphepha ngayo oko.—Efese 6:11, 13, 14, 18.
Thandazela Ukungahexi
12. Kutheni kwakuyimfuneko ngokukhethekileyo ukuba abaseKolose ‘bangahexi’?
12 UEpafra wathandazela nenye into eyayibalulekile ukuba ekugqibeleni abaseKolose babeza kufunyanwa bemi ngokuqinileyo ngendlela eyamkelekileyo kuThixo. Ibaluleke ngokufanayo nakuthi. Yintoni yona leyo? Wathandazela ukuba ‘bangahexi kuko konke ukuthanda kukaThixo.’ Babengqongwe luwexuko neentanda-bulumko ezonakalisayo, zimbi zazo ezazinembonakalo ekhohlisayo ngokungathi lunqulo oluyinyaniso. Ngokomzekelo, babecinezelelwa ukuba bagcine iintsuku ezithile ezikhethekileyo ngokuzila ukutya okanye ngokwenza izidlo ezikhulu, njengoko kwakukhe kwayimfuneko kunqulo lwamaYuda. Abafundisi bobuxoki babenikela ingqalelo kwiingelosi, loo mimoya inamandla eyayisetyenziswe ekudluliseleni uMthetho kuMoses. Khawuzithelekelele uchanabeke kwiingcinezelo ezinjalo! Zazininzi iingcamango ezididayo neziphikisanayo.—Galati 3:19; Kolose 2:8, 16-18.
13. Kukuqonda siphi isibakala okwakunokunceda abaseKolose, yaye kunokusinceda njani thina oko?
13 UPawulos waziphikisa ezi ngcamango ngokugxininisa indima kaYesu Kristu. “Njengoko niye namamkela uKristu Yesu iNkosi, qhubekani nihamba ngokumanyene naye, nimiliselwe yaye nakhelwe kuye, nizinzisiwe elukholweni, kanye njengoko nafundiswayo.” Ewe, kwakuyimfuneko (kwabaseKolose ngokufanayo nakuthi) ukuba beyiseke ngokupheleleyo ngendima kaKristu kwinjongo kaThixo nasebomini bethu. UPawulos wachaza: “Nguye onazo ngokupheleleyo iimpawu zobuthixo emzimbeni wakhe. Nani ke niye napheleliswa ngaye, lowo uyintloko yabo bonke oorhulumente namagunya.”—Kolose 2:6-10.
14. Kwakutheni ukuze ithemba libe yinto yokwenene kwabo baseKolose?
14 AbaseKolose babengamaKristu athanjiswe ngomoya. Babenethemba elicacileyo lokuphila emazulwini, yaye babenezizathu ezibambekayo zokugcina elo themba liqaqambile. (Kolose 1:5) ‘Yayikukuthanda kukaThixo’ ukuba bangahexi ekuqinisekeni kwethemba labo. Ngaba bakho kubo ababelithandabuza elo themba? Akunjalo konke konke! Ngaba kumele kubekho umahluko namhlanje ngabo bonke abo banikwe ithemba nguThixo lokuphila kwiparadesi esemhlabeni? Nakanye! Ngokucacileyo elo themba liqinisekileyo liyinxalenye ‘yokuthanda kukaThixo.’ Ngoku khawuqwalasele le mibuzo: Ukuba uzabalazela ukuba ngomnye ‘wesihlwele esikhulu’ esiya kusinda ‘kwimbandezelo enkulu,’ liyinto yokwenene kangakanani elakho ithemba? (ISityhilelo 7:9, 14) Ngaba liyinxalenye ‘yokungahexi kuko konke ukuthanda kukaThixo’?
15. Ziziphi iingongoma ezadweliswa nguPawulos ezaziquka ithemba?
15 Xa sithetha ‘ngethemba’ asithethi ngomnqweno ongacacanga okanye ukuba nombono. Sinokukubona oku kwiingongoma ezakhankanywa nguPawulos ngaphambilana kwabaseRoma. Kwezo ngongoma, nto nganye ekhankanyiweyo inxulumene okanye ikhokelela kwenye elandelayo. Phawula indawo uPawulos alibeka kuyo “ithemba” xa eqiqa nawo: “Masigcobe ngoxa sisezimbandezelweni, ekubeni sisazi ukuba imbandezelo ivelisa unyamezelo; unyamezelo luvelisa ukukholeka; ukukholeka kuvelisa ithemba, kwaye ithemba alidanisi; ngenxa yokuba uthando lukaThixo luye lwathululelwa ezintliziyweni zethu ngomoya oyingcwele.”—Roma 5:3-5.
16. Njengoko wawufunda inyaniso yeBhayibhile, liliphi ithemba owalifumanayo?
16 Xa amaNgqina kaYehova ayeqala ukwabelana nawe ngesigidimi seBhayibhile, kusenokwenzeka ukuba inyaniso ethile yatsala ingqalelo yakho, njengemeko yabafi okanye uvuko. Kwabaninzi, eyona nto iyintloko intsha bayiqondayo lithemba elisekelwe eBhayibhileni lokuphila kwiparadesi esemhlabeni. Khumbula ukuqala kwakho ukuva loo mfundiso. Elinjani ukumangalisa ithemba—ukugula nokwaluphala akusayi kuphinda kubekho, unokuqhubeka uphila ukuze unandiphe iziqhamo zokubulaleka kwakho, yaye uya kuba noxolo nezilwanyana! (INtshumayeli 9:5, 10; Isaya 65:17-25; Yohane 5:28, 29; ISityhilelo 21:3, 4) Wafumana ithemba elingummangaliso!
17, 18. (a) Uludwe lwezinto ezachazwa nguPawulos kumaRoma lufikelela njani kwithemba? (b) Luhlobo olunjani lwethemba ekuthethwa ngalo kumaRoma 5:4, 5, yaye ngaba unalo ithemba elinjalo?
17 Ekuhambeni kwexesha, mhlawumbi wahlangabezana nenkcaso okanye intshutshiso. (Mateyu 10:34-39; 24:9) Kwanakumaxesha akutshanje, kumazwe awahlukahlukeneyo amakhaya amaNgqina aye aphangwa okanye kuye kwanyanzeleka ukuba wona amaNgqina abe ziimbacu. Amanye aye axhatshazwa emzimbeni, kwathinjwa uncwadi lwawo, okanye aye angamaxhoba eengxelo zobuxoki ezisasazwa ngamajelo eendaba. Enoba uye wajamelana naluphi na uhlobo lwentshutshiso, njengoko amaRoma 5:3 esitsho, wagcoba embandezelweni, yaye oko kwavelisa umphumo omhle. Kwananjengokuba uPawulos wabhalayo, imbandezelo yavelisa unyamezelo kuwe. Lwaza unyamezelo lwakhokelela ekubeni ufumane inkoliseko. Wawusazi ukuba wenza okulungileyo, wenza ukuthanda kukaThixo, ngoko wawuqinisekile ukuba ukholekile kuye. Ngokutsho kukaPawulos, waziva ‘ukholekile’ kuye. Ehlabela mgama, uPawulos wabhala esithi “ukukholeka kuvelisa ithemba.” Oko kunokubonakala kungaqhelekanga. Kwakutheni ukuze uPawulos abeke “ithemba” kude kangaka kolu ludwe? Wawungenalo na ithemba kwakude kudala ekuqaleni kwakho ukuva iindaba ezilungileyo?
18 Ngokucacileyo, uPawulos apha akabhekiseli kwithemba lethu lobomi bemfezeko esaba nalo ekuqaleni. Ubhekisela kwinto engaphaya; enzulu ngakumbi, nesishukumisa ngakumbi. Xa sinyamezela ngokuthembeka size ngaloo ndlela siqonde ukuba sikholekile kuThixo, oku kunegalelo elikhulu ekongezeni nasekomelezeni ithemba esasinalo ekuqaleni. Elo themba sasinalo ngoku linyaniseka ngakumbi, liqiniseka ngakumbi, libe yinto yokwenene kuthi. Eli themba linzulu liqaqamba ngokungakumbi. Liba yinxalenye yobuntu bethu. “Kwaye ithemba alidanisi; ngenxa yokuba uthando lukaThixo luye lwathululelwa ezintliziyweni zethu ngomoya oyingcwele.”
19. Ithemba onalo lifanele libe yinxalenye yemithandazo yakho njani?
19 Umthandazo onyanisekileyo kaEpafra yayikukuba abazalwana noodade wabo baseKolose bahlale bechukumisekile yaye benolweyiseko loko kwakubekwe phambi kwabo, ‘bangahexi kuko konke ukuthanda kukaThixo.’ Ngokufanayo ngamnye wethu makasondele rhoqo kuThixo ngokuphathelele ithemba esinalo. Kwimithandazo yakho yangasese, liquke ithemba onalo ngokuphathelele ihlabathi elitsha. Yivakalise kuYehova indlela olilangazelela ngayo, unolweyiseko olupheleleyo lokuba liza kufika. Mbongoze ukuba akuncede wandise yaye ukhulise ulweyiseko onalo. Njengoko uEpafra wathandazela abaseKolose ukuba ‘bangahexi kuko konke ukuthanda kukaThixo,’ nawe yenza okufanayo. Kwenze rhoqo.
20. Ukuba abo bambalwa ngentelekiso bayaphambuka kwindlela yobuKristu, kutheni kungeyomfuneko ukuba oko kusidimaze?
20 Akufanele kuphazanyiswa okanye udinyazwe sisibakala sokuba ingengabo bonke abemi ngokuqinileyo nangolweyiseko olupheleleyo. Bambi banokusilela, baphambuke, okanye banikezele. Oko kwenzeka kwabo babesondele gqitha kuYesu, abapostile bakhe. Kodwa xa uYudas wajika waba ngumngcatshi, ngaba abanye abapostile bayekelela okanye ngaba bayeka? Nakanye! UPetros wasebenzisa INdumiso 109:8 ukubonisa ukuba indawo kaYudas yayiya kuthatyathwa ngomnye. Kwanyulwa owayeza kuthabatha indawo yakhe, yaye abanyanisekileyo bakaThixo baqhubeka ngenkuthalo nesabelo sabo sokushumayela. (IZenzo 1:15-26) Babezimisele ukuma ngokuqinileyo bangahexi.
21, 22. Ukuma kwakho ngokuqinileyo yaye ungahexi kuya kuphawulwa ngayiphi ingqiqo?
21 Unokuqiniseka ngokupheleleyo ukuba ukuma kwakho ngokuqinileyo ungahexi kuko konke ukuthanda kukaThixo kuya kubonwa. Kuya kubonwa kuze kuxatyiswe. Ngubani?
22 Kaloku, abazalwana noodade wenu, abakwaziyo nabakuthandayo, baya kukuphawula oko. Kwanokuba inkoliso yabo ayikutsho ngokoqobo oko, umphumo uya kufana noko sikufunda kweyoku-1 kwabaseTesalonika 1:2-6 ethi: “Sisoloko simbulela uThixo xa sinikhankanya nonke emithandazweni yethu, kuba asiwulibali umsebenzi wenu wokuthembeka, nokubulaleka kwenu niqhutywa luthando, nokunyamezela kwenu ngenxa yethemba eninalo eNkosini yethu uYesu Kristu phambi koThixo uBawo wethu. Kuba . . . iindaba ezilungileyo esizishumayelayo azibangakho kuni ngantetho yodwa kodwa kwanangamandla nomoya oyingcwele nolweyiseko olunamandla . . . ; yaye nani naxelisa thina neNkosi.” AmaKristu anyanisekileyo akungqongileyo avakalelwa ngendlela efanayo njengoko ephawula ukuba ‘umi ngokuqinileyo yaye akuhexi kuko konke ukuthanda kukaThixo.’—Kolose 1:23.
23. Yintoni esifanele sizimisele ukuyenza ebudeni balo nyaka uzayo?
23 Ngokuqinisekileyo, uYihlo osemazulwini uya kukuphawula oko yaye uya kukholiswa kuko. Qiniseka ngaloo nto. Ngoba? Ngenxa yokuba ume ngokuqinileyo yaye akuhexi “kuko konke ukuthanda kukaThixo.” UPawulos wabhala ekhuthaza abaseKolose ukuba ‘bahambe ngokumfaneleyo uYehova baze bamkholise ngokupheleleyo.’ (Kolose 1:10) Ewe, kunokwenzeka ukuba abantu abangafezekanga bamkholise ngokupheleleyo. Abazalwana noodade wenu baseKolose bakwenza oko. AmaKristu akungqongileyo kanye ngoku ayakwenza oko. Nawe unokukwenza! Ngenxa yoko, ebudeni balo nyaka uzayo, imithandazo yakho oyenza rhoqo nezenzo zakho mazingqine ukuba uzimisele ukuba ‘ekugqibeleni ume ngokuqinileyo ungahexi kuko konke ukuthanda kukaThixo.’
Ngaba Uyakhumbula?
• Yintoni ebandakanyekileyo ‘ekumeni kwakho ngokuqinileyo’?
• Ziziphi izinto eziphathelele wena omele uziquke kwimithandazo yakho?
• Njengoko kuboniswe kumaRoma 5:4, 5, hlobo luni lwethemba ofuna ukuba nalo?
• Isifundo sethu siye sakushukumisela ukuba ube naluphi usukelo kulo nyaka uzayo?
[Umfanekiso okwiphepha 20]
UEpafra wathandazela ukuba abazalwana bakhe beme ngokuqinileyo, benolweyiseko oluqinileyo kuKristu nakwithemba labo
[Imifanekiso ekwiphepha 23]
Abanye abantu abazizigidi banethemba onalo eliqinisekileyo yaye abahexi njengawe