Indlela Esinokuloyisa Ngayo Uloyiko

NGABA ukufumanisa kulula ukukhonza uYehova?— UMfundisi Omkhulu akazange athi kuza kuba lula ukwenjenjalo. Kubusuku obungaphambi kokubulawa kwakhe, uYesu wathi kubapostile bakhe: “Ukuba ihlabathi linithiyile, niyazi ukuba liye lathiya mna ngaphambi kokuba lithiye nina.”​—Yohane 15:18.

UPetros waqhayisa ngelithi yena akanakuze amshiye uYesu, kodwa uYesu wamxelela uPetros ukuba wayeza kukhanyela ukuba uyamazi izihlandlo ezithathu ngobo busuku bunye. Yaye uPetros wenza loo nto kanye! (Mateyu 26:31-35, 69-75) Yayinokwenzeka njani into elolo hlobo?— Yenzeka ngenxa yokuba uPetros woyika, ngokunjalo nabanye abapostile.

Ngaba uyasazi isizathu sokuba abapostile boyike?— Basilela ukwenza eyona nto ibalulekileyo. Ukufunda ngaloo nto kunokusinceda sikhonze uYehova, kungakhathaliseki oko abanye abantu bakuthethayo okanye bakwenzayo kuthi. Noko ke, kuqala kufuneka sihlolisise oko kwenzekayo kubusuku bokugqibela uYesu awabuchitha nabapostile bakhe.

Baqala ngokubhiyozela iPasika kunye. Esi yayisisidlo esikhethekileyo esasisenziwa nyaka ngamnye, ukuze kukhunjuzwe abantu bakaThixo ngokukhululwa kwabo kubukhoboka baseYiputa. Emva koko uYesu waqalisa esinye isidlo esikhethekileyo kunye nabo. Siza kuxubusha ngaso kamva kwesinye isahluko, size sichaze indlela eso sidlo esisinceda ngayo sikhumbule uYesu. Emva kweso sidlo nasemva kokukhuthaza abapostile bakhe, uYesu ubasa kumyezo waseGetsemane. Le yindawo abayithandayo ababedla ngokuyityelela.

UYesu uyabashiya aye mganyana esiya kuthandaza. Uxelela uPetros, uYakobi, noYohane ukuba bathandaze nabo. Kodwa bayalala. UYesu uphinda ahambe izihlandlo ezithathu esiya kuthandaza, yaye ezo zihlandlo zithathu ubuya afike uPetros nabanye belele! (Mateyu 26:36-47) Ngaba uyasazi isizathu sokuba babemele bahlale bethe qwa baze bathandaze?— Makhe sithethe ngoku.

Ngaphambilana ngaloo ngokuhlwa, uYudas Skariyoti wayekho kule Pasika, noYesu kwakunye nabanye abapostile. Njengoko usenokukhumbula, uYuda waba lisela. Ngoku ungumngcatshi. Uyayazi indawo ekumyezo waseGetsemane, apho uYesu ebedla ngokuhlanganisana khona nabapostile bakhe. Ngoko uYudas uthumela amajoni apho ukuze aye kubamba uYesu. Ukufika kwawo, uYesu uyawabuza: “Nifuna bani na?”

La majoni aphendula athi: “UYesu.” Engawoyiki, uYesu uphendula athi: “Ndinguye.” Amajoni amangaliswa gqitha yinkalipho kaYesu kangangokuba ayahlehla aze awele emhlabeni. Emva koko uYesu uthi: ‘Ukuba, ke ngoko ndim lo nimfunayo, bayekeni bahambe abapostile bam.’​—Yohane 18:1-9.

Xa amajoni ambambayo uYesu aza ambopha, abapostile boyika baza babaleka. Kodwa uPetros noYohane bafuna ukuqonda oko kwenzekayo, ngoko bayalandela. Ekugqibeleni, uYesu usiwa kwikhaya likaKayafa umbingeleli omkhulu. Ekubeni uYohane esaziwa ngumbingeleli omkhulu, umngcini-mnyango uyamngenisa uPetros entendelezweni.

Ababingeleli sele behlanganisene kwikhaya likaKayafa ukuza kuxoxa ityala. Babefuna ukuba uYesu abulawe. Ngoko beza namangqina aza kuthetha ubuxoki ngaye. Abantu babetha uYesu ngamanqindi baze bamqhwabe. Ngoxa kusenzeka yonke le nto, uPetros ukufutshane apho.

Esinye isicakazana, esingumgcini-mnyango esasingenise uPetros noYohane, sibona uPetros. Sithi: “Nawe, ubukunye noYesu!” Kodwa uPetros uyakhanyela ukuba uyamazi kwaukumazi uYesu. Emva kwethuba elithile enye intombazana ijonga uPetros ize ithi kwabo bami apho: “Lo mntu wayekunye noYesu.” Kwakhona uPetros uyakhanyela ukuba uyamazi. Kamva iqela labantu libona uPetros lize lithi kuye: “Ngokuqinisekileyo nawe ungomnye wabo.” Okwesihlandlo sesithathu, uPetros uyakhanyela esithi: “Andimazi lo mntu!” UPetros ude afunge ngelithi uthetha inyaniso, yaye uYesu uyajika aze amjonge.​—Mateyu 26:57-75; Luka 22:54-62; Yohane 18:15-27.

Ngaba uyasazi isizathu sokuba uPetros axoke?— Ewe, kungenxa yokuba wayesoyika. Kodwa kwakutheni ukuze oyike? Yintoni awasilelayo ukuyenza ukuze omeleze inkalipho yakhe? Cinga ngoku. Yintoni awayenzayo uYesu ukuze abe nenkalipho?— Wathandaza kuThixo, ibe uThixo wamnceda ukuze abe nenkalipho. Yaye khumbula, uYesu wayemxelele izihlandlo ezithathu uPetros ukuba athandaze aze ahlale ethe qwa yaye ephaphile. Kodwa kwenzeka ntoni?—

Sihlandlo ngasinye, uPetros wayelala. Akazange athandaze yaye akazange ahlale ephaphile. Ngoko kwamothusa ukubanjwa kukaYesu. Kamva ebudeni bokuthethwa kwetyala, xa abantu babetha uYesu baza benza amalungiselelo okuba abulawe, uPetros woyika. Noko ke, kwiiyure nje ezimbalwa ngaphambi koko, uYesu wathi mabalindele ntoni abapostile bakhe?— UYesu wabaxelela ukuba ihlabathi laliya kubathiya kanye njengokuba naye lamthiyayo.

Ngoku makhe sicinge ngento enokusehlela nathi efana naleyo yehlela uPetros. Masithi ukwigumbi lokufundela, xa abanye beqalisa ukugxeka abantu abangayikhahleliyo iflegi okanye abangayibhiyozeliyo iKrismesi. Ngoko kuthekani ukuba omnye umfundi uza kuwe aze akubuze: “Ngaba kuyinyaniso ukuba wena akuyikhahleli iflegi?” Okanye abanye bathi: “Sivile ukuba akuyibhiyozeli neKrismesi!” Ngaba ubuya koyika ukubaxelela inyaniso?— Ngaba ubuya kuhendelwa ekubeni uxoke, kanye njengoPetros?—

Emva koko, uPetros waba buhlungu ngenxa yokuba eye wakhanyela ukuba uyamazi uYesu. Xa waqonda oko wayekwenzile, waphuma phandle waza walila. Ewe, wabuyela kuYesu. (Luka 22:32) Khawukhe ucinge nje ngoku. Yintoni enokusinceda singoyiki de sithethe ngendlela awathetha ngayo uPetros?— Khumbula ukuba, uPetros akazange athandaze aze ahlale ephaphile. Ngoko, ubunokuthi yintoni esifanele siyenze ukuze sibe ngabalandeli boMfundisi Omkhulu?—

Ngokuqinisekileyo simele sithandazele uncedo lukaYehova. Emva kokuba uYesu ethandazile, ngaba uyazi ukuba uThixo wamenzela ntoni?— Wathumela ingelosi ukuze imomeleze. (Luka 22:43) Ngaba iingelosi zikaThixo zinokusinceda thina?— IBhayibhile ithi: “Ingelosi kaYehova imisa inkampu macala onke kwabo bamoyikayo, ize ibahlangule.” (INdumiso 34:7) Kodwa ukuze sincedwe nguThixo, simele senze okuthile okungaphezu nje kokuthandaza. Ngaba uyazi ukuba yintoni enye esimele siyenze?— UYesu waxelela abalandeli bakhe ukuba, bathi qwa baze bahlale bephaphile. Ucinga ukuba sinokukwenza njani oko?—

Kufuneka siphulaphule ngenyameko kwiintlanganiso zamaKristu, size sinikele ingqalelo koko sikufunda eBhayibhileni. Kodwa kwakhona sifanele sithandaze rhoqo kuYehova size simcele ukuba asincede siqhubeke simkhonza. Ukuba senjenjalo, uya kusinceda soyise uloyiko. Ngoko siya kuvuya xa sifumana ithuba lokuxelela abanye ngoMfundisi Omkhulu noYise.