Abavumisi Ngeenkwenkwezi Bazokubona UYesu

Kufika amadoda avela ngaseMpuma. Ngabavumisi ngeenkwenkwezi. Bakholelwa ukuba banokuchaza ukuba kutheni kusenzeka izinto ezithile ebomini bomntu ngokujonga nje kwiinkwenkwezi. (Isaya 47:13) Xa bebesekhayeni labo eMpuma, baye babona inkwenkwezi baza bayilandela ixesha elide de bafika eYerusalem.

Ukufika kwabo bathi: “Uphi lo kumkani wamaYuda uzelweyo? Kuba besibone inkwenkwezi yakhe xa besiseMpuma, ngoku sizokumnika imbeko.”—Mateyu 2:1, 2.

UKumkani waseYerusalem uHerode uyayiva le nto aze acaphuke kakhulu. Ubiza ababingeleli abaziintloko neenkokheli zenkolo yamaYuda aze ababuze ukuba uza kuzalelwa phi uKristu. Bamxelela into ekwiZibhalo bathi: “EBhetelehem.” (Mateyu 2:5; Mika 5:2) Emva koko uHerode ubiza abavumisi ngeenkwenkwezi bengabonwa ngabantu, aze athi kubo: “Hambani niyokumkhangelisisa lo mntwana, nizokundixelela xa nimfumene ukuze nam ndiyokumnika imbeko.” (Mateyu 2:8) Kodwa eyona nto ifunwa nguHerode kukufumana lo mntwana aze ambulale!

Emva kokuba bemkile abavumisi ngeenkwenkwezi kwenzeka into emangalisayo. “Inkwekwezi” ebebeyibone xa bebeseMpuma, ngoku ihamba phambi kwabo. Kuyacaca ukuba le ayonkwenkwezi eqhelekileyo, kodwa yenzelwe ukubakhokela. Bayayilandela le nkwenkwezi de iyokuma phezu kwendlu ehlala uYosefu, uMariya nonyana wabo.

Xa bengena endlini, babona uMariya nomntwana omncinci onguYesu. Ngoko nangoko baqubuda kuye. Bamnika izipho zegolide, intlaka yokuqhumisa nemore. Emva koko, xa beza kubuyela kuHerode, balumkiswa nguThixo ephupheni ukuba bangayenzi loo nto. Bahamba ngenye indlela babuyele kwilizwe labo.

Ucinga ukuba ngubani owenze ukuba inkwenkwezi ikhokele aba bavumisi? Ukhumbule ukuba le nkwenkwezi ayizange ibase nqo eBhetelehem kodwa yabasa eYerusalem, apho badibana noKumkani uHerode owayefuna ukubulala uYesu. Ukuba uThixo wayengazange angenelele aze abalumkise abavumisi ngeenkwenkwezi, uHerode ngewayembulele uYesu. Kuyacaca ukuba lutshaba lukaThixo uSathana olwalufuna ukubulala uYesu ibe wasebenzisa le ndlela ukuze azame ukwenza loo nto.