Ngubani Owathuma “Inkwenkwezi”?

▪ Ngaba wakha wayibona imizobo okanye imifanekiso ebonisa ookumkani abathathu okanye amadoda azizilumko, ezazityelele usana olunguYesu njengoko wayesemkhumbini? Ngokutsho kwelinye ibali, uThixo wasebenzisa inkwenkwezi ukuze iwakhokelele esitalini eBhetelehem. Abantwana abaninzi baye bawankqaya amagama aba kumkani bathathu—uMelchior, uCaspar noBaltazar. Noko ke, ngaba loo ngxelo ithandwayo iyavisisana noko kutshiwo yiBhayibhile? Akunjalo. Eli bali linezinto ezininzi ezingachananga.

Okokuqala, ayengoobani loo madoda? KwisiGrike santlandlolo, iBhayibhile ayitsho ukuba angookumkani okanye izilumko. Ayengabavumisi ngeenkwenkwezi. Kuyabonakala ukuba ayengabahedeni abavumisa ngeenkwenkwezi. IBhayibhile ayiwachazi amagama awo okanye inani lawo.

Okwesibini, atyelela nini loo madoda? Kungekhona xa uYesu wayelusana olusemkhumbini. Siyazi njani loo nto? Umbhali weVangeli uMateyu uthi: “Xa bangena endlwini bambona umntwana oselula ekunye noMariya unina.” (Mateyu 2:11) Phawula ukuba uYesu wayengaselulo usana, kunoko “wayengumntwana.” UMariya noYosefu babengasachithi ubusuku esitalini; kunoko, ngelo xesha babesele behlala endlwini.

Okwesithathu, ngubani owathumela loo “nkwenkwezi” ukuba ikhokele ezo zazi ngeenkwenkwezi? Iinkokeli zonqulo zithanda ukufundisa ukuba nguThixo owathuma loo “nkwenkwezi.” Ngaba wayenza nyani loo nto? Khumbula ukuba, “inkwenkwezi” ayizange izikhokelele eBhetelehem ezo zazi. Kunoko, yazikhokelela kuKumkani uHerode eYerusalem. Zamveza uYesu kweso sigebenga sinomona ngalo ndlela bemnika izizathu ezinamandla zokumthiya uYesu umntwana owayeza kuba “ngukumkani wamaYuda.” (Mateyu 2:2) Ngobuqili, uHerode wabaxelela ukuba ze babuye baze kumchazela ngeyona ndawo akuyo umntwana, kuba naye wayefuna ukuqubuda kuye. Emva koko, le “nkwenkwezi” yazikhokelela kuYosefu noMariya. Izazi ngeenkwenkwezi zazinokubangela ukuba uYesu enzakaliswe ukuba uThixo wayengazange angenelele. Okuvuyisayo kukuba wangenelela. Waba ligqabi ngumsindo uHerode zisakungezi kuye izazi kangangokuba wayalela ukuba abantwana abangamakhwenkwe abaneminyaka emibini nangaphantsi eBhetelehem nakwimimandla eyingqongileyo babulawe.—Mateyu 2:16.

Kamva uYehova wabhekisela kuYesu ngokuba “nguNyana wam, oyintanda, endikholisiweyo nguye.” (Mateyu 3:17) Khawuve oku: Ngaba uBawo onothando nobulungisa wayenokukhetha izazi ngeenkwenkwezi ezingabahedeni—abaqhelisela umlingo owalelweyo eMthethweni wakhe—njengabathunywa bakhe? (Duteronomi 18:10) Ngaba wayenokusebenzisa inkwenkwezi ukuze ibakhokelele kwesona sigebenga siyingozi nesinamandla kwelo lizwe, nesigidimi esasiza kumenza uHerode ajwaqeke ngumona? Ngaba uThixo wayenokusebenzisa kwa inkwenkwezi nezazi ngeenkwenkwezi ukuze achaze indawo akuyo unyana wakhe owayengenakuzinceda?

Masenze umzekelo: umphathi mkhosi uthumela ijoni alithembileyo kumhlaba wotshaba. Ngaba ebenokuchazela utshaba indawo eliza kulifumana kuyo elo joni? Kakade ebengenakuyenza loo nto! Ngendlela efanayo, uYehova wathumela uNyana wakhe kweli hlabathi liyingozi. Ngaba wayenokuchazela uKumkani uHerode ongendawo indawo akuyo uNyana Wakhe ongenakukwazi ukuzikhusela? Nakanye!

Ngubani owathumela “inkwenkwezi” okanye into efana nenkwenkwezi? Ngubani oyena mntu wayefuna abulawe uYesu, engafuni ukuba akhule ukuze enze umsebenzi awuzele emhlabeni? Ngubani olahlekisa abantu esebenzisa amaqhinga nogonyamelo? UYesu ngenkqu walichaza “ixoki noyise wabo ubuxoki,” lowo “wayesisibulala-mntu kwasekuqaleni.”—uSathana uMtyholi.—Yohane 8:44.