ISAHLUKO 16
UYesu Ubonisa Ukuba Uyayithanda Indlu KaThixo
UYESU UGXOTHA ABATSHINTSHI BEMALI NABANTU ABATHENGISAYO
Emva komtshato waseKana uYesu uya eKapernahum. Uhamba nomama wakhe nabantakwabo, uYakobi, uYosefu, uSimon noYudas.
Kutheni uYesu esiya eKapernahum? Esi sixeko sikhulu kuneNazarete okanye iKana ibe yindawo abantu abadibanela kuyo. Enye into, abafundi bakaYesu abaninzi abatsha bahlala apha okanye kufuphi nalapha. Ngenxa yaloo nto uYesu unokubaqeqeshela kwindawo yabo.
Nalapha eKapernahum, uYesu wenza imisebenzi emikhulu. Ngenxa yaloo nto abantu abaninzi balapha nabeendawo ezikufutshane bayeva ngezinto azenzayo. Kodwa kuba yena nabafundi bakhe bengamaYuda kufuneka baye kwiPasika yonyaka ka-30 C.E. eYerusalem.
Njengoko beseYerusalem, abafundi bakaYesu babona into emangalisayo ngaye, eyahlukileyo kwinto ebebekade beyibona.
UMthetho KaThixo wawusithi amaSirayeli kufuneka anikele ngezilwanyana etempileni, ibe abantu abatyeleleyo kwakufuneka babenako nokutya abaza kukutya ngeli xesha batyelele ngalo. Ngoko uMthetho wawubavumela abantu abatyelele eYerusalem besuka kwiindawo ezikude ukuba baziphathele imali ukuze bathenge ‘iinkomo, iigusha, iibhokhwe,’ nezinye izinto abaza kuzidinga. (Duteronomi 14:24-26) Ngenxa yaloo nto, abantu abathengisa eYerusalem bathengisa izilwanyana kunye neentaka phakathi eyadini yetempile. Abanye bade baqhathe abantu ngokubabiza imali eninzi.
Ecaphuka uYesu uchitha imali yabatshintshi bemali, awise neetafile zabo aze abagxothe. Uthi kubo: “Susani ezi zinto apha! Sanukwenza indlu kaTata indawo yokuthengisa!”—Yohane 2:16.
Xa abafundi bakaYesu beyibona le nto bakhumbula isiprofeto esithetha ngoNyana KaThixo esithi: “Ndiyavutha ngaphakathi kukuthanda indlu yakho.” Kodwa amaYuda athi: “Yenza ummangaliso ke, ukuze sibone ukuba unalo ilungelo lokwenza le nto uyenzayo?” UYesu uphendula athi: “Dilizani le tempile, ibe mna ndiza kuyivusa ngeentsuku ezintathu.”—Yohane 2:17-19; INdumiso 69:9.
AmaYuda acinga ukuba uYesu uthetha ngetempile eseYerusalem, ngenxa yaloo nto athi: “Ungayivusa njani ngeentsuku ezintathu le tempile, kuthathe iminyaka eyi-46 ukuyakha?” (Yohane 2:20) Kodwa itempile athetha ngayo uYesu ngumzimba wakhe. Kwiminyaka emithathu elandelayo abafundi bakhe bayawakhumbula la mazwi xa evuswa.