Umntu Unokukwazi Ukwenza Imisebenzi Emihle NgeSabatha?

Ininzi into eyenziwe nguYesu xa ebeshumayela eGalili. Kodwa ke ucinga ngezinye iindawo xa esithi, “Ndimele ndishumayele iindaba ezilungileyo ezingoBukumkani bukaThixo nakwezinye izixeko.” Ngenxa yaloo nto, uyemka ayokushumayela “kwizindlu ekukhonzelwa kuzo kwaYuda.” (Luka 4:43, 44) Lixesha elihle lokuhamba eli kuba sele iyintwasahlobo ibe sele lisondele itheko laseYerusalem.

Iincwadi zeVangeli zithetha kakhulu ngokushumayela kukaYesu eGalili kunokushumayela kwakhe kwaYuda. UYesu akayeki ukushumayela nokwenza izinto ezintle kwiindawo aya kuzo ngenxa yokuba abantu bakwaYuda bengenamdla.

Kungekudala uya kwiPasika ka-31 C.E. eseYerusalem, ikomkhulu lakwaYuda. Kule ndawo iphithizelayo, ngakwiGeyithi Yeegusha, kukho idama elikhulu elibizwa ngokuba yiBhethezatha. Kuza abantu abaninzi abagulayo, abangaboniyo nabaqhwalelayo kweli dama. Ngoba? Kuba kukholelwa ukuba abantu banokuphiliswa ngokungena nje kweli dama xa amanzi eshukuma.

Ngoku kungeSabatha, ibe uYesu ubona indoda ngakweli dama eneminyaka eyi-38 igula. UYesu uyayibuza: “Uyafuna na ukuphila?” Le ndoda iyamphendula ithi: “Mhlekazi, andinamntu wokundifaka edamini xa amanzi eshukuma. Ndithi ndisaya, kusuke kungene omnye umntu phambi kwam.”​—Yohane 5:6, 7.

UYesu uthetha into emele ukuba yothusa le ndoda naye nabani na omameleyo, uthi: “Phakama, thatha umandlalo wakho uhambe.” (Yohane 5:8) Le ndoda yenza kanye loo nto. Ngoko nangoko iyaphila, ithathe umandlalo wayo ize iqalise ukuhamba!

Endaweni yokuba amaYuda avuye emva kokuba kwenzeke into entle kangaka, athi xa ebona le ndoda: “YiSabatha namhlanje, ibe akukho semthethweni ukuba uthwale umandlalo.” Le ndoda iwaphendula ithi: “Laa mntu undiphilisileyo uthe kum, ‘Thatha umandlalo wakho uhambe.’” (Yohane 5:10, 11) La maYuda ayamgxeka umntu ophilisa ngeSabatha.

Ayayibuza athi: “Ngubani loo mntu uthe kuwe, ‘Wuthathe uhambe’?” Kutheni eyibuza le nto? Kaloku uYesu sele “engene phakathi kwabantu abaninzi ababelapho,” ibe le ndoda iphilisiweyo ayilazi igama lakhe. (Yohane 5:12, 13) Kodwa iza kuphinda idibane noYesu. Kamva etempileni, le ndoda idibana noYesu ize ilazi igama lo mntu oyiphilise ngasedamini.

Ixelela la maYuda ebeyibuzile ukuba iphiliswe ngubani. Iyawaxelela ukuba ibinguYesu. Xa esiva le nto la maYuda aya kuye. Ngaba ayokufuna ukwazi ukuba uzenza njani ezi zinto zintle kangaka? Hayi. Afuna ukumgxeka ngokwenza izinto ezintle ngeSabatha. Ade aqalise nokumtshutshisa!