“Hamba Uye Kuhlamba Echibini LaseSilowam”
EMVA kokuphilisa indoda eyimfama ngodongwe olumanzi, uYesu wathi kuyo: “Hamba uye kuhlamba echibini laseSilowam.” Yakwenza oko le ndoda yaye ‘yabuya ibona.’ (Yohane 9:6, 7) Lalindawoni iChibi laseSilowam? Kukho inkcazelo yakutshanje efumaneke xa bekusimbiwa izinto zakudala, enokunceda sazi indawo elalikuyo eli chibi.
Abakhenkethi abaninzi baye batyelela komnye ummandla waseYerusalem obizwa ngokuba liChibi laseSilowam, beqinisekile ukuba lichibi ekuthethwa ngalo kuYohane 9:7. Le ndawo ingasekupheleni kwetonela likaHezekiya—itonela lamanzi eliziimitha ezingama-530 ubude, elakhiwa ngenkulungwane yesibhozo ngaphambi kweXesha Eliqhelekileyo. Noko ke, eli chibi labakho emva phayaa ngenkulungwane yesine yeXesha Eliqhelekileyo. Lakhiwa ngamaByzantine awayezibiza ngokuba ngamaKristu, awenza impazamo yokucinga ukuba ichibi ekuthethwa ngalo kwincwadi yeVangeli kaYohane limele ukuba lalingasekupheleni kweli tonela.
Noko ke, ngowama-2004, abembi bezinto zakudala bafumana ichibi abagqiba kwelokuba liChibi laseSilowam elalikho ngexesha uYesu wayesemhlabeni. Likummandla okumgama omalunga neemitha ezili-100 ukusuka kwichibi ekwakha kwenziwa impazamo yokucinga ukuba lelona Chibi laseSilowam. Balifumana njani? Abaphathi besixeko babefuna kulungiswe umbhobho wamanzi amdaka, ngoko bathumela abasebenzi noomatshini abakhulu bokumba. Umembi wezinto zakudala owayesebenza kufuphi naloo ndawo wabukela njengoko aba basebenzi babesimba waza wabona kuvela izinyuko ezibini. Abasebenzi banqumama kumsebenzi wabo yaye i-Israeli Antiquities Authority yagunyazisa ukuba abembi bezinto zakudala bembe kuloo ndawo. Sele kumbiwe icala lonke lechibi, elimalunga neemitha ezingama-70 ubude, neekona ezimbini zelinye icala.
Xa kusimbiwa, kuye kwafunyanwa ezinye zeengqekembe ezazisetyenziswa ngonyaka wesibini, owesithathu nowesine wemvukelo yamaYuda nxamnye neRoma. Le mvukelo yabakho phakathi kowama-66 nowama-70 C.E. Ezi ngqekembe zenza kucace ukuba eli chibi lasetyenziswa de kwangowama-70 C.E. ekutshatyalalisweni kweYerusalem ngamaRoma. Iphephancwadi elibizwa ngokuba yiBiblical Archaeology Review lithi: “Eli chibi lasetyenziswa de kwaphela ixesha lemvukelo yaye emva koko layeka ukusetyenziswa. Kulo mmandla ungowona usezantsi kulo lonke elo laseYerusalem, akuzange kuhlale mntu de kwangexesha lamaByzantine. Nyaka ngamnye iimvula zobusika zazibangela imfumba yodaka kweli chibi. Yaye emva kokuba esi sixeko sitshatyalaliswe ngamaRoma, eli chibi alizange liphinde licocwe. Ukutyhubela iinkulungwane, imfumba yodaka yaligqumelela ichibi kangangokude kungabonakali nokuba kwakha kwakho ichibi. Kwezinye iindawo, kuye kwafuneka abembi bezinto zakudala bembe imfumba yodaka emalunga neemitha ezintathu.”
Kutheni abafundi beBhayibhile abanyanisekileyo benomdla kwindawo elalikuyo iChibi laseSilowam? Kungenxa yokuba oko kubanceda bayiqonde kakuhle indlela eyayimi ngayo iYerusalem ngenkulungwane yokuqala, ekhankanywa rhoqo kwiingxelo zeVangeli ezithetha ngoYesu nobulungiseleli bakhe.
[Umfanekiso okwiphepha 7]
IChibi laseSilowam elisandul’ ukufunyanwa
[Inkcazelo]
© 2003 BiblePlaces.com