Uphiliswa Kukubamba Isambatho SikaYesu

Iindaba zokuba uYesu ubuyile zikhawuleza zithi saa kumaYuda ahlala eDekapoli kufutshane nomntla ntshona wonxweme loLwandle LwaseGalili. Kusenokwenzeka ukuba abantu bavile ngendlela uYesu azolise ngayo isaqhwithi namanzi olwandle. Mhlawumbi abanye bavile nangendlela ayiphilise ngayo indoda ebineedemon. Ngenxa yaloo nto, “abantu abaninzi” beza ngaselwandle, mhlawumbi eKapernahum, bazokwamkela uYesu. (Marko 5:21) Ufika elunxwemeni abantu bemlinde ngomdla omkhulu.

Omnye umntu ongxamele ukubona uYesu nguYayiro, igosa lendlu akhonzela kuyo amaYuda, ibe kusenokwenzeka ukuba uligosa lale iseKapernahum. UYayiro uwa ezinyaweni zikaYesu amcenge athi: “Intombi yam encinci igula kakhulu. Ndicela uzokuyibeka izandla ukuze iphile.” (Marko 5:23) UYayiro uyamcenga uYesu ukuba azokuphilisa intombi yakhe, nekuphela kwayo, ayithanda kakhulu neneminyaka eyi-12. Uza kuthini uYesu?—Luka 8:42.

Endleleni eya kwindlu kaYayiro kwenzeka enye into. Abantu abaninzi abahamba noYesu bavuya nyhani ibe bayazibuza ukuba baza kumbona na esenza omnye ummangaliso. Kodwa omnye umfazi ohamba naba bantu, ucinga ngempilo yakhe.

Lo mfazi womYuda uneminyaka eyi-12 ngoku enengxaki yokopha. Uhambe koogqirha abaninzi waza wayisebenzisa yonke imali yakhe kwizinto abathi zinokumnceda. Kodwa akakaphili. Endaweni yoko uya “egula kakhulu.”—Marko 5:26.

Unokuyicinga indlela esimhlaza ngayo esi sigulo sakhe phezu kokuba simenza angabi namandla. Umntu onesi sigulo akafane ahambe ethetha ngaso. Enye into, uMthetho KaMoses uthi xa umfazi ephuma igazi akacocekanga. Nabani na ombambayo okanye obamba iimpahla zakhe ezinegazi kufuneka ahlambe ibe akacocekanga de kuhlwe.—Levitikus 15:25-27.

Lo mfazi ‘uvile ngoYesu,’ ibe ngoku uyamfuna. Kuba engacocekanga uzama kangangoko ukuba abantu bangamboni. Uzixelela ukuba: “Ukuba nje ndinokubamba isambatho sakhe sangaphezulu, ndiza kuphila.” Uthi xa ebamba imisonto yesambatho sikaYesu, ngoko nangoko ayeke ukopha! “Uphilisiwe kwisifo esibuhlungu.”—Marko 5:27-29.

Emva koko uYesu uthi: “Ngubani ondibambileyo?” Ucinga ukuba uziva njani lo mfazi xa uYesu esitsho? UPetros uthi kuYesu: “Mfundisi, ungqongwe ngabantu ibe bakuxinile.” Kutheni ke uYesu ebuza ukuba, “Ngubani ondibambileyo?” Uthi: “Ukho umntu ondibambileyo, kuba ndiwavile amandla ephuma kum.” (Luka 8:45, 46) Kuyacaca ukuba lo mfazi uphiliswe ngamandla aphuma kuYesu.

Uthi lo mfazi akubona ukuba ubhaqiwe aqubude phambi koYesu esoyika ibe engcangcazela. Uxelela wonke umntu ngesigulo sakhe nokuba ngoku uphilisiwe. Ngobubele uYesu uthi: “Ntombi yam, ukholo lwakho lukuphilisile. Hamba ngoxolo, uphile kwisifo sakho esibuhlungu.”—Marko 5:34.

Kuyacaca ukuba umntu uThixo amkhethe ukuba alawule umhlaba unobubele, ubakhathalele abantu ibe unamandla okubanceda!