Yintoni UBukumkani BukaThixo?

ITHINI IBHAYIBHILE?

“UThixo wezulu uza kumisa ubukumkani obungasoze butshatyalaliswe.”​—Daniyeli 2:44, iNguqulelo Yehlabathi Elitsha.

“Sinikwe unyana; yaye ukuba ngurhulumente kubekwe emagxeni akhe.”​—Isaya 9:6; umbhalo osemazantsi.

INGAKUNCEDA NJANI LE NTO?

• Urhulumente onokukunceda.​—Isaya 48:17, 18.

• Kwihlabathi elitsha elizayo, asizukugula ibe siza konwaba.​—ISityhilelo 21:3, 4.

NGABA SINOKUYIKHOLELWA INTO ETHETHWA YIBHAYIBHILE?

Ewe, nazi ezinye izizathu zokuyikholelwa:

• UYesu wabonisa izinto eziza kwenziwa buBukumkani BukaThixo. Wafundisa abalandeli bakhe ukuba bathandazele uBukumkani BukaThixo nokuba kwenziwe ukuthanda kukaThixo emhlabeni. (Mateyu 6:9, 10) Wabonisa indlela oza kuphendulwa ngayo loo mthandazo.

  Xa wayelapha emhlabeni, uYesu wondla abantu, waphilisa abagulayo waza wavusa abaswelekileyo. (Mateyu 15:29-38; Yohane 11:38-44) NjengoMlawuli woBukumkani BukaThixo, wabonisa izinto uBukumkani obuza kuzenzela abantu.​—ISityhilelo 11:15.

• Izinto ezenzeka ehlabathini ziqinisekisa ukuba uBukumkani BukaThixo sele buza kufika. UYesu watsho kwakudala ukuba xa uBukumkani sele buza kufika, buzise uxolo emhlabeni, kuza kuqala kubekho iimfazwe, indlala neenyikima.​—Mateyu 24:3, 7.

  Ezo zinto ziyenzeka namhlanje. Ngenxa yaloo nto, sinokuqiniseka ukuba uBukumkani BukaThixo sele buza kuziphelisa zonke iingxaki ezikhoyo.