UYesu Ufela EGolgotha

Ababingeleli abaziintloko bamthatha uYesu bamsa kwindlu yomlawuli uPilato. Wababuza wathi: ‘Yenzeni le ndoda?’ Bathi: ‘Ithi ingukumkani!’ UPilato wathi kuYesu: “Unguye na ukumkani wamaYuda?” UYesu waphendula wathi: “Ubukumkani bam ayibubo obeli hlabathi.”

Emva koko uPilato wasa uYesu kumlawuli waseGalili uHerode, ukuze abone ukuba uza kumfumana enetyala na. UHerode akazange amfumane enetyala ibe wamphindisa kuPilato. UPilato wathi ebantwini: ‘Mna noHerode siyifumanise ingenatyala le ndoda. Ndiza kuyikhulula.’ Abantu bakhwaza besithi: ‘Mbulale! Mbulale!’ Amajoni amkatsa ngesabhokhwe uYesu, amtshicela, embetha nokumbetha. Amthwalisa isithsaba sameva aza ehlekisa ngaye athi: ‘Molo kumkani wamaYuda.’ Kwakhona uPilato wathi: ‘Ayinatyala le ndoda.’ Kodwa bona bathi: “Mbethelele!” UPilato wavuma ukuba abulawe.

Bamsa kwindawo ebizwa ngokuba yiGolgotha, apho bafika bambethelela emthini baza bawumisa nkqo. UYesu wathandaza wathi: “Tata baxolele, kuba abayazi le nto bayenzayo.” Abantu badlala ngaye, besithi: ‘Ukuba unguNyana kaThixo, yehla kuloo mthi uzisindise!’

Omnye wabantu ababesenza izinto ezimbi owayesecaleni kwakhe wathi: “Uze undikhumbule xa uthe wangena ebukumkanini bakho.” UYesu wathi: “Uya kuba nam eParadesi.” Emva kwemini, kwaba mnyama iiyure ezintathu kulo lonke elo lizwe. Abanye abalandeli bakhe bema ngakwisibonda awayebethelelwe kuso, noMariya umama wakhe wayelapho. UYesu wacela uYohane ukuba amphathe njengomama wakhe uMariya, amhoye.

Ekugqibeleni, uYesu wathi: “Kugqityiwe!” Waza wayiyekelela intloko yakhe waphefumla okokugqibela. Kanye ngaloo mzuzu, kwafika inyikima enkulu. Etempileni, ikhethini eyahlula iNgcwele kweYona Ngcwele yakrazuka. Igosa lomkhosi lathi: ‘Ngokwenene nguNyana kaThixo lo.’