AmaNgqina KaYehova Kuthumo Lobuvangeli
ABAVANGELI basemazweni abangamaNgqina kaYehova e-Asia nakwezinye iindawo badla ngokubuzwa kuthiwe: “Kutheni le nto ningenazo nje izifundo zesiNgesi njengabanye abavangeli?” “Ngaba ninazo izikolo apho ndinokusa khona abantwana bam okanye izibhedlele ezilungiselelwe abagulayo?” Kambe ke, impendulo iba nguhayi. Kodwa kutheni engenazo nje? Enyanisweni, luyintoni usukelo lwamaNgqina? Yaye abenzele ntoni abantu kula mazwe?
Ukwahlukana Kweembono
Ayinakukhanyelwa into yokuba abavangeli beNgqobhoko baye baguqula abantu abaninzi ngoncedo lokuphucula intlalo abalulungiselelayo. Kodwa ngenxa yokuba uncedo olunjalo ngokuyintloko lwalathiselwe ekwaneliseni iimfuno zabantu zokuphathekayo kunokuba lwanelise iimfuno zabo zokomoya, aba bavangeli abaphumelelanga ekwenzeni abafundi bokwenene bakaYesu Kristu. (Mateyu 7:22, 23; 28:19, 20) Okubaluleke ngakumbi kukuba, abakwazanga ukwalatha ngokucacileyo kuso nasiphi na isicombululo esisisigxina kwiimeko ezimbi zentlalo abazama ukuzoyisa.
Kwelinye icala, amaNgqina kaYehova azixhalabise ngowona myalelo ubalulekileyo wokushumayela iindaba ezilungileyo zoBukumkani bukaThixo. (Mateyu 24:14) Oku awakwenzi ngenxa yokuba engayikhathalelanga okanye engazixhalabisanga ngayo yonke intlupheko nokungekho sikweni akubona kuluntu. Kunoko, kungenxa yokuba esazi ukuba isicombululo esikuphela kwaso sezi ngxaki zinzulu asikho ebantwini, kodwa sikuBukumkani bukaThixo.—INdumiso 146:3-10.
Oko koko kanye uYesu nabafundi bakhe babekushumayela kwinkulungwane yokuqala. UYesu wathi, “Ndimelwe kukuba ndizishumayele iindaba ezilungileyo zobukumkani bukaThixo . . . ngokuba ndithunywe oko.” (Luka 4:43) UYesu walatha kuBukumkani bukaThixo waza washumayela ngabo njengobukuphela kwesicombululo esipheleleyo, kuba wayesazi ukuba iingxaki zehlabathi zazinkulu kakhulu ukuba umntu ahlangabezane nazo eyedwa. Nangona uYesu wenza imimangaliso emininzi yokuphilisa, wababongoza abafundi bakhe ukuba ‘bafune tanci ubukumkani nobulungisa bukaThixo, zaye zonke ezinye izinto zaziya kongezelelwa kubo.’—Mateyu 6:33.
Kamva, xa uYesu wathuma abafundi bakhe, kuqala wabaxelela oku: “Ekuhambeni kwenu ke vakalisani, nisithi, Ubukumkani bamazulu busondele.” Wandula ke wongezelela oku: “Philisani imilwelwe, hlambululani abaneqhenqa, vusani abafileyo, khuphani iidemon.” (Mateyu 10:7, 8) Oko kubonakalisa eyona nto ibalulekileyo kubafundi banamhlanje bakaYesu Kristu. Kwakhona, nabo bamele bajonge ukushumayela iindaba ezilungileyo zoBukumkani njengowona msebenzi wabo uyintloko, ngaphezu kokunceda abantu ngokwentlalo. Oko koko kanye abavangeli basemazweni abangamaNgqina kaYehova bazabalazela ukukwenza.
Ukuzalisa Iimfuno Zokomoya Zabantu
Njengeqela lamaKristu, amaNgqina kaYehova azibandakanya kucwangciso lomsebenzi omkhulu wokuzithandela wokulungiselela imfundo yeBhayibhile ukwenzela abantu. Ekubeni engabavakalisi beendaba ezilungileyo, anomdla ekuncedeni abanye ukuba bangenelwe kubulumko nakwisiluleko seBhayibhile, ngoku nakwixesha elizayo. (INdumiso 68:11) Kutheni kunjalo nje oku?
AmaNgqina ayaqonda ukuba xa abantu bencedwa ukuba baqonde baze balandele isiluleko seBhayibhile, baba ngabaxhotyiswa kakuhle ukuba bahlangabezane neengxaki kunye neengcinezelo zobomi. Kwelinye icala, bafumana amandla okuziphatha kakuhle afunekayo ukuze boyise imikhwa ekhobokisayo neyenzakalisayo emzimbeni enjengokutshaya, ukusela ngokugqithiseleyo, ukusetyenziswa kakubi kweziyobisi, impilo engekho mgangathweni, ukungcakaza nokuba vakalala ngokwesini. Kwelinye icala, inyaniso yeBhayibhile ibancedile ukuba baguqule iingqondo zabo, ibazisela injongo ebomini nethemba lokwenene lekamva.
Ngaloo ndlela, ngokulungiselela uhlobo oluphakamileyo lwemfundo—leyo iphuma kwiLizwi likaThixo, iBhayibhile—amaNgqina kaYehova anegalelo elingqalileyo ekuphakamiseni impilo engokokuziphatha nengokomzimba yabantu bendawo ahlala kuyo nashumayela kuyo. Oku kusoloko kuphawulwa ngabanye abaye bawajonga ngengcamango yokuchasa. Ngokomzekelo, uGqr. Bryan Wilson okwiYunivesithi yaseOxford noye waqwalasela imisebenzi yamaNgqina kaYehova eAfrika, wathetha oku kwileta ekwiLondon Times:
“AmaNgqina kaYehova angabasebenzi abazimiseleyo nabasoloko besenza izinto ngesazela yaye ekhuthele kunabantu ahlala nawo. Ayalelwa ziinkokeli zawo ukuba ahlawule iirhafu zawo ngokukhawuleza, ukuba angabandakanyeki kugonyamelo, aze akuphephe ukukhubekisa abanye. Alungelelene, anyanisekile yaye aziingcathu. Le migaqo yayiyebaluleke kakhulu kwinkqubela yoqoqosho nentlalo yebutho laseNtshona, yaye ibingayi kuba kukubaxa ukuthi amaNgqina kaYehova aphakathi kwabantu abaninzi abalungileyo nabakhutheleyo kubemi bamazwe aseAfrika.”
Ethetha ngendlela efanayo, omnye umakhi-mkhanya kuMzantsi Merika wanikela le ngxelo kwiphephandaba lomhleli:
“AmaNgqina kaYehova angabantu abakhutheleyo, abanyanisekileyo naboyika uThixo. Angabantu ababambelela kwimigaqo yangaphambili yaye athanda isithethe ibe unqulo lwawo lusekelwe kwiimfundiso zeBhayibhile.”
Ngoko ngoxa amaNgqina kaYehova engabalaselisi oko ngokuqhelekileyo kubhekiselwa kuko njengevangeli yokuphucula intlalo, ngokukhutheleyo afak’ isandla kwizilangazelelo zoluntu ngokunceda abanye ukuba bavisisanise ubomi babo nemilinganiselo ephakamileyo yeBhayibhile. (Roma 12:1, 2) Okubaluleke kakhulu kukuba, akwanceda abantu kuyo yonke indawo ukuba bakhangele ngaphaya kokungekho sikweni nokukhetha kwale nkqubo yezinto idodobala ngamandla ukusa kwinkqubo entsha eyenziwe nguThixo, ekumbovu ukuba ifike.—ISityhilelo 21:5.
[Imifanekiso ekwiphepha 8, 9]
Izicombululo Kwimeko Embi Engokwentlalo NgoBukumkani BukaThixo
Khawufunde eBhayibhileni yakho ezi zibhato zilandelayo uze uthuthuzeleke ngokubona indlela uThixo athembisa ngayo ukuphelisa iingxaki zanamhianje nemeko embi yentiaio kwizinto ezilandelayo:
Impilo Isaya 33:24; 35:5, 6; ISityhilelo 21:4
Imfundo Isaya 11:9; Habhakuki 2:14
Ingqesho Isaya 65:21-23
Ukudla INdumiso 67:6; 72:16; Isaya 25:6
Okusesikweni Isaya 11:3-5; 32:1, 2