Bonakalisa Ukukulangazelela Ukuvakalisa Iindaba Ezilungileyo
“Ngokunjalo okukokwam ndingxamele [ndilangazelela, NW] ukuzishumayela iindaba ezilungileyo nakuni.”—ROMA 1:15.
1, 2. Ngokufuthi abantu basabela njani engozini?
“BABEPHUMA kuzo zonke iindawo . . . amakhulukhulu amatsha-ntliziyo ethontelana kwiinqila ezimbini kuloo mmandla, befika neelori ezithwele ukutya nezinto zokwambatha, bemisa neendawo zokuzikhusela zokwexeshana, bambi besebenza iiyure ezili-18 ukuya kwezingama-20 ngemini, abanye bengalali nokulala kwiintsuku zokuqala emva kokuba udonga oluthintel’ amanzi luqhekeke ngokoyikekayo.”
2 Leyo yindlela abantu abasabela ngayo xa izantyalantyala zamanzi zabetha kummandla okumbindi waseCalifornia kwintwasahlobo ephelileyo, nto leyo eyabangela ukuba abantu abanokuba ngama-24 000 basabe ukuze basinde. Ewe, xa iintlekele—izikhukula ezibakho ekuhlaleni neenyikima zomhlaba kwaneengozi zenyukliya—zithwaxa, abantu badla ngokusabela ngokuzithandela baze bafak’ isandla benceda. Ngokungathi kunjalo, babhinqela phezulu, benyamezela iingozi ezininzi neengxaki, baze ngokuvumayo bancede abanye—kwanabantu abangabazi ngokupheleleyo.
Ixesha Longxamiseko
3. Yiyiphi ingozi eqatha uluntu olujongene nayo namhlanje?
3 Namhlanje, uluntu lujongene neyona ntlekele inkulu embalini. Le ntlekele ayibangelwa ngumonakalo umntu awenzayo kwimekobume, sisisongelo semfazwe yenyukliya, okanye kukwanda kolwaphulo-mthetho nogonyamelo, nangona ezi zinto zimbi nje. Kunoko, uluntu lujongene noko uYesu Kristu wakubiza ngokuba ‘yimbandezelo enkulu, ekungazange kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo.’ Ukubonisa indlela eya konakalisa ngayo “imbandezelo enkulu,” uYesu wahlabela mgama esithi: “Ukuba ibingayi kuthi loo mihla inqanyulelwe, bekungayi kubakho nyama isindayo.”—Mateyu 24:21, 22.
4. Njengoko sijongene nengozi enjalo, sifanele sisabele njani?
4 Ubuya kusabela njani ukuba ubusazi ukuba abantu abaninzi, kuquka abo basondeleyo kuwe, bebeya kutshabalala kungekudala kuloo mbandezelo? Ngaba ubuya kukulangazelela ukubanceda? Khumbula umbono ongokwesiprofeto kaHezekile ongendoda enezinto zokubhala. Yayixelelwe ukuba kuphela ngabo babefumene uphawu lokomfuziselo emabunzini abo ababeya kusinda kwintshabalaliso yeYerusalem, yaye yiyo ekwakufuneka ilungiselele olo phawu lusindisa ubomi. Yasabela njani? “Ndenze njengoko ubundiwisele umthetho ngako,” yanikela loo ngxelo.—Hezekile 9:1-11.
5. Nguwuphi umsebenzi esiyalelwe ukuba siwenze, yaye ungxamiseke kangakanani?
5 Ngaba ubonakalisa ukuvuma nokulangazelela okufana nokwaloo ndoda yambethe ilinen, usenza njengokuba uYehova eyalele? Yintoni le akuyalele yona uYehova? NgoNyana wakhe, uYesu Kristu, uye wakhupha lo myalelo: “Hambani ngoko niye kuzenza abafundi zonke iintlanga, . . . nibafundisa ukuba bazigcine zonke izinto endiniwisele umthetho ngazo.” (Mateyu 28:19, 20) Lo ngumsebenzi osindis’ ubomi njengokuba kwakunjalo ukubekwa kophawu olufuziselayo emabunzini ngomhla kaHezekile. Nabani na ongasabeliyo aze abe ngumfundi kaYesu Kristu uya kuva ubuhlungu bokutshatyalaliswa nguMtshabalalisi Omkhulu omiselwe nguThixo. (2 Tesalonika 1:6-8) Ngaba uyayiqonda indlela ekungxamiseke ngayo oku? Ngaba uyabonakalisa ukuba uyakuqonda ngokubonakalisa ukulangazelela ukuvakalisa iindaba ezilungileyo?
Ulangazelelo—Lubonakaliswa Njani?
6. Kuthetha ntoni ‘ukukulangazelela’?
6 Abantu bakaYehova, xa bebonke, bayakuqonda ukungxamiseka kwexesha. Sonke silangazelela ukubona abantu abaninzi kangangoko kunokwenzeka besinda ‘kwimbandezelo enkulu’ esondelayo. Ngokutsho kwesinye isichazi-magama, ukulangazelela “ngumnqweno obukhali okanye oshushu wokusukela okanye wokufikelela into ethile.” Umntu olangazelela into walathisela ingcinga nenyathelo lakhe ngasekuyifumaneni. Uya kwenza konke okusemandleni akhe ukuze oyise nawuphi na umqobo nesithintelo, yaye uya kuzingisa ekwenzeni oko de afikelele usukelo lwakhe. Leyo yindlela umpostile uPawulos awavakalelwa ngayo ngobulungiseleli bakhe, yaye senza kakuhle ukuba siyamxelisa.—1 Korinte 4:16.
7. Kutheni le nto uPawulos wayefuna ukuya eRoma nje?
7 Ngokomzekelo, qwalasela amazwi kaPawulos awawabhekisa kumaKristu aseRoma, kumaRoma 1:13-16. Wawaxelela oku, “Kufuthi ndizimisela entliziyweni yam ukuza kuni.” Ngoba? “Ukuze ndibe nasiqhamo sithile naphakathi kwenu,” wacacisa ngelitshoyo. Ngale nto, ngaba uPawulos wasuka nje wacinga ngokutyelela abazalwana eRoma nokuba mhlawumbi akhe abakhuthaze ukuba basivelise “isiqhamo somoya” ngokupheleleyo, njengokuba bambi abagqabazi besitsho? (Galati 5:22, 23) Hayi, kuba amazwi akhe ongezelelekileyo athi “kwanjengaphakathi kwezinye iintlanga” enza kucace ukuba wayelangazelela ukuzuza isiqhamo soBukumkani kubantu ababengengomaKristu apho eRoma. Wayefuna ukuvakalisa iindaba ezilungileyo eRoma yaye mhlawumbi nakwezinye iindawo ezikufuphi nalapho.—Roma 15:23, 24.
8. ‘Wathintelwa’ njani uPawulos ukuba aye eRoma?
8 “Ndathintelwa kwada kwanamhla,” watsho njalo uPawulos. Wayethintelwe yintoni? Ngaba imicimbi yobuqu yayimxakekise gqitha kangangokuba angabi nakuzabalaza? Kaloku, uPawulos wayeyindoda eyayixakekile kodwa engaxakekiswanga zizilangazelelo zobuqu. Ngexesha awayebhalela amaRoma nga-lo (malunga nowama-56 C.E.), wayesele elugqibile uhambo lwakhe lwesibini kumsebenzi obanzi wobuvangeli yaye wayexakeke kolwesithathu. Ngokufuthi, kwezi hambo wayesalathiswa ngumoya oyingcwele ukuba aye kwizabelo ezingqalileyo. (Bona IZenzo 16:6-9.) Kwananjengokuba wayebhala incwadi yakhe, wayesele ewenzelwe amalungiselelo okuba aye eYerusalem ukuya “kulungiselela abangcwele” abalapho. (Roma 15:25, 26) Ibe kwakhona wayedibene nezinye ‘izithintelo’ ezininzi zolu hlobo.—Bona eyesi-2 kwabaseKorinte 11:23-28.
9. UPawulos wakubonakalisa njani ukukulangazelela ukuvakalisa iindaba ezilungileyo?
9 Nakuba kwakunjalo, uPawulos akazange abe noluvo lokuba kwakwanele oko wayemele akwenze, engazange aqiqe nangelokuba wayenesabelo sakhe yaye sasisikhulu. Wayefuna ukwenza okungakumbi. Enyanisweni, wathi: “Ndingxamele [ndilangazelela, NW] ukuzishumayela iindaba ezilungileyo nakuni baseRoma.” Yiloo nto kanye ethethwa kukuba nolangazelelo! Ngokufanelekileyo, uNjingalwazi F. F. Bruce kwincwadi yakhe ethi The Epistle of Paul to the Romans wathetha oku ngalo mpostile: “Ukushumayela ivangeli kusegazini lakhe, yaye akanakukuphepha; akuze nakanye kuthiwe akasebenzi kodwa umele ngokuzingisileyo abe semsebenzini, ephungula inxalenye yetyala analo ngenxa yoluntu lonke—ityala angenakulihlawula ngokupheleleyo lo gama nje esaphila.” Ngaba leyo yindlela obujonga ngayo ubulungiseleli?
10. Ziziphi ‘izithintelo’ ezisenokuba kwindlela yethu, kodwa sifanele siqhubane njani nazo?
10 Namhlanje, bonke abantu bakaYehova baxakekile ngenxa yeembopheleleko ezininzi. Bambi kufuneka benyamekele iintsapho. Bambi baneemfanelo ezikwezinye iinkalo. Bambi banokwenza okulinganiselweyo ngenxa yobudala okanye impilo enkenenkene. Ukanti abanye banezabelo ezinzima kwibandla lamaKristu. Kanti, kwakhona siyaqonda ukuba le nkqubo yezinto ikhoyo iya iphelelwa lixesha, yaye ubungqina obungoBukumkani bumele bunikelwe. (Marko 13:10) Ngaloo ndlela, njengoPawulos, sifanele sibonakalise ukukulangazelela ukuzabalaza kumsebenzi wokushumayela phezu kwazo nje ‘izithintelo’ ezisenokuba sendleleni yethu. Asifanele sibe noluvo lokuba kwanele, sicinga ukuba sinokuninzi esimele sikwenze.—1 Korinte 15:58
“Ndinetyala” Kubo Bonke
11. Kusingisele entwenini ukuthi “ndinetyala”?
11 Imigudu kaPawulos yokungatyhafi ekuvakaliseni iindaba ezilungileyo yayishukunyiswa nangamanye amandla. UPawulos wathi, “KumaGrike nakumaBharbhari, kwizilumko nakwabaswele ukuqonda ndinetyala.” (Roma 1:14, NW) UPawulos ‘wayenetyala’ ngayiphi indlela? Ezinye iinguqulelo ziguqulela eli binzana ngokuthi “ndinemfanelo” (New English Bible), “kuyimfanelo yam” (Today’s English Version), okanye “ndinyanzelekile” (Jerusalem Bible). Ngoko, ngaba wayesithi umsebenzi wokushumayela yayingumsebenzi oluxanduva okanye oyimfanelo lowo kwakufuneka ukuba awufeze phambi koThixo? Kulula ukuba sibe nesimo sengqondo esinjalo ukuba asikuqondi ukungxamiseka kwawo okanye siphazanyiswa zizinto ezinomtsalane zeli hlabathi. Kodwa oko asikuko oko uPawulos wayecinga ngako.
12. Ngoobani aba uPawulos ‘wayenetyala’ kubo, yaye ngoba?
12 ‘Njengesitya esinyuliweyo’ sikaThixo yaye ‘njengompostile weentlanga,’ uPawulos wayenembopheleleko enzima gqitha phambi koThixo. (IZenzo 9:15; Roma 11:13) Kanti wayengazivi enemfanelo kuThixo nje kuphela. Wathi ‘wayenetyala’ ‘kumaGrike, kumaBharbhari, kwabalumkileyo nakwabaswele ukuqonda.’ Ngenxa yenceba nelungelo awayejizekwe lona, waba noluvo lokuba ngumsebenzi wakhe ukushumayela khon’ ukuze bonke abantu babe nokuziva iindaba ezilungileyo. Kwakhona, waqonda ukuba kukuthanda kukaThixo ukuba babe “bangasindiswa bonke abantu, bafikelele ekuyazini inyaniso.” (1 Timoti 1:12-16; 2:3, 4) Kungoko wahlala ebulaleka, kungekuphela nje ukuphila ngokuvisisana nembopheleleko yakhe kuThixo kodwa kwanokuphumeza imfanelo yakhe kubantu abangoowabo. Ngaba unoluvo lokuba unetyala elinjalo kubantu abakummandla okuwo? Ngaba unoluvo lokuba ufanele uzibhokoxe ubazisa iindaba ezilungileyo?
“Andinazintloni Ngazo Iindaba Ezilungileyo”
13. UPawulos wayezigqala njani iindaba ezilungileyo?
13 Ngokuqinisekileyo uPawulos wayengumzekelo obalaseleyo ekuboniseni ukukulangazelela ukuvakalisa iindaba ezilungileyo. Waluxabisa ngokunzulu ubabalo uThixo awalubonisayo kuye, ibe akazange afune ukuba lube lilize. (1 Korinte 15:9, 10) Kungenxa yoko le nto wahlabela mgama esithi: “Kuba andinazintloni ngazo iindaba ezilungileyo.” (Roma 1:16) Ngokwembono yabantu, asikukuba nje amaKristu ayengathandwa kodwa ayekwagculelwa. “Sixeliswa inkunkuma yehlabathi, inkuthu yezinto zonke,” watsho njalo uPawulos. (1 Korinte 4:13) Kanti wayengenazintloni ukuya kuvakalisa iindaba ezilungileyo eRoma, isazulu sehlabathi elikhanyiselweyo kwezemfundo nalapho kwakukho isihlalo soBukhosi obulawulayo baseRoma. Xa sijongene nokungakhathalelwa, ukuphathwa kakubi, okanye kwanenkcaso kumsebenzi wethu wokushumayela, sinokukhumbula umzekelo kaPawulos okhuthazayo.
14. Kutheni le nto uPawulos ‘wayengenazintloni ngazo iindaba ezilungileyo’?
14 Ukuthi “andinazintloni ngazo iindaba ezilungileyo” ngenene kuyenye indlela yokuthi “ndineqhayiya ngazo iindaba ezilungileyo,” ibe sifanele sibe njalo. Ngoba? Ngenxa yokuba “zingamandla kaThixo okusindisa bonke abakholwayo,” wacacisa ngelitshoyo uPawulos. Wayenamava obuqu ayintabalala okuxhasa amazwi akhe. Ngeendaba ezilungileyo, uPawulos wathi, “siwisa ngazo nje amabhongo, nayo yonke into ephakamileyo, eziphakamisayo ngokuchasa ukwazi uThixo; iingqiqo zonke sizithimbela ekumlulameleni uKristu.” (2 Korinte 10:5) Enoba zazinxamnye nesithethe samaYuda, intanda-bulumko yamaGrike, okanye igunya lamaRoma, iindaba ezilungileyo zangqineka zisoyisa.
15. Ukuba nolangazelelo kwakungamandla ashukumisayo njani kubomi bukaPawulos?
15 Hayi indlela ekukuhle ngayo ukuba kunokuba abe noluvo lokuba iluxanduva, uPawulos ‘wayekulangazelela’ ukuphumeza imbopheleleko yakhe awayeyinikwe nguThixo! Kunjengokuba yena ngokwakhe wathi: “Ndimelwe kukuzishumayela. Yeha ke mna, ukuba ndisuka ndingazishumayeli iindaba ezilungileyo!” (1 Korinte 9:16) Olu langazelelo lwamnceda ukuba aqhubeke kangangeminyaka emininzi yenkonzo yokungatyhafi, kangangokuba ekugqibeleni wayenokuthi: “Umzamo omhle ndiwuzamile, ugqatso ndilufezile, ukholo ndilugcinile.”—2 Timoti 4:7.
Ukuba Nempumelelo Kuyongezelela Kwimiphumo
16. Luluphi ucelomngeni ocinga ukuba lwajongana nendoda eyayinezinto zokubhala embonweni kaHezekile?
16 NjengoPawulos, indoda eyayinezinto zokubhala embonweni kaHezekile ngokungathandabuzekiyo yayinolangazelelo ngesabelo sayo. Yeza nale ngxelo intle: Umsebenzi ufeziwe! Ingxelo ayisixeleli indlela eyabafumana ngayo bonke abo ‘bagcumayo, bancwinayo ngenxa yamasikizi onke awenzekayo.’ (Hezekile 9:4) Nangona kungekho nto yathethwayo ngendlela okwaphunyezwa ngayo oku kubekwa kophawu, ngokucacileyo kwakungengomsebenzi ulula.
17. (a) Luluphi ucelomngeni ojongene nalo kumsebenzi wokwenza abafundi, yaye uhlangabezana njani nalo? (b) Ngaba imigudu efunekayo ifanelekile?
17 Ngokufanayo namhlanje, umsebenzi esiwuthunyiweyo asingomsebenzi ulula. Ngoko ke, umbuzo ngulo: Sinempumelelo kangakanani kulo msebenzi wokusindis’ ubomi? Ukuze sibenze abafundi abantu abaninzi kangangoko kunokwenzeka, simele sibandakanyeke kulo msebenzi ngokuthe rhoqo nangokwendlela ecwangcisiweyo, singayeki naliphi na ithuba lokuba nesabelo kwiindaba ezilungileyo. Njengathi, abantu abakwindawo yethu baxakekile; basenokungasoloko besemakhaya xa sisiya kubo, yaye nokuba bakho, ngokufuthi baxakekiswa zezinye izinto. Sinokwenza ntoni? Kaloku, kufuneka sigcine iingxelo ezichanileyo size sibuyele ngamaxesha awahlukileyo, ngokuphindaphindiweyo, sinethemba lokuba siya kufumana uthile wokuthetha naye. Ngaba imigudu enjalo ifanelekile? Makhe sivumele amagqabaza amafutshane alandelayo avela kubaninimzi ababini anikele impendulo:
“Ndithanda ukuvakalisa umbulelo wam kumaNgqina kaYehova ngokundityelela kwawo izihlandlo ezininzi endiwini yam. Ndiyazi ukuba maxa wambi umsebenzi wenu awujongwa ngabo bangekho kwicawa yenu ngehlombe olifanele kakuhle. Ngoko bendicinga ukuba ndinibalisele la mava am ndize ndithi maz’ enethole!”
“Baninzi kuthi abalambele inyaniso, baninzi kuthi nabakholelwa ukuba iicawa zisengela thungeni linye. Nina ke bazimisele ukuqhubeka befuna ubani abanokushumayela kuye, musani ukusincama! Asingobantu boyikekayo, nangona sinithuka nje, siniphoxa, side sinichase. Musani ukuncama, ngenxa yokuba siye safundiswa ubuxoki obuninzi, saxelelwa amabali amaninzi oyikekayo, yaye safundiswa ukuba sinithiye ukuze sisigcine sikude nathi isigidimi soBukumkani bukaYehova.”
18. (a) Unokubanceda njani abanye ukuba baziqonde iindaba ezilungileyo? (b) Omnye umvakalisi wakoyisa njani ukungakhathalelwa okucacileyo? yeBhayibhile.
18 Ukuze sifikelele intliziyo yabantu ngabanye nokuze sibancede ukuba baziqonde iindaba ezilungileyo kufuneka okungakumbi kunokuthetha nje nabo okungenzulu, sinikela isigidimi esilungiselelweyo, okanye sishiya uncwadi oluthile lweBhayibhile. Simele sizabalazele ukuqonda iintswelo zabo nezinto abazixhalabeleyo, abazithandayo nabangazithandiyo, izinto abazoyikayo nabazithiyileyo. Konke oku kufuna ukucingisisa nomgudu—nokuba thina sibe nolangazelelo. Qwalasela la mava alandelayo:
Omnye umvakalisi wathetha nomfazi othile kumnyango wegunjana kodwa akazange afumane ntsabelo ingako. Ephawula ukuba kwakukho abantwana abaliqela ababelapho, lo mvakalisi wabuza lo mfazi ukuba bangaphi na abantwana bakhe. Waphendula ngelithi aba asingobantwana bakhe koko ngabomyeni wodade wabo, owayefudukele apha esuka kwelinye ilizwe. Ngokukhawuleza incoko yaba ngombandela wokunqongophala kwezindlu. Umvakalisi wavuma ukuba izindlu ezifanelekileyo kwakunzima ukuzifumana kwizixeko ezikhulu, njengokuba naye wayenezalamane ezaziza kumfikela, yaye wathi wayezinikela ukuba ancede. Eli nenekazi lavuyiswa koku laza labiza umyeni wodade walo. Incoko yaqhubeka, yaye banikana iinombolo zemfonomfono. Engayilibali injongo yokutyelela kwakhe, umvakalisi ngobuchule watyhila kwiphepha 157 kwincwadi ethi Unokuphila Ngonaphakade waza wacacisa ukuba kwinkqubo entsha ethenjisiweyo, iingxaki zezindlu nezokuqeshwa zobe zingekho. Le ndoda yachukumiseka gqitha yaye ngokuvumayo yayamkela incwadi. Kamva, umvakalisi wabuyela waza wabazisa ngokufumaneka kwegumbi eliqeshisayo; kwakhona wayihlaziya incoko yabo yeBhayibhile.
19. Ngoku lixesha lokuba senze ntoni? Ibe yintoni esifuna ukuyixubusha ngokubhekele phaya?
19 Ixesha lokushumayela iindaba ezilungileyo liphela ngokukhawulezileyo. Ukuba ‘izithunywa zezulu ezine’ ziya kuqhubeka ithuba elide kangakanani “zibambe imimoya yomine yomhlaba” asazi. (ISityhilelo 7:1) Nakuyiphi na imeko, “imbandezelo enkulu” isengaphambili, yaye abantu abantliziyo zinyanisekileyo bayahlanganiswa. Eneneni, “amasimi” “asel” emhlophe ukuba kuvunwe.” (Mateyu 24:21, 22; Yohane 4:35) Ngoku lixesha lokuba sizibhokoxe ngamandla kulo msebenzi ongasayi kuze uphindwe. Sinokulisebenzisa njani ngeyona ndlela ilungileyo ixesha lethu elisaseleyo? Sinokwenza ntoni ukuze sibe nesabelo esizele ngakumbi kulo msebenzi wokusindis’ ubomi? Ibe yintoni enokusinceda ukuba siqhubeke sibonakalisa ukukulangazelela ukuvakalisa iindaba ezilungileyo? Le mibuzo iza kuxutyushwa kwinqaku elilandelayo.
Qwalasela umzekelo kaPawulos ngokuvisisana neyabaseRoma 1:13-16—
◻ Kutheni le nto wayekulangazelela nje ukuya eRoma?
◻ Yintoni eyamthintelayo ukuba angayi apho? Kodwa wasabela njani?
◻ Ngoobani aba ‘wayenetyala’ kubo yaye ngoba?
◻ Wayevakalelwa njani ngeendaba ezilungileyo? Ngoba?
◻ NjengoPawulos, sinokwenza ntoni ukuze sibe nempumelelo ekuvakaliseni iindaba ezilungileyo?