“Andinazintloni Ngazo Iindaba Ezilungileyo”

“Andinazintloni ngazo iindaba ezilungileyo zikaKristu; kuba zingamandla kaThixo okusindisa bonke abakholwayo.”—ROMA 1:16.

1. Ngokuqhelekileyo iindaba ezilungileyo zamkelwa njani, kodwa abantu behlabathi abangenalukholo bebeya kuzijonga njani iindaba ezilungileyo zoBukumkani bukaThixo?

OKO kubonakala kuziindaba ezilungileyo komnye umntu kusenokubonakala kungezizo komnye. Ngokuqhelekileyo, umntu ophethe iindaba ezilungileyo udla ngokwamkelwa ngobubele, yaye udla ngokuphulaphulwa ngenyameko enkulu. Noko ke, iBhayibhile yakuxela kwangaphambili ukuba abantu abangenalukholo beli hlabathi babengayi kuzigqala njengezivuyisayo iindaba ezilungileyo zoBukumkani nesigidimi sazo sosindiso.—Thelekisa eyesi-2 yabaseKorinte 2:15, 16.

2. Wathini umpostile uPawulos ngeendaba ezilungileyo awazivakalisayo, yaye kutheni le nto esi sigidimi siseziindaba ezilungileyo nanamhlanje?

² Umpostile uPawulos wayengulowo wayethunyelwe ebantwini ukuba avakalise iindaba ezilungileyo. Wavakalelwa njani ngothumo lwakhe? Wathi: “Ngokunjalo okukokwam ndingxamele ukuzishumayela iindaba ezilungileyo nakuni baseRoma. Kuba andinazintloni ngazo iindaba ezilungileyo.” (Roma 1:15, 16) Ukuze ezo ndaba zibe zisezezilungileyo namhlanje, phantse iminyaka engama-2 000 emva kokuba umpostile uPawulos wabhalela loo maKristu aseRoma emva apho, ngokuqinisekileyo beziya kuba ziindaba ezihlala ixesha elide. Enyanisweni ke, zona ‘ziziindaba ezilungileyo ezingunaphakade.’—ISityhilelo 14:6.

3, 4. Kutheni le nto umpostile uPawulos wathi wayengenazintloni ngeendaba ezilungileyo?

³ Kwakutheni ukuze umpostile uPawulos athi wayengenazintloni ngeendaba ezilungileyo? Yayisisiphi isizathu esasingambangela abe neentloni ngazo? Sasikukuba zazingesosigidimi sithandwayo, kuba zaziphathelele umntu owayebethelelwe kumthi wentuthumbo njengesaphuli-mthetho esicekisekayo, nesibonakala singumntu ongendawo ngokwenene ngenkangeleko yangaphandle. Kangangeminyaka emithathu enesiqingatha, loo mntu wayesihla esenyuka ePalestina eshumayela iindaba ezilungileyo ibe wachaswa ngokukrakra ngamaYuda, ngokukodwa ziinkokeli zonqulo. Ibe ke ngoku yena uPawulos, ekubeni wayethwele igama laloo mntu wayedelelwe, wayejamelene nobutshaba obufanayo.—Mateyu 9:35; Yohane 11:46-48, 53; IZenzo 9:15, 20, 23.

⁴ Ngenxa yenkcaso enjalo, uPawulos nabafundi awayekhonza nabo bakaYesu Kristu ngokunokwenzeka babegqalwa njengababenokuthile ababemele bazive beneentloni ngako. Eneneni, ngeli thuba uPawulos wayebambelele kokuthile yena ngokwakhe awayekhe wakujonga njengokubangela iintloni. Yena ubuqu waba nenxaxheba ekugculeleni kakhulu abalandeli bakaYesu Kristu. (IZenzo 26:9-11) Kodwa wayekuyekile ukuhamba ngekhondo elinjalo. Ngenxa yoko, yena, nabanye ababa ngamaKristu, batshutshiswa ngogonyamelo.—IZenzo 11:26.

5. UPawulos wawacacisa njani amazwi akhe okungabi nazintloni ngeendaba ezilungileyo?

⁵ Ukuba umntu uyazivumela ukuba abe neentloni ngokuba ngumlandeli kaYesu Kristu, uya kuba ujonga izinto ngeliso lenyama. Wayengenjalo umpostile uPawulos. Kunoko, kwinkcazelo yakhe yokungabi nantloni ngeendaba ezilungileyo awayezishumayela, wathi: “Kuba zingamandla kaThixo okusindisa bonke abakholwayo.” (Roma 1:16) Amandla kaThixo awabangeli zintloni ukuba asebenza kumfundi kaYesu ekuphumezeni injongo yokudumisa uThixo ozukileyo owayenqulwa yaye edunyiswa nguYesu Kristu.—Thelekisa eyoku-1 yabaseKorinte 1:18; 9:22, 23.

Iindaba Ezilungileyo Zivakaliswa Kwihlabathi Lonke

6, 7. (a)Yiyiphi imbopheleleko emayela neendaba ezilungileyo amaNgqina kaYehova azabalazela ukuyinyamekela, yaye ube yintoni umphumo? (b) Nangona singafuni ukuvumela uloyiko lusibangele sirhoxobise ekunikeleni ubungqina, yintoni esenokufuneka maxa wambi? (Bona umbhalo osemazantsi.)

⁶ NjengoPawulos, amaNgqina kaYehova namhlanje angabafundi boNyana Wakhe ozukisiweyo, uYesu Kristu. Kula maNgqina akhe, uYehova uwanike imbopheleleko yokunyamekela obu butyebi ‘beendaba ezilungileyo zozuko.’ (1 Timoti 1:11) AmaNgqina kaYehova aye ayinyamekela le mbopheleleko, ibe ayabongozwa ukuba angabi nazintloni ngayo. (2 Timoti 1:8) Kubalulekile ukuba singaze sivumele uloyiko okanye ubugwala busibangele sirhoxobise ekunikeleni ubungqina nokuzazisa njengamaNgqina kaYehova.a

⁷ Ukunikela ubungqina ngokungafihlisi nangokungoyiki okunjalo kuye kwaphumela ekubeni igama loThixo Osenyangweni livakaliswe kuwo wonke umhlaba nasekushunyayelweni kweendaba ezilungileyo zoBukumkani bakhe kwihlabathi lonke. UNyana kaThixo wathi: “Zaye ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela,” ibe asinakuze nakancinane eso siprofeto sakhe singavulelwa ithuba lokuba sizaliseke. (Mateyu 24:14) Ngoku iindaba ezilungileyo zishunyayelwa kumazwe angaphezu kwangama-210, ibe ke asikafiki isiphelo salo msebenzi wokushumayela. Singenazintloni ngeendaba ezilungileyo yaye sijamelene ngenkalipho noko kuza kwenzeka kwixesha elizayo, njengabafundi bakaYesu Kristu sithandaza sisithi: “Okwangoku ke, Nkosi, . . . ubanike abakhonzi bakho ukuba balithethe ilizwi lakho ngako konke ukungafihlisi.”—IZenzo 4:29.

8. Kutheni le nto amaNgqina kaYehova engamele adimazeke kukuchaswa kuzo zonke iintlanga zomhlaba?

⁸ Ngoxa kuyinyaniso ukuba amaNgqina kaYehova athiyiwe yaye achaswe kuzo zonke iintlanga ezisemhlabeni, oku kukuzalisekiswa koko kwaxelwa kwangaphambili njengophawu olwahlulayo lwabanquli bokwenyaniso boThixo omnye ophilayo noyinyaniso. (Yohane 15:20, 21; 2 Timoti 3:12) Ngoko kunokuba badimazeke baze baphelelwe lithemba ngenxa yoku, abavakalisi beendaba ezilungileyo baqinisekiswa kukuba baxhaswa nguThixo nokuba bangabentlangano ekholekileyo yoMongami Wendalo iphela, uYehova.

9. Kutheni le nto singakhathazeki nganto ngenxa yokuchaswa lihlabathi lonke?

⁹ Ungaze ulibale ukuba: Thina sixhaswa nguThixo Osenyangweni wendalo iphela. Ngoko, kunamsebenzi mni na ukuba ihlabathi nawo onke amahlelo alo onqulo namaqela alo ezobupolitika ayasichasa? UNyana kaThixo ekuphela kwamzeleyo wachaswa lilo lonke ihlabathi, ibe nathi asikho manyonywana ngokuzifumana sikwimeko enjalo. Kunjengokuba yena wathi kubafundi bakhe: “Ukuba ihlabathi linithiyile, yazini ukuba lindithiye kuqala kunani. Ukuba beningabehlabathi, ihlabathi linge likuthanda okwalo; ke ngokuba ningengabehlabathi, ndaninyulayo mna kulo ihlabathi, ngenxa yoko linithiyile ihlabathi.”—Yohane 15:18, 19.

10. AmaNgqina aye atshutshiswa ngoobani ngokukhethekileyo, yaye kutheni le nto engenazintloni ngenxa yoko?

¹⁰ Ngaloo ndlela amaNgqina kaYehova aye anyamezela intshutshiso kulo lonke ihlabathi kodwa ngokukodwa kuloo mazwe abumba oko kufane kubizwe ngokuba yiNgqobhoko. Ukutshutshiswa kwawo yiNgqobhoko akuwangqini engengomaKristu. Kunoko, kuliqinisa ngamandla ibango lawo lokuba angamaKristu okwenyaniso, amaNgqina kaThixo noYise kaYesu Kristu, oko kukuthi, uYehova. Ngenxa yokuba engamaNgqina kaThixo, awazivi eneentloni xa etshutshiswa ngenxa yemibandela yonqulo. Ngoko ke, isiluleko sompostile uPawulos kumaKristu enkulungwane yokuqala sokuba ayemele angabi nazintloni sisebenza ngokufanelekileyo ngoku kumaNgqina kaYehova.—Bona abaseFilipi 1:27-29.

Iindaba Ezilunge Ngakumbi Ezinokuvakaliswa

11. Ngokwamkela igama elithi amaNgqina kaYehova, kutheni le nto singayeki ukuba ngabalandeli bakaYesu Kristu?

¹¹ Ezalisekisa uIsaya 43:10, amaNgqina kaYehova aye alamkela ngenkalipho elo gama lawo ledinga likaYehova kubantu bakhe bomnqophiso. Noko ke, oku akuthethi ukuba awasamlandeli uYesu Kristu. UYesu uyiNkokeli yawo, ungulowo alandela emanyathelweni akhe. Yena kanye ungomnye wamaNgqina kaYehova. Enyanisweni, uliNgqina likaYehova elikhokelayo.—1 Timoti 6:13; ISityhilelo 1:5.

12. Luhlobo olunjani lweendaba olushunyayelwa ngamaNgqina kaYehova kulo lonke ihlabathi, ibe ngoba?

¹² Isigidimi esishunyayelwa ngala maNgqina kaYehova kulo lonke ihlabathi sizezona ndaba zilunge ngakumbi ezinokuvakaliswa. Akukho rhulumente onokuze abe ngolunge ngakumbi kuluntu kunoBukumkani obungoMesiya obuye bamiselwa nguYehova ukuba bulawule phezu kwehlabathi loluntu, alikhulule ngokuthumela okuphela koNyana wakhe amzeleyo. (Isaya 9:6, 7) Abemi bomhlaba ekushunyayelwa kubo iindaba ezilungileyo zoBukumkani banikwa ithuba lokuzamkela nelokuzingqina besifanelekele isipho sobomi obungunaphakade semfezeko yoluntu kumhlaba owenziwe iparadisi.

13. Kutheni le nto sinokuqiniseka ukuba urhulumente woBukumkani obungoMesiya uya kuba ngoyena ulunge ngakumbi, yaye yintoni enconyelwa ngamaNgqina engenazintloni ngayo?

¹³ Ngokuqinisekileyo, ukuba uYesu wakuvuma ukuthubeleza ekufeni ngenkohlakalo ukuze akhulule abo babeza kuba ngabalawulwa bakhe, wayeya kuqinisekisa ukuba balawulwa ngurhulumente ongoyena ulunge ngakumbi. Naku esikuncomela kuso sonke isidalwa esingumntu esikulo mhlaba: Yiba ngumlawulwa othembekileyo nothobekileyo waloo rhulumente. Asiziva simanyonywana ngorhulumente esimncomelayo kulo lonke uluntu. Asihlehli ekushumayeleni uBukumkani, nangona eli khondo lisenokusizisela intshutshiso. Njengompostile uPawulos, ngamnye wethu uthi: “Andinazintloni ngazo iindaba ezilungileyo.”

14. Ngokutsho kukaYesu, uBukumkani babuza kushunyayelwa ukusa kuwuphi umkhamo kumhla wethu?

¹⁴ UYesu waprofeta ngelithi ukushunyayelwa kweendaba ezilungileyo zoBukumkani kwakuza kwenziwa kwihlabathi lonke, yaye esi siprofeto sigubungela imibandela eliqela ngolu hlobo nesasiya kuvakaliswa ngokubanzi ngolu hlobo, sasikufanele ukuba sisigidimi esinjalo. (Marko 13:10) Akazange abe madolw’ anzima ukuxela kwangaphambili ukuba uBukumkani bukaYehova babuya kushunyayelwa ukusa eziphelweni—ewe, ukusa kwezona ziphelo zehlabathi. (IZenzo 1:8) UYesu wayesazi ukuba naphi na apho abantu babenokufumaneka khona, abalandeli bakhe abathembekileyo babeza kwenza umgudu wokunyaniseka ukuze babafikelele ngeendaba ezilungileyo zoBukumkani.

15, 16. (a) Ngoobani abafanele bafikelelwe ngeendaba ezilungileyo? (b) Kutheni le nto umsebenzi wokushumayela uya kuphunyezwa phezu kwayo nje intshutshiso ebangelwa yintlangano kaMtyholi?

¹⁵ Namhlanje abemi bomhlaba bafikelela kumawaka ezigidi yaye basasazeke kuwo onke amazwekazi nakwiziqithi ezikhulu zeelwandlekazi. Ukanti, akukho ndawo yelimiweyo eye yaba yekude kakhulu ukuba amaNgqina kaYehova angenzi mgudu wokuyifikelela ngeendaba ezilungileyo. Lonke elimiweyo lisisihlalo sokomfuziselo seenyawo zikaYehova uThixo. (Isaya 66:1) Izidalwa ezingabantu ezikuyo nayiphi na indawo yesihlalo seenyawo zakhe zifanele zifikelelwe ngesi sigidimi sosindiso.

¹⁶ Iindaba ezilungileyo namhlanje ziziindaba ezonwabisayo zorhulumente wasebukhosini osele emiselwe kade ulawulwa ngoMesiya. UYesu wayesazi ukuba phezu kwayo nje eyona ntshutshiso yenkohlakalo engakumbi ebangelwa yintlangano kaMtyholi, umoya kaThixo wawuza kushukumisa abalandeli bokwenyaniso bakaMesiya ukuba basebenze ngowona mlinganiselo wakha wamkhulu, ukuze “ezi ndaba zilungileyo zobukumkani” obumiselwe ngenene zibe ‘nokushunyayelwa kulo lonke elimiweyo.’—Mateyu 24:14.

Ukungabi Nazintloni NgoYesu Kristu NangoYehova

17. (a) Yintoni le bangenazintloni ngayo abanquli bokwenyaniso? (b) Uthini umthetho owandlalwa nguYesu kuMarko 8:38, yaye ubaluleke ngantoni?

¹⁷ UThixo Osenyangweni akazange athandabuze ekuzithiyeni igama lokuba, unguYehova; nabanquli bakhe abathembekileyo abanazintloni ngelo gama. Abanquli bokwenyaniso bayavuya kuba besaziwa yaye beqondwa njengabo bamnqula ngokuzinikela nangokuzithoba ngokupheleleyo kuye. UYesu, wamisela umthetho, okanye umgaqo kuMarko 8:38 ebhekisela kuye esithi: “Othe waneentloni ngam nangamazwi am, kwesi sizukulwana sikrexezayo, sonayo, naye uNyana woMntu woba neentloni ngaye, xa athe weza esebuqaqawulini boYise, enezithunywa ezingcwele.” Ngokufanayo, nabani na oba neentloni ngoThixo noYise weNkosi uYesu Kristu, ngokufanelekileyo uYehova ebeya kuba neentloni ngomntu onjalo. Ibe nasiphi na isidalwa uYehova aya kuba neentloni ngaso ngenxa yekhondo laso lokungathembeki asiyi kukufanelekela ukunandipha ukuphila kuyo nayiphi na indawo yommandla kaThixo wasezulwini okanye wasemhlabeni.—Luka 9:26.

18. (a) Kutheni le nto amazwi kaYesu akuMateyu 10:32, 33 afanele endele nzulu ezintliziyweni nasezingqondweni zethu? (b) Kwenzeka ntoni kwabo bakhanyela uYesu noYehova ngenxa yokoyika abantu? (Nika imizekelo ngokusekelwe kumbhalo osemazantsi.)

¹⁸ Mawendele nzulu ezintliziyweni nasezingqondweni zethu la mazwi kaYesu Kristu alandelayo: “Wonke umntu ngoko oya kundivuma phambi kwabantu, ndiya kumvuma nam phambi koBawo osemazulwini. Osukuba ke eya kundikhanyela phambi kwabantu, ndiya kumkhanyela nam phambi koBawo osemazulwini.” (Mateyu 10:32, 33; Luka 12:8, 9) Ngesizinzi esifanayo, nabani na oya kukhanyela uThixo uYise weNkosi uYesu Kristu naye uya kukhanyelwa Nguye. Akayi kubalwa njengokufaneleyo ukuba lilungu lentsapho anguNyana omkhulu kuyo uYesu Kristu. Ngoko uza kutshatyalaliswa ngexesha elimiselwe nguThixo.b

19, 20. (a) Kutheni le nto abo baye bathandazela ukuba igama likaYehova lingcwaliswe kungekho nto baya kuziva beneentloni ngayo? (b) Abavakalisi boBukumkani abangoyikiyo baphumeze okungakanani, yaye bebexhaswa yintoni?

¹⁹ Uza kuphendulwa umthandazo ongumzekelo uYesu awawufundisa abalandeli bakhe ongulo: “Bawo wethu osemazulwini, malingcwaliswe igama lakho. Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.” (Mateyu 6:9, 10) Xa oko kusenzeka, akuyi kubakho nto baya kuba neentloni ngayo abafundi bakaYesu abanothando. Igama likaYehova liya kuhlonelwa, lingcwaliswe, kungekhona zizigidi eziphilayo ngoku ekunokwenzeka ukuba azisayi kuze zife kodwa kwanazizigidi zoluntu aya kuzibiza ukuba ziphume emangcwabeni ebudeni bolawulo loBukumkani bakhe lweminyaka eliwaka. Ziya kuba nethuba lokuphila ngonaphakade kumhlaba owenziwe iparadisi.

²⁰ Bengenazintloni, abavakalisi beendaba ezilungileyo zoBukumkani abangenaloyiko baye baphumelela ekunikeleni ubungqina emhlabeni wonke phezu kwako nje ukuchaswa lihlabathi lonke ngenxa yokuba baxhaswa ngamandla awongamileyo kunawomntu—izithunywa zezulu. Ngenxa yoko, amaNgqina kaYehova ‘oyika uThixo aze amzukise.’—ISityhilelo 14:6, 7.

Awanazintloni Ngokoyika Nangokumzukisa UThixo

21. Yintoni le amaNgqina kaYehova ebengenazintloni zakuyenza, yaye ube yintoni umphumo?

²¹ AmaNgqina kaYehova aye azingqina engenazintloni ngokoyika nangokumzukisa uThixo, nezokude asebenzise igama lakhe lobuqu, uYehova. Oku kuye kwaphumela ekubeni afumane iintsikelelo ezingathethekiyo. Ezi ntsikelelo aye azifumana ngenxa yokuthembeka koThixo Osenyangweni ekuzalisekiseni amadinga akhe. Enjani yona into ukubangela ukuba athethelelwe njengalowo unguThixo ophilayo noyinyaniso, uMongami wendalo iphela!

22. Kutheni le nto amaNgqina kaYehova eza kujamelana nentshutshiso yenkohlakalo, kodwa aza kuziyolisa ngovuyo ngenxa yantoni?

²² Kwixesha elizayo elingekude, oorhulumente behlabathi baza kujikela ulawulo lwezonqulo ibe baza kulutshayela luphele cwaka—kuquka iNgqobhoko—kuphele kuthi tu. (ISityhilelo 17:16, 17) Ngenxa yoko, amaNgqina kaYehova aza kujamelana nethuba lentshutshiso yenkohlakalo eza kubangelwa ngabantu behlabathi. Ebengayi kukwazi ukunyamezela aze asinde ukuba bekungengenxa yokuba uThixo ongunaphakade eza kuba nawo. Kodwa uza kuba nawo, ibe ke ngoko aya kuziyolisa ngokubona bonke abachasi abanjalo bamaKristu, bakaYehova betshatyalaliswa ngokupheleleyo ngulo Thixo amaNgqina amnqula ngokungaxengaxengiyo. Awayi kuba nazintloni zokubhenceka nezokutshatyalaliswa njengeentshaba zolawulo lobuthixo lokwenyaniso kodwa aza kuziyolisa ngovuyo olungathethekiyo ngokuvumela uYehova esithi: “Kususela kwaphakade kude kuse ephakadeni, wena unguThixo.”—INdumiso 90:2.

23. Kutheni le nto amaNgqina kaYehova engenanto anokuba neentloni ngayo, yaye uza kuba yintoni umphumo woko?

²³ Aza kufumana uzuko kuThixo, uYise kaYesu Kristu, ekuthe ngaye intsapho yoluntu yahlangulwa ukuze ifumane ubomi obungunaphakade njengoluntu olufezekisiweyo nolonwabileyo kumhlaba owenziwe iparadisi. Hayi indlela uYehova uThixo aye wazibonakalisa ngayo enamandla ngokusebenzisa uKristu Yesu! Hayi indlela uYehova aye wazibonakalisa kakuhle ngayo njengolumkileyo nosebenzisa ngokunothando, kungekhona ngokuxhaphazayo, njengoko engonamandla onke! Nathi ngokukwanjalo, akukho nto singaziva sineentloni ngayo ngaye okanye ngoNyana wakhe ekuphela kwamzeleyo, uYesu Kristu. Asinazintloni zokuba ngabavakalisi beendaba ezilungileyo ezizezona zizukileyo, ezibonisa amandla kaYehova uThixo awoyisa konke ngokusebenzisa uKristu Yesu, owathi kwiiyure zakhe zokugqibela kubomi bakhe basemhlabeni: “Yomelelani, mna ndiloyisile ihlabathi.” (Yohane 16:33) Ekuthabatheni eli khondo, masisoloko silandela umzekelo kampostile uPawulos, owayengenazintloni nakancinane ngeendaba ezilungileyo. Ukuba senjenjalo, uThixo uSomandla akayi kuba nazintloni naye ngathi.

[Imibhalo esemazantsi]

Imibuzo Yokushwankathela

◻ Njengompostile uPawulos, sisiphi isimo sengqondo esifanele sibe naso, ngokuphathelele ukuvakalisa iindaba ezilungileyo, ibe ngoba?

◻ Kutheni le nto isigidimi esivakaliswa ngamaNgqina kaYehova sizezona ndaba zilunge ngakumbi kwezakha zakho?

◻ Sisiphi isilumkiso esanikelwa nguYesu ngaye nabani na owayeya kuba neentloni ngaye ekufikeni kwakhe ekuzuko loBukumkani?

◻ Kwenzeka ntoni kwabo bakhanyela uYesu noYehova?

◻ Yintoni abaye bakwazi ukuyiphumeza bengenazintloni abavakalisi beendaba ezilungileyo, ibe ngoba?