Ukuqiqa Okusezindabeni
Ngaba Ligama “Elikhubekisayo”?
Makungathethwa ngegama likaThixo, lingade libhalwe nje kuthiwe JHWH, lize libizwe ngokuthi “Nkosi,” olo luncomelo olumele lwamkelwe, utsho njalo ulindixesha wamaKatolika iCom-nuovi tempi. Le yayiyimpendulo kwisibongozo esavakaliswa “Lumanyano Lobudlelane Phakathi KwamaYuda NamaKristu” kwelaseRome saza satyobeIwa ngabefundisi nabaphengululi abaziwayo bamaKatolika nabamaYuda. Esi sibongozo sasinesicelo sokuba “imizi-mveliso epapashayo nabasebenzi abangabahleli bamaphephandaba namaphephancwadi” bayeke ukusebenzisa igama elithi “Jahweh” ngenxa yokuba “liyawakhubekisa amaYuda, aligqala igama likaThixo lingenakubizwa.” Olu Manyano luthi, isibongozo salo sisekelwe “kwisithethe samaYuda ekudala sikho” esiye “salondolozwa singaphazanyiswa” ukuza kuthi ga namhla.
Kodwa ngaba amaKristu amele akhokelwe zizithethe zamaYuda? Ngaba bekuya kuba yinto efanelekileyo ukuba alibekele bucala igama likaThixo aze akuphephe ukulibiza? IBhayibhile ibonisa ukuba uThixo ufuna bonke bazi ukuba yena, “ugama linguYehova,” nguye Osenyangweni. (INdumiso 83:18; Hezekile 38:23; Malaki 3:16) UYesu wamisela umzekelo koku. Kunokulandela izithethe zamaYuda ‘ezawuphanga igunya umthetho kaThixo,’ wafundisa abalandeli bakhe ukuthandaza bathi: “Malingcwaliswe igama lakho.” (Mateyu 6:9; 15:6) Kwiiyure ezimbalwa nje ngaphambi kokufa kwakhe okulidini, wavakalisa oku emthandazweni: “Ndabazisa igama lakho [abafundi], ndandiya kubazisa.”—Yohane 17:26.
Ukugana: Ngaba Kusisivumelwano?
Intombi eselula yaseBrazil nomfana eyayiganwe nguye babesandul’ ukugqiba ukufaka ifanishala kwikhaya labo elitsha. Izimemo zazisele zithunyelwe, ibe yonk’ into yayibonakala ilungele umtshato wabo, kwiintsuku nje ezintathu ngaphambi kwawo. Elindele ubomi bakhe obutsha, umtshakazi wawulahla umsebenzi wakhe. Kwandula ke, ngaphandle kwaso nasiphi na isaziso, umyeni wakuqhawula ukuganana kwabo. Emangalisiwe yaye edanile, umtshakazi owaliweyo wabhenela emthethweni. Igqwetha lakhe lema ngelithi ‘ukuganelwa umtshato sisivumelwano sokuqala, yaye ukuba saphulwa ngendlela engenakuthetheleleka, iqabane elimsulwa limele libuyiselwe ngawo nawuphi na umonakalo ofumanekileyo.’ Inkundla yavuma yaza yayalela le ndoda ukuba inike lo wayefudula eganene nayo ‘isipho semali esilingana nomvuzo omiselwa kwangaphambili emthethweni yaye ahlawule iindleko zenkundla neemali zamagqwetha.’ Egqabaza ngesi sigqibo, uNereu Mello oligqwetha, wabhala kwiphephandaba laseSao Paulo iJornal da Lapa: “Ukugana okwenziwa emtshatweni sisivumelwano esinzulu gqitha ibe ukwaphuIwa kwako akujongwa njengento engenamsebenzi eMthethweni.”
Ubunzulu bokugana okungokwasemtshatweni asinto intsha. Phantsi koMthetho kaMoses intombi eganiweyo eyayihenyuza yayifumana isohlwayo esifanayo neso somfazi otshatileyo okrexezileyo. Ngaloo ndlela yayiphathwa ngokwahlukileyo kwiintombi ezingatshatanga ezazihenyuzile. (Duteronomi 22:23, 24, 28, 29) Emva apho ukugana kwakujongwa njengento ebophayo—ngokungathi isibini sasisele sitshatile. (Mateyu 1:19) AmaKristu namhlanje nawo akugqala ukugana njengenyathelo elinzulu. Akakujongi njengento engenamsebenzi.—Thelekisa uMateyu 5:37.
Kuhlengahlengiselwe Kubugcisa Banamhla
Emva kokuba uMartin Luther wenza iphulo lokuchasa ukukhutshwa kwemali ukuze kushenxiswe lintlobo ezithile zesohlwayo sezono, iCawa yamaRoma Katolika yaluphelisa olu qheliselo ngowe-1562. Kodwa igosa laseVatican uPedro Albelian kutshanje uye wabethelela ukuba imfundiso engokuphunyezwa kokushenxiswa kweentlobo ezithile zesohlwayo sezono isahleli “iyengenakupheliswa nengenakuguqulwa.” Incwadi ehlaziyiweyo yamaRoma Katolika engokushenxiswa kweentlobo ezithile zesohlwayo sezono ibonisa ukuba iVatican iye yahlanganisa le nkolelo yamandulo nobugcisa banamhla. Ngokutsho kweThe Times yaseLondon, ngoku oobhishophu “banokuzishenxisa ngokupheleleyo iintlobo ezithile zesohlwayo sezono kwabo bathembekileyo ngokusebenzisa unomathotholo okanye umabonwakude kathathu ngonyaka xa bedlulisa intsikelelo egameni likaPopu.” Noko ke, kukho umqathango othile. “Oko kumele kwenziwe kwinkqubo eyenziwa ngabantu ngelo xesha ingabi yerekhodiweyo,” utsho njalo uLuigi De Magistris weSacred Apostolic Penitentiary yaseVatican, isebe eliphathelele nokushenxiswa kweentlobo ezithile zesohlwayo sezono. “Ukubukela inkqubo ebirekhodwe ngaphambili akwanele.”
Kodwa enoba oko kwenziwa ngokukhutshwa kwemali okanye kwenziwa kumntu ngokuthe ngqo okanye kusetyenziswa umabonwakude, ngaba ukushenxiswa kweentlobo ezithile zesohlwayo sezono kungokweZibhalo? Ngoxa uYesu, maxa wambi, wayezixolela ngesisa izono, akazange athethe nto ngemfuneko yokushenxiswa kweentlobo ezithile zesohlwayo sezono. Nabapostile abazange bakuthethe oko. Umpostile uYohane wabhala oku, “Lithi negazi likaYesu Kristu, uNyana [kaThixo], lisihlambulule kuso sonke isono. Ukuba sithi sizivume izono zethu, uthembekile, ulilungisa, ukuba asixolele izono zethu, asihlambulule kuko konke ukungalungisi.” (1 Yohane 1:7, 9) Ukuba zonke izono zixolelwa ngaloo ndlela, yintoni enye eseleyo enokuhlawulelwa ngesohlwayo okanye igutyungelwe ngokushenxiswa kweentlobo ezithile zesohlwayo sezono?—Yohane 3:36; Roma 5:10.