‘Ndimi Emboniselweni’
“Wadanduluka ngelengonyama, esithi, Nkosi [Yehova], kususela koko ndimi emboniselweni emini, ndizimisile esigxineni sam ubusuku ngobusuku.”—ISAYA 21:8.
1, 2. (a) Luluphi usukelo awaba nalo uCharles T. Russell? (b) Uncwadi lweBhayibhile lwaluya kunceda njani ukuphumeza usukelo lwakhe?
INDODA eneminyaka engama-21 ubudala eyayisoyika uThixo neyayihlala kumntla-mpuma welaseUnited States yayikwiphulo elithile. Yayilusukelo lwayo ukubhenca iimfundiso zobuxoki zonqulo ngomhla wayo, ingakumbi imfundiso yentuthumbo kanaphakade neyokumiselwa kwangaphambili kwekamva labantu. Kwakhona, yayifuna ukubalaselisa inyaniso engentlawulelo nenjongo kwanendlela yokuza kukaKristu. Yayiza kukwenza njani konke oku? Ngokukhanyisa ukhanyiselo lweLizwi likaThixo, iBhayibhile Engcwele, kwiinkolelo zonqulo.—INdumiso 43:3; 119:105.
2 Loo ndoda yayinguCharles T. Russell, umongameli wokuqala weWatch Tower Society, yaye ngowe-1873 wagqiba kwelokuba apapashe uncwadi lonqulo njengendlela yokubalaselisa ukukhanya kwenyaniso yeBhayibhile. Kubafundi abanyanisekileyo, ezo mpapasho zaziya kubhenca iziphako ezikwiimfundiso zeNgqobhoko. Nawaphi na amatyheneba afihlakeleyo angokwemfundiso ayeya kubhencwa kukukhanya okunamandla kweBhayibhile. (Efese 5:13) Kwangaxeshanye, olu ncwadi lwaluya kudandalazisa ‘amazwi aphilileyo’ ukuze akhe ukholo lwabafundi. (Tito 1:9; 2:11; 2 Timoti 1:13) Ngaba ukuzondelela inyaniso yeBhayibhile okwashukumisa uRussell kuphengululo lwakhe kwakukhe kwakho ngaphambili?—Thelekisa eyesi-2 yooKumkani 19:31.
AmaKristu Okuqala: Ababalaselisi BeLizwi LikaThixo
3. UYesu Kristu wawumisela njani umzekelo wokubalaselisa inyaniso?
3 AmaKristu enkulungwane yokuqala abalaselisa ukusetyenziswa kweLizwi likaThixo phakathi kwamaYuda neeNtlanga. Ema ngokungathi asemboniselweni, ebhengeza inyaniso kubo bonke ababeya kuphulaphula. (Mateyu 10:27) INkokeli yawo, uYesu Kristu, yayibafundisile. Yathi: “Mna ndizalelwe oku; ndizele oku ehlabathini, ukuze ndiyingqinele inyaniso.” (Yohane 18:37) Nangona wayefezekile, akazange akuvume ukukholosa ngobulumko bakhe okanye ngezimvo zakhe. Kunoko, iimfundiso zakhe zazivela kuMfundisi wakhe Omkhulu, uYehova uThixo. Iqela lamaYuda walixelela oku: “Andenzi nto ngokwam; ndisuka ndizithethe ezi zinto njengoko wandifundisayo uBawo.” (Yohane 8:28; bona kwanoYohane 7:14-18.) Ngokweengxelo zeVangeli ezingobulungiseleli bakhe basemhlabeni, uYesu wacaphula (okanye wavakalisa iingcamango ezihambisana nazo) kwiincwadi ezazimalunga nesiqingatha zeZibhalo zesiHebhere.—Luka 4:18, 19 (Isaya 61:1, 2); Luka 23:46 (INdumiso 31:5).
4. Nika imizekelo engendlela uYesu awalisebenzisa ngayo iLizwi likaThixo ekufundiseni inyaniso.
4 Kwanasemva kokufa nokuvuswa kwakhe, uKristu wayesasebenzisa iLizwi likaThixo ukufundisa inyaniso. Ngokomzekelo, xa uKleyopa neqabane lakhe babehamba bevela eYerusalem besiya e-Emawusi, uYesu wabanceda abo bafundi ukuba baqiqe ngeZibhalo. Ingxelo ithi: “Uqalele ke kuMoses nakubo bonke abaprofeti, wabachazela kuzo zonke izibhalo iindawo ezingaye.” (Luka 24:25-27) Kamva kwangolo suku, uYesu wabonakala kubapostile abali-11 nakubafundi bakhe abathile ukuze akhe ukholo lwabo. Alwakhe njani? Ngokusebenzisa iZibhalo ngobuchule. ULuka ubhala oku: “Wandula wayivula [uYesu] ingqiqo yabo, ukuze baziqonde izibhalo; wathi kubo, Kubhaliwe ngokunjalo, umelwe ngokunjalo uKristu kukuthi eve ubunzima, abuye avuke kwabafileyo ngomhia wesithathu.”—Luka 24:45, 46.
5. NgePentekoste yowama-33 C.E., uPetros wawulandela njani umzekelo kaKristu ekusebenziseni iZibhalo?
5 Lilandela uMzekelo walo, ngonyaka wama-33 C.E. ibandla lamaKristu laqalisa ubulungiseleli balo basesidlangalaleni ngokusebenzisa iZibhalo. Indawo: kwakusebaleni elingaphandle kwendlu eYerusalem. Emva kokuva isandi “somoya ovuthuza ngamandla” ovela kule ndlu, isihlwele samawaka amaYuda aseYerusalem namaYuda awayeze ngenjongo yokunqula eza kule ndawo aze ahlanganisana. UPetros wasuka wema—abanye abapostile abali-11 bemphahlile—yaye ngelizwi elinamandla waqalisa ukuthetha: “Madoda, maYuda, nani nonke nimiyo eYerusalem, makwazeke oku kuni, niwabekele iindlebe amazwi am.” Yaye ephuhlisa ‘oko kwathethwa ngomprofeti uYoweli’ noko ‘kuthethiweyo nguDavide,’ uPetros ucacisa ummangaliso osandul’ ukwenzeka nokuba “uThixo wamenza iNkosi noKristu, kwayena lo Yesu nambethelelayo emnqamlezweni nina.”—IZenzo 2:2, 14, 16, 25, 36.
6. (a) Cacisa oko kwathi kwenzeka kwintlanganiso yequmrhu elilawulayo lenkulungwane yokuqala. (b) Amabandla aziswa njani ngesigqibo sequmrhu elilawulayo, yaye oko kusiba nayiphi ingenelo?
6 Xa amaKristu okuqala afuna inkcazelo yokuwatyhilela ngokholo nehambo, nequmrhu elilawulayo lenkulungwane yokuqala lazisebenzisa gqitha iZibhalo. Ngokomzekelo, kwintlanganiso yequmrhu elilawulayo ngonyaka wama-49 C.E., umfundi uYakobi, njengosihlalo, watsalel’ ingqalelo yabo kwisibhalo esifanelekileyo esifumaneka kuAmos 9:11, 12. Wathi: “Madoda, bazalwana, ndiphulaphuleni. USimon lo ukucacisile ukuba wathini na ekuqaleni uThixo ukuzivelela iintlanga, ukuba kuzo alinyulele abantu elakhe igama. Ayavumelana nako oko amazwi abaprofeti, njengokuba kubhaliwe.” (IZenzo 15:13-17) Eli qumrhu liphela lahambisana nengcamango kaYakobi laza lazibhala phantsi izigqibo zalo ezisekelwe kwizibhalo ukuze zithunyelwe kuwo onke amabandla zize zifundwe ngawo. Yaba yintoni imiphumo? AmaKristu “aluvuyela uthuthuzelo [ukhuthazo, NW] olu,” yaye “ayezimaseka ke ngoko amabandla elukholweni, esanda ngenani imihla ngemihla.” (IZenzo 15:22-31; 16:4, 5) Ngaloo ndlela, ibandla lokuqala lamaKristu laba ‘yintsika nesiseko sayo inyaniso.’ Kodwa kuthekani ngembali yanamhlanje? Ngaba uC. T. Russell nezinxulumani zakhe ezingabafundi beBhayibhile babeya kuwuxelisa lo mzekelo mhle wenkulungwane yokuqala? Babeya kuyibalaselisa njani inyaniso?—1 Timoti 3:15.
Amaphephancwadi Enzelwe Ukufikelela Kude
7. (a) Yayiyintoni injongo yeZion’s Watch Tower? (b) Yayikhangele kubani ngenkxaso?
7 Isixhobo esiphambili sokukhanyisa iBhayibhile sikaRussell saqala ukubakho ngoJulayi we-1879—iZion’s Watch Tower and Herald of Christ’s Presence. Inkupho yayo yokuqala yachaza injongo ephakamileyo yeli phephancwadi: “Njengoko igama lalo libonisa, linenjongo yokuvakalisa ngeendawo ephuma kuzo imibandela ebangel’ umdla neyingenelo ‘kumhlambi omncinane,’ nanjengaleyo eyi-‘Herald of Christ’s Presence,’ [evakalisa ngobukho bukaKristu] ukuze inikele ‘ukudla ngexesha elifanelekileyo’ kwabo ‘bendlu yokholo.’” Ukukholosa ngoThixo ongusomandla kwakuyinto elalingqiyame ngayo eli phephancwadi. Inkupho yalo yesibini yathi: “‘Sikholelwa ekubeni, iZion’s Watch Tower ixhaswa nguYEHOVA, ibe ngoxa oku kusenjalo ayisayi kuze icele okanye ibongoze abantu ukuba bayixhase. Xa Lowo uthi: ‘Yonke igolide nesilivere esezintabeni yeyam,’ esilela ukulungiselela imali eyimfuneko, siya kuqonda ukuba lixesha lokuba siyiyeke le mpapasho.”
8. Cacisa ngokwanda kweMboniselo ngenxa yoko kuboniswa nguIsaya 60:22 noZekariya 4:10.
8 IZion’s Watch Tower, ngoku eyiThe Watchtower (IMboniselo), iye yapapashwa ngokuzingisileyo ngaphezu kweminyaka eli-107. Iye yanda ukususela kwimibhalo engama-6 000 yephephancwadi lenyanga ngenyanga elalishicilelwe ngolwimi olunye ukusa kwimibhalo eli-12 315 000 zamaphephancwadi aphuma qho kabini ngenyanga nafumaneka ngeelwimi ezili-103.—Thelekisa uIsaya 60:22; Zekariya 4:10.
9. Waba ngofanelekileyo njani umxholo othi IMboniselo?
9 Wahlab’ ekhangele uRussell ngokukhetha umxholo othi Watch Tower. Igama ngokuqhelekileyo elisetyenziselwa “imboniselo” kwiZibhalo zesiHebhere lithetha “isibonelo” okanye “indawo ekujongelwa kuyo,” leyo abengathi umlindi xa ekuyo alubone lula utshaba olusekude aze avakalise isilumkiso kwangaphambili ngengozi ezayo. Ngoko ngokufanelekileyo, kwiminyaka engama-59 yokuqala yokupapashwa kwayo, iphepha elingaphambili lalinale ngcaphulo icel’ umngeni ithatyathwe kuIsaya 21:11, 12 ithi: “Mlindi, kuxa liphi na ebusuku?” “Kuyeza ukusa.”
10. Ngubani okhonza njengomlindi okuIsaya 21:11, ibe sisiphi isigidimi asivakalisayo?
10 Umlindi omisiweyo wesiprofeto sikaIsaya ngokukhawuleza wayemele azibonakalise. Phakathi kwemeko eyesameleyo engendawo yobumnyama bomhlaba, ngovuyo uRussell waye wasasaza iindaba ezilungileyo, ‘zokusa’ okuzayo. ULawulo Lweminyaka Eliwaka loxolo lukaYesu Kristu lungumxholo wesigidimi esilungileyo. Kodwa ngaphambi kokuba kufike “ukusa,” udidi olukhonza njengomlindi—intsalela yoSirayeli wokomoya wanamhlanje—ngokungafihlisiyo lulumkisa ngokuqhubeka ‘kobusuku,’ obuya kufikelela ezona nzulu zabo “emfazweni yaloo mini inkulu kaThixo uSomandla” eArmagedon.—ISityhilelo 16:14-16.
11, 12. (a) Amazwi akuIsaya 21:8 abonisa njani ukuba udidi lomlindi luthembekile yaye luphaphile? (b) Nguwuphi uthunywashe osetyenziswayo ukuzisa ingxelo yanamhla, ibe isasazwa njani ngokuyintloko?
11 Ngaphambilana, kuIsaya 21:8, saziswa ngalo mlindi uthembekileyo ngala mazwi: “Wadanduluka ngelengonyama, esithi, Nkosi, kususela koko ndimi emboniselweni emini, ndizimisile esigxineni sam ubusuku ngobusuku.”
12 Engqondweni yiba nombono womlindi ekwinqaba ephakamileyo, ekrobile, akh’ umkhanya ngoxa lihlab’ umhlaba, encin’ amehlo ukuze abone phezu kwabo nje ubumnyama bobusuku—ephaphe ngalo lonke ixesha. Ngoku unengcamango eyintloko edluliselwa ligama lesiHebhere elithetha “imboniselo” (mits·pehʹ) njengoko lisetyenziswa kuIsaya 21:8. Ekubeni lo mlindi ephaphe kangaka, ngubani osezingqondweni obengayithandabuza ingxelo yakhe enkentezayo? Ngokunjalo namhlanje, udidi lomlindi luye lwazibhokoxa ngokuhlola eZibhalweni ukubona ukuba yintoni na uYehova ayigcinele le nkqubo yezinto. (Yakobi 1:25) Wandula ke lo mlindi abhengeze eso sigidimi ngezwi elikhulu nangokungoyiki, ngokuyintloko ngokusebenzisa IMboniselo. (Thelekisa uAmos 3:4, 8.) Eli phephancwadi alinakuze lithi ngenxa yokoyika lirhoxe ekubalaseliseni inyaniso!—Isaya 43:9, 10.
13. Nguwuphi ulindixesha oliqabane owabakho ngowe-1919, ibe yiyiphi injongo efanayo anayo?
13 Ngo-Oktobha 1, 1919, kwaveliswa iphephancwadi elitsha ehlabathini elithi: The Golden Age.a Udidi lomlindi lwaluya kusisebenzisa esi sixhobo njengesiliqabane leMboniselo. Nangona amanqaku ayo ayengaz’ ukungena nzulu kwimibandela yeBhayibhile njengalawo eMboniselo, yayiza kwenza uluntu luziphaphele iimfundiso zonqulo lobuxoki, intshabalalo ezayo yale nkqubo ingendawo yezinto ikhoyo, nomhlaba omtsha wobulungisa oza kulandela. Ewe, nayo yayiza kubalaselisa inyaniso!
14. Yayiyintoni injongo yeConsolation, neyathi kamva yaba nguVukani!?
14 Kwiminyaka elishumi elinesibhozo kamva igama leThe Golden Age laguqulwa lathi Consolation. Inkupho kaOktobha 6, 1937 yathi: “Eli gama limela inyaniso.” IConsolation yaba yiAwake! (uVukani!) ngenkupho ka-Agasti 22, 1946. Kuloo nkupho wathembisa esithi: “Ukubambelela kwinyaniso kuya kuba yeyona njongo iphambili yeli phephancwadi.” Ukuza kutsho namhlanje, akasilelanga ekusigcineni eso sithembiso. Ngokungenakuthelekiswa nanto, IMboniselo noVukani! zikuphakamisela phezulu ukuxabiseka kwenyaniso ukuze bonke bayibone. Ngokwenjenjalo, la maphephancwadi alandela ikhondo elakhanyiswa libandla lokuqala lamaKristu.—3 Yohane 3, 4, 8.
IMboniselo NoVukani!: Izixhobo Ezibalaselisa Inyaniso
15. (a) Yiyiphi indlela yokusasaza ukudla kokomoya namhlanje efanayo neyayikho kwibandla lamaKristu lokuqala? (b) Ngaphandle kokucaphula iindinyana zeBhayibhile, yintoni enye efunekayo? Nika imizekelo.
15 Udidi ‘lomkhonzi othembekileyo noqondayo,’ “umlindi,” namhlanje usebenzisa iphephancwadi eliyiMboniselo phantsi kolwalatbiso lweQumrhu Elilawulayo lamaNgqina kaYehova njengomjelo walo omkhulu wokusasaza ‘ukudla kokomoya ngexesha elifanelekileyo.’ (Mateyu 24:45) Oku kukulandela umzekelo webandla lenkulungwane yokuqala, elathi labhala ngenkcazelo ecacisa ngemfundiso nangokuziphatha ukuze ‘ileswe ngabo bonke abazalwana.’ (1 Tesalonika 5:27) Ukususela ekuqaleni IMboniselo ibiliphephancwadi elisebenzisa nelifundisa ngeBhayibhile. Ngokomzekelo, inkupho yokuqala yeZion’s Watch Tower yacaphula okanye yabonisa izibhalo ezingaphezu kwama-200 ezivela ubuncinane kwiincwadi zeBhayibhile ezingama-30. Kodwa kufuneka okungakumbi kunokucaphula nje iindinyana zeBhayibhile. Abantu bafuna ukuncedwa ukuze baziqonde. IMboniselo ibisoloko iqulethe ulwazi lweBhayibhile oluhambele phambili. Ukususela ngowe-1892 kuse kowe-1927 inkupho nganye yayiqulethe ufundo lweBhayibhile Iweeveki ngeeveki nengxubusbo yesibhalo esiyintloko kufundo ngalunye. Ukuze ufumane eminye imizekelo, bona isicangca esinomxholo othi “Amanqaku EMboniselo Abalaseleyo Embalini, Kumashumi Ngamashumi Eminyaka.”
16, 17. Umhleli wokuqala weMboniselo wenza ntoni ukuqinisekisa ukuba eli phephancwadi laliya kusoloko libalaselisa inyaniso yeBhayibhile?
16 IMboniselo yayinokukulondoloza njani ukusulungeka kwesigidimi esibhalwe kuyo? Umhleli wokuqala weli phephancwadi, uC. T. Russell, wamisela iziqinisekiso zokuba oko kwakubhaliwe kwiMboniselo kwakuyinyaniso eyayisaziwa ngoko. Esinye sezi ziqinisekiso siye saboniswa kumyolelo wakhe awawenza ngoJuni 27, 1907. (URussell wafa ngo-Oktobha 31, 1916.) Umyolelo wakhe uthi:
“Ndimisela ukuba bonke abahleli beZlON’S WATCH TOWER babe sezandleni zekomiti yabazalwana abahlanu, endibabongoza ukuba babe nenyameko nokuthembeka okukhulu kwinyaniso. Onke amanqaku akwiZION’S WATCH TOWER kufuneka abe ngavunywe ngokupheleleyo ubuncinane ngabathathu bale komiti ibunjwa ngabahlanu, ibe ndenza isibongozo sokuba ukuba nawuphi na umbandela ongqinwa ufanelekile ngabathathu uthi waziwe okanye ucingelwe njengochaseneyo nezimvo zomnye okanye zababini bamanye amalungu ekomiti, amanqaku anjalo aya kuxhonywa ukuze kucingwe ngawo, kuthandazwe yaye kuxutyushwe kangangeenyanga ezintathu ngaphambi kokuba lipapashwe—ukuze kangangoko kunokwenzeka umanyano lokholo namaqhina oxolo alondolozwe kubahleli abangabaphathi balo lindixesha.”
17 Lungu ngalinye leKomiti Yabahleli, ngokomyolelo kaRussell, kwakufuneka “linyaniseke ngokupheleleyo kwiimfundiso zeZibhalo,” ibe kwakufuneka libonise, njengeempawu eziphambili, “ubomi bokuba nyulu, ukucacelwa yinyaniso, ukuzondelela uThixo, ukuthanda abazalwana nokuthembeka kuMhlawuleli.” Kwakhona, uRussell wamisela ukuba “akusayi kuthi nangayiphi na indleia kuboniswe ukuba amanqaku abhaliweyo kulo lindixesha abhalwe ngubani na . . . ukuze inyaniso iqondwe yaye ixatyiswe ngokuxabiseka kwayo, nokuze iNkosi iqondwe ngakumbi njengeNtloko yebandla noMthombo wenyaniso.”
18. Kutheni le nto sinokufunda IMboniselo noVukani! ngentembelo?
18 Ukuza kuthi ga ngoku iQumrhu Elilawulayo lilandela imigaqo yokhokelo efanayo. Nqaku ngalinye kwiMboniselo noVukani! nephepha ngalinye, kuquka nemifanekiso, kuphicothwa ngamalungu akhethiweyo eQumrhu Elilawulayo ngaphambi kokuba lishicileIwe. Ukongezelela, abo bancedisa ekubhaleni amanqaku eMboniselo ngabadala abangamaKristu ababuqondayo ubunzulu besabelo sabo. (Thelekisa eyesi-2 yeziKronike 19:7.) Bachitha iiyure ezininzi ekuhloleni iBhayibhile nezinye iincwadi ekubhekiselwa kuzo ukuqinisekisa ukuba oko kubhaliweyo kuyinyaniso yaye kuzilandela ngokuthembeka iZibhalo. (INtshumayeli 12:9, 10; 2 Timoti 1:13) Akunto ingaqhelekanga ngenqaku elinye elikwiphephancwadi—osenokulifunda ngemizuzu eli-15—ukuba lithabathe ukususela kwiiveki ezimbini ukusa ngaphaya kwenyanga ukulilungiselela.
19. Yintoni onokuyenza ukubalaselisa inyaniso yeBhayibhile?
19 Ngoko ke, unokufunda IMboniselo noVukani! ngentembelo. Kodwa unokwenza okungakumbi. Unokuthi ngehlombe unikele la maphephancwadi kwabanye ukuze nabo bafunde inyaniso baze bangenelwe ekuphulaphuleni isigidimi ‘somlindi omi emboniselweni.’ (Isaya 21:8) Ewe, kunye nomlindi wanamhla, nawe unokuyibalaselisa inyaniso yeBhayibhile.
[Umbhalo osemazantsi]
a Okubangel’ umdla kukuba, abafundi abathile ekuqaleni yabadanisa indlela elalenziwe ngayo iqweqwe elingaphandle leThe Golden Age. Kubo lalibonakala liqheleke gqitha. Ngentsabelo koko ingxelo yonyaka yeWatch Tower Society yathi: “Mayela noku ebesingakutsho nje kukuba kanye ngexesha lokuqaliswa kokupapashwa kweThe Golden Age kwabakho ugwayimbo lwabashicileli kwiNew York Enkulu. Iintsuku nje ezimbalwa ngaphambili, kwakwenziwe isivumelwano sokuba kupapashwe iThe Golden Age yaye amadoda awayesebenzisa oomatshini bokushicilela ababesebenzisa uhlobo Iwephepha neqweqwe elalisetyenziswa kuyo awazange agwayimbe. Ngaloo ndlela kwabonakala kululwalathiso lobuthixo ukuba kukhethwe olo hlobo loqweqwe nephepha, ngesizathu sokuba ukuba babanyule nawaphi na amaphepha angamanye kwakungayi kwenzeka konke konke ukuqalisa eli phephancwadi. Ngaloo ndlela kwabonakala ukuba iNkosi yakholiseka kukuqaliswa kwale mpapasho.”
Uyakhumbula Na?
◻ Kwakutheni aze uC. T. Russell aqalise ukupapasha uncwadi lweBhayibhile?
◻ AmaKristu okuqala ayibalaselisa njani inyaniso?
◻ Kutheni le nto igama elithi “IMboniselo” liseqweqweni leli phephancwadi?
◻ Ungubani “umlindi” wanamhla, ibe sisiphi isixhobo asisebenzisa ngokuyintloko ukuze aphakamise ilizwi lakhe?
◻ IMboniselo noVukani! ziyibalaselisa njani inyaniso?
[Itshati ekwiphepha 13]
Amanqaku EMboniselo Abalaseleyo Embalini, Kumashumi Ngamashumi Eminyaka
1879: “UThixo Uluthando”—labalaselisa idini lentlawulelo likaYesu njengesizinzi sokuhlangulwa kwabantu
1879: “Isizathu Sokuvunyelwa Kobubi”—yacacisa isizathu sokungabonakali kobukho bukaYesu Kristu
1880: “Mnye Umzimba, Mnye Umoya, Linye Ithemba”—lalatha kowe-1914 njengesiphelo samaXesha eeNtlanga
1882: “Umvuzo Wesono Kukufa”—labhenca imfundiso yentuthumbo kanaphakade ikukukhanyela uthando lukaThixo
1885: “Indaleko Nesizukulwana Sengqondo”—labhenca ingcamango yendaleko njengebubuxoki
1897: “Oko Kuthethwa Zizibhalo Ngokukhafula?”—lanikela ubungqina bokuba ukukhafula kuvela kwiidemon
1902: “UThixo Kuqala—Imimiselo Yakhe”—lagxininisa ukuthobela imithetho kaThixo entsatsheni nakwiinkqubano zezoshishino
1919: “Basikelelekile Abangenaloyiko”—lavuselela Intlangano eyayiphakama yabanquli abangenaloyiko
1925: “Ukuzalwa Kohlanga”—lacacisa iziprofeto ezibonisa ukuba uBukumkani bukaThixo bazalwa ngowe-1914
1931: “Igama Elitsha”—ukususela ngoko igama elithi AmaNgqina kaYehova laliya kuwahlula amaKristu okwenyaniso kwiNgqobhoko ewexukileyo
1935: “Isihlwele Esikhulu”—labonisa ukuba ukuhlanganiswa kwabo babeza kuphila ngonaphakade emhlabeni kwakuqhubeka
1938: “Intlangano”—lamisela ilungiselelo lolawulo lokwenyaniso lobuthixo phakathi kwamaNgqina kaYehova
1939: “Ubundilele”—laxhobisa amaNgqina kaYehova zwenibanzi ukuze axhathise iingcinezelo zeMfazwe Yehlabathi II
1942: “Okuphela Kokhanyo”—lavakalisa isibhengezo sokuba kuyiwe phambili ukuze umsebenzi owenziwa ngenkalipho wokunikel’ ubungqina uqhubeke
1945: “Ukungagungqi Ngenxa Yonqulo Olulungileyo”—labonisa ukuba amaKristu amele azinxweme ekwamkeleni ukutofelwa kwegazi
1952: “Ukugcina Intlangano Icocekile”—labonisa ukuba ukususa kubudlelane bebandla kungokweZibhalo
1962: “Intobelo ‘Kumagunya Awongamileyo’—Ngoba?”—lanikela izizathu zokuzithoba ngokomlinganiselo ofanelekileyo kumagunya abantu
1973: “Ukugcina Intlangano KaThixo Icocekile ‘Kwixesha Lomgwebo Wakhe’”—labongoza ukuyekwa kokusetyenziswa kwecuba
1979: “Ukuzondelela Indlu KaYehova”—lagxininisa ukuba ukushumayela kwindlu ngendlu kukulandela umzekelo wabapostile
1982: “Zintanda, . . . Hlalani Nihleli Eluthandweni LukaThixo”—lenza ukuba amaKristu aphaphele iindlela ezisetyenziswa ngabawexuki
1983: “Ukuhamba NoThixo Kwihlabathi Elinogonyamelo”—lagxininisa ukuba amaKristu amele angabi nanxaxheba kugonyamelo
1984: “Ubuhlanti Bakutshanje ‘Bezinye Izimvu’ ”—lacacisa indlela olu didi lwasemhlabeni olumanyaniswa ngayo nabo ‘bakubuhlanti’ bomnqophiso omtsha
1987: “Intlokoma YamaKristu Ifikelela Incopho Yayo KwiMinyaka Eliwaka”—labonisa indlela onke amaKristu anyanisekileyo afumana ngayo ukukhululeka nobomi