Ukukhonza Kunye Nomlindi

“Nkosi, kususela koko ndimi emboniselweni emini, ndizimisile esigxineni sam ubusuku ngobusuku.”—ISAYA 21:8.

1. Liliphi idinga eliphakamileyo elingqinwa nguYehova ngokwakhe?

UYEHOVA uyiMbangi Ebalaseleyo. Ingelosi eyapheq’ idyokhwe yaza yaba nguSathana uMtyholi akukho nto inokuyenza ukuze ikatyise injongo Yakhe ephakamileyo yokungcwalisa igama Lakhe aze amisele ulawulo loBukumkani oluzukileyo kumhlaba oyiparadesi. (Mateyu 6:9, 10) Phantsi kolo lawulo, uluntu luya kusikelelwa ngokwenene. UThixo ‘uya kuginya ukufa kuphele, izisule iNkosi uYehova iinyembezi ebusweni bonke.’ Abantu abonwabileyo nabamanyeneyo baya kunandipha uxolo nenkqubela ngonaphakade. (Isaya 25:8; 65:17-25) UYehova uwangqina ngokwakhe la madinga aphakamileyo!

2. Ngawaphi amangqina angabantu aye amiselwa nguYehova?

² Noko ke, uMdali Ozukileyo ukwanawo namangqina angabantu. Ngaphambi kwexesha lamaKristu ‘ilifu lamangqina,’ elisusela kuAbheli, labaleka ugqatso lonyamezelo, ngokufuthi lisenjenjalo phantsi kweemeko ezinzima kakhulu. Umzekelo walo osemagqabini uyawakhuthaza amaKristu anyanisekileyo namhlanje. UKristu uYesu ungumzekelo oyincamisa wengqina elikhaliphileyo. (Hebhere 11:1–12:2) Ngokomzekelo, khumbula ubungqina bokugqibela awabunikelayo phambi kukaPontiyo Pilato. UYesu wavakalisa oku: “Ndizalelwe oku, yaye ndizele oku ehlabathini, ukuze ndinikele ubungqina kuyo inyaniso.” (Yohane 18:37) Ukususela ngowama-33 C.E. ukuhla ukuza kuthi ga kulo nyaka wama-2000 C.E., amaKristu anenzondelelo aye alandela umzekelo kaYesu yaye aye aqhubeka enikela ubungqina, ezivakalisa ngenkalipho “izinto zobungangamela zikaThixo.”—IZenzo 2:11.

Amahlelo AseBhabhiloni

3. USathana uye wabuchasa njani ubungqina obunikelwe ngoYehova nangokuthanda kwakhe?

³ Ukutyhubela amawaka eminyaka uTshaba olukhulu, uSathana uMtyholi, uye wazama ngolunya ukubusingela phantsi ubungqina obunikelwa ngamangqina kaThixo. Ekubeni ‘inguyise wabo ubuxoki,’ le “namba enkulu, inyoka yantlandlolo,” ‘ibilahlekisa umhlaba omiweyo uphela.’ Ibibeth’ ibuyelela isilwa imfazwe nabo “bagcina imiyalelo kaThixo,” ngokukodwa kule mihla yokugqibela.—Yohane 8:44; ISityhilelo 12:9, 17.

4. Yabakho njani iBhabhiloni Enkulu?

⁴ Kwiminyaka emalunga nama-4 000 eyadlulayo, emva koMkhukula womhla kaNowa, uSathana wavelisa uNimrodi, ‘igorha lezingela nxamnye noYehova.’ (Genesis 10:9, 10, thelekisa iNW.) Isixeko esikhulu sikaNimrodi, iBhabhiloni (iBhabheli), saba sisazulu sonqulo lweedemon. Xa uYehova waphixanisa ulwimi lwabakhi benqaba yaseBhabheli, abantu bathi saa emhlabeni, kwaye bemka nonqulo lwabo lobuxoki. Ngaloo ndlela iBhabhiloni ingumthombo wobukhosi behlabathi bonqulo lobuxoki, obubizwa ngokuba yiBhabhiloni Enkulu kwincwadi yeSityhilelo. Loo ncwadi ixela kusengaphambili ngokubhangiswa kwale nkqubo indala yonqulo.—ISityhilelo 17:5; 18:21.

Uhlanga Lwamangqina

5. Luluphi uhlanga uYehova awalulungelelanisayo ukuze lube ngamangqina akhe, kodwa kwakutheni ukuze aluvumele luthinjwe?

⁵ Kwiminyaka emalunga nama-500 emva kwexesha likaNimrodi, uYehova walungelelanisa inzala ka-Abraham owayethembekile yaba luhlanga lwakwaSirayeli olwaluza kukhonza njengamangqina Akhe emhlabeni. (Isaya 43:10, 12) Uninzi lwabantu bolo hlanga lwakhonza uYehova ngokunyaniseka. Noko ke, ukutyhubela iinkulungwane, iinkolelo zobuxoki zeentlanga ezingabamelwane zamonakalisa uSirayeli, yaye abantu uYehova awayenqophisene nabo bamnikel’ umva baza bangena kunqulo loothixo bobuxoki. Ngenxa yoko, ngowama-607 B.C.E., imikhosi yaseBhabhiloni, eyayikhokelwa nguKumkani uNebhukadenetsare, yatshabalalisa iYerusalem netempile yayo yaza yayithimbela eBhabhiloni inkoliso yamaYuda.

6. Ziziphi iindaba ezilungileyo ezavakaliswa ngumlindi kaYehova ekuthethwa ngaye kwisiprofeto, yaye zazaliseka nini?

⁶ Olunjani uloyiso lonqulo lobuxoki! Noko ke, uloyiso lweBhabhiloni lwalulolwexeshana. Kwiminyaka emalunga nama-200 ngaphambi kokuba kwenzeke eso siganeko, uYehova wayalela oku: “Yiya umise umboniseli, athi akubona into aze kuyixela.” Ziziphi iindaba ezaziza kuvakaliswa ngulo mlindi? “Iwile, iwile iBhabheli; yonke imifanekiso eqingqiweyo yoothixo bayo uyaphulele emhlabeni.” (Isaya 21:6, 9) Kwenzeka loo nto kanye, ngowama-539 B.C.E., amazwi esiprofeto azaliseka. Ingangalala eyiBhabhiloni yawa bhuma, yaye kungekudala abantu awayenqophisene nabo uThixo bakwazi ukubuyela kwilizwe labo.

7. (a) AmaYuda afunda ntoni kuqeqesho lukaYehova? (b) AmaYuda asemva kwexesha lokuthinjwa awela kwiyiphi imigibe, ibe waba yintoni umphumo?

⁷ AmaYuda awayebuya ayefunde isifundo kangangokuba alulahla unqulo lwezithixo kunye nolwemimoya. Noko ke, njengoko iminyaka yayihamba, awela kweminye imigibe. Amanye arhintyelwa yintanda-bulumko yamaGrike. Amanye anamathela kakhulu kwizithethe zabantu ngaphezu kweLizwi likaThixo. Ukanti amanye arhiwulwa ngumoya wokuthand’ izwe. (Marko 7:13; IZenzo 5:37) Ngexesha uYesu awazalwa ngalo, olu hlanga lwaluphinde lwalushiya unqulo olunyulu. Ngoxa amaYuda ngamanye asabela kwiindaba ezilungileyo ezazivakaliswa nguYesu, njengohlanga akazange amamkele ibe ngenxa yoko alahlwa nguThixo. (Yohane 1:9-12; IZenzo 2:36) USirayeli wayengaselongqina likaThixo, yaye ngowama-70 C.E., iYerusalem netempile yayo zaphinda zatshatyalaliswa, ngesi sihlandlo itshatyalaliswa ngumkhosi wamaRoma.—Mateyu 21:43.

8. Ngubani owaba lingqina likaYehova, yaye kutheni isilumkiso sikaPawulos esasisiya kweli ngqina safika ngexesha elililo?

⁸ Kusenzeka yonke loo nto nje, “uSirayeli kaThixo” oyilwe ngamaKristu wayezelwe, ibe ngoku wakhonza njengengqina likaThixo ezintlangeni. (Galati 6:16) Kuthe kungekabi phi, uSathana wenza iyelenqe lokonakalisa olu hlanga lokomoya lutsha. Ithe iphela inkulungwane yokuqala, yabe sele ibonakala impembelelo yamahlelo emabandleni. (ISityhilelo 2:6, 14, 20) Isilumkiso sikaPawulos sasifike ngexesha: “Lumkani: mhlawumbi kusenokubakho uthile oya kunithabatha njengexhoba lakhe ngentanda-bulumko nenkohliso elambathayo ngokwesithethe sabantu, ngokwezinto eziziziqalelo zehlabathi yaye kungekhona ngokukaKristu.”—Kolose 2:8.

9. Kanye njengokuba uPawulos wayelumkisile, ziziphi iziganeko ezaphumela ekuyilweni kweNgqobhoko?

⁹ Ekugqibeleni, intanda-bulumko yamaGrike, iingcamango zonqulo zaseBhabhiloni kunye “nobulumko” babantu obafika kamva obunjengemfundiso yendaleko kunye nohlalutyo oluqatha zalungcolisa unqulo lwabaninzi ababesithi bangamaKristu. Izinto zahamba kanye ngendlela uPawulos awayexele ngayo kwangaphambili: “Ndiyazi ukuba emva kokumka kwam iingcuka ezicinezelayo ziya kungena phakathi kwenu yaye aziyi kuwuphatha ngofefe umhlambi, kwaye phakathi kwenu ngokwenu kuya kusuka amadoda aze athethe izinto ezijijekileyo ukuze abatsale abafundi emva kwawo.” (IZenzo 20:29, 30) Yavela kolo wexuko ke iNgqobhoko.

10. Ziziphi iziganeko ezenza kwabonakala ukuba asinguye wonk’ ubani onikezeleyo kunqulo olungendawo lweNgqobhoko?

¹⁰ Abo babezinikele ngokwenene kunqulo olunyulu kwafuneka ‘balulwele nzima ukholo olwanikelwa kwaba kanye okwexesha lonke kwabo bangcwele.’ (Yude 3) Ngaba ubungqina obunikelwa kunqulo olunyulu nakuYehova babuza kuphela emhlabeni? Akunjalo. Njengoko ixesha lokutshatyalaliswa komvukeli onguSathana nayo yonke imisebenzi yakhe lalisondela, kwabonakala ukuba asinguye wonke ubani owayeyekelele kunqulo lwabawexuki olwaluqheliselwa kwiNgqobhoko. Ngasekupheleni kwenkulungwane ye-19, ePittsburgh, ePennsylvania, eUnited States, kwalungelelaniswa iqela labafundi abanyanisekileyo beBhayibhile laza layila udidi lwamangqina kaThixo anamhlanje. La maKristu atsalela ingqalelo kubungqina obuvela kwiZibhalo bokuba ukuqosheliswa kwale nkqubo yehlabathi ikhoyo kusemnyango. Ngokuvisisana nesiprofeto seBhayibhile, ‘ukuqosheliswa’ kweli hlabathi kwaqalisa ngowe-1914 ngokuqhambuka kwemfazwe yehlabathi yokuqala. (Mateyu 24:3, 7) Kukho ubungqina obunesihlahla bokuba uSathana nemikhosi yakhe yeedemon bakhutshelwa ngaphandle kwamazulu ngaloo nyaka. Inkulungwane yama-20 ebizaliswe ngamajingi-qhiwu iye yabenza bacaca ubungqina bemisebenzi kaSathana kunye nenzaliseko yomqondiso wobukho basebukhosini bukaYesu esemandleni oBukumkani basezulwini.—Mateyu, isahluko 24 nesama-25; Marko, isahluko 13; Luka, isahluko 21; ISityhilelo 12:10, 12.

11. Yintoni eyazanywa nguSathana, kodwa imizamo yakhe yasilela njani?

¹¹ NgoJuni 1918, uSathana wabhuduzela ezama ukutshayela abo bafundi BeBhayibhile, ngoko ababesele beshumayela kumazwe aliqela. Wazama nokutshabalalisa umbutho wabo osemthethweni, iWatch Tower Bible and Tract Society. Amagosa oMbutho akwizikhundla zembopheleleko avalelwa entolongweni, ngobuxoki etyholwa ngokuqhwaya udushe, kanye njengoYesu kwinkulungwane yokuqala. (Luka 23:2) Kodwa ngowe-1919, la magosa akhululwa, nto leyo eyawenza akwazi ukuqhubeka nobulungiseleli bawo. Kamva, ahlanjwa ngokupheleleyo kwezo zityholo.

“Umlindi” Olindileyo

12. Namhlanje ngoobani abayila udidi “lomlindi” kaYehova, yaye sisiphi isimo sengqondo abaye baba naso?

¹² Ngoko ke, xa “ixesha lokuphela” laqalisayo, uYehova waphinda waba nomlindi oliliso, owayelumkisa abantu ngeziganeko ezinento yokwenza nokuzalisekiswa kweenjongo Zakhe. (Daniyeli 12:4; 2 Timoti 3:1) Ukuza kuthi ga namhlanje, olo didi lomlindi—amaKristu athanjisiweyo, uSirayeli kaThixo—belusenza ngokuvisisana nendlela uIsaya amchaza ngayo umlindi ekuthethwa ngaye kwisiprofeto: “Wabaza iindlebe, wazibaza kakhulu kunene. Wadanduluka ngelengonyama, esithi, Nkosi, kususela koko ndimi emboniselweni emini, ndizimisile esigxineni sam ubusuku ngobusuku.” (Isaya 21:7, 8) Lo mlindi yindoda engafekethiyo ngomsebenzi wayo!

13. (a) Sisiphi isigidimi esiye savakaliswa ngumlindi kaYehova? (b) Kunokutshiwo njani ukuba iBhabhiloni Enkulu iwile?

¹³ Wabona ntoni lo mlindi? Kwakhona, umlindi kaYehova, udidi lwamangqina akhe, wavakalisa oku: “Iwile, iwile iBhabheli; yonke imifanekiso eqingqiweyo yoothixo bayo [uYehova] uyaphulele emhlabeni.” (Isaya 21:9) Ngeli xesha, emva kweMfazwe Yehlabathi I, yiBhabhiloni Enkulu, ubukhosi behlabathi bonqulo lobuxoki, engqulwa phantsi ithotywa kwisigxina sayo segunya. (Yeremiya 50:1-3; ISityhilelo 14:8) Yiyo le nto kunje! IMfazwe Enkulu, njengoko yayibizwa njalo ngoko, yaqalisa kwiNgqobhoko, apho abefundisi bamacala omabini babentyontyela olo ngquzulwano ngokufunza umlisela edabini. Elinjani lona ihlazo! Ngowe-1919 iBhabhiloni Enkulu yawa phantsi kwimizamo yayo yokuthintela aBafundi BeBhayibhile, njengoko amaNgqina kaYehova ayesaziwa njalo ngoko, ukuba bangasabi koko kucubhuka kwayo baze baphume iphulo lehlabathi lonke lokunikela ubungqina elisaqhubeka nanamhlanje. (Mateyu 24:14) Oko kwaba luphawu lokuwa kweBhabhiloni Enkulu, kanye njengokuba ukukhululwa kukaSirayeli ngenkulungwane yesithandathu ngaphambi kweXesha Eliqhelekileyo kwaphawula ukuwa kweBhabhiloni yamandulo.

14. Liliphi iphephancwadi eliye lasetyenziswa ngokuyintloko ludidi lomlindi lukaYehova, kwaye uYehova uye wakusikelela njani ukusetyenziswa kwalo?

¹⁴ Udidi lomlindi belusoloko luwenza umsebenzi walo ngenzondelelo yaye lunomnqweno ongazenzisiyo wokwenza okulungileyo. NgoJulayi 1879, aBafundi BeBhayibhile baqalisa ukupapasha eli phephancwadi, ngoko elalisaziwa ngokuba yiZion’s Watch Tower and Herald of Christ’s Presence. Inkupho nganye, ukususela ngowe-1879 ukuya kutsho kuDisemba 15, 1938, kwiphepha elingaphandle yayinamazwi athi “‘Mlindi, Kuxa Liphi Na Ebusuku?’—Isaya 21:11.”a IMboniselo iye yabek’ iso ngokuthembeka kwiziganeko zehlabathi nakwindlela ezizizalisekisa ngayo iziprofeto kangangeminyaka eli-120. (2 Timoti 3:1-5, 13) Udidi lomlindi lukaThixo kunye “nezinye izimvu” ezingoogxa balo luye lwasebenzisa eli phephancwadi ukuze luvakalise ngamandla kuluntu ukuba ukuthethelelwa kolongamo lukaYehova ngoBukumkani bukaKristu kusemnyango. (Yohane 10:16) Ngaba obu bungqina buye basikelelwa nguYehova? Kaloku, ukususela kwinkupho yokuqala ekwahamba kuyo imibhalo engama-6 000 ngowe-1879, inani leeMboniselo ezisasazwa ehlabathini lonke lintinge laya kutsho ngaphezu kwemibhalo engama-22 000 000 ngeelwimi ezili-132—ezili-121 kwezi zipapashwa ngaxeshanye. Hayi indlela ekufaneleke ngayo ukuba elona phephancwadi lonqulo elisasazwa kakhulu emhlabeni ibe lelo liphakamisa igama loThixo wenyaniso, uYehova!

Ukuhlanjululwa Ngokuqhubekayo

15. Kukuphi ukuhlanjululwa ngokuqhubekayo okwaqalisa ngaphambi kowe-1914?

¹⁵ Ebudeni beminyaka enokuba ngama-40 ngaphambi kokuba ulawulo lwasezulwini lukaKristu luqalise ngowe-1914, aBafundi BeBhayibhile babekhululwe kwinkoliso yeemfundiso zeNgqobhoko ezingasekelwanga eBhayibhileni, ezinjengokubhaptizwa kweentsana, ukungafi komphefumlo womntu, indawo yentlambululo-miphefumlo, ukuthuthunjiswa kwisihogo esivuthayo kunye nengcamango yokuba uThixo unguBathathu Emnye. Kodwa kwathabatha ixesha elingakumbi ukuze kukhuculwe zonke iingcamango eziphosakeleyo. Ngokomzekelo, ngeminyaka yee-1920 uninzi lwaBafundi BeBhayibhile lwalunxiba ibrotshi enomnqamlezo onesithsaba, ibe lwalubhiyozela iKrismesi kunye nezinye iiholide zobuhedeni. Noko ke, ukuze unqulo lube nyulu, yonke imizila yonqulo-zithixo kufuneka ishenxiswe. ILizwi likaThixo, iBhayibhile Engcwele, limele libe sisiseko esingundoqo sokholo lwamaKristu kunye nendlela aphila ngayo. (Isaya 8:19, 20; Roma 15:4) Kuphosakele ukongezelela okanye ukuphungula nantoni na kwiLizwi likaThixo.—Duteronomi 4:2; ISityhilelo 22:18, 19.

16, 17. (a) Yiyiphi ingcamango ephosakeleyo udidi lomlindi olwalukholelwa kuyo kangangamashumi eminyaka? (b) Yiyiphi ingcaciso echanileyo ‘yesibingelelo’ kunye ‘nelitye’ elimiswe ‘eYiputa’?

¹⁶ Ukho umzekelo obethelela ukubaluleka kwalo mgaqo. Ngowe-1886, xa uC. T. Russell wapapasha incwadi eyabizwa ngokuba yiDivine Plan of the Ages, lo mqulu wawunesicangca esasinxibelelanisa izizukulwana zabantu kunye nePiramidi Enkulu yaseYiputa. Kwakucingwa ukuba esi sikhumbuzo sikaPharaoh Khufu sasililitye ekuthethwa ngalo kuIsaya 19:19, 20: “Ngaloo mini kuya kubakho isibingelelo kuYehova phakathi kwelizwe lamaYiputa, nelitye elimisiweyo kuYehova ngasemdeni walo. Oko koba ngumqondiso nobungqina kuYehova wemikhosi ezweni lamaYiputa.” Le piramidi yayidibana njani neBhayibhile? Ngokomzekelo, ubude bezinye iipaseji ezikwiPiramidi Enkulu ngelo xesha babugqalwa njengobubonisa ixesha lokuqalisa ‘kwembandezelo enkulu’ ekuthethwa ngayo kuMateyu 24:21. Abanye aBafundi BeBhayibhile babethe swi-i kukulinganisa iinkalo ezahlukeneyo zepiramidi ukuze baqonde izinto ezifana nomhla ababeza kuya ngawo ezulwini!

¹⁷ Le piramidi eyayibizwa ngokuba yiBhayibhile Yelitye yagqalwa njengento ebalulekileyo kangangamashumi eminyaka, de iinkupho zeMboniselo zikaNovemba 15 nekaDisemba 1, 1928, zalikhupha latsola elokuba uYehova akafuni litye lesikhumbuzo elakhiwe ngoofaro abangabahedeni nelinemiqondiso yeedemon yokuvumisa ngeenkwenkwezi ukuze aqinisekise ubungqina obunikelwe eBhayibhileni. Kunoko, isiprofeto sikaIsaya sagqalwa njengesizaliseka ngengqiqo yokomoya. NjengakwiSityhilelo 11:8, “iYiputa” ifuzisela ihlabathi likaSathana. “Isibingelelo kuYehova” sisikhumbuza ngamadini amkelekileyo awenziwa ngamaKristu athanjisiweyo ngoxa engabemi bokwexeshana beli hlabathi. (Roma 12:1; Hebhere 13:15, 16) ‘Ilitye elimiswe ngasemdeni weYiputa’ lifuzisela ibandla lamaKristu athanjisiweyo ‘eliyintsika nesixhaso senyaniso,’ nelimi njengobungqina ‘eYiputa,’ ihlabathi aza kulishiya kungekudala.—1 Timoti 3:15.

18. (a) UYehova uye waqhubeka njani ecacisa izinto kubafundi beBhayibhile abanyanisekileyo? (b) Xa umKristu efumanisa kunzima ukuyiqonda ingcaciso ethile yeZibhalo, sisiphi isimo sengqondo ekububulumko ukuba abe naso?

¹⁸ Njengoko iminyaka ihamba, uYehova uyaqhubeka esikhanyisela nangakumbi ngenyaniso, kuquka nendlela ecacileyo esimele siliqonde ngayo ilizwi lakhe lesiprofeto. (IMizekeliso 4:18) Kwiminyaka yakutshanje, siye saphinda sakhuthazwa ukuba sihlolisise nzulu—phakathi kwezinye izinto—isizukulwana esingayi kudlula ngaphambi kokuba isiphelo sifike, umzekeliso wezimvu neebhokhwe, into elizothe nexesha eza kuma ngalo kwindawo engcwele, umnqophiso omtsha, umbono wokwenziwa kumila kumbi kunye nombono wetempile wencwadi kaHezekile. Maxa wambi kusenokuba nzima ukuziqonda ezi ngcaciso zintsha, kodwa izizathu ziye zicace nangakumbi njengoko ixesha lihamba. Ukuba umKristu akayiqondi ngokupheleleyo ingcaciso yendinyana ethile, uya kuba uyatyapha xa evakalelwa ngendlela umprofeti uMika awavakalelwa ngayo: “Ndiya kulindela kuThixo wokusindiswa kwam.”—Mika 7:7.

19. Intsalela yabathanjiswa kunye noogxa bayo bezinye izimvu iye yakhalipha njani njengengonyama kule mihla yokugqibela?

¹⁹ Khumbula kaloku ukuba lo mlindi “wadanduluka ngelengonyama, esithi, Nkosi, kususela koko ndimi emboniselweni emini, ndizimisile esigxineni sam ubusuku ngobusuku.” (Isaya 21:8) Intsalela ethanjisiweyo iye yanenkalipho efana neyengonyama xa ibibhenca unqulo lobuxoki yaye ibonisa abantu indlela eya kwinkululeko. (ISityhilelo 18:2-5) ‘Njengekhoboka elithembekileyo neliyingqondi,’ iye yalungiselela ukuba kubekho iiBhayibhile, amaphephancwadi nezinye iimpapasho ngeelwimi ezininzi—‘ukutya ngexesha elifanelekileyo.’ (Mateyu 24:45) Iye yakhokela ekuhlanganiseni “isihlwele esikhulu . . . siphuma kuzo zonke iintlanga nezizwe namaqela abantu neelwimi.” Naso sihlanjwa ngegazi elihlawulelayo likaYesu yaye sikhaliphile ekunikeleni kuThixo “inkonzo engcwele . . . imini nobusuku.” (ISityhilelo 7:9, 14, 15) Siye sanjani isiqhamo sebathwana elisaseleyo lamaNgqina kaYehova athanjisiweyo noogxa bawo, isihlwele esikhulu, kulo nyaka uphelileyo? Inqaku lethu elilandelayo liza kusichazela.

[Umbhalo osemazantsi]

Ngaba Usakhumbula?

• Ngawaphi amangqina aye amiselwa nguYehova ukutyhubela iminyaka?

• Yayivela phi iBhabhiloni Enkulu?

• Kwakutheni ukuze uYehova avumele iYerusalem, isixeko esilikomkhulu sohlanga olungamangqina akhe, itshatyalaliswe ngowama-607 B.C.E.? ngowama-70 C.E.?

• Nguwuphi umoya oluye lwanawo udidi lomlindi kaYehova noogxa balo?

[Umfanekiso okwiphepha 7]

“Nkosi, kususela koko ndimi emboniselweni”

[Imifanekiso ekwiphepha 10]

Udidi lomlindi kaYehova alufekethi ngomsebenzi walo