Incwadana Enemifanekiso Ehlaziyiweyo
INKCAZELO ekwinqaku elandulelayo yanikelwa emhlabeni wonke ebudeni bowe-1986 kwiiNdibano Zesithili “Zoxolo Lobuthixo” zamaNgqina kaYehova. Apha sishwankathela amagqabaza angakumbi nabangel’ umdla awavakaliswa sisithethi:
“Khangela! Izinto Zonke Ndizenza Ntsha.”—Lowo yayingumxholo wencwadana eyapapashwa yiWatch Tower Society emva phaya ngowe-1959. Incwadana elolu hlobo yathi yacelwa ngabavangeli basemazweni eJapan. Apho baba noluvo lokuba kwakufuneka impapasho eyayiya kunikela isigidimi soBukumkani ngendlela ecacileyo nelula ukuze kungenelwe abantu abangaqhelananga kakuhle neBhayibhile. Phantsi kokonganyelwa nguMbutho weWatch Tower, abavangeli basemazweni abangaphezu kwama-30 baba nesabelo ekuqulunqeni le ncwadana. Ngaba le ncwadana intsha yahlangabezana nale ntswelo xa yathi yaba sisixhobo esiphambili sokuqalisa izifundo ezitsha eJapan?
Imiphumo iyazithethela. Ngexesha ekwakukhutshwa ngalo le ncwadana ithi “Khangela!”, kwakukho incopho yabavakallsi abali-1 390 eJapan. Namhlanje, incopho ekhoyo ngabavakalisi abali-114 480. Phantse bonke aba baqallsa isifundo seBhayibhile ngencwadana ethi “Khangela!” Ebudeni beminyaka engama-27 edluleyo, imibhalo engaphezu kwe-8 750 000 yale ncwadana iye yasasazwa ngolwimi IwesiJapan kuphela. Ibe kwiminyaka engama-20 edluleyo, iJapan iye yanikela ingxelo yencopho entsha yabavakalisi nyanga nganye ngaphandle kwezimbini. Nangona ngaphandle kwamathandabuzo izizathu ezithile ezizezinye nazo zafak’ isandla kolu lwando luhle, alithandabuzeki elokuba ukusebenzisa incwadana ethi “Khangela!” ukuqalisa izifundo zeBhayibhile kube ngunobangela omkhulu wolwando.
Le ncwadana ngoku iye yaphuculwa, ngokweentswelo ezikhoyo, ibe yakhutshwa kwiindibano “Zoxolo Lobuthixo” iyincwadana engangephephancwadi elinamaphepha angama-32. Kuye kongezelelwa icandelo elitsha elinomxholo othi “Izinto Ezimbi—Kutheni UThixo Ezivumela Zenzeke?” Ngokubhekele phaya, iziqendu zokugqibela ziye zabhalwa ngokutsha ukunika umfundi ukhuthazo olufudumeleyo lokunxulumana nentlangano kaYehova. Ngoku le mpapasho ibhalwe kakhulu, ifundeka lula yaye inemifanekiso eliqela efundisayo. Imifanekiso yayo emihle emitsha nenemibala emine iye yacuthwa kwelinye icala lephepha.
Ngaba le ncwadana intsha inemifanekiso nenomxholo othi, “Uyabona, Izinto Zonke Ndizenza Ntsha,” iza kusetyenziswa eMpuma kuphela? Ngokungathandabuzekiyo iya kuphumelela gqitha apho. Noko ke, kukholelwa ukuba le ncwadana inemifanekiso ithi “Uyabona,” iza kusebenziseka nakuyo yonke intsimi yehlabathi ekuqaliseni izifundo zeBhayibhile. Phantse sele kudlule iminyaka engama-30 ukususela oko yaqalayo ukuveliswa le ncwadana. Ebudeni belo xesha, ulwazi lweBhayibhile luye lwehla ngakumbi, kwanakumazwe azibiza ngokuba ngawobuKristu. Kunokuphulaphula kubazali baso amabali awaziwa gqitha asuka eBhayibhileni, isizukulwana esitsha sikhule sibukela yaye siphulaphula umabonwakude, sifunxa nantoni na enikelwa lihlabathi. Oku, kunye nezinye izinto eziphazamisayo ezikweli hlabathi lithe ti ziziyolo, kuye kwadla iiyure ezixabisekileyo ebezinokusetyenziselwa ekukhuleni ngokomoya. Isizukulwana sanamhla, enoba kukwiNgqobhoko okanye kukwenye indawo, sazi okuncinane ngeLizwi likaThixo. Sifuna ‘ubisi lwelizwi,’ njengoko kwandlalwe ngokucacileyo kule ncwadana ithi “Uyabona”.—Hebhere 5:12.
Ehlabathini jikelele, kukho abantu abaneentliziyo ezityekele kubulungisa nabaya kukuvuyela ukufunda indlela abanokuthi bafaniswe ngayo kunye ‘nesihlwele esikhulu,’ esiya kusinda kwiArmagedon. (ISityhilelo 7:9, 14) Kwinkonzo yethu yendlu ngendlu, sisenokufumana abaninzi abachukunyiswayo liqweqwe elinemifanekiso ethandekayo lale ncwadana inemifanekiso kwanengcaciso etsalayo yeParadisi kwiziqendu zokuqala. Ekubuyeleni, sisenokusebenzisa udederhu lwezibhalo ezibonisiweyo ezixhasa ezo ziqendu ukubonisa ukuba eli themba asilophupha nje. Ngoko, ekuqhubeni kwethu ngokuthe rhoqo isifundo seBhayibhile, ngoncedo lwencwadana enemifanekiso ethi “Uyabona,” sinokubanceda baqalise kwindlela esa ebomini. Kunjengokuba uYesu wathi kuYise emthandazweni: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3.
Ngamana sonke singayisebenzisa ngokunenzondelelo le ncwadana inemifanekiso ithi “Uyabona,” ekuqaqambiseni inyaniso yoBukumkani, “isihlwele esikhulu” sithelela intsalela yabo bathanjisiweyo isibingeleli esibukumkani ‘ekukhanyiseni ukukhanya kwaso phambi kwabantu.’ (Mateyu 5:16) Ngamana igama elingenakuthelekiswa nanto leNkosi enguMongami uYehova lingangcwaliswa ngokupheleleyo. Ngamana kungaboniswa ngalo lonke ixesha ukuba amadinga kaYehova uThixo, uMdali wezulu nomhlaba, ahlala ‘ethembekile yaye eyinyaniso.’ Nguye ovakalisa oku ekwitrone yakhe yasezulwini: “Uyabona, izinto zonke ndizenza ntsha.”—ISityhilelo 21:5.
Incwadana enemifanekiso nenomxholo othi “Uyabona, Izinto Zonke Ndizenza Ntsha,” kunye nezingamaqabane ayo ezithi Urhulumente Oya Kuzisa IParadisi kunye nethi Igama LikaThixo Eliya Kuhlala Likho Ngonaphakade ziya kuthunyelwa kuwe ukuba uzicelile, uthumela nomnikelo we-R1,50. Nceda uodole kwikhelingi efanelekileyo njengoko zidweliswe kwiphepha 2.