Amabhinqa AngamaKristu—Agcina Ingqibelelo Kwiindawo Zempangelo

“MAXA wambi [emsebenzini] unxunguphalo luba lukhulu kangangokuba unokulusika ngesitshetshe.” Latsho njalo elinye ibhinqa eliphangelayo.a Ingcinezelo yokuba ube ngonemveliso, ukhuphiswano olunenkohliso, abaphathi abafuna izinto ngegunya, izinto eziphindaphindwa ngokudinayo—ezi zizinto nje ezimbalwa ezenza ukuba imisebenzi emininzi ibe yekruqulayo. Imbalwa imisebenzi eba nomtsalane noyolo oluthenjiswa liziko lokusasazwa kweendaba. Kodwa ukuba ulibhinqa eliphangelayo, ufanele uzabalazele ukwenza umsebenzi wakho ube ngophumelelayo.

Phofu ke, ngoku kungasentla asibhekiseli kwinzuzo yemali. Indawo yempangelo ingummandla apho ingqibelelo yakho yobuKristu ivavanywa khona! Indlela ozenza ngayo izinto emsebenzini wakho, ukuphepha umoya wokhuphiswano lwenkohlakalo nokuxhathisa ukugabadela kokuziphatha kutyhila umlinganiselo ozinikele ngawo kwimigaqo yokuhlonel’ uThixo. Ukuze lizuze inkoliseko kaYehova uThixo, ibhinqa eliphangelayo limele likwazi ukuthetha oku njengokuba wenzayo umdumisi: “Mna ndihambe engqibelelweni yam.”—INdumiso 26:1.

IBhayibhile iyakunceda ukuba wenze kanye oko. Ngokomzekelo, xa ubongozelwa ukuba uphumeze amacebo athile nokuba sekumnyam’ entla okanye xa uhendelwa ukuba uvumele umsebenzi uhambe phambili kuneembopheleleko zentsapho, ufundisiso lweBhayibhile, iintlanganiso zamaKristu nobulungiseleli, usenokuwakhumbula kakuhle amazwi kaKumkani uSolomon athi: “Kananjalo ndayiqonda ke mna yonke imigudu, nayo yonke impumelelo yomsebenzi, ukuba ingumona nokwanyelana. Kwanaloo nto ingamampunge, nokusukelana nomoya.” (INtshumayeli 4:4) Ukuwujonga ngale ndlela umsebenzi wempangelo kuthintela okanye kuthomalalisa ibhongo elivuthayo. Kukunceda ukuba ube nembono efanelekileyo ngomsebenzi, uwujonga njengoza kwindawo yesibini kwimicimbi yokomoya.—Mateyu 6:33.

Kodwa ngaba oku kuthetha ukuba ube ngongawukhathaleliyo umsebenzi wempangelo? Kungangenkankulu ukuba kube njalo, kuba iBhayibhile iyabugweba ubuvila. (IMizekeliso 19:15) Ithetha ‘ngokubona okulungileyo emigudwini yakho.’ (INtshumayeli 2:24) Ngaphezu koko, ukuyilungiselela kukabani intsapho yakhe kuyimbopheleleko enikelwe nguThixo. (1 Timoti 5:8) Ngoko ukuba ukuhlangabezana naloo mfanelo kuthetha ukwenza umsebenzi wempangelo ongayolisiyo, khumbula amazwi eBhayibhile akumaKolose 3:23 athi: “Nako konke enisukuba nikwenza, kusebenzeni ngokwasemphefumlweni, kunge kukwiNkosi [uYehova], akukhona kubantu.” Ukuzijonga kukabani ngokunga usebenzela “uYehova” kuyintshukumisa enamandla yokuba ngonemveliso, enkulu ngakumbi gqitha kunokunyuswa komvuzo okanye umtsalane wokunyuselwa.

“Kunzima Ukukholisa” Abaqeshi

Ibhinqa eligama linguSally lithi: “Ndiye ndizive ngokungathi [umphathi wam] usoloko endikhangele ngalo lonke ixesha. Akakwazi kumncoma nabani na.” Ukusebenza phantsi komphathi “ekunzima ukumkholisa” okanye okhawuleza abe nomsindo kunokudanisa ngendlela efanayo, ingakumbi xa ubani esemtsha kwindawo yempangelo.—1 Petros 2:18, NW.

Noko ke, ukuwushiya kusenokuba yinto engenakwenzeka ngenxa yobunzima bezoqoqosho. Ngaloo ndlela kusenokuba kokona kulungileyo ukulandela icebiso leBhayibhile lokuba abasebenzi—abangamadoda nabangamabhinqa—“bathobele.” (1 Petros 2:18) Kunokuba uphakamise imbambano ngokuphoxa okanye ngokungabi nantlonelo, zama ukuba ‘ngokholeke kakuhle [kubaqeshi], ungaphiki.’ (Tito 2:9) Ukuzeyisa okunjalo kusenokude kukuthintele ekuphulukaneni nomsebenzi wakho. USolomon wathi: “Ukuba ukufutha komlawuli [uthile osegunyeni] kuthe kwenyuka kwakuchasa, musa ukuyishiya indawo yakho; ngokuba ubulali buleleza izono ezinkulu.”—INtshumayeli 10:4.

Umphathi womsebenzi ongqwabalala usenokude abe neentloni xa ukungabi namonde kwakhe kubuyekezwa ngobulali, ukufuna kwakhe izinto ngegunya nangokungekho ngqiqweni kubuyekezwa ngobubele. (IMizekeliso 15:1; Kolose 4:6) Ibe njengokuba uzingqina ufanelekile yaye ungumntu onokuthenjwa, isimo sakhe sengqondo ngakuwe sisenokuguquka ngokuthe ngcembe. Ukuba akunjalo, usenokukhetha ‘ukunyamezela,’ usazi ukuba uThixo uyakholiswa yihambo yakho yobuKristu.—Yakobi 5:7, 8.

Ukuhlala Unyulu Ngokuziphatha

Ingqibelelo ikwabandakanya ukuziphatha kobuKristu. Inqaku elikwiLadies’ Home Journal lalumkisa lathi: “Eofisini—apho wonk’ ubani alindeleke ukuba anxibe kakuhle, aziphathe kakuhle, achithe ixesha nabanye yaye abe nosukelo olufanayo nolwabanye—kukho imekobume enokwenza kube lula ukuhlaselwa ngokwesini.” Imicimbi yaseofisini iyinto eqhelekileyo. Ngoko kububulumko ukuba ngophaphileyo. Ulwalamano lwakho namadoda emsebenzini lugcine lukwizinto ezingomsebenzi. Ziphephe iincoko ezinokuvuselela iimvakalelo zothando. “Kuba oku kukuthanda kukaThixo, . . . ukuba nikhumke kulo uhenyuzo.”—1 Tesalonika 4:3, 4.

Noko ke, maxa wambi amabhinqa aba ngamaxhoba engxaki ekudala ikho: ukuxhatshazwa ngokwesini. IBhayibhile isixelela ukuba indoda egama linguBhohazi yayalela abafana ababeyisebenzela ukuba ‘bangamchukumisi’ uRute, ibhinqa elalisebenza kwintsimi yakhe. Umphengululi weBhayibhile uJohn P. Lange uthetha “ngeziqhulo ezirhabaxa ababesithi mhlawumbi abo basebenzi bakudidi oluphantsi bakwenze umkhwa wabo ukuhlasela ngazo amabhinqa.” (Rute 2:9) Ibe nangona abaqeshi abathile banamhlanje bezama ukukhusela abaqeshwa babo abangamabhinqa, bambi baqikelela ukuba amabhinqa aphangelayo angama-40 ukuya kwangama-85 ekhulwini (eUnited States) aye achanabeka kuhlobo oluthile lokuxhatshazwa ngokwesini.

Ngokomzekelo, ibhinqa eliselula eligama linguValerie lalisebenza njengonobhala. Ngamathub’ athile, umphathi wakhe—owayemdala ngeminyaka ephindwe kathathu kunaye—wayeye athethe amazwi avuselela inkanuko ngesinxibo sakhe. Ngesinye isihlandlo wazama ukumhenda ngokumenza akhangele imifanekiso yezinto ezibonisa amanyala. Ekugqibeleni, wambizela kwiofisi yakhe waza wamxelela oku, “Ukuze uhlale emsebenzini wakho, kuya kufuneka ukuba ube neentlobano zesini kunye nam.” Noko ke, wakwala ukwenjenjalo.

Impatho enjalo ethob’ isidima yenzeka ngeendlela ezininzi. Iphephancwadi laseBritani eliyiNew Statesman lithi: “Oku kususela ekuqwalaseleni ngamehlo anenkanuko, ekutswebeni, ekuphathaneni emzimbeni ngokungeyomfuneko nasekuthukeni.” Ngokufuthi ingcinezelo yokubandakanyeka ekuziphatheni okubi ngokwesini inobuqhophololo njengokubizwa ngamagama abonakalisa uthando (Honey, Sweetheart) okanye kucace njengokuthi ucela ukuba ube sisithandwa sakhe. Wambi amabhinqa ayakunyamezela ukuxhatshazwa kuba esoyikela ukuphulukana nemisebenzi yawo. Ibe uhlolisiso lubonisa ukuba amabhinqa ambalwa asenokude abonakale ekhohliswa kukunikelwa kwawo ingqalelo!

Kodwa ngoxa ingqalelo evela kumntu wesini esahlukileyo isenokuba yekhohlisayo, ukuqhelana ngokugqith’ emgceni kudla ngokuba linqanaba lokuqala ekulukuhlelweni ukuba ube neentlobano zesini ezingekho mthethweni. Ngaloo ndlela oko kuyayihlasela ingqibelelo yakho yaye kulwa nesidima sakho sobuKristu.—1 Korinte 6:18.

Imilinganiselo Ethintelayo

“Kuba ubulumko buya kungena entliziyweni yakho, . . . ukunkqangiyela kokugcina, ukuqonda kokulondoloza.” (IMizekeliso 2:10, 11) Ngoko unokubusebenzisa njani ubulumko nokuqonda okuluncedo ukuze uzikhusele? Ibhinqa eliphangelayo eligama linguDiane lithi: “Ndiyenza yaziwe emsebenzini into yokuba ndilelinye lamaNgqina kaYehova.” (Thelekisa uMateyu 5:16.) Xa amadoda esazi ukuba unemilinganiselo ephakamileyo yokuziphatha, ngokufuthi kunokwenzeka ukuba ayeke ukukuhenda.

Kanti ibhinqa elinengqiqo eligama linguBetty linikela esinye isilumkiso. Lithi: “Ndikulumkele gqitha ukubutha nabo ndisebenza nabo kuba ukuziphatha kwabo akufani nokwam.” (1 Korinte 15:33) Oku akuthethi ukuba ube ngoziphakamisileyo okanye ubathiye abo usebenza nabo. Kodwa xa bezingisa ekuthetheni ngezinto ezikhubekisayo kumKristu, musa ukuphozis’ amaseko ekuzinxwemeni kubo. (Efese 5:3, 4) Ukuphulaphula kwakho kwintetho yokuziphatha okubi okulolo hlobo kunokuwanika amadoda asemsebenzini ingcamango yokuba uya kuyekelela kwizihendo zawo.

Ukulondoloza unxulumano ngezinto ezingomsebenzi nako kunokuyiphelisa ingqalelo ongayifuniyo. Kwakhona, iBhayibhile icebisa amabhinqa ukuba ‘anxibe iingubo ezifanelekileyo, eneentloni, enesidima.’ (1 Timoti 2:9; thelekisa IMizekeliso 7:10.) Incwadi ethi Sexual Harrasment on the Job ithi: “Isinxibo esixhokonxayo—oko kukuthi, ukuzigaxa ngeentsimbi zomqala; ukunxiba iilokhwe ezivelisa amalungu athile omzimba; imibhinqo emifutshane; nokuzithambisa ngokugqithiseleyo—ezo zinto azifuneki kwindawo yempangelo. . . . Amathuba akho okubangela ukuba ubonwe ungowufanelekele kakuhle umsebenzi aba ngalunge ngakumbi ukuba ukhetha ukunxiba ngendlela engekho mbejembeje.”

Okokugqibela, ibhinqa eliqiqayo liyaziphepha iimeko ezibangela ukulalanisa. Ukumenyelwa ukuba ufumane isiselo esinxilisayo okanye usale emsebenzini emva kweeyure zomsebenzi kungekho sizathu sicacileyo soko kusenokuba ngumgibe wokwenene. (Thelekisa eyesi-2 kaSamuweli 13:1-14.) Umzekeliso wobulumko uthi, “Onobuqili ubona into embi, azifihle.”—IMizekeliso 22:3.

Ukunqumamisa Ukuxhatshazwa

Kambe ke, akunto ingekho ngqiqweni ukuthelekelela ukuba unokukuhlengahlengisa ukucinga kwawo onke amadoda asemsebenzini okanye uguqule iindlela zokuziphatha esezendele ithuba elide. (Thelekisa uYeremiya 13:23.) Ibe akunto ifanelekileyo ukugqiba kwelokuba onke amadoda abonakala enobuhlobo ngokugqithiseleyo ‘anamehlo azele lukrexezo.’ (2 Petros 2:14) Ngoko maxa wambi kufanelekile ukungamcingeli umntu ngoxa ungaqinisekanga ngakucingayo.

Kodwa xa ukuqhelana ngokugqith’ emgceni nokucacileyo kubandakanyekile, yima ngokuqinileyo. Xa uSolomon wenza ubuhlobo obungafunekiyo kwintombi eyayiselula, yayingenantloni. Yasabela kubuqhophololo bakhe ngamazwi abonakalisa ukuyithanda ngokungaguqukiyo le nkwenkwe engumalusi eyayizithobile. Ekubeni yayilandule ukuyekelela kwizihendo zikaSolomon, yayinokuthi: “Ndaba ludonga mna.”—INgoma yazo iiNgoma 8:10.

Nawe bonakalisa ukuqina okunjalo. Ngokufuthi izihendo zinokupheliswa kusaqala ngokuthi: “Nceda ungandiphathi,” “Ndibize ngegama lam,” okanye “Andisithandi eso siqhulo.” Elinye ibhinqa elingumKristu lathetha oku ngokuphindaphindiweyo, “Ungathethi ngolo hlobo!” Nokuba kutheni na, yenze icace into yokuba uhayi wakho nguhayi! (Thelekisa uMateyu 5:37.) Ukuphendula ngendlela engacacanga okanye e-ethe-ethe kunokusuka nje kumkhuthaze umxhaphazi ukuba azame ngamandla.

Ukuba utshatile, bekuya kuba kuhle ukuchaza iimvakalelo zakho kumyeni wakho. Usenokuba uneembono ezithile eziluncedo ngendlela yokusingatha imeko. Ukuba kubonakala kukokona kulungileyo ukuwutshintsha umsebenzi, khumbula eli dinga likaThixo: “Andiyi kukha ndikuyekele, andiyi kukha ndikushiye.”—Hebhere 13:5.

Umsebenzi Wakho Nengqibelelo Yakho

Ngoko ngoxa umsebenzi wempangelo udla ngokuba yimfuneko, kwiimeko ezithile unokuzisa izisongelo kwingqibelelo yakho yobuKristu. Ngaloo ndlela afaneleke ngokupheleleyo amazwi kaYesu akuMateyu 10:16 athi: “Yibani nobulumko njengeenyoka, nibe njengamahobe ukungabi nabuqhinga.”

Ukugcina ingqibelelo yobuKristu kwindawo yempangelo akunto ilula, kodwa kunokwenziwa. Amawaka amabhinqa aphakathi kwamaNgqina kaYehova enjenjalo ngokulandela isiluleko seBhayibhile. Azigcina omelele ngokomoya ngokufundisisa iBhayibhile, ngomthandazo, ngeentlanganiso zamaKristu, ngomsebenzi wokushumayela uBukumkani nangeminye imisebenzi yokuhlonel’ uThixo. Ngenxa yoko, anandipha into engenakunikelwa nangumvuzo wemali. Lulwazi lokuba akholekile kuThixo, Lowo iLizwi lakhe elithembisa oku: “Ohamba ngengqibelelo uhamba ngenkoloseko.”—IMizekeliso 10:9.

[Umbhalo osemazantsi]

[Imifanekiso ekwiphepha 7]

Ukuze Ulondoloze Ingqibelelo Kwindawo Yempangelo:

Kulumkele ukubutha nabo usebenzanabo

Yenze yaziwe into yokuba unemiknganiselo

Nxiba impahla endilisekileyo