Umlinganiselo Omtsha Wobulumko BukaThixo
WATHI uThixo kuMoses, NDINGUYE ENDINGUYE. Wathi, Wotsho koonyana bakaSirayeli ukuthi, uNDINGUYE undithumile kuni.” (Eksodus 3:14) UYehova wacacisela uMoses esithi kwanangaphambi koku abakhonzi Bakhe babengayiqondi intsingiselo epheleleyo yegama Lakhe. UnguThixo wenjongo yaye usoloko ekuzalisekisa ukuthanda kwakhe. Ukuba iimeko zifuna kube njalo, unokwenza inguqulelo kwindlela yakhe ukuze afikelele injongo yakhe. Unobulumko ngaloo ndlela!
USathana akazange ayiqonde intsingiselo yegama likaThixo. Kunokwenzeka ukuba wayesazi okuthile ngomthi wobomi owawukumyezo wase-Eden. Ukuba wayekhokelele uAdam noEva kuwo, oko ngekwakubonakele kusiya kumfaka engxakini uYehova: enoba akugcine oko wayekuthethile esithi ukona kwabo kwakuya kuthetha ukufa kwabo okanye oko wayekuthethile ngokubhekisele kumthi wobomi. (Genesis 2:9; 3:1-6) Nokuba kwakunjani na, uSathana wayefanele aphoxwe.
Ngoku uThixo waqalisa ukubonakalisa ubulumko obabungalindelwanga ngoonyana bakhe bokomoya nobabungazange batyhilwa kubo ngaphambili. (Thelekisa amaEfese 3:10.) Waqalisa ukusungula uthotho lwezibhengezo neziganeko ezaziya kuthi ngokumangalisayo emva kwethuba lexesha elide zibonakalise ubulumko bakhe obukhulu namandla akhe okuphumeza injongo yakhe kanaphakade, eyayikukuba umhIaba uzaliswe ngabantu abonwabileyo nabanyanisekileyo ababenokuthi baphile ngonaphakade kwiParadisi. (Genesis 1:27, 28) Ngokuphindaphindiweyo uThixo wayeya kuyithintela imigudu kaSathana yokuphazamisa.
Ukutyhilwa Kwemfihlelo Engcwele
Kungekudala ngemva kwemvukelo yokuqala, uThixo wathabath’ inyathelo. Wasizisa enkundleni eso sibini sasinetyala waza wanikela isohlwayo sokufa ngenxa yokungathobeli. Kuthekani ngokudla kuka-Adam noEva kumthi wobomi? “Wathi uYehova uThixo, Yabonani, umntu usuke waba njengomnye wethu, ukwazi okulungileyo nokubi; hleze ke olule isandla sakhe, athabathe nakuwo umthi wobomi, adle, aphile ngonaphakade: uYehova uThixo wamndulula emyezweni weEden.”—Genesis 3:17-23.
Ngeli xesha uThixo wakwasebenza njengoMshumayeli, okanye uMvakalisi weendaba ezilungileyo. Wathetha la mazwi esiprofeto sokuqala: “Wathi uYehova uThixo kwinyoka, . . . Ndiya kumisa ubutshaba phakathi kwakho nomfazi, naphakathi kwembewu yakho nembewu yakhe; yona iya kukutyumza intloko, wena uya kuyityumza isithende.” (Genesis 3:14, 15) Kwiinkulungwane kamva umpostile uPawulos wacacisa esithi: “Kuba indalo [engumntu] yalulanyiselwa kokungelutho, kungengakuvuma kwayo, kungenxa yowayilulamisayo, inethemba.”—Roma 8:20.
Ewe, emva koko umntu ngokungenakuzinceda wayeya kuqanyangelwa ngamakhamandela okufa awathi wakuzuz’ ilifa kuAdam, kodwa uThixo wayevakalisa injongo yakhe yokusindisa inzala ka-Adam ethobelayo. Kanti, sasiyintoni ‘isizinzi sethemba’? Wayenokulusindisa njani uluntu aze sekunjalo anikele isigwebo sakhe sokufa ngenxa yokona? Obu yayiza kuba bubulumko bukaThixo obuyimfihlelo; babubandakanya “imfihlelo, leyo ke ibifihliwe kwasemaphakadeni nasezizukulwaneni.” (Kolose 1:26; 1 Korinte 2:7, 8) Nangona abo babethembekile kumaxesha adlulayo bengazange bayiqonde le mfihlelo, babenethemba lokuba ngandlel’ ithile uThixo wayeya kubasindisa. Ewe, nezithunywa zezulu zazikulangazelela ukubona indlela uYehova awayeya kuyizalisekisa ngayo le njongo yakhe! (1 Petros 1:10-12) Ngaba uyayiqonda le mfihlelo ingcwele?
Ukuhlawulelwa Ngedini
Ngokuthe ngcembe kwiinkulungwane ezadlulayo, uYehova wongezelela inkcazelo kwidinga lakhe lantlandlolo. KuAbraham owayethembekile wathembisa ngembewu ezaziya kuthi iintsikelelo zize ngayo kuluntu oluthobelayo. (Genesis 22:15-18) NgoYakobi watyhila ukuba imbewu yayiya kuba ngukumkani ophuma kuhlanga lwakwaYuda. (Genesis 49:10) Ngeli xesha amadoda ahlonela uThixo ayekholelwa kuvuko lwabafileyo, nangona ayengayiqondi ngokupheleleyo indlela okwakuya kwenzeka ngayo oku. (Yobhi 14:14, 15; Hebhere 11:19) Ekugqibeleni, uThixo wathembisa uDavide esithi uKumkani ozayo, okanye uMesiya, wayeya kuba yinzala kaDavide yaye wayeya kulawula kude kube ngonaphakade.—2 Samuweli 7:16.
Bonke abaprofeti bongezelela amazwana okuyiqonda le mfihlelo ingcwele, kodwa loo madoda ayengawuboni ngokupheleleyo umfanekiso wayo. Ekugqibeleni, ixesha lokuvela kukaMesiya lafika, yaye ngoko, ekugqibeleni, obu bulumko bukaThixo bahlukahlukene kakhulu bathi bacaca ngakumbi. Babusekelwe kuYesu Kristu nakwilungiselelo lobomi bakhe bobuntu obufezekileyo njengedini elifanelekileyo loluntu. Kukho isizinzi esinjalo, yonke injongo kaYehova ezukileyo ngoBukumkani yayiya kuqhubela phambili. Ngaba uyaliqonda elo dini?
KumaRoma,, uPawulos unikela ingcaciso entle yalo. KumaRoma 5:12 ucacisa isono esasizuz’ ilifa nokufa. Uhlabela mgama ebonisa indlela umphumo wesono esinye esenziwa nguAdam ofezekileyo nokwenza kwakhe ukuba inzala yakhe iphulukane nobomi okwakunokulungelelaniswa ngayo ngobunye ubomi bomntu ofezekileyo. Ubomi obunjalo yaba ‘bobomntu uYesu Kristu.’ (Indinyana 15-21; bona kwaneyoku-1 kuTimoti 2:5, 6.) Kwakutheni ukuze uYesu alungiselele le ntlawulelo? Kungenxa yokuba wayenguNyana kaThixo, uYesu ‘wayengcwele, engenabubi, engenabala, ahlukile kubo aboni.’ (Hebhere 7:26; Luka 1:32, 33) Akuyomfuneko ukuba sizame ukucacisa iinkcukacha zemfuza ezingokuzalwa kukaYesu. Isithunywa sezulu esinguGabriyeli samqinisekisa unina kaYesu, uMariya, nathi, ukuba akukho nto ingenakwenzeka kuThixo. (Luka 1:37) Ngoko, nangona uYesu wazalwa ngumfazi oyinzala ka-Adam, wayenguNyana kaThixo—enyanisweni wayengumntu ofezekileyo. Igazi lakhe, okanye ubomi, lalixabiseke ngakumbi kunegazi lezilwanyana ezininzi ekwakusenziwa ngazo amadini ngababingeleli baka-Aron bakwaSirayeli kwitempile yaseYerusalem. ‘Wayeyimvana kaThixo ethwala isuse isono sehlabathi.’—Yohane 1:29; 3:16.
Ngaba uThixo wayenokwenza eli lungiselelo ngoYesu aze sekunjalo abe ngosesikweni? Ukuba uThixo wamvusa uNyana wakhe ukuba adle ubomi ngosuku Iwesithathu, kwenzeka ntoni kwidini? UPawulos usiqinisekisa ngelithi uThixo usesikweni. Khawulandele le ndlela aqiqa ngayo: “Bagwetyelwe ngesisa lubabalo lwakhe ngako ukukhululwa ngentlawulelo ekuYesu Kristu; athe uThixo wammisa, ukuba abe sisicamagushelo ngegazi lakhe, ngako ukukholwa, ukuze bubonakaliswe ubulungisa bakhe ngenxa yokuyekelelwa kwezono ezibe zenziwe ngenxa engaphambili, ekunyamezeleni kukaThixo; ukuze bubonakaliswe ubulungisa bakhe ngeli xesha lakalokunje, ukuze abe lilungisa, kwanomgwebeli walowo waselukholweni lukaYesu.” (Roma 3:24-26) Kuthetha ntoni oku? Kuthetha ukuba uYesu, njengomntu ofezekileyo wenyama nonegazi lomntu, enyanisweni wafa njengomntu yaye uhlala efile njengomntu ngonaphakade. “Wakwenza kwaba kanye [wafa kwaba kanye efela amaxesha onke, NW], ekuzinyuseni kwakhe ngokwedini.” (Hebhere 7:27) Ngoko elo dini liyasebenza. UYesu wafa esenyameni; ngosuku lwesithathu ‘wadliswa ubomi ekuwo umoya.’—1 Petros 3:18.
Umnqophiso Omtsha Nendalo Entsha
Ngoku siyayibona inxalenye eyincopho yemfihlelo engcwele. Ukuthembeka kukaYesu kude kuse ekufeni kumenza afaneleke ukuba nguMbingeleli Omkhulu noKumkani kaYehova. Ngegazi lakhe elaphalalayo wenza umnqophiso omtsha waba ngosebenzayo. Lo mnqophiso mtsha uza kuvelisa amadlelane asezuIwini aya kulawula noYesu njengookumkani nababingeleli. (ISityhilelo 5:9, 10; 20:4, 6) Abumba uhlanga olutsha, “indalo entsha,” yaye oko ngokuqinisekileyo kuyinto ebalulekileyo!—Galati 6:15, 16, TE.
Khawuqwalasele oku: UThixo esebenzisa uKristu Yesu unyula inani labameli abaphuma kulo lonke uluntu lisakhiwa ngabantu abangamadoda nabafazi. Ngokufanelekileyo unokubavakalisa bengamalungisa aze ababize njengoonyana bokomoya. Ngexesha likaThixo elifanelekileyo ngemva kokufa kwabo, ubavusela ezulwini aze abaqinisekise ngokungafi, kanye njengokuba wamvuzayo uYesu. (1 Petros 1:3, 4) Enjani yona intembelo anayo ‘kwindalo yakhe entsha’ nokunyaniseka enako kuye! Enjani yona impendulo kulo wo uye wayityhola ngobuxoki kuYehova! (ISityhilelo 12:10) Nangona inokuhlala ingafi noYesu Kristu, ayinakuze inganyaniseki kuYehova. Kodwa oko akuphelelanga apho.
Umhlaba Owenziwe IParadisi
UKristu Yesu, ekunye nookumkani nababingeleli akunye nabo ezulwini, baya kuqinisekisa ukuba injongo kaYehova ngomntu nangomhlaba iya kuphunyezwa ngokupheleleyo ebudeni boLawulo lwakhe Lwewaka Leminyaka. Esebenzisa iingenelo zedini, uYesu uya kuvusa abafileyo yaye uya kubenza babe ngabantu abafezekileyo abo baye bathembeka kunye nabasindi besiphelo sale nkqubo ingendawo. Kwangaxeshanye, umhlaba uya kwenziwa iparadisi. Baya kwandula ke bonke abo balichasileyo ilinge likaSathana lokugqibela lokubonakalisa banikwe ubomi obufezekileyo boluntu ngonaphakade. USathana nesihlwele sakhe sonke esingendawo baya kutshatyalaliswa ngonaphakade. Uxolo nomanyano ziya kwesamela kuyo yonke indalo, ngokupheleleyo zithethelela ulongamo lukaYehova nokulawula kwakhe ngokunothando. Izithunywa zezulu nabantu baya kuba bebonakalisa uthando olunyanisekileyo kuMdali wabo noThixo.—ISityhilelo, isahluko 20.
Ngoku sinokuyiqonda kakuhle imfihlelo engcwele. Ngoku siyabubona ubulumko bukaYehova obuzodlula lee izinto zakhe eziyilwe ngobugcisa kwizityalo nakwizilwanyana. Sinesizathu esilungileyo sokudanduluka sithi: ‘Hayi, ubunzulu bobutyebi nobobulumko nobokwazi kukaThixo! Asikuko nokuba ayiphengululeki imigwebo yakhe, Ngokuba ziphuma kuye, zikho ngaye, zikholo yena, zonke ezo zinto. Malube kuye uzuko kude kube ngonaphakade. Amen.’—Roma 11:33-36.
[Umfanekiso okwiphepha 7]
Umphumo wesono esinye esenziwa nguAdam ofezekileyo nokuphulukana kwakhe nobomi bakhe kwakunokulungelelaniswa. Njani? Ngobunye ubomi bomntu ofezekileyo, obo bukaYesu.