Ukusetyenziswa Kwamayeza Esintu EAfrika—Ngaba Kuyavisisana NobuKristu?

Kwizigidi zabantu abaNtsundu, ukuya emaxhweleni kokuphela kwendlela abanayo abanokuthi ngayo bafumane amayeza alo naluphi na uhlobo. Oku kunjalo ingakumbi kwimimandla esemaphandleni apho izibhedlele noogqirha izizinto ezinqabiieyo. Noko ke, amayeza esintu, adla ngokunxibelelana kakhulu neenkolo nokukhafula. Yintoni emele yenziwe ngumKritu phantsi kwezi meko?

“‘MHLAWUMBI le “agbo” iza kumbulala ize ngaloo ndlela iphelise yonke imbandezelo yakhe neyethu.’ Ngoko, ndaseliswa umxube weyeza elitsha kukhole-Iwa ekubeni wawuya kundinceda.”

Oku kwabhalwa ngugqirha wezamayezakwinqaku leSunday Times yaseLagos, eNigeria, elalinomxholo othi “Mus’ ukulijongela Phantsi Ixhwele.” Wayechaza indlela abazali bakhe ababencame ngayo ukuba wayeya kuze achache kwimpilo yakhe emandundu xa wayenonyaka omnye kuphela ubudala. Iyeza, elathunyelwa lixhwele kubazali bakhe kwathiwa lilo elasindisa ubomi bakhe.

Inkoliso yabantu abaNtsundu abathanda amayeza esintu ithetha ngonyango olumangalisayo oluye lwanempumelelo kwiimeko ekuthe olwasesibhedlele lwasilela kuzo. Abanye bayalugxeka besithi olo nyango luneentsholongwane, Iwenziwa ngabantu abangenalwazi nabaneenkolo. Abangaxhasi nalinye icala ngabo bafuna kwenziwe uphando lwenzululwazi kumayeza aziingcambu asekuhlaleni nokuqondwa okanye ukwamkelwa okupheleleyo kwamaxhwele. Abaninzi bangathanda ukubona ukudityaniswa kwamayeza esintu nawoogqirha, bebalula intsebenziswano ekhoyo phakathi kweengcali zala maqela omabini eTshayina naselndiya.

Nokuba akuhlali eAfrika, usenokuba nomdla wokwazi enoba amayeza abantu abaNtsundu anempumelelo nengenelo ngokwenene. Kuthekani ngokudibana kwawo nezithethe okuxhaphake kangaka kubantu abaNtsundu? Ngaba amandla angaphaya kwemvelo abandakanyekileyo ayinxalenye ebalulekileyo okanye eyenzakalisayo efanele iphetshwe? Sifanele sibe yintoni isimo sengqondo somKristu ngamayeza esintu anjalo nasetyenziswa ngabaNtsundu?

Amayeza Aziingcambu

Kakade ke, uhlaza lungowona mthombo wethu wokutya yaye lubalulekile ekuphileni kwethu. Kukwakho nezityalo ezivelisa iziyobisi okanye iityhefu eziye zabulala inyambalala yabantu abaye bazisebenzisa kakubi. Kodwa ngaba ubusazi ukuba ezinye zezi ziyobisi zibulele abantu ziyasetyenziswa xa kusenziwa amayeza oogqirha? Izazinzulu zazifumana ezinye zezi ziyobisi ngokuhlolisisa izityalo ezazisetyenziswa xa kusenziwa amayeza esintu okanye kwimixube eyenziwa ngamagqirha. Baqokelela izityalo ezimbalwa, bazihlolisisa ngemichiza baza bavavanya imiphumo yazo emizimbeni nakwiintsholongwane ezibangela izifo. Umphumo ube kukuveliswa kwamanye amayeza aziziyobisi nabalulekileyo, anjengequinine, ireserpine, idigitalis necodeine.

Kubantu bamandulo ukufumana amayeza amaninzi aziingcambu kwakuyinto ezenzekelayo, neyayisenzeka ngokuzama iindlela ezahlukeneyo, okanye ngokuphawula oko kwenzekayo kwizilwanyana xa zithi zitye izityalo ezithile. Ngokufuthi abo babefumana amayeza ngaloo ndlela baze babe ngamaxhwele babengaxeleli namnye umntu ngobo buchule ngaphandle kweentsapho zabo. Ngaloo ndlela ulwazi ngamayeza lwaludluliselwa ngubawo kunyana okanye kwabanye abantu ababefundela loo msebenzi. Amaxhwele amaninzi atyekele ekubeni azifihle gqitha izinto, ngokufuthi engakuvumi ukubaxelela abanye iingcambu athi enze ngazo amayeza awo. Kodwa kubandakanyeke okungakumbi kumayeza esintu abaNtsundu kunokuba enziwe nje ngeengcambu.

Impembelelo Enamandla Yokukhafula

Ukuphilisa ngamayeza esintu bekunxityelelaniswa ngokusondeleyo nokusetyenziswa kwamandla avela kwelemimoya. Abaninzi bakholelwa kwelokuba izityalo zineemvakalelo, zinamandla okuthetha nabantu, nokuqonda okungaphaya kwemvelo. Wambi amagqirha athi ayaluqonda ulwimi ezithetha lona izityalo nokuba ayakwazi ukuphendulana nazo. Amanye akanalunxibelelwano lungqalileyo nezityalo, kuba athi imimoya engabonakaliyo iwalathisela kwiingcambu ezineempawu zokuphilisa.

Ngaloo ndlela ukukhafula kuye kwanegalelo elibonakalayo ekwenziweni kwamayeza esintu eAfrika. Ngokomzekelo, amaNigeria amaninzi akholelwa kwelokuba izifo nokufa kubangelwa ngoothixo abacatshukisiweyo (okanye zizinyanya) okanye ziintshaba ezingamagqwirha. Ngoko kwenziwa imibingelelo yokuxolisa ezo zinyanya, kuze kwenziwe nezithethe ezihlobene nokukhafula.

Umphilisi ongumNigeria, uAsuquo, ngomnye okukholelwa nzulu oku. Uthi: “Ubawo wandifundisa ukukhanda amayeza yaye xa ndilungiselela imixube yam ndandidla ngokubingelela koothixo nakwizinyanya. Ndandikholelwa ekubeni zazibangela umxube ube namandla okuphilisa nokuba ukungabingeleli kuzo kwakuya kubangela ukugula nokufa.”

Eneneni, kudla ngokwenzeka ngendlela eyahlukileyo koko. Iinkolelo ezinjalo ziye zenza izigidi zabantu zangamaphakuphaku ngenxa yeenkolo nokukhotyokiswa yimikhosi yemimoya engabonakaliyo. Abaninzi baye bahlaselwa baza babandezeleka ngenxa yoko. Oku kukodwa nje kusisizathu esomeleleyo sokwala naluphi na unyango oluquka amadini okanye ezinye iinkqubo zokukhafula. Kwaye imimoya ebangela abantu boyike baze babandezeleke okanye ibakhohlisele ekubeni bacinge ukuba ookhokho babo basaphila okanye izityalo zinokuthetha ngokucacileyo inenkohliso kwaye ikhohlakele. IBhayibhile ilumkisa ngokuthi: “Amadini eziwenzayo iintlanga, ziwenzela iidemon, aziwenzeli uThixo. Andithandi ke ukuba nibe ngamadlelane needemon nina.”—1 Korinte 10:20.

Iidemon, izithunywa zezulu ezingathobeliyo nezigwetywe nguThixo ukuba zitshabalale kumgwebo ozayo, zizimisele ukuphambukisa abantu ekunquleni uThixo oyinyaniso, uYehova. (2 Petros 2:4; Yuda 6) Kwezinye iimeko zizenza ngathi zingoothixo abalungileyo. (2 Korinte 11:14) Zihambisela phambili inkohliso yazo, ezi demon zizimilisa okomntu ofileyo zize zibangele abantu bacinge ukuba ookhokho babo basaphila kwelemimoya. Noko ke, ngokucacileyo iBhayibhile ithi: “Abafileyo abazi lutho, . . . ngokuba akukho kwenza, nakucinga, nakwazi, nakulumka kwelabafileyo, apho uya khona wena.”—INtshumayeli 9:5, 10.

Ngoko kungayinto ephosakeleyo ngabanquli boThixo oyinyaniso ukwamkela naluphi na unyango lwamaxhwele olunento yokwenza nokukhafula. Ngokukwanjalo, amaxhwele anqwenela ukunqula uThixo ngokwamkelekileyo amele ayeke naluphi na uqheliselo lokukhafula. Ngokwenyaniso, abo babhenela ekukhafuleni balahlekelwa lubabalo nenkuselo kaYehova yaye abanandawo kwibandla lamaKristu. (Galati 5:19-21; ISityhilelo 21:8) Kukho abaninzi abaye bazikhwebula ekukhafuleni, yaye baye bafumanisa ukuba wambi amayeza aziingcambu anokuba nempumelelo yokwenene ngaphandle kwezenzo zokukhafula.

Ukuguqukela KubuKristu

Ethetha ngamava akhe siqu, uErhabor, ongugqirha ovunywe ngokwasemthethweni nosebenzisa isibhedlele samayeza aziingcambu, uthi: “Kuqala ndandikholelwa ekubeni amadini ayefanele enziwe xa kusenziwa amayeza ukuze kuliwe nomoya ombi ongunobangela wesifo. Kodwa emva kokufundisisa iBhayibhile namaNgqina kaYehova nokuba ngumKristu, ndazikhwebula kule mikhwa yaye ngoku ndiphila ngokuvisisana nemigaqo yeBhayibhile. Ndiye ndaphawula ukuba iimpawu zokuphilisa zisezityalweni ngokwazo.”

Ngokufanayo, uAsuquo uthi: “Izinto endazifundayo ngoYehova zenza ubomi bam banentsingiselo entsha. Ukoyika izinyanya kwaphela, yaye ndathi ndamazi uThixo oyinyaniso. Ndabona ukuba amadini ayengafuneki nganto nokuba yincindi yamaxolo emithi neyamagqabi ethi iphilise umntu. Abantu abaninzi ngoku bafuna ukunyangwa ndim kuba mna andibaxhaphazi ngokwenza imibingelelo ngenxa yeenkolo abanazo. Iindleko zolwam unyango aziphakamanga njengezo zabaphilisi abasebenza ngemilingo.”

UOkon okwalixhwele, utyholwa ngamanye amaxhwele “ngokuthob’ isidima inkqubo yawo” ngenxa yokuba engaphehli okanye enze imibingelelo xa ephilisa. Uchaza athi: “Abanye babo ndandibaphilisa, beza njengeentlola ukuza kubona ukuba ndisawenza na amadini ngokufihlakeleyo. Emva kokuba benyangwe ngokunempumelelo kangangeeveki ezimbini, bavuma ukuba andilusebenzisi naluphi na uhlobo lomlingo. Bakwangenelwa nakwiingxoxo ezingokweZibhalo esaba nazo kunye. Ndamangaliswa kukubona abane endandikade ndibanyanga kwiNdibano yamaNgqina kaYehova ‘Yothando Lobuthixo’ ngoDisemba 1980. Bandiwola baza bathi: ‘Seza kuwe kuba sasifuna unyango lokwenyama. Kodwa sakwafumana nolokomoya.’”

AmaKristu anjengala kuye kwafuneka axhathise izilingo zabo banqwenela ukuba abuyele kwizenzo zokukhafula. Ayazi ukuba ukudibanisa kwawo iindlela zokuphilisa nokukhafula kuya kuwenza angakufanelekeli ukuhlala ebandleni lamaKristu. Ngoko akawenzi amadini okanye akaphehli. Akathi ngokuxokayo abange ukuba anokuphilisa naluphi na uhlobo lwesifo, okanye azame ukubonisa ukuba anamandla akhethekileyo. Aphepha kwaneempawu zokukhafula.

Unyango Lokwenyaniso Oluvela KuThixo

Kwinkoliso yamazwe asakhasayo, abona bemi baninzi baxhomekeke ekunyangweni ngamaxhwele, lawo bathembele kuwo kakhulu. Ngaphandle koko, izibhedlele noogqirha bambalwa kakhulu ukuba bangahlangabezana neemfuno zonyango. Kungoko abantu abaninzi kula mazwe kunokwenzeka ukuba boqhubeka besiya emaxhweleni, inkoliso yawo esebenzisa ukukhafula. Kodwa uza kwenza ntoni wena?

UYesu wathi, “Inyaniso iya kunikhulula.” (Yohane 8:32) Esazi ukuba iBhayibhile iyalugweba uqheliselo olunjalo, umKristu uya kwala ukunganyaniseki kuThixo ngokuya koosiyazi okanye ngokufuna unyango oluhlobene nokuvumisa exhweleni. (Duteronomi 18:10-13; thelekisa iNumeri 23:21, 23.) Yaye ukuba uyagula, akunakuba bubulumko ukuba umKristu acinge ukuba iingxaki zibangwa kukuba uthakathiwe. Xa ubani esima ngokuqinileyo kwicala likaThixo ngokwala ukusebenzisa nantoni na ehlobene nokukhafula akafanele abe noloyiko lokuba uguliswa kukuthakathwa. Ngoko ukuba sithi sigule, ngenxa yokuba sonke singafezekanga, ubani ngamnye unokuzenzela isigqibo sobuqu ngokuphathelele iindidi zonyango ezinokusetyenziswa.a

Idini lentlawulelo elanikelwa nguYesu kuphela kwendlela yokukhululeka esonweni nasekuguleni nokufa okungumphumo. (Yohane 3:16; IZenzo 4:12) Lilodwa nje livulela abantu abathembekileyo indlela yokuzuza ubomi obungunaphakade kumhlaba oyiparadisi apho ‘engasayi kuthi ummi wakhona, Ndiyafa.’—Isaya 33:24.

UThixo usomandla usiqinisekisa ngokuba uya kubakhusela abo bakholosa ngaye de kufike loo mhla wolonwabo.

Ngoko onke amaKristu afanele athembele kuYehova, azigcine esondele kuye ngokuthandaza nokukhunga. Oku kuya kuphumela kubomi obusempilweni ngoku, yaye kuya kuqinisekisa ukufumana kwethu ubomi obufezekileyo kumhlaba othenjisiweyo oyiParadisi.—2 Petros 3:10-14; 1 Yohane 2:17.

[Umbhalo osemazantsi]