Ukuphilisa Yintoni Etsalela Abantu Kuko?

Icawa yenza ingxolo ikhalisa isiginkci, ixilongo, kubethwa amagubu, iingqongqo namacangci akhenkcezayo. Amadoda, abafazi nabantwana bayangqungqa baze bacule bechwayitile ngathi bashiywa ziingqondo. Abantu sebelungele ukuphiliswa.

Umphilisi, etsho ngomwunduzo omhlophe, uqalisa ngokubeka izandla zakhe phezu kwendoda esisiqhwala esihamba ngokukhasa. Ulandelisa ngendoda eyimfama, eneendondo ezimnyama ezigqume loo mehlo ayo angaboniyo. “Ngumhlol’ obomvu!” ababukeli bayahlahlamba njengoko isilima siqalisa ukuhamba nemfama ibona . . .

IMIBONO enjengale iqhelekile kwiicawa ezininzi zabaNtsundu ezizezokuphilisa. Ngokwenene, abaphilisi balandelwa ngabantu abaninzi eAfrika nakwamanye amazwe ngenxa yamabango abo okuba banako ukucombulula naluphi na uhlobo lweengxaki ngokuthandaza nokuba nokholo kuThixo. Ngaloo ndlela bambi baya kubaphilisi ngenxa yokuba beneengxaki ezingokwemali. Yaye ekubeni kubantu abaNtsundu ukungabi namntwana kusoloko kujongwa njengehlazo, bambi baya kubaphilisi benethemba lokufumana unyango kubudlolo babo.

Noko ke, iingxaki ezingokwempilo zitsalel’ ingqalelo yabantu kubaphilisi kunayo nayiphi na enye into. Nangona iziyobisi ezisetyenziselwa ukunyanga zizalise ezorhwebo yaye kusenziwa nemigudu encomekayo kwezamayeza ukunikela uncedo kwabagulayo, umntu usekude ekufumaneni isicombululo kwingxaki yokugula. Wambi amaxhoba okugula aye achitha intywenka yemali ekufuneni unyango, kodwa atsho phantsi. Ngoko, akumangalisi ukuba, ngenxa yokuphelelwa lithemba, abaninzi babhenela kubaphilisi.

Bambi bavakalelwa kukuba ukuphilisa kuye kwabanceda yaye babona kungekho kungqubana phakathi kwako nobuKristu. Eneneni, ekubeni abaphilisi bedla ngokuthi basebenza egameni likaYesu, akunto ingaqhelekanga ngabalandeli babo ukuba babe ngamalungu eenkonzo eziphambili naweecawa zabaphilisi. Kodwa ngaba kufanelekile ngomnquli onyanisekileyo kaThixo ukuba abe ngumphilisi? (Yohane 4:23) Yaye ngaba naluphi na unyango olwenziwa ngumntu onjalo kunokuthiwa luvela kuThixo?