Ukucikidwa Nokuhluzwa Kumaxesha Anamhlanje
“Ngubani na ke onokuyinyamezela imini yokuza kwakhe? Ngubani na ke onokuma ekubonakaleni kwakhe?”—MALAKI 3:2.
1. Xa uYehova wafika kwitempile yokomoya kumaxesha anamhlanje, yintoni awayifumanayo, nto leyo ephakamisa wuphi umbuzo?
XA “INKOSI” yafikayo kwitempile yokomoya iphelekwe ‘ngumthunywa wayo womnqophiso,’ emva nje kokumiselwa koBukumkani ezulwini ngowe-1914, uYehova wafumana ntoni? Abantu bakhe kwakufuneka besulungekisiwe yaye becociwe. Ngaba babeya kuzithoba koku baze banyamezele nakuphi na ukucocwa okwakufuneka kwentlangano, komsebenzi, kwemfundiso nokwehambo yabo? Kunjengokuba uMalaki echaza esithi: “Ngubani na ke onokuyinyamezela imini yokuza kwakhe? Ngubani na ke onokuma ekubonakaleni kwakhe?”—Malaki 3:1, 2.
2. Kumaxesha anamhla, bangoobani “oonyana bakaLevi” ekuthethwa ngabo kuMalaki 3:3?
2 UYehova uyayamkela imbopheleleko yokucoca neyokusulungekisa “oonyana bakaLevi.” (Malaki 3:3) KuSirayeli wamandulo, isizwe sikaLevi sasinababingeleli nabantu ababencedisa etempileni. “Oonyana bakaLevi” abanjalo bafanelana nequmrhu eliyintlanganisela labathanjiswa banamhlanje abakhonza njengababingeleli phantsi kukaYesu, uMbingeleli Omkhulu. (1 Petros 2:7-9; Hebhere 3:1) Bangabokuqala abathi bacikidwa xa uYehova wafika kwitempile yokomoya ‘enomthunywa wakhe womnqophiso.’ Ngoku, bubuphi ubungqina obukhoyo bokuba oku kusulungekiswa kwenzeka ukususela kwiintsuku zokugqibela zeMfazwe Yehlabathi I kuse phambili?
Ixesha Leemvavanyo Ezinjengomlilo
3. Kwintlakohlaza yowe-1918, yayinjani imeko yamangqina kaThixo?
3 Xa uYehova wapheleka ‘umthunywa wakhe womnqophiso’ ukuya kwitempile yokomoya, wafumanisa ukuba intsalela kwakufuneka isulungekisiwe yaye icociwe. Ngokomzekelo, iThe Watch Tower yayikhuthaze abafundi bayo ukuba babekele bucala uMeyi 30, 1918, njengosuku lokuthandazela ukoyisa kwamagunya olawulo-melo, njengokuba oko kwakucelwe ngurhulumente waseUnited States nanguMongameli uWilson. Oku kwakuchasene nobundilele bamaKristu.—Yohane 17:14, 16.
4. Kwavela ntoni mayela nentshutshiso yabakhonzi bakaYehova?
4 Abefundisi noorhulumente bezisa ingcinezelo enkulu kubakhonzi bakaYehova abathanjisiweyo. Ityholwa ngokuba ikhuthaza ukuvukelwa kukarhulumente, intsalela ethanjisiweyo yazama ukucacisa ekuhleni ukungabi natyala kwayo. Noko ke, ngoMeyi 7, 1918, kwakhutshwa imvume yokuba kubanjwe amalungu asibhozo aphetheyo eWatch Tower Bible and Tract Society nabasebenzi abangabahleli, kuquka umongameli, uJ. F. Rutherford. Ityala labo laqala ngoMvulo, ngoJuni 3. NgoJuni 20 inkundla yabavakalisa benetyala lezinto ezine ababetyholwa ngazo. Kwathi ke ngoJulayi 4, 1918, la madoda angamaKristu azahluleleyo ahanjiswa ngololiwe ukusiwa kwintolongo eseAtlanta, eGeorgia, eUnited States.
5. Kwacaca njani ukuba phakathi kwabo babekhonza uThixo kwakufuneka kuhluziwe, yaye yintoni ebonisa ukuba oku kwenzeka?
5 Kwihlobo lowe-1918, abashumayeli boBukumkani bukaYehova abangabathanjiswa ababomelele nabalungelelanisiweyo bancitshiswa kakhulu. Kwakungathi ‘babebulewe’ mayela nomsebenzi wabo wasekuhleni. (ISityhilelo 11:3, 7) Ngexesha leendibano zoMbutho ngelo hlobo, bambi baba ngabawexuki baza babumba amaqela abo onqulo achasayo. Bebonakalisa iimpawu ‘zomkhonzi okhohlakeleyo,’ ‘beliwa’ “njengomququ” ukuze bahlukaniswe kwintsalela kaYehova ethembekileyo. (Mateyu 3:12; 24:48-51) NgeCawa, ngoAprili 13, 1919, kwenziwa iSikhumbuzo sokufa kukaKristu ekwakukho kuso abantu abali-17 961 ababezile kumazwe amaninzi. Xa kuthelekiswa nengxelo engaphelelanga yowe-1917, ababezile kwiSikhumbuzo babehle ngaphezu kwama-3 000, nto leyo eyayibonisa imiphumo yokuhluzwa.
6. Ukuvumela kukaYehova iimvavanyo ezinjalo kwaba yiyo njani intsikelelo kubantu bakhe ekugqibeleni?
6 Noko ke, ukuvumela kukaYehova ukuba iimvavanyo ezinjalo ezinjengomlilo zehlele abantu bakhe kwakwenzelwe ukuba ekugqibeleni basikelelwe. Akazange abayekele. NgoLwesibini, ngoMatshi 25, 1919, uJ. F. Rutherford nezinxulumani zakhe ezisixhenxe bakhululwa entolongweni ngebheyile yaye kamva lachithwa ityala labo. Ngesiquphe, aba basindi bacociweyo bethuba lokucikidwa, bakhululeka kubukhoboka! Ewe, ‘umoya wobomi ophume kuThixo wangena kubo, bema ngeenyawo zabo,’ belungele ukusebenza.—ISityhilelo 11:11.
7. (a) La mangqina abuyiselweyo ayeza kwenza ntoni ngoku? (b) Waba yintoni umphumo woku kusulungekiswa noku kucocwa?
7 Yintoni ababeza kuyenza ngoku? Njengebutho lamaKristu elibuyiselweyo, intsalela yazigocagoca. Yathandazela ukuba uYehova ayixolele ngenxa yazo naziphi na izono zokulalanisa. (Thelekisa INdumiso 106:6; Isaya 42:24.) Yaqhubeka injengabantu abacociweyo. Ngenxa yokusulungekiswa, intsalela enentliziyo enyanisekileyo ‘yaba yezisa umnikelo kaYehova inobulungisa.’ (Malaki 3:3) Iminikelo yendumiso engokomoya eyayinikelayo yabayekholekileyo kuThixo. (Hebhere 13:15) Yayivuyela into yokuba ukungonwabi kukaYehova okwethutyana kwakuphelile. Yayinentembelo yokuba inkonzo yayo yexesha elizayo yayiya kuba yeyamkelekileyo kuye. (Isaya 12:1) Ukususela kumhla woku-1 kaSeptemba kuse kowesi-8, 1919, kwaqhutywa indibano eyonwabisayo eCedar Point, eOhio, ekwakuze kuyo abantu abangama-7 000 kwaza kwabhaptizwa abangama-200. Konke oku kwabonisa ukubuyiselwa nokuvuma ukuphumeza umsebenzi kaYehova wokushumayela.
8. (a) Inkqubo yokusulungekiswa nokucocwa isichaphazela njani thina namhlanje? (b) Ukongezelela ‘koonyana bakaLevi’ banamhlanje, ngoobani abanye abamele bacikidwe baze bahluzwe?
8 Konke oku kubachaphazela njani abantu bakaThixo abaphila namhlanje? Ngokwesiprofeto, uYehova, ephelekwa ngumthunywa wakhe, wayeza kuza aze ahlale “engumnyibilikisi, engumcoci.” (Malaki 3:3) Ewe, inkqubo yokusulungekiswa nokucocwa yayiza kuqhubeka, yaye wayeza “kuhlala” ondele ngenyameko. Isibakala sokuba intsalela enyanisekileyo yatyhubela ixesha leemvavanyo ezinjengomlilo ekuqaleni kwale nkulungwane asizange sithethe ukuba uMsulungekisi Omkhulu wayekugqibile ukuyicoca kwakhe. Ukucikidwa nokuhluzwa kuye kwaqhubeka ukuza kutsho kumhla wethu. UYehova usesetempileni yakhe, uhleli kuyo egweba. Ebengasulungekisi nje kuphela “oonyana bakaLevi,” intsalela ethanjisiweyo. Isiprofeto sikaMalaki sabonisa ukuxhalabela kwakhe “owasemzini,” ofana ‘nesihlwele esikhulu,’ esinethemba lobomi basemhlabeni. (Malaki 3:5; ISityhilelo 7:9, 10) Ewe, ebudeni beminyaka engama-69 edluleyo, abantu bakaYehova bebesulungekiswa ngokuqhubekayo ngeendlela ezine eziqhelekileyo.
Ukusulungekiswa Okungokwentlangano
9. Ziziphi ezinye zezinto ezintsha eziqhubekayo ezavelayo ekulungelelanisweni kwentlangano ukususela ngowe-1919?
9 Okokuqala, ukucocwa kwabakho ngokuvisisaniswa okuqhubekayo kwebandla lazwenibanzi nemigaqo engokweZibhalo eyayisandul’ ukuqondwa. Ngokuthe ngcembe kwaye kwafuneka kushenxiswe iindlela zolawulomelo ekuqhubeni imicimbi yebandla. Khawuqwalasele ezinye zezinto ezintsha ezathi zabakho ngokuvisisana noku.
Ngowe-1919: Ukumiselwa kwabantu liQumrhu Elilawulayo kwaqalisa ngokuthi ikomkhulu leWatch Tower Society limisele isicaka senkonzo esisisigxina kwibandla ngalinye ukuze songamele imisebenzi yenkonzo yasentsimini.
Ngowe-1932: Ukunyulwa kwaminyaka le kwabadala nabadikoni kwapheliswa; ukunyula kwebandla amadoda afanelekele ezi zigxina kwathatyathelw’ indawo yikomiti yenkonzo, incedisa (yaye iquka) isicaka senkonzo esimiselwe nguMbutho.
Ngowe-1937: Kwathi kwaqondwa ukuba abodidi “lukaYonadabhi” [abo banethemba lasemhlabeni] banokuba nezikhundla zembopheleleko ebandleni.
Ngowe-1938: Bonke abaveleli nabancedani babo babeza kumiselwa nguMbutho ngendlela yolawulo lobuthixo.
Ngowe-1972: Yenziwa yacaca into yokuba indlela engokweZibhalo yokulawula ibandla ngalinye yayingaphunyezwa nje yindoda enye engumKristu okhulileyo kodwa yayiphunyezwa yintlanganiso yabadala, njengoko imiselwa nguMbutho.
Ngowe-1975: Kwamiselwa iikomiti zeQumrhu Elilawulayo ukuze zinyamekele iimbopheleleko ezahlukahlukeneyo; kwakungayi kubakho ndoda enye yokwalathisa imicimbi, kodwa onke kwikomiti ayeya kuba nenxaxheba ngokulinganayo, yaye ayeza kukhangela ngokumanyeneyo kukhokelo lukaKristu Yesu.
10. (a) Uye waba yintoni umphumo wokusulungekiswa okunjalo? (b) Uziva njani ngalo lonke uhlengahlengiso olunjalo?
10 Ube yintoni umphumo wohlengahlengiso olunjalo? Ngokungathandabuzekiyo kuye kwabakho iintsikelelo ezininzi zikaYehova, njengokuba kungqinwa lulwando olungokomoya nolungokwamanani lwabanquli bakhe. (Thelekisa IZenzo 6:7; 16:5.) Kuyinyaniso ukuba, bambi abaveleli nabanye baye bahluzwa ngenxa yokuba abazange bazithobe ngokunyanisekileyo kwindlela eyalelwa nguThixo. Noko ke, uninzi lwabantu bakaYehova luye lwazingqina luthembekile yaye lukuthobela ukusulungekiswa okunjalo kwentlangano. (Hebhere 13:17) Luyaqonda ukuba ngohlengahlengiso olunjalo uMsulungekisi Omkhulu uye waluvisisanisa ngokusondeleyo neendlela ezingokweZibhalo zamabandla.
Ubulungiseleli Basentsimini
11. Ziziphi iindlela ezinenkqubela umsebenzi wokushumayela oye wanazo kumashumi eminyaka akutshanje?
11 Okwesibini, ukucocwa kwenzeka ngokucikidwa mayela nokuba nenxaxheba kwinkonzo yasentsimini.
Ngowe-1922: Bonke abanxulumene namabandla bakhuthazwa ukuba babe nesabelo kwinkonzo yasentsimini yendlu ngendlu, IBulletin yenyanga ngenyanga (ngoku ebuBulungiseleli Bethu BoBukumkani) eyayinemiyalelo yenkonzo yaqalisa ukufumaneka.
Ngowe-1927: Kwaqaliswa umsebenzi wokushumayela rhoqo kwindlu ngendlu ngeeCawa; kwasasazwa iincwadi neencwadana ngomnikelo.
Ngwe-1937: Kwabakho incwadana yokuqala Yesifundo Esingumzekelo ukwenzela izifundo zeBhayibhile zamakhaya.
Ngowe-1939: Kwaqaliswa uhlaselo lokuqala lwaminyaka le lomrhumo weMboniselo; kwafunyanwa imirhumo emitsha engaphezu kwama-93 000.
Ngowe-1940: Kwaqaliswa umsebenzi wokusasaza amaphephancwadi esitratweni.
Lo msebenzi wokushumayela esidlangalaleni waba nezinye iinkalo ezihambele phambili, kuquka ukwenza amabuyelo nokuqhuba izifundo zeBhayibhile zamakhaya.
12. (a) Ibe yintoni imiphumo yokusulungekiswa okunjalo kobulungiseleli basentsimini? (b) Sinokukubonisa njani ukunyaniseka kwethu kwindlela uYehova aye wabasulungekisa ngayo abantu bakhe?
12 Ibe yintoni imiphumo? Ekuhambeni kweminyaka abathile baye bahluzwa ngenxa yokuba babengakulungele ukuba ngamaKristu athwele isiqhamo. (Yohane 15:5) Kanti ngokuqinisekileyo inkoliso yabantu bakaYehova iye yasabela ekuhlatyweni kwekhwelo lokufunwa kwabashumayeli boBukumkani. Ewe, elo bathwana lalingaphantsi kwama-8 000 emva phaya ngowe-1919 lakhula laba yincopho yabavakalisi boBukumkani abazizi-3 229 022 ngowe-1986! Kuthekani ngobulungiseleli bexesha elizeleyo? Xa kuthelekiswa neecolporteurs (oovulindlela) ezili-150 ezazikho ekwindla lowe-1919, kunyaka odluleyo kwabakho umlinganiselo ongaphezu kwama-391 000 wabavakalisi abangoovulindlela abakhutheleyo nyanga nganye—nani elo elilelona liphakamileyo kwimbali yamaNgqina kaYehova anamhlanje! Ngokuba nesabelo ngokukhutheleyo ekushumayeleni iindaba ezilungileyo, sibonisa ukuyixhasa kwethu ngokunyanisekileyo indlela uYehova aye waqhubeka ngayo ecoca abantu bakhe.—1 Korinte 9:16.
Ukukhanya Okuqhubekayo
13. Yiyiphi eminye imizekelo engendlela uYehova aye wabakhanyisela ngayo abantu bakhe?
13 Okwesithathu, ukucocwa kwenzeka xa abantu bakaThixo bathi bacikidwa mayela nokwamkela ukukhanyiselwa kokomoya okuqhubekayo okuvela eBhayibhileni. (IMizekeliso 4:18) Ukususela ngowe-1919 ukuza kutsho ngoku kuye kwathululeka iinyaniso ezininzi ezahlukahlukeneyo ezisandul’ ukuqondwa.
Ngowe-1925: Yathi yaqondwa ngokucacileyo into yokuba kukho iintlangano ezimbini ezahlukeneyo nezichaseneyo—ekaYehova nekaSathana.
Ngowe-1931: Kwamkelwa igama elitsha elithi amaNgqina kaYehova.
Ngowe-1935: “Isihlwele esikhulu” seSityhilelo 7:9-15 sachazwa njengodidi olunethemba lasemhlabeni.
Ngowe-1941: Ukulunga kolongamo lukaYehova lwendalo iphela kwaboniswa kuyimbambano ephambili eyaphakanyiswa lucelomngeni lukaSathana.
Ngowe-1962: “Amagunya awongamileyo” amaRoma 13:1 achazwa ngokufanelekileyo njengamagunya oorhulumente abalawulayo, lawo amaKristu amele azithobe kuwo ngokulinganiselweyo.
Ngowe-1986: Kwathi kwaqondwa ukuba intsalela ‘nesihlwele esikhulu’ zimele zithabathe ngokufuziselayo kumzimba nakwigazi likaYesu ngokwamkela idini lakhe ukuze zivisisane kunye naye.—Yohane 6:53-56.
Kumashumi eminyaka edluleyo, njengokuba uYehova wabakhanyiselayo abantu bakhe, kwathi kwacaca ukuba amabandla kwakufuneka anikel’ ingqalelo ekulondolozweni kwentlangano ecocekileyo nengathabathi cala eyayihlonela ubungcwele begazi.—1 Korinte 5:11-13; Yohane 17:14, 16; IZenzo 15:28, 29.
14. (a) Abantu bakaYehova baye basabela njani ekukhanyiselweni okuqhubekayo okunjalo? (b) Uzimisele ukwenza ntoni mayela nomjelo wonxibelelwano kaYehova?
14 Abantu bakaThixo baye basabela njani koko kukhanyiselwa kuqhubekayo? Ngalo lonke eli xesha, bekukho abambalwa abebengenako ukulwamkela uhlengahlengiso oluthile. Aba bathi beliwa. (Mateyu 3:12) Kwelinye icala, hayi indlela abakhonzi abathembekileyo bakaYehova abaluvuyela ngayo ukhanyiselo lokomoya olunjalo! Ngexesha iNgqobhoko ifathula kubumnyama bokomoya, umendo wabantu bakaYehova uya ukhanya ngakumbi. Ngaba asifanele sizimisele ukunamathela ngokusondeleyo kumjelo wonxibelelwano uYehova awusebenzisayo, sikwamkela konke ukukhanyiselwa okuqhubekayo okulolo hlobo ‘njengokudla ngexesha elifanelekileyo’?—Mateyu 24:45.
Ukulahla Uqheliselo Olungacocekanga
15. UYehova uye wabasulungekisa ngokuthe ngcembe njani abantu bakhe ngokubhekisele kuqheliselo olungacocekanga okanye olubuBhabhiloni?
15 Okwesine, ukucocwa kwenzeka xa kwathi kwaba yinto enyanzelekileyo ukulahla uqheliselo olungacocekanga okanye olubuBhabhiloni. Ngeminyaka yee-1920 abantu bakaThixo bayeka ukubhiyozela iKrismesi nezinye iiholide ezaboniswa zinemvelaphi yobuhedeni. Ngowe-1945 kwathi kwacaciswa isimo sengqondo samaKristu mayela nokutofelwa kwegazi. Ebudeni beminyaka yee-1960 neyee-1970, njengokuba imekobume yokuziphatha esehlabathini yaqhubeka idodobala, IMboniselo yaqhubeka ilungiselela abantu bakaThixo isiluleko esingqalileyo kwimibandela enjengehambo efanelekileyo phakathi kwabantu besini esahlukileyo nemfuneko yokwahlukana necuba nezinye iziyobisi.
16. Uhlengahlengiso olunjalo olumayela noqheliselo olungacocekanga lufanele lujongwe njani?
16 Kambe ke, uhlengahlengiso olunjalo olumayela noqheliselo olungacocekanga ngokufuthi luye lwangunobangela wokucikidwa kokunyaniseka kwabantu bakaThixo. Noko ke, abo benza uhlengahlengiso olufunekayo iinguqulelo ezinjalo bazijonga njengezibancedela ekulahleni ingubo emdaka. (Kolose 3:9, 10) Baqonda ukuba nangona amasiko anxulumene neeholide ezithile esenokubonakala engenabungozi, into esifanele siyixhalabele yindlela uYehova awajonga ngayo; walubona kwangaphambili uqheliselo lobuhedeni olungokonqulo awathi avela kulo la masiko. Mayela nemigaqo yokuziphatha uThixo ayifunayo, baye bayijonga njengebakhuselayo kunokuba bayijonge njengebathintelayo, ngoko basikelelwa nguYehova ngokuba ngabacocekileyo. Ukuba uhlengahlengiso kwakubonakala kunzima ukuluqonda, baba nentembelo yokuba uYehova ‘ubafundisa okungabancedayo.’—Isaya 48:17.
17, 18. (a) UMcikidi Omkhulu usicikida njani ngokwabantu ngabanye? (b) Lufanele lube yintoni uzimiselo Iwethu njengokuba silindele imini kaYehova?
17 Unyaka emva konyaka uYehova uyaqhubeka ebasulungekisa yaye ebacoca abantu bakhe. Ngokuyintlanganisela, baye bazithoba kwinkqubo yokusulungekiswa okungokwentlangano, emsebenzini, kwimfundiso nokucoceka kwabo ngokokuziphatha. Kodwa kuthekani ngathi njengabantu ngabanye? Ngokusebenzisa intlangano yakhe uYehova uyaqhubeka ekhupha “ukudla okuqinileyo” okwenzelwe ukukhokela okusulungekisa intliziyo. Iintshukumisa zethu ziyacikidwa zize zivavanywe. (Hebhere 4:12; 5:14) Ngokusabela kwinkqubo yokusulungekiswa nokucocwa nguMsulungekisi Omkhulu, sihlala sicocekile njengokuba silindele ‘ukufika kwemini enkulu neyoyikekayo kaYehova.’—Malaki 4:5.
18 Siyambulela uYehova, “iNkosi,” ‘nomthunywa wakhe womnqophiso,’ uYesu Kristu, abasisulungekisayo baze basihlangule kukungacoceki ngeli xesha lokucikidwa nelokuhluzwa. Ngamana sonke singazimisela ukuqhubeka sihamba kwiindlela zikaYehova ezicocekileyo zoxolo phantsi ‘koMthetheli Woxolo,’ uKristu Yesu, size ngaloo ndlela sigcine ulwalamano lwethu noYehova olubangela ukonwaba.—Isaya 9:6; INdumiso 72:7.
UYehova uye wabasulungekisa njani abantu bakhe mayela—
◻ Nohlengahlengiso olungokwentlangano?
◻ Nokuba nenxaxheba kwinkonzo yasentsimini?
◻ Nokwamkela ukukhanya okuqhubekayo?
◻ Nokulahla uqheliselo olungacocekanga?
[Amagama acatshuliweyo akwiphepha 16]
Ngenxa yokucocwa nokusulungekiswa, intsalela enentliziyo enyanisekileyo ‘yaba yezisa umnikelo kaYehova inobulungisa’
[Amagama acatshuliweyo akwiphepha 19]
Unyaka emva konyaka uYehova uyaqhubeka ebasulungekisa yaye ebacoca abantu bakhe
[Umfanekiso okwiphepha 17]
Umsulungekisi wamandulo wayesongula ukungcola, okanye okungafunekiyo. Ngokufanayo, uYehova uvumela abantu bakhe ukuba bacikidwe yaye bahluzwe ukuze abasulungekise
[Umfanekiso okwiphepha 18]
Abathile baye ‘beliwa’ “njengomququ” kodwa abakhonzi bakaYehova abanyanisekileyo bakwamkela ngovuyo ukukhanyiselwa kokomoya okuqhubekayo
[Inkcazelo]
Pictorial Archive (Near Eastern History) Est.