IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w89 7/1 iphe. 30-31
  • INkosi Yokwenyaniso Izela Ukugweba

No video available for this selection.

Sorry, there was an error loading the video.

  • INkosi Yokwenyaniso Izela Ukugweba
  • IMboniselo Evakalisa UBukumkani BukaYehova—1989
  • Imixholwana
  • Amanqaku Afanayo
  • Ukudelela Igama LikaThixo
  • Umgwebo Nokusulungekiswa
  • Imini kaYehova Iyeza!
  • Iimbalasane Zencwadi KaMalaki
    IMboniselo Evakalisa UBukumkani BukaYehova—2007
  • Ixesha Lokucikidwa Nelokuhluzwa
    IMboniselo Evakalisa UBukumkani BukaYehova—1987
  • Incwadi YeBhayibhile 39—Malaki
    “Sonke ISibhalo Siphefumlelwe NguThixo Kwaye Siyingenelo”
  • Ngubani Oya Kusinda Ngemini KaYehova?
    IMboniselo Evakalisa UBukumkani BukaYehova—2002
Khangela Okunye
IMboniselo Evakalisa UBukumkani BukaYehova—1989
w89 7/1 iphe. 30-31

Izifundo Ezivela KwiZibhalo: Malaki 1:1–4:6

INkosi Yokwenyaniso Izela Ukugweba

“AKUNTO yanto ukumkhonza uThixo.” (Malaki 3:14) Ukuthandabuza okunjalo kwavakaliswa ngabantu bakaThixo xa uMalaki waprofetayo ngenkulungwane yesihlanu Ngaphambi kweXesha Eliqhelekileyo. Kwakutheni? Kwakungenxa yeemeko ezimbi ezazikho kwaYuda, ingakumbi phakathi kwababingeleli. Eyona njongo yabo yayiphambili yayikukuzizuzela izinto ngokuzingca. Ngendlela engqalileyo nenamandla, uMalaki wazibhenca ezo nkokeli zonqulo zazihanahanisa waza walumkisa ngokuba iNkosi yokwenyaniso yayisiza kugweba.—Malaki 1:6-8; 2:6-9; 3:1.

Isiprofeto sikaMalaki siyazaliseka kumhla wethu. Ngoko ke, senza kakuhle ukuqwalasela izifundo esiziquletheyo.

Ukudelela Igama LikaThixo

UYehova ulindele ukuba abantu bakhe bamnqule ngeyona ndlela ilungileyo. UThixo ulubonakalisa kuqala uthando lwakhe ngabantu bakhe. Sekunjalo, ababingeleli bayalidelela igama lakhe ngokwamkela ebantwini amadini ezilwanyana eziziimfama, ezigulayo neziqhwalelayo. UYehova akavuyiswa ngababingeleli abazikholisayo okanye yiminikelo engento ephuma ezandleni zabo. Kodwa kungakhathaliseki oko bakwenzayo, ‘igama likaYehova liya koyikeka phakathi kweentlanga.’—1:1-14.

Abo bangabafundisi banembopheleleko enzima. (Yakobi 3:1) Ababingeleli ‘baye babakhubekisa abaninzi kuwo umyalelo.’ Bakwenze njani oko? Bakwenze ngokungabafundisi abantu umthetho kaThixo nangokubonakalisa ukukhetha ubuso. UYehova ubaqumbele ngokufaneleyo, “kuba umlomo wombingeleli ngowokugcina ukwazi, umyalelo bawufune emlonyeni wakhe.”—2:1-9.

UYehova akabajongi nje lula abo bangalihloneliyo ilungiselelo lomtshato. Esenza ngokuchasene nomthetho kaThixo, amadoda akwaYuda aye azithabathela abafazi kwiintlanga zangaphandle. (Duteronomi 7:3, 4) Aye abanginizela abafazi bobutsha bawo ngokubaqhawula umtshato. UMalaki ulumkisa ngokuba uYehova ‘ukuthiyile ukwala.’—2:10-17.

Umgwebo Nokusulungekiswa

UYehova akabunyamezeli ngonaphakade ububi. “Inkosi [yokwenyaniso, NW]” iya kuza etempileni yayo, iphelekwe ‘ngumthunywa womnqophiso.’ Iya kubasulungekisa ize ibacoce oonyana bakaLevi. UYehova uya kuba lingqina elikhawulezayo kubakhafuli, kubakrexezi, kubafungi bobuxoki, kubakhohlisi nakubacinezeli.—3:1-5.

Abo bangayizisiyo iminikelo yabo kuYehova bayazihluphekisa. UYehova akaguquki. Ukuba abantu abatyekileyo babuyela kuye, uya kuthi ngenceba abuyele kubo. Bebemqhatha uThixo ngokungazizisi izishumi nemirhumo. Kodwa ukuba bayazizisa izishumi, uYehova uthembisa intsikelelo, “kude kungasweleki lutho.” Baya kusoloko beneziqhamo ezingapheliyo.—3:6-12.

Amehlo kaYehova aphezu kwabantu bakhe. UThixo uyabathethisa abo baye bathetha kakubi ngaye. Ngokuchaseneyo noko, unikela ingqalelo kwabo bamoyikayo. “Incwadi yokukhumbuza” iya kubhalelwa “abacinga ngegama lakhe.” Abantu bakhe baya kuwubona umahluko phakathi kwelungisa nongendawo.—3:13-18.

Imini kaYehova Iyeza!

Imini kaYehova iya kuthetha ukutshatyalaliswa ngokupheleleyo kwabangendawo. Imini kaYehova iyeza, yaye abangendawo baya kutsha babe njengeendiza kwiziko elivuthayo. Iya kubaqwenga, kungasali ‘ngcambu nasebe.’ Abo baloyikayo igama likaYehova, baya kunandipha iingenelo eziphilisayo ‘zelanga lobulungisa.’ Ngaphambi kokuba le mini yoyikekayo ifike, uYehova uya kuthumela umprofeti uEliya ukuba enze umsebenzi wokubuyisela.—4:1-6.

Oko kusisifundo namhlanje: Xa kusiziwa kunqulo, uYehova ufuna ukuba abantu bakhe bamnqule ngeyona ndlela ilungileyo. (Thelekisa uMateyu 22:37, 38.) Abafundisi beLizwi likaThixo banempopheleleko yokubafundisa nokubakhokela ngokufanelekileyo abanye kunqulo oluyinyaniso. Senza kakuhle ukukhumbula ukuba amehlo kaThixo osesikweni aphezu kwabo bangabonakalisi ntlonelo ifanelekileyo ngomtshato nabo babandakanyeka ekwenzeni okubi. Kwanga thina singavuma ngokuzithoba ukusulungekiswa nokucocwa yiNkosi yokwenyaniso njengoko ngolangazelelo silindele ‘imini enkulu eyoyikekayo kaYehova’!

[Ibhokisi ekwiphepha 30]

UKUHLOLISISWA KWEENDINYANA ZEBHAYIBHILE

○ 1:10—Ababingeleli abazingcayo nababefun’ imali babesebenzela inzuzo yabo yobuqu. Babefuna ukuhlawulwa ngezinto ezilula ababezenza etempileni, ezinjengokuvala iingcango okanye ukubasa umlilo wesibingelelo. Akumangalisi ukuba uYehova ‘engazange akholiswe yiminikelo ephuma ezandleni zabo’!

○ 1:13—Ababingeleli abangenalukholo bawajonga amadini njengayindinisa, njengomthwalo. Bahlekisa, okanye bazidelela izinto ezingcwele zikaYehova. Kwanga singangaze sivumele ukuba “imibulelo yomlomo wethu” inikelwe nje ukwenzela uphela sonwabe!—Hoseya 14:2; Hebhere 13:15.

○ 2:13—Amadoda amaninzi angamaYuda ayebaqhawula umtshato abafazi bobutsha bawo, mhlawumbi esenzela ukuze atshate abanye abafazi abaselula abangabahedeni. Isibingelelo sikaYehova sagutyungelwa ziinyembezi—ekubonakala ukuba zazizezabo bafazi baliweyo abathi beza engcweleni ukuza kuthulula intlungu yabo phambi koThixo.—Malaki 2:11, 14, 16.

○ 3:1—“INkosi [yokwenyaniso, NW]” nguYehova uThixo, yaye “umthunywa womnqophiso” nguYesu Kristu. Ukuzaliseka kokuqala kwesi siprofeto kwenzeka xa uYesu wacoca itempile. (Marko 11:15-17) Oku kwenzeka kwiminyaka emithathu enesiqingatha emva kokuba wayethanjiswe njengoKumkani Otyunjiweyo. Ngokufanayo, kwiminyaka emithathu enesiqingatha emva kokuba uYesu ebekwe etroneni njengoKumkani ekwindla lowe-1914, wapheleka uYehova ukuya kwitempile yokomoya waza wafumana abantu bakaThixo befuna ukusulungekiswa nokucocwa.

○ 3:2, 3—Inkqubo yamandulo yokusulungekisa yayithabatha ixesha. Ngoko ke umsulungekisi wayedla ‘ngokuhlala,’ alinde de isinyithi sibonakale singamanzi yaye sibonakale sinjengesipili esipolishisisiweyo aze abe nako ukubona umfanekiselo wakhe kuso. Ngokufanayo, uYehova uye waqhubeka ebasulungekisa abantu bakhe namhlanje, ezishenxisa iimfundiso noqheliselo olungacocekanga. Oku kuye kwabanceda ukuba bawubonakalise ngokuchanileyo umfanekiselo wakhe.—Efese 5:1.

○ 4:2—Le yingcaciso yeentsikelelo zexesha elizayo eziya kunanditshwa ngabo baloyikayo igama likaThixo. Banethemba lokufumana ukukhanya kwelanga okuyinkoliseko kaThixo xa iintlungu ezingokomzimba, ezingokwengqondo nezingokweemvakalelo eziye zathwaxa intsapho engabantu ziya kube ziphelisiwe.—ISityhilelo 21:3, 4.

○ 4:5—Umprofeti uEliya waphila iminyaka enokuba ngama-500 ngaphambi kokuba esi siprofeto sinikelwe. Ngenkulungwane yokuqala yeXesha Eliqhelekileyo, uYesu Kristu wachaza uYohane uMbhaptizi njengalowo wayexelwe kwangaphambili ukuba wayeya kumela uEliya. (Mateyu 11:12-14; Marko 9:11-13) Phofu ke, “uEliya” wayeza kuba ngumanduleli ‘wemini kaYehova,’ nto leyo ebonisa ukuzaliseka okubhekele phaya ‘kobukho’ bukaKristu kweli xesha.—2 Tesalonika 2:1, 2.

[Umfanekiso okwiphepha 31]

Ebudeni bobulungiseleli bakhe basemhlabeni, uYesu wacoca itempile. Ngowe-1918 wapheleka uYehova ukuya kwitempile yokomoya ukuze acoce abantu bakaThixo

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share