Ukufuna Abahlobo Bokwenyaniso

IATYANA lomfana lalenzakele kakubi kwingozi yesithuthuthu. Kangangeeveki lalife isiqaqa laza ngokuthe ngcembe lachacha. Lathi, “Ukuba ndandinabahlobo abaninzi abalungileyo njengoko ndinabantu endiqhelene nabo ngendachacha ngokukhawuleza okukhulu.” ‘Abahlobo abaninzi endandinabo ngaphambi kwaloo ngozi bandishiya. Kodwa abahlobo abalungileyo banokuba liyeza elinamandla okunyanga.’

Le meko ayahlukanga nganto kwihlabathi lanamhlanje elingenabuhlobo. Oosingabahlobo banokuba baninzi xa kuxhelw’ eXhukwane. Kodwa xa kusehla ilishwa, baxel’ inalit’ engceni. Kusoloko kunzima ukufumana abahlobo bokwenyaniso.

Kanti, ukuba nomhlobo omnye okanye ababini abanyanisekileyo nabanobubele kwenza umahluko omkhulu ebomini. Ngalo mbandela iingcali zithi: “Ukulangazelela umhlobo osondele ngakumbi kungumxholo ophambili kumaxesha ethu.” Ibe kunjengokuba isaci sakudala sesiNgesi sisithi: ‘Abahlobo abafumaneka ngexesha lentswelo ngabahlobo bokwenene.’

Kukhe kwakho ixesha apho abantu babebaxhalabele ngakumbi abanye ibe bekulungele ukunceda abahlobo babo okanye abamelwane babo. Kodwa ithuba lokuguquka kwezinto leMfazwe Yehlabathi I lezisa oko kubi sikubonayo kulwalamano lwabantu. Isimo sengqondo sokungabi nabubele, ukungakhathali nesokuba ndim phambili namhlanje siyinto eqhelekileyo.

Le meko imbi yaxelwa ngenxa engaphambili kwiinkulungwane ezili-19 ezadlulayo kula mazwi: “Imihla yokugqibela iya kuba ngamaxesha anzima. Abantu baya kuba ngabathandi beziqu zabo, bathande imali, bezigwagwisa, bengoozwi-labo. Baya kunyelisa, bangathobeli bazali, bengabuleli, beluchasa unqulo, bengenabuntu, bengaxoleli mntu, behleba. Baya kuba nengcwangu, beziindlobongela, bayithiye into elungileyo. Baya kuba ngabangcatshi.”—2 Timoti 3:1-4, TE.

Onjani wona ukuba mbi ukanti uyinene umfanekiso wehlabathi lanamhlanje! Ubonakala ungasiniki themba lokufumana abahlobo bokwenyaniso. Sekunjalo, kunokwenzeka ukuba nangoku ubafumane abahlobo bokwenyaniso. Ibe hayi indlela abaxabiseke ngayo! Unokusoloko uphethukela kubo ukuze ufumane uncedo, icebiso, intuthuzelo nobuqabane obufudumeleyo. Kodwa kubalulekile ukwahlukanisa abahlobo bokwenyaniso nabobuxoki.

Asingabo Bonke “Abahlobo” Abangabokwenyaniso

Igatyana lomfana elenzakala kwingozi ekhankanywe kwingabula zigcawu yeli nqaku lalililungu leqela lebhola ekhatywayo ibe “lalinabahlobo” abaninzi. Amalungu amaqela amakhulu okanye amaqela amancinane emidlalo ngokufuthi aba nolwalamano oluhle. Kodwa “ubuhlobo” obunjalo busenokuba bobungazinzanga ngakumbi. Ibe ukuba ‘nabahlobo’ abaninzi uze uphulukane nabo bonke kuyadimaza kakhulu, njengoko eli gatyana lakufumanisayo oko. Ukufuna abantu onokuqhelana nabo kulula; ukufuna abahlobo bokwenyaniso akunjalo.

Abantu abafumileyo okanye abo bakwizigxina eziphezulu banokubafuna ngokulula “abahlobo” abaninzi. Kunjengokuba iBhayibhile isithi: “Abathanda isityebi baninzi.” “Baninzi abacenga amanene; yonke into isisihlobo kwindoda ephayo.” (IMizekeliso 14:20; 19:6) Kodwa bangaphi kubo abanenjongo yokuzingca? Ibe ukuba abantu abanabahlobo abaninzi baphulukana nobutyebi okanye nesigxina abakuso, kungekatshoni nelanga eli basenokuba ngamalolo.

Abantu abahle ngembonakalo nabo badla ngokuba ‘nabahlobo’ abaninzi—abaninzi babo bephenjelelwa ziimbonakalo nje zobuhle. Kodwa “ubuhlobo” obunjalo bunokuba yingozi kakhulu ibe mhl’ izinto zingasahambi kakuhle bunokuthi shwaka njengenkungu etshiswa lilanga. Ngoko kukho imfuneko yokwenene yokuba . . .

Ngokhethayo

Ewe, kububulumko ukuba ngokhethayo ekufuneni abahlobo. Oosingabahlobo badla ngokuba ngabanyhwalazi abakhulu abaye banikele uncedo kanti bathi lala gusha ndikuchebe. “Umfo ocengangacenga ummelwane wakhe uthiyela iinyawo zakhe ngomnatha.”—IMizekeliso 29:5.

Ngoko ke, cinga ngenyameko ngabahlobo onabo ngoku. Ngaba bakuphembelela ukuba wenze okulungileyo okanye okubi? Ngaba bangabantu abaziphakamisileyo, ababambelela kwizimvo zabo, okanye abazicingelayo? Ngaba bangabantu ababhuduzelayo bekuvuyela ukuzibeka engozini? Siyintoni isimo sabo sengqondo ngakwabo besini esahlukileyo? Ngaba banembeko yaye banentlonelo okanye babaqhela ngokugqithiseleyo, mhlawumbi bangabantu abaziphethe kakubi? Ngaba abantu onxulumana nabo rhoqo bangqineke bengabantu abanganyanisekanga nabangathembekanga? Ngaba bangabantu abasebenzisa iziyobisi? Ngaba baziindla-manzi? Ukuba banjalo, uphakathi kwenyama nozipho. Wena usenokuba ngumntu onyanisekileyo, ococekileyo nothobekileyo, kodwa khumbula: “Incoko embi yonakalisa izimilo ezilungileyo.”—1 Korinte 15:33.

Ingozi enkulu ekunxulumaneni nabantu ababi yile yokuba uya kubaxelisa. Ngokuthe ngcembe, mhlawumbi ungaqondi wena, iindlela zabo nesimo sabo sengqondo ziya kuba lukhwekhwe lwexhwili kuwe. Kunjengokuba iBhayibhile isithi: “Ohamba nezilumko uba sisilumko naye; ke olikholwane lesidenge uya konakaliswa.”—IMizekeliso 13:20.

Kulula ukwenza ukhetho olungachananga xa ufuna abahlobo. Kodwa musa ukudimazeka. Kusekho izigidi zabantu abalungileyo abanobuhlobo kweli hlabathi. Ngoko unokubafumana njani abahlobo bokwenyaniso abanjalo?

[Umfanekiso okwiphepha 4]

Amaqabane akho anokukuphembelela ngamandla