Hlala Uzithoba ‘Kumoya Odlisa Ubomi’
“Ngumoya odlisa ubomi; inyama yona ayincedi lutho.”—YOHANE 6:63.
1. (a) UYehova ubanceda njani abantu bakhe ukuba baxhathise impembelelo ‘yomoya’ weli hlabathi? (b) Ukuhlakulela isiqhamo somoya kaThixo kuya kusinceda njani ukuba sibe notyekelo Iwengqondo olulungileyo?
UMOYA oyingcwele kaYehova uThixo ufuneka ngokwenene ukuze sixhathise impembelelo ‘yomoya’ weli hlabathi, okanye izimo zengqondo zalo. (Efese 2:1, 2) Kwakhona kufuneka sisebenzise iBhayibhile, eneengcamango zikaThixo ezabhalwa phantsi kokhokelo lomoya oyingcwele. Ibe kufuneka sibe nesimo sengqondo sokuthobeka nesisesobuKristu, esiveliswa ngokuhlakulela iziqhamo zomoya kaThixo—“uthando, uvuyo, uxolo, ukuzeka kade umsindo, ububele, ukulunga, intembeko, ubulali, ukuzeyisa.” Umpostile uPawulos wabongoza esithi: “Hambani ngokomoya, naningasayi kuthi ke niyizalise inkanuko yenyama. Kuba inyama ikhanuka ngokuchasene nomoya, umoya ke ukhanuka ngokuchasene nenyama; ezo zinto ke ziphambene, ukuze ningazenzi izinto enisukuba nizithanda.”—Galati 5:16, 17, 22, 23.
2. Oko kuveliswa ngumoya kaThixo kunokuthelekiswa njani nemiphumo yokwamkela ‘umoya wehlabathi’?
2 UPawulos wakwabhala oku: “Ke thina asamkelanga moya wehlabathi; samkele umoya ophuma kuye uThixo, ukuze sizazi izinto esazibabalwa nguThixo.” (1 Korinte 2:12) “Umoya,” okanye isimo sengqondo, seli hlabathi siyabulala, kodwa oko kunikelwa nguThixo ngomoya oyingcwele kuzisa ubomi obungunaphakade kwabo bakwamkelayo. UYesu wathi: “Ngumoya odlisa ubomi; inyama yona ayincedi lutho. Amazwi la ndiwathethayo kuni mna angumoya, abubomi.” (Yohane 6:63) Ekubeni ‘inyama ingancedi lutho,’ sifuna uncedo lukaThixo ukuze soyise isono nokuze sixhathise umoya wehlabathi.
3, 4. (a) Kuyintoni ukubawa, yaye ‘umphathi womoya’ uwusebenzisa njani umnqweno wenyama wokufuna izinto eziphathekayo? (b) Umntu olibalwa unguye njani umkhonzi wezithixo?
3 Kwinqaku elingaphambilana, siye sathetha ngeenkalo ezimbini eziyingozi ‘zomoya’ weli hlabathi—ukudlala ngezinto ezikhuthaza ukuziphatha okubi neendlela zokunxiba nezokuzilungisa ezingafanelekanga. Kodwa kukho ezinye iinkalo ezininzi. Ngokomzekelo, umoya weli hlabathi uzaliswe kukubawa, ngumnqweno omkhulu wokuzingca wokufuna amancedo okuphathekayo okanye izinto eziphathekayo. ‘Umphathi womoya’ uye wabona ukuba inkqubo yeli hlabathi ekhohlisayo nezibhengezo zalo zikwenza uzive ungenzanga nto ukuba akunayo intabalala yezinto eziphathekayo. Le nkalo ‘yomoya’ wehlabathi inokukwenza uthi phithi yinto yokuba ezi zizinto ezinkulu ebomini. Ngaba uye wachatshazelwa ngulo “moya” wezinto eziphathekayo?
4 IBhayibhile ithi: “Wonke umenzi wombulo, nomntu ongcolileyo, nolibawa, engumkhonzi wezithixo, akanalifa ebukumkanini bukaKristu noThixo.” (Efese 5:5) Phawula ukuba umntu olibawa ngokwenene ungumkhonzi wezithixo. Usenokucinga ngale ndlela, ‘Ngokuqinisekileyo, andinakude ndigabadele kangako, ndibe ngumkhonzi wezithixo.’ Kodwa kuyintoni ukukhonza izithixo? Ngaba asikuko ukubeka tanci into ethile endaweni kaYehova nonqulo lwakhe, unikela ingqalelo kuyo kunokunikela ingqalelo kuThixo nakwinkonzo yakhe? Ukubawa kusenokuquka ukuyinqula ngokwenene imali namandla nempembelelo yayo. Ukuba kuyinto ephambili kuwe ukufuna inqwelo-mafutha entsha, umatshini wokudlala iikhasethi zevideo, okanye nayiphi na enye into ephathekayo kunokuba wandise amathuba onawo okuba nesabelo kwinkonzo kaYehova, ngaba obo asibobungqina bokuba “umoya” weli hlabathi ukuchaphazela ngendlela eyingozi? Ngaba izinto eziphathekayo azithi zibe zizithixo kuwe.
5. Ziziphi iindlela ekuthi ngazo “umoya” weli hlabathi uzaliswe ngumnqweno wokuzingca wokufuna ubutyebi?
5 Ukuba ufuna imfundo ephakamileyo okanye umsebenzi onomvuzo oncumisayo, ngaba wenjenjalo ukuze ube sisinhanha yaye ube neengenelo ezingakumbi zokuphathekayo kunozifunayo? Ngaba unomdla kwiinkqubo zokufuna ubutyebi ngokukhawuleza, ufuna ukubandakanyeka kuzo? “Umoya” weli hlabathi uzaliswe ngumnqweno wokuzingca wokufuna ubutyebi nokuqhatha ngokubhekisele ekuhlawuleni iirhafu ezimiselwe ngurhulumente. Kulo moya kukho ukungcakaza neminye imisebenzi efana nako. Musa ukuhendeka. Abo bayiphephayo impembelelo ‘yomoya’ weli hlabathi ozaliswe kukubawa bafumanisa ukuba ulonwabo lokwenene lubakho ngokwanela zizinto ezifunekayo nangokubeka tanci izilangazelelo zoBukumkani.—Mateyu 6:25-34; 1 Yohane 2:15-17.
Ukulusebenzisa Kakuhle Ulwimi
6. Nguwuphi umphumo iindlela zokuthetha zeli hlabathi ezinokuba nawo kuthi njengamaKristu?
6 Kuthekani ngeendlela esithetha ngazo? Amanyala, amazwi omsindo, ukuxoka—lo “moya” weli hlabathi ungcoliswe ngokupheleleyo yintetho engcole ngolo hlobo. Kanti, maxa wambi kwanentetho yabantu abambalwa abanxulumana nebandla lamaKristu ibonisa uburhabaxa, kwanamanyala. Ethetha ngamandla umfundi uYakobi usixelela oku: “Kwakulo mlomo mnye kuphuma intsikelelo nengqalekiso. Akufanelekile, bazalwana bam, ukuba ezi zinto zibe nje. Umthombo umpompoza amnandi nakrakra kwangelo liso linye, yini na?” (Yakobi 3:10, 11) Ngaba uye wasebenzisa intetho ethile engavakaliyo okanye engaphucukanga yeli hlabathi? Ngaba usebenzisa iintetho ezimbini, enye uyisebenzisa xa uphakathi kwamaKristu, enye uyisebenzisa xa ukwenye indawo? UPawulos wabhala oku: “Makungaphumi nanye intetho ebolileyo emlonyeni wenu; mayibe yesukuba ilungele ukuxuma oko kuluncedo, ukuze ibabale abevayo.” (Efese 4:29) Hayi indlela ekubaluleke ngayo ukusebenzisa intetho efanelekileyo nenyulu maxa onke!
7. Kubandakanyeke ntoni ‘ekulahleni ubuxoki nasekuthetheni inyaniso’?
7 Kwakhona kufuneka sikulumkele ukuba sihlale sithetha inyaniso. Ukuba ngoguqukayo entweni okanye obalahlekisa ngabom abanye ukuze uphephe imbopheleleko ngokwenene oko kufana nokuxoka. Ngoko qiniseka ukuba uyasithobela isiluleko sikaPawulos esithi: “Lahlani ubuxoki, thethani inyaniso elowo nommelwane wakhe; ngokuba singamalungu, omnye elelomnye.”—Efese 4:25; IMizekeliso 3:32.
8. (a) Abantu abaninzi behlabathi basabela njani xa becatshukisiwe? (b) Ukuba sicatshukisiwe, sifanele senze ntoni?
8 Ukuphalaza umsindo ongalawulekiyo kuyenye inkalo yomoya weli hlabathi. Abantu abaninzi behlabathi abakwazi ukuzeyisa. Bayabhavuma, baze ke bazithethelele ngokuthi bebekhupha nje umsindo. Kodwa oku asikuko oko uPawulos wakubonisayo, kuba wabhala oku: “Mabukhweleliswe kuni bonke ubukrakra, nomsindo, nengqumbo, nengcolo, nonyeliso, ndawonye nolunya lonke.” (Efese 4:31) Kodwa kuthekani ukuba umsindo uthi ubekho phezu kwako nje ukuhlakulela kwethu ukuzeyisa nezinye iziqhamo zomoya kaThixo? UPawulos wabhala oku: “Qumbani, ningoni; ilanga malingade litshone nicaphukile; kananjalo musani ukumkhwelela indawo uMtyholi lo.” (Efese 4:26, 27) Ngoko ukuba sithi sicatshukiswe, sifanele siwuzinzise ngokukhawuleza umcimbi, ngaphambi kokuba usuku luphele. Ngapha koko, ubukrakra nentiyo zithi ziqalise ukwendela entliziyweni, ibe kunzima ukuzishenxisa. Musa ukuzivumela ukuba uphefumle “umoya” wengqumbo nowempindezelo weli hlabathi!—INdumiso 37:8.
9. Ziziphi izimo zengqondo ezithile eziqhelekileyo abanazo abaqeshwa, yaye kutheni le nto sifanele sizihlolisise iindlela esisebenza ngazo?
9 Kuthekani ngeendlela osebenza ngazo? Ukuhiliza emsebenzini nokuba izinto zomqeshi zizinto eziqhelekileyo namhlanje. Ngaba uye wawusezela lo “moya”? Ngaba uye wangenwa sisimo sengqondo sokuba ‘wonke ubani uyakwenza oku’? Ungaze ulibale ukuba indlela esiwenza ngayo umsebenzi wethu njengamaKristu ichaphazela uYehova nonqulo lwakhe oluyinyaniso. Ngaba ubungafuna ukuba ubani ayichase inyaniso ethethwa lelinye lamaNgqina kaYehova kwindlu yakhe ngenxa yendlela ozenza ngayo izinto emsebenzini? UPawulos wathi: “Lowo ubayo makangabi seba; kanye ke makabulaleke . . . ukuze abe nako ukwabela osweleyo.”—Efese 4:28.
10. Ekwenzeni umsebenzi wengqesho, sinokubonisa njani ukuba asichatshazelwa ‘ngumoya’ wokuzingca weli hlabathi?
10 Nangona ulwalamano oluphakathi kwenkosi nomkhonzi olwalukho ngenkulungwane yokuqala lunqabile namhlanje, abaqeshwa abangamaKristu banokufunda koko uPawulos wakubhalela abakhonzi abangamaKristu kumaEfese 6:5-8. Kwezo ndinyana abakhonzi baxelelwa ukuba ‘babathobele abo babasebenzelayo, kungengenxa yokuba bekholisa abantu, kodwa njengabakhonzi bakaKristu.’ Ngoko umKristu akafanele nakancinane azame ukwenza izinto ngenye indlela ukuze aphephe ukusebenza usuku lonke okanye ukuzisa impahla abethembise ukuyizisa okanye ukwenza oko ebethe uza kukwenza. Ukuba izinto sizenza ‘ngokunga sizenzela uYehova,’ siya kuba nesimo sengqondo esilungileyo yaye asiyi kuchatshazelwa ‘ngumoya’ wokuzingca nowokwanqena weli hlabathi.
Ukudla, Ukusela Nokuzonwabisa
11. Isimo sengqondo sehlabathi ngokudla nangokusela sabachaphazela njani abantu abathile bakaYehova kumaxesha okubhalwa kweBhayibhile?
11 Ngaba uye wachatshazelwa yindlela elihlabathi elikusebenzisa ngokungenabungcathu ngayo ukudla nokusela? Isimo salo sengqondo sesokuba ‘masesisidla, sisela, sonwabe, ngokuba ngomso siya kufa.’ (1 Korinte 15:32) Ibe lo moya uye wabachaphazela abakhonzi abathile bakaThixo, ukususela kwakumaxesha amandulo. Khumbula isiganeko esenzeka entlango xa amaSirayeli ‘ahlala phantsi, adla asela, asuka ema, adlala [azonwabisa, NW].’ (Eksodus 32:6) Oko ‘kuzonwabisa’ kwakhokelela kwihambo evakalala engalawulwayo nasekunquleni izithixo, kangangokuba umsindo kaThixo wavutha kuwo. Masingaze sililandele elo khondo.—1 Petros 4:3-6.
12. Ukuba iindlela esidla nesisela ngazo kufuneka sizinikele ingqalelo ethile, sifanele senze ntoni?
12 UYehova uye wasinika ukudla neziselo ezininzi ezahlukahlukeneyo ezinencasa, ezithandekayo nezinesondlo, kodwa ezi zinto ufuna ukuba sizisebenzise ngobungcathu. IBhayibhile iyabugxeka ubudla-kudla nobunxila. (IMizekeliso 23:20, 21) Ngoko, ngonyanisekileyo khawuzibuze oku: Ngaba ikho indawo endinokuphucula kuyo kwiindlela enditya nendisela ngazo? Ukuba kufuneka uqhelisele ukuzeyisa okukhulu, kuqonde oku yaye yenza izinto ngokuvisisana nemithandazo yakho ukuze umoya kaThixo ukuncede uyoyise le ngxaki. UPawulos wathi: “Musani ukunxila yiwayini, ekukhoyo kuloo nto ukuzibhubhisa; manizaliswe ngumoya.” (Efese 5:18) Ewe, zaliswa ngumoya kaThixo, yaye musa ukuyekelela kumoya ongalawulekiyo weli hlabathi! “Nokuba niyadla, nokuba niyasela, nokuba nenza yiphi na into, zenzeleni uzuko lukaThixo izinto zonke.” (1 Korinte 10:31) Noko ke, ukuba usoloko uneengxaki kwezi nkalo, funa uncedo lwamadoda akhulileyo ngokomoya asebandleni.—Galati 6:1; Yakobi 5:14, 15.
13. (a) Ibonakala njani into yokuba uMtyholi uye wakonakalisa ukuzonwabisa okuninzi okukhoyo namhlanje? (b) Sinokusiphepha njani isimo sengqondo seli hlabathi ngasekuzonwabiseni?
13 Eli hlabathi likhotyokiswe gqitha yimidlalo, ngumculo naziintlobo ezahlukahlukeneyo zokuzonwabisa. Ukuzinandipha ezi zinto asikuba kuphosakele, ngaphandle kokuba zingqubana nemigaqo engokweZibhalo. Kodwa ingxaki yeyokuba uSathana, ‘umphathi womoya,’ uye wakonakalisa ukuzonwabisa okuninzi okukhoyo namhlanje. (Efese 2:2) Ngokufuthi, kukhuthazwa ukuziphatha okubi, kuthethelelwa ugonyamelo yaye kude kuboniswe ukuba impumelelo ifumaneka ngokuqhatha kwanangokubulala. Xa sibukele ukuzonwabisa okunjalo, siziphefumlela ngaphakathi kuthi ezi zimo zengqondo, ibe imiphumo yazo enetyhefu imele isenzakalise. Ngaphezu koko, nalapho iintlobo ezithile zokuzonwabisa zingachasananga neZibhalo, kukho ingozi yokukhotyokiswa zizo, kangangokuba kungabikho xesha lokunyamekela izinto zokomoya. Ngenxa yoko, kufuneka sibe ngabakhethayo. Yiba nexesha lokunandipha ngobungcathu ukuphumla okuthile okunik’ impilo nokuyingenelo, kodwa kuphephe ukulandela iindlela ezigabadeleyo zeli hlabathi. Enoba “umoya” weli hlabathi uvakala unevumba elimnandi okanye elingathandekiyo, ungcolile yaye uyabulala!—IMizekeliso 11:19.
Ikratshi Lobuzwe—Umoya Ombi
14. Ngokubhekisele kwiingxaki zentlalo, sinokuchatshazelwa njani ‘ngumoya’ weli hlabathi?
14 Enye inkalo ongenakukhawulez’ uyiqonde ‘yomoya’ weli hlabathi likratshi lobuzwe nelobuhlanga. Bambi bakhuthaza imbono ephosakeleyo yokuba izizwe ezithile zingabantu bodidi oluphezulu yaye ezinye zingabantu bodidi oluphantsi. Ubuhlanga bukhuthaza abantu ukuba ilizwe labo lokuzalwa balijonge lileliwongameleyo onke amanye. Enyanisweni, abaninzi babandezeleka ngokungeyomfuneko yaye bavinjwa amalungelo nezinto eziyimfuneko ezisisiseko zabantu ngenxa yokuzingca nokuba nekhethe. Oku kuthi kuphumele kwinzondo kwanakugonyamelo. Abaninzi bathi bavukele, bewuthabathela ezandleni zabo umthetho, beqinisekile ukuba iingxaki zentlalo baya kuzicombulula ngeyabo indlela. Nathi, sisenokubanjiswa zezi zinto. Xa sibona okungekho sikweni okanye sibandezelwe kuko size ke sive abo banyanzelisa ukuba kubekho inguqulelo kwezentlalo, sinokuphembeleleka ukuba asilumkanga. Sinokuqalisa ukubuyeka ubundilele bethu size sixhase elinye icala. (Yohane 15:19) Okude kwakubi ngakumbi kukuba, sinokuziva sihendekile ukuba sithelele ekugwayimbeni, ekubumbeni amaqela okulwa, okanye ekubheneleni kugonyamelo ukuze sinyanzelise ukuba kubekho iinguqulelo ezenziwayo.
15. Xa siziva sifuna ‘ukuziphindezelela’ liliphi ikhondo elincomelayo iBhayibhile?
15 Umoya webandla unokuba sengozini ngenxa yeemvakalelo zobuzwe okanye zobuhlanga. (Thelekisa IZenzo 6:1-7.) Kodwa siya kuba nomoya omhle xa sithobela esi siluleko: “Ukuba kunokwenzeka, okukokwenu nina, hlalani ninoxolo nabantu bonke. Musani ukuziphindezelela, zintanda; yikhweleleni ingqumbo; kuba kubhaliwe kwathiwa, Impindezelo yeyam, kuya kubuyekeza mna, itsho iNkosi.” (Roma 12:18, 19) Ekubeni zonke izizwe zavela kwisibini sokuqala esingabantu, yaye uThixo engemkhethi wabuso bamntu, akumele kubekho ikratshi lobuzwe okanye lobuhlanga kwibandla lamaKristu.—IZenzo 10:34, 35; 17:26; Roma 10:12; Efese 4:1-3.
Hlala Uphefumla “Umoya” Odlisa Ubomi
16. Yintoni eya kunceda ekusithinteleni ukuba singachatshazelwa ngumoya weli hlabathi?
16 Siye sathetha ngeenkalo eziphambili ezibulalayo ‘zomoya’ weli hlabathi. Usingqongile yaye unamandla kangangokuba ukuba siwuvulela indawo yokuba ungene kubumoya bethu, lo “moya” ungcolileyo uya kungena uyizalise loo ndawo. Impumelelo ekuwuxhathiseni ixhomekeke ikakhulu kwindlela esikuthanda ngayo okunyulu, okucocekileyo nokububulungisa, nendlela esikuthiya ngayo okungcolileyo, okungacocekanga nokungendawo. Ukuba sihlala sihlakulela isimo sengqondo esilungileyo yaye silandela ukhokelo lomoya oyingcwele kaYehova siya kuhlala siphefumla “umoya” olungileyo.—Roma 12:9; 2 Timoti 1:7; Galati 6:7, 8.
17. Yintoni efanele yenziwe ngokukhawulezileyo xa sibona “umoya” weli hlabathi usigubungela?
17 Ngazo zonke iindlela, musa ukuvumela “umoya” ongcolileyo weli hlabathi ukuba uqalise ukuvakala unuka kamnandi kuwe. Umphathi walo “moya” uyazi kakuhle into efunekayo ukuze atsale umdla wethu nokuze akhe ulangazelelo oludla ngokukhokelela kwisono. (Yakobi 1:14, 15) Hlala ‘ukwindawo ekungatshaywayo’ kuyo, iparadisi yokomoya kaYehova. Xa ubona umsi ‘womoya’ weli hlabathi ukugubungela, wuphephe. Wushiye ngendlela kanye obuya kuyiphepha ngayo ityhefu ebulalayo. “Khangelani ngoko, ukuba ningathini na, ukuze kucokiseke ukuhamba kwenu; ningabi njengabaswele ubulumko, yibani njengezilumko; nizongela ixesha eli, ngokuba le mihla ayindawo. Ngenxa yoko musani ukuba ziintsweli-kuqonda; yibani ngabakuqondayo into okuyiyo ukuthanda kweNkosi.”—Efese 5:15-17.
18. Uya kuba njani umoya wabo banikwe ilungelo lokuphila kumhlaba ocociweyo?
18 Ukuthanda kukaThixo kukuba simkhonze njengabagcini bengqibelelo. Ukwenjenjalo kuya kuthetha ubomi kwinkqubo yakhe entsha, esemnyango ngoku. Xa siphefumla umoya ngelo xesha, hayi indlela oya kuhlaziya ngayo! Awuyi kuba nazinto zingcolisayo ezibulalayo, uya kuba ngumoya nje ococekileyo odlisa ubomi. Kuya kuba njalo nangomoya wokoqobo yaye, okubaluleke ngakumbi kukuba, kuya kuba njalo ngomoya wabo banikwe ilungelo lokuphila kumhlaba ocociweyo. Baya kuba nesimo sengqondo sokuthobela, sokululama nokuphulaphula. “Umoya” weli hlabathi lidala, ozaliswe ziimpembelelo zemvukelo, ezonakeleyo nezokungahloneli Thixo, uya kube ungasekho.—ISityhilelo 21:5-8.
19. Ngoobani abaya kusindela kwinkqubo entsha kaYehova?
19 Ngokuqinisekileyo, asifuni kuba phakathi kwabo baphefumla “umoya” wale nkqubo xa uYehova eshenxisa ungcoliso nabangcolisi bawo eArmagedon. Enjani yona inkululeko eya kubakho xa eli hlabathi lidala lingasekho ‘nomphathi womoya’ ekhonxwe enzonzobileni! Bonke abamthandayo uYehova nabahlala bekuthanda okucocekileyo, okundilekileyo nokububulungisa baya kuba lapho. UYehova ubafuna belapho yaye uya kubanceda ngomoya wakhe. Uya kubanika ubomi obungunaphakade kwinkqubo entsha ecocekileyo nenik’ impilo. Masingaphulukani nelungelo elinjalo ngenxa yokuphefumla “umoya” obulalayo wale nkqubo indala!
Unokuphendula Njani?
◻ Kungayiphi indlela anokuthi umntu olibawa abe ngumkhonzi wezithixo?
◻ “Umoya” weli hlabathi unokuzichaphazela njani iindlela othetha ngazo?
◻ Abaqeshwa abangamaKristu bafanele babonakalise wuphi umoya ngoxa besenza kumsebenzi wengqesho?
◻ Unokukuphepha njani ukuchatshazelwa sisimo sengqondo seli hlabathi ekudleni, ekuseleni nasekuzonwabiseni?
◻ Mayela nobuzwe nobuhlanga nguwuphi umoya ongamele ubekho kwibandla lamaKristu?
[Umfanekiso okwiphepha 16]
Ngaba intsapho yakho yomelele gqitha ngokomoya ukuze ixhathise “umoya” weli hlabathi?
[Umfanekiso okwiphepha 17]
Ukuba izinto sizenza ‘ngokungathi sizenzela uYehova asiyi kuchatshazelwa ‘ngumoya’ wokuzingca nowokwanqena weli hlabathi