IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w87 10/1 iphe. 26-30
  • Ndibonile Ukuba UYebova Ulungile

No video available for this selection.

Sorry, there was an error loading the video.

  • Ndibonile Ukuba UYebova Ulungile
  • IMboniselo Evakalisa UBukumkani BukaYehova—1987
  • Imixholwana
  • Amanqaku Afanayo
  • Ubulungiseleli Bexesha Elizeleyo
  • Ukuchaswa Ebudeni Bokugquba Kwemfazwe
  • Isabelo Sokukhonza EGiliyadi Nakwilizwe Lasemzini
  • Ukukhonza Phantsi Kokuvalwa Komsebenzi
  • Ukukhonza EPuerto Rico
  • Ndibone “Omncinanana” Esiba “Luhlanga Olunamandla”
    IMboniselo Evakalisa UBukumkani BukaYehova—1997
  • Ukufuna Kuqala Ubukumkani—Ubomi Obunqabisekileyo Nobonwabisayo
    IMboniselo Evakalisa UBukumkani BukaYehova—2003
  • Icandelo 4—Amangqina Ukusa Ekupheleni Komhlaba
    AmaNgqina KaYehova—Abavakalisi Bobukumkani BukaThixo
  • Indlela Okwandonwabisa Ngayo Ukupha
    IMboniselo Evakalisa UBukumkani BukaYehova (Efundwayo)—2016
IMboniselo Evakalisa UBukumkani BukaYehova—1987
w87 10/1 iphe. 26-30

Ndibonile Ukuba UYebova Ulungile

Ngokubaliswa NguLennart Johnson

NGECAWA, umhla wama-26 kuJulayi 1931, umongameli wesibini weWatch Tower Bible and Tract Society, uJ. F. Rutherford, wanikela intetho ethi “UBukumkani, Ithemba Lehlabathi” kwindawo yokuzonwabisa eColumbus, eOhio. Intsapho yakowethu eyayihlala eRockford, eIllinois, yayiphulaphula kunomathotholo loo ntetho. Ndandine-14 leminyaka kuphela ubudala, kodwa olu cwangciso, lwaba ngathi lususe umkhusane ongqingqwa owawundisithile.

Nangona ubawo wayenomdla kwisigidimi soBukumkani, yaye kamva umkhuluwa wam, umama yena wayesoloko engazikhathazi ngaso. Ubawo wafa kunyaka olandelayo, ngowe-1932. Ezinye iindaba zeWatch Tower ezazisasazwa ngamaza omoya zaqhubeka zindondla ngokomoya, kodwa kwade kwaba ngoAprili 1933 endathi ndafumana indawo awayehlanganela kuyo amaNgqina kaYehova, eyayingumgama oziikhilomitha eziliqela kwelinye icala lomlambo.

Hayi indlela ekwakumangalisa ngayo kwelo qela lincinane lalapho ukubona ibhayisikile encinane ekhwelwe ngokwishumi elivisayo esiya esifundweni sencwadi ethi Vindication uMqulu weSibini! Ndandisoloko ndifunda okungakumbi kwintlanganiso nganye, yaye kwiinyanga ezimbini kamva ndakuvuyela ukuqalisa ukushumayela isigidimi soBukumkani kwindlu ngendlu. Ndabhaptizwa kwindibano yenqila (ngoku eyeyesiphaluka) kwangaloo nyaka mnye.

Suku ngalunye ukuphuma kwesikolo, ndandichitha iyure okanye kweso sithuba ndityelela abamelwane kummandla okufutshane nasekhaya ngesigidimi soBukumkani. Kwakhona ndandiba nethuba lokunikela ubungqina esikolweni. Ngokomzekelo, esinye isifundo sasingengcamango yobukho besihogo somlilo nokuthuthunjiswa kuso. Oku kwandiqhubela ekubeni ndinikele ubungqina obusekelwe kwiZibhalo bokuba abafileyo abathuthunjiswa kodwa, kunoko, abazi nto yaye basemangcwabeni abo benethemba lovuko. Umfundisi-ntsapho wandivumela ukuba ndifunde isincoko sam esasibangel’ umdla phambi kwabo bonke ababesegumbini lokufundela.

Ubulungiseleli Bexesha Elizeleyo

NgoMeyi 1935, ndaya kwindibano eyayiseWashington, D.C., apho ubuvulindlela (ubulungiseleli bexesha elizeleyo) bathi babalaseliswa khona. Ekubuyeleni kwam ekhaya, ndabhalela iWatch Tower Society, yaye okwandimangalisayo kukuba, ayizange ibuyise nje kuphela uludwe lwemimandla yentsimi enokusetyenzwa kodwa yathumela kwaneqela leeplani zokwakha indlwana erhuqwa yinqwelo-mafutha. Kuloo mihla ukuba nguvulindlela ngokufuthi kwakuthetha ukufudukela kwimimandla emitsha, yaye indlwana erhuqwa yinqwelo-mafutha yayisetyenziswa njengendawo anokuhlala kuyo umntu. Ngoko ndagqiba kwelokuba ndenze umgudu wokufumana inqwelo-mafutha nendlwana leyo ukuze ndikwazi ukungenela ubulungiseleli bexesha elizeleyo.

Okwelo xesha, ndasebenzisa inqwelo-mafutha enesandisi-lizwi eyayifunyenwe libandla lethu ukuze kubhengezwe isigidimi soBukumkani. Xa sathi nomnye umzalwana samenyeIwa ukuya kusebenza ngayo eMonroe, eWisconsin, ndadibana noVirginia Ellis yaye ngokukhawuleza emva koko ndatshata naye. Ngoku sasinokuncedisana ukuze sifumane loo nqwelo-mafutha nendlwana erhuqwayo esasiza kuzisebenzisa kumsebenzi wobuvulindlela!

Kwathi ekwindla lowe-1938 umama wafa, yaye malunga nelo xesha uHarold Woodworth waseNew Mexico wasibhalela esithi: “Yizani ngapha; nifuneka kakhulu.” Ngoko sathabatha uhambo lokucanda umhlaba olumalunga ne-1 600 leekhilomitha ukuya eNew Mexico. Ngoxa sasisendleleni, safumana ucingo olwaluthunyelwe ngedilesi yaloo ndawo sasikuyo. Lwalunesibongozo esithi, “Buyelani ekhaya.” Ndandinikwa umsebenzi onentlawulo encumisayo owawunamathuba amahle kakhulu okunyuselwa. Ndalikrazula elo phepha locingo. Ukuba uYehova wayesincedisile ukulungiselela ukuba ngoovulindlela, ndandingayi kuvumela nantoni na isiphazamise!

NgoMatshi 1939 saqalisa inkonzo yethu yobuvulindlela ngaseHobbs, eNew Mexico. Eli yayililizwe ekwakufuywe iinkomo kakhulu kulo; kwakukwakho neendawo ezininzi ezazisandul’ ukumiwa nekwakufumaneka ioli eninzi kuzo ekwakufuneka sizityelele kulo mmandla. Ibandla elincinane elalilapho laliba neentlanganiso ngoLwesihlanu nangeCawa, ngoko sasiphatha uncwadi, amanzi, ukutya, isitovu esincinane nebhedi esongwayo size sishumayele ezilalini ukususela ngoMvulo de kube ngenjikalanga yangoLwesihlanu. Ebusuku, sasilala endle sibona isibhakabhaka njengophahla size sibeke “isibane” esivuthiswa ngeoli kufutshane nathi ukwenzela ukothusa iinyoka ekuthiwa ziirattlesnakes zingasondeli kuthi. limpelaveki sasizichithela ekusebenzeni nebandla edolophini.

Emva kweenyanga eziliqela sisebenza apho, umbutho wasithumela eRoswell yaye emva koko sathunyelwa eAlbuquerque, eNew Mexico. Nalapha sasebenzisa inqwelo-mafutha enesandisi-lizwi, eyayisebenziseka ngakumbi ekunikeleni ubungqina kwiidolophana zamalndiya ezazikuloo mmandla. Xa kwathi kwaqalisa umsebenzi omtsha wokunikel’ ubungqina ngamaphephancwadi esitratweni ebutsheni bowe1940, sakuvuyela ukuba nesabelo kuwo kunye nabazalwana baseAlbuquerque.

Ukuchaswa Ebudeni Bokugquba Kwemfazwe

Imfazwe yehlabathi yesibini yayiqalise ngoSeptemba odlulileyo eYurophu, yaye kwalandela ithuba lenkcaso ekrakra ngenxa yokungabi nanxaxheba kwethu emfazweni. Ngenye imini ihempe yam yakrazulwa apha emqolo ngoxa ndandinesabelo kubulungiseleli.

Kwihlobo lowe-1940 kwabanjwa iqela labazalwana ababekumsebenzi wamaphephancwadi kufutshane ne-El Paso, eTexas. NgoMvulo weveki elandelayo, mna noHarold Woodworth saya kubancedisa ebudeni bokuxoxwa kwetyala labo. Ndakwazi ukuphuhlisa iingongoma ezifanelekileyo ezazibonisa ubumsulwa babazaIwana ngokuthi ndibabuze inkundla iphulaphule. Emva kokuba kuvakaliswe ukuba bamsulwa xa bebonke, ingxelo yephephandaba yabhekisela kum “njengegqwetha eliselula nelithembisayo laseAlbuquerque.” Kodwa ngokwenene, yayinguYehova owenza abakhonzi bakhe baphumelela ngaloo mini!

Ngokufanayo, kwesinye isixeko abazalwana babephoswe ngaphaya kwezitshixo ngenxa yokushumayela. Emva kokuba ndivele enkundleni ngenjongo yokubamela, mna noMzalwan’ uDavid Gray sabhalela igosa lesixeko ngasinye. Kwileta nganye saphawula ilungelo elingokwasemthethweni analo amaNgqina kaYehova lokwenza umsebenzi wawo, yaye kuloo leta salumkisa ngokuba ukuba amaNgqina ayeqhubeka ekhathazwa, amagosa ayeya kuba netyala lawo nawuphi na umonakalo owawusenokuba ngumphumo woko.

Usibonda wedolophu wayifumana loo leta waza wayifunda yaye akazange athethe nelimdaka, kodwa, umphathi wamapolisa wasixelela oku: ‘Apha eNtshona, abantu bathabatha uhambo baphume esixekweni, kwaye . . . ewe . . . kuthi kamva abanye babakhangele, yaye abaze babafumane.’ Phofu ke, eso sisongelo asizange siphunyezwe kunoko, imeko yaba yezolileyo yaye ityala labazalwana elalixoxwa enkundleni lapheliswa.

Malunga neli xesha iWatch Tower Society yandimisela ukuba ndibe sisicaka secandelo (ngoku esibizwa ngokuba ngumveleli wesiphaluka). Indawo endandiyabelwe yayidibanisa ummandla omkhulu weNew Mexico nenxalenye yaseTexas.

Isabelo Sokukhonza EGiliyadi Nakwilizwe Lasemzini

Ngowe-1943 mna noVirginia safumana isimemo sokuba kwiklasi yesibini yeSikolo SeBhayibhile seWatchtower saseGiliyadi. Emva kokugqiba kuso ngoJanuwari 1944, okokuqala sabelwa ukusebenza neBandla laseFlatbush eBrooklyn, eNew York. Sasihlala kwisakhiwo esidala esasisemva komzi-mveliso woMbutho esathi kamva sadilizwa ukuze kwandiswe isakhiwo somzi-mveliso owawuseAdams Street.

Noko ke, ekuhambeni kwexesha, safumana isabelo sokuya kwiRiphabliki yaseDominica, apho uRafael Leónidas Trujillo Molina wayelawula ngegqudu khona. Xa safikayo ngeCawa, umhla woku-1 kuAprili 1945, yayindim noVirginia kuphela amaNgqina awayekho kwelo lizwe. Saya kwiHotele yaseVictoria saza safumana indawo yokuhlala—sisobabini sasihlawula i-R10 ngosuku, kuquka nokutya. Kwangaloo njikalanga saqalisa isifundo sethu seBhayibhile sokuqala.

Oku kwenzeka ngolu hlobo: Amabhinqa amabini aseDominica esasiwaqhubela isifundo seBhayibhile eBrooklyn ayesinike amagama ezalamane nawabantu awayebazi, elinye lalilelika Gqr. Green. Xa samtyelelayo, sadibana kwanommelwane wakhe uMoses Rollins. Sakuba sibaxelele indlela esasiwafumene ngayo amagama neekhelingi zabo, basiphulaphula ngenyameko isigidimi soBukumkani yaye bavuma ukuqhutyelwa isifundo seBhayibhile. Ngokukhawuleza uMoses waba ngumvakalisi woBukumkani wokuqala ekuhlaleni.

Kwangolo rhatya uGqr. Green wasikhwelisa kumgangatho ophezulu kaduladula ukuya kufuna indlu yokuhlala. Ekugqibeleni saqesha igunjana elalifakwe ikhonkile kwikomkhulu lalapho, iCiudad Trujillo (ngoku eyiSanto Domingo). NgoJuni sathelelwa ngabanye abavangeli basemazweni abane. Kwavulwa ikhaya lesibini labavangeli basemazweni, kwaza ke kwafika abavangeli basemazweni abangakumbi. NgoAgasti 1946 saba nencopho yabavakalisi abangama-28. Ngokukhawuleza kwafika abanye abavangeli basemazweni abaninzi, yaye nabo bavulelwa amakhaya okuhlala. Ulwando Iwaluqhubeka!

Ukukhonza Phantsi Kokuvalwa Komsebenzi

Ngowe-1950 sasande ukuya kutsho ngaphe zu kwama-200 abavakalisi. Noko ke, ngenxa yokuba amaNgqina kaYehova ahlala engoondilele ngokungqongqo, amagosa kaTrujillo aqalisa ukuphosa abazalwana bethu abaselula ngaphaya kwezitshixo. Kwaza ke, ukuqwela, awubhangisa ngokupheleleyo umsebenzi wamaNgqina kaYehova ngoJuni 21, 1950.

Bengakwazi ukuhlangana kwiiHolo zoBukumkani, abazalwana baqalisa ukuhlangana ngokwamaqela amancinane ezindlwini zabantu ukuze bangabonwa. Apho sasifunda amanqaku eMboniselo yesiNgesi awayebhalwa ngomatshini oyimimeograph. Bonke abanyanisekileyo babekuxabisa kakhulu ukudla kokomoya uYehova awayeqhubeka ebanika kona kwezi zifundo zamaqela amancinane.

Usuku lwangeCawa salusebenzisa ekutyeleleni abazalwana bethu abaninzi baseDominica kwiintolongo zaseTrujillo. Xa singena sasimpantshathwa, size sigocagocwe xa sizazisa. Maxa wambi xa sikunye naba bazalwana amajoni ayesijikeleza, esiqwalasele ngenyameko. Ngesinye isihlandlo sahamba noStanley Aniol waseChicago, owayeye kubona intombi yakhe uMary owayengumvangeli wasemazweni (ngoku onguMary Adams okhonza kwiBheteli yaseBrooklyn). Eshukunyiswe yingqibelelo yabazalwana abaselula baseDominica, uMzalwan’ uAniol wabanga bonke ngothando amajoni ebukele.

Ekupheleni kotyelelo lwethu, njengoko sasisihla ngesona sitrato sinamashishini amaninzi, inqwelo-mafutha eyayizele ngamadoda aseTrujillo yasilandela ithe chu. Le yayiyenye yeendlela ezidumileyo ezazisetyenziswa eTrujillo zokoyikisa abantu. Xa saxelela uMzalwan’ uAniol isizathu sokuba loo madoda enze loo nto, akazange othuke nakancinci. Ngenene, kwakulungile ukungayisi so imigudu yeTrujillo yokusoyikisa size sikholose ngoYehova.

Maxa wambi amabhedengu, abecuphi baseTrujillo, babefika egumbini lethu, baze bazenze abazalwana. Ngoko sasimele sibe ‘nobulumko njengeenyoka, sibe njengamahobe ukungabi nabuqhinga.’ (Mateyu 10:16) Abantu abanjalo sasibahlola ngokubancina ukuze sibone enoba babengabazalwana bethu ngokwenene na okanye kwakungenjalo.

Ebudeni bokuvalwa komsebenzi izithethi eziliqela zazisithi eso neso sinikele iintetho zeSikhumbuzo kumaqela amathathu awahlukahlukeneyo, zizama kangangoko kunokwenzeka ukuba zingaqatshelwa xa zihamba ukusuka kwenye ilokishi ukuya kwenye. Ngobusuku beSikhumbuzo kwakudla ngokuna imvula enezikhukula, yaye oko kwakuyintsikelelo kuthi ekubeni iqela labecuphi baseTrujillo laliyoyika imvula enkulu oku kwabantu bezinye iindawo xa besoyika uqhwithelo olunekhephu.

Ekubeni urhulumente waseTrujillo wayengayi kubavumela abavangeli basemazweni ukuphinda bangene kwelo lizwe, abaninzi kubo abazange baye kwiindibano zezizwe ngezizwe kwiSixeko saseNew York ngowe-1950 nangowe-1953. Sasimele saneliswe yingxelo yendibano ayayibhalwe kwiThe New York Times, phephandaba elo elalibonisa imifanekiso emihle yendibano nenkcazelo eneenkcukacha yocwangciso lwamihla le. Kwakhona, kumbonisobhanyabhanya owawuqhutyelwa kuloo mmandla kwaboniswa kangangethuba elide inani elikhulu labo babebhaptizwa kwindibano yowe-1953.

Ngowe-1956 mna noRoy Brandt sabizelwa ukuncinwa ngokwasemthethweni. Ngaphambilana amagosa oburhulumente bukaTrujillo ayememe uMzalwan’ uManuel Hierrezuelo ukuba eze kuwabona. Kodwa kamva uManuel wabuyela kowabo esisidumbu. Ngoko ke, kwakuza kwenzeka ntoni kuthi?

Ekufikeni kwethu sabuzwa ngabanye ngabanye, ngokuqinisekileyo iimpendulo zethu zazirekhodwa. Akuzange kuphinde kwenzeke nto emva koko, kodwa kwiinyanga ezimbini kamva amaphephandaba avakalisa ukuba urhulumente waseTrujillo wakuphelisa ukuvalwa komsebenzi wamaNgqina kaYehova nokuba sasingaqhubeka kwakhona nomsebenzi wethu esidlangalaleni. IiHolo zoBukumkani zakhiwa kwakhona, yaye umsebenzi kaYehova wahambela phambili.

Noko ke, ngoJuni 1957 kwaqalisa enye intshutshiso ekrakra, yaye bonke abavangeli basemazweni banikwa uphumaphele kwelo lizwe. Ukunduluka kwethu kwaba lusuku olubuhlungu ngenene kuthi. Mna noVirginia sasikhonze iminyaka eli-12 kwiRiphabliki yaseDominica yaye sasibone inani lamaNgqina likhula ukususela kuthi sobabini ukuya kutsho ngaphezulu kuhle kwama-600. Ngowe-1960 ukuvalwa okwesibini komsebenzi kwapheliswa, yaye inani labavakalisi laqhubeka likhula de ngoku laba limalunga ne-10 000!

Ukukhonza EPuerto Rico

Xa safikayo ePuerto Rico ngoAgasti 1957, abazalwana bethu abangamaKristu ndawonye neentatheli zamaphephandaba beza kusikhawulela. Iingxelo zeendaba ezapapashwayo zanikela ubungqina obalizalisa lonke elo. Ngelo xesha, kwakukho abavakalisi boBukumkani abangaphantsi kwe-1 200 ePuerto Rico; ngoku kukho abaphantse babe ngama-22 000!

Ngowe-1958 uMbutho wandimema ukuba ndibe ngumveleli ohambahambayo. Ngaloo ndlela, kangangeminyaka eliqela siye saqhelana yaye sasebenza nabazalwana abaninzi abathembekileyo abakuyo yonke imimandla yasePuerto Rico nakwiziqithi zeVirgin. Ekuhambeni kwexesha, mna nowakwam saba ngamalungu entsapho yaseBheteli yasekuhlaleni. Yaye ukususela ekusekweni kweKomiti yeSebe yalapha, uYehova uye wandibabala ngokuba lilungu layo.

Kundonwabisa kakhulu ukufumana ngokobuqu ‘ukwamkeliswa kalikhulu ngoku . . . nabazalwana, noodade, noonina nabantwana’ okwaxelwa ngaphambili ukuba uYehova uya kukwenza. (Marko 10:30) Andizange ndithande ukubuphila ngayo nayiphi na enye indlela ubomi bam ngaphandle kokubuphilela enkonzweni yakhe. Yaye ngoko, xa ndikhangela emva kwiminyaka enokuba ngama-48 ukususela ekuqaliseni kwam ukuba nguvulindlela, kuyandivuyisa ukuthi, ngenene ndibonile ukuba uYehova ulungile!—INdumiso 34:8.

UVirginia Johnson wafa ngoxolo ngoxa wayelele ngoJanuwari 31, 1987, xa kwakuqokelelwa inkcazelo yokugqibela yeli bali lingasentla lobomi bukaLennart Johnson

[Amagama acatshuliweyo akwiphepha 27]

NguYehova owabenza baphumelela abakhonzi bakhe ngaloo mini!

[Amagama acatshuliweyo akwiphepha 28]

Bonke abathembekileyo bakuxabisa kakhulu ukudla kokomoya uYehova awayeqhubeka ebanika kona

[Umfanekiso okwiphepha 29]

Mna noVirginia sasebenza nabazalwana abaninzi abathembekileyo kuzo zonke iindawo zasePuerto Rico

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share