Imibuzo Evela Kubafundi

◼ Yayiyintoni impazamo kaMoses eyamphulukanisa nelungelo lokungena kwiLizwe Ledinga? Ngaba yaba kukubetha eliweni endaweni yokuthetha nje ebhekisa kulo okanye ngaba akazange amzukise uYehova uThixo?

Kubonakala ukuba impazamo kaMoses yayingekokubetha nje iliwa endaweni yokuthetha ebhekisa kulo, njengoko uThixo wayeyalele.

Ngasekupheleni kweminyaka engama-40 yokubhadula, amaSirayeli amisa iintente eKadeshe-barneha kwintlango yaseTsin (okanye, yeParan). Ayegxumeke iintente zawo apho kumashumi eminyaka ngaphambili, mhlawumbi ngenxa yemithombo emithathu kuloo ngingqi ebangela ukubakho kohlaza oluyingqongileyo, njengoko kunokubonwa kumfanekiso olandelayo. Noko ke, ngesi sihlandlo, amanzi ayenqongophele, nto leyo eyathetha ukuba abantu babengenakufumana kutya kuninzi. Ngoko bakhalaza kuMoses, ummeli kaYehova, besithi: “Yini na ukuba nisinyuse eYiputa, nisizise kule ndawo imbi kangaka? Asindawo yambewu, namakhiwane, namidiliya, nazirharnate, tu namanzi okusela.”—Numeri 20:5.

Ngoko uThixo waxelela uMoses noAron wathi: “Yithabathe intonga, ulibizele ndawonye ibandla, . . . nithethe engxondorheni phambi kwabo, inike amanzi ayo, ubakhuphele amanzi engxondorheni apho, uliseze ibandla neenkomo zalo.’’ (Numeri 20:8) Kwenzeka ntoni ngokulandelayo?

“Wasibizela ndawonye uMoses noAron isikhungu phambi kwengxondorha leyo, wathi kubo, Khanive, nina baneenkani. Sinikhuphele amanzi kule ngxondorha na? Wasiphakamisa uMoses isandla sakhe, wayibetha ingxondorha ngentonga yakhe izihlandlo zazibini; aphuma amanzi amaninzi.”—Numeri 20:10, 11.

Bambi baye bathi uThixo wayalela uMoses noAron ukuba ‘bathethe engxondorheni,’ kodwa bona basuka ‘bayibetha.’ Ngaba loo nto ayizange imkholise uYehova kangangokuba waxelela uMoses noAron ukuba Yena wayengasayi kubavumela bamkhokele uSirayeli ukungena kwilizwe Ledinga?

Akubonakali kunjalo. Isibakala sikukuba kwiinyanga nje ezimbalwa emva kweMfuduko, abantu bathi baqala ukukhalazela ukungabikho kwamanzi. Oku kwenzeka kufutshane neNtaba yeSinayi (eHorebhe), endaweni eyathi yabizwa ngokuba yiMeribha (kummandla obonakala ngezantsi). Phawula oko uThixo wakuxelela uMoses kweso sihlandlo: “Ndiya kuma phambi kwakho khona, phezu kweliwa eHorebhe; uze ulibethe iliwa; kophuma amanzi kulo, basele abantu.” (Eksodus 17:2-7; 33:6) Ngoko xa uMoses waxelelwa ukuba athethe kulo iliwa eKadeshe, kusenokuba wayetyekele ekwenzeni oko wayekwenze ngaphambili ngokomyalelo kaThixo, nakuba uThixo wayethetha ukuba ukuthetha nje kulo iliwa kwakuya kwanela.

Kubonakala kukho okungakumbi okwakhokelela uThixo ekumgwebeni uMoses noAron. Kunokuba kwakuyintoni oko? UMoses wathi kwabo bantu bazaliswe zizikhalazo: “Sinikhuphele amanzi kule ngxondorha na?” INdumiso 106:33 isinika mbono ithile ngako oku, kuba ibonisa ukuba uMoses wathetha ngomoya oshushu waza ‘waphololoza ngomlomo wakhe.’ Kunokuba atsalele ingqalelo kuLowo wayenokuthi ngenene akhuphe amanzi ngommangaliso, ngokucaphuka, watsalel’ ingqalelo kuye siqu nakuAron. Ngaloo ndlela, kanye nje phambi kokufa kukaMoses emdeni weLizwe Ledinga, uThixo wabhekisela kwisiganeko saseKadeshe-barneha waza wabonisa ukuba impazamo kaMoses yayikukuba akazange ‘amngcwalise uThixo phambi kwamehlo abantu.’—Numeri 27:12-14.

Kukho esikufundayo koku. Ngoxa liqinisekile elokuba kubalulekile ngathi ukuba sikuphephe ukwenza izinto ngomsindo, ngokufanayo kubalulekile ukuwubamba umoya wethu, ingakumbi xa abanye besilela. Ukuba sizivumela ukuba siphazamiseke ngokugqith’ emgceni, sinokuqalisa ukubajonga abakhonzi bakaThixo ngokwabantu benyama, kunokubagqala ‘njengabasezizimvu’ zikaThixo. Enyanisweni, abafezekanga yaye banokwenza izinto ezicaphukisayo, kodwa ‘bangabantu bakhe nezimvu ezaluswa nguye.’ (INdumiso 100:3) UThixo wamnikela ekufeni uNyana wakhe ngenxa yabo, ngoko, ngaba asimele sizabalazele ukuba nomonde kubo, ngokuthi singacingi kangako ngendlela esivakalelwa ngayo okanye ngendlela esichaphazeleka ngayo kodwa sicinge ngakumbi ngolwalamano lwabo noThixo?

[Imifanekiso okwiphepha 31]

Ngentwasahlobo kuba luhlaza kufuphi nomnye wemithombo kummandla waseKadeshe-barneha

[Inkcazelo]

Photos, pages 10, 31: Pictorial Archive (Near Eastern History) Est.