Ngaba Unqulo Lunokuzanelisa Iintswelo Zethu?
SIZA kudla ntoni na? Siza kusela ntoni na? Siza kwambatha ntoni na? Le mibuzo ifuna impendulo engxamisekileyo, ingakumbi xa kunzima ukufumana ezi zinto zifuneka ngokusisiseko ebomini. Kanti, phawula oko kwathethwa nguYesu Kristu: “Musani ukubuxhalela ubomi benu, nisithi nodla ntoni na; nosela ntoni na; kwanomzimba wenu, nisithi niya kwambatha ntoni na.” (Mateyu 6:25) Ngaba oko kuvakala kuyinto engaqhelekanga? Ngapha koko, ukuba umntu ulambile, akananto yakwambatha, engenayo nendawo yokuhlala, into ayifunayo luncedo olubonakalayo, kungeyiyo into abanye abasengayijonga njengamazwi onqulo entuthuzelo naqhelekileyo.
UYesu wayengengomntu ongenavelwano, wayengazami nokuyiphepha le ngxaki. Wayezazi kakuhle iintswelo zabantu. Sekunjalo, wayesazi kwanangento eyingozi yokwenene. Xa kufikelela kumcimbi wokwanelisa iintswelo zethu, kulula gqitha ukuba ubomi bethu sibusekele kwizinto eziphathekayo size uThixo simjonge engabalulekanga. Ngoko ke, kufuneka sizazi izinto eziza kuqala ebomini bethu.
Siya kube siyazazi izinto eziza kuqala ebomini ukuba sithi silandele isiluleko sikaYesu esithi: “Funani ke tanci ubukumkani bukaThixo nobulungisa bakhe, zaye zonke ezo zinto ziya kongezelelwa kuni.” (Mateyu 6:33) Ukuba siyasilandela esi siluleko, unqulo—unqulo lokwenyaniso olusekelwe kwiinyaniso zeBhayibhile—lunako ukuzanelisa iintswelo zethu.
Noko ke, uYesu wayengengomntu ongazichaziyo njengokuba zinjalo izinto ngokokude acebise ukuba, ukuba ngomnye nje wabafundi bakhe uze ulandele iimfundiso zakhe zonqulo bekuya kuziphelisa kwangoko iingxaki zethu; wayengathethi nokuba abafundi bakhe babemele basong’ izandla baze balindele ukuba uThixo abalungiselele ngokungummangaliso. Ewe, wonke umntu ngewaba ngumKristu ukuba oko kwakuthetha ukukhululeka ngephanyazo kuzo zonke iingxaki zobomi! UYesu wayethetha ukuba uYise, uYehova uThixo, usilungiselela yonke into efunekayo ukwanelisa zonke iintswelo zethu. Kungoko uYesu kwakhona wathi: “UYihlo wasemazulwini uyazi ukuba ezo zinto zonke ziyafuneka kuni.”—Mateyu 6:32.
Kwakhona uYehova uyazanelisa iintswelo zethu ezibalulekileyo zokomoya. NgeZibhalo Ezingcwele, uye walungiselela ukhokelo oluphefumlelweyo ukuze siphile ngeyona ndlela iyiyo. (Isaya 48:17) UThixo useke umanyano lwabanquli abathi banikele inkxaso xa kuyimfuneko. (IZenzo 4:34) Kwakhona, uthi angenelele ukuze ancede abakhonzi bakhe ngomoya wakhe oyingcwele, okanye amandla asebenzayo. (Luka 11:13; Galati 5:22-25) Ngaphezu koko, uThixo uye walungiselela ukubuyisela iParadisi emhlabeni.—Luka 23:43, NW; ISityhilelo 21:1-4.
Ukwanelisa Iintswelo Zethu Zokwenyama
Khawuqwalasele ke ngoku eminye yemigaqo yeBhayibhile eye yanceda abantu ukuze banelise iintswelo zabo zokwenyama. Umpostile uPawulos ongumKristu wabhala:
“Masizihlambulule kuko konke ukudyobheka kwenyama nokomoya” (2 Korinte 7:1)
Khawucinge ngazo zonke iingxaki esinokusinda kuzo ukuba siyakuphepha ukuzidyobha ngecuba, ngeziyobisi ezingekho mthethweni nezinye izinto ezingcolisa umzimba. Yaye hayi indlela ekulunge ngakumbi ngayo ukuba asithi siyichithe ngokungeyomfuneko imali nexesha, size singonakalisi iingcinga zethu ngeencwadi ezikhuthaza ukuziphatha okubi nokuzonwabisa okunokusingcolisa ngokomoya!
Kwakhona iZibhalo zithi:
“Musa ukuba phakathi kwamasela-wayini, naphakathi kwamadla-kudla; kuba isela-wayini nedla-kudla liyahlwempuzeka; kona ukozela kwambesa amajacu” (IMizekeliso 23:20, 21)
Phawula umphumo wokugqibela obangelwa bubunxila nobudla-kudla—ubuhlwempu nobujacu. Abaninzi namhlanje—kwanabantu abathanda unqulo kakhulu—bahlala bengamahlwempu ngenxa yokuzifica ngokugqithiseleyo etywaleni okanye ngenxa yokukhotyokiswa zizinto ezidyobha inyama. Ukuphepha izinto ezinjalo ukuze sivisisane nemilinganiselo yeBhayibhile kunokusinceda kakhulu ukuze sikwazi ukwanelisa iintswelo zethu zokudla, impahla yokunxiba nekhusi.
Omnye umgaqo oye wanceda amaKristu ukuze anelise iintswelo zawo ngulo ukumazwi ompostile uPawulos athi:
“Sikholosekile kukuthi sinesazela esilungileyo, singa ezintweni zonke singahamba kakuhle.” (Hebhere 13:18)
Ukunyaniseka kuzo zonke iinkqubano zawo nabantu kuye kwanceda amaKristu amaninzi akwazi ukuzinyamekela kakuhle wona neentsapho zawo. Oku kuye kwawenza anegama elihle, ibe abanye bakuthanda kakhulu ukushishina nawo. Umntu onyanisekileyo akanakusoloko emi kakuhle ngokwezinto eziphathekayo, kodwa ngokuqhelekileyo ubanazo iimfuneko ezisisiseko ebomini ibe uhlala engozihlonelayo.
Oku kuhlobene kakhulu nesi siluleko:
“Lowo ubayo makangabi seba; kanye ke makabulaleke esebenza okulungileyo ngezandla zakhe” (Efese 4:28)
Ukusebenzisa lo mgaqo kubancedile abaninzi ukuba bafumane umsebenzi wempangelo baze bahlale kuwo ngenxa yokuthembeka kwabo. Ngenxa yoko, bayakwazi ukuzinyamekela bona neentsapho zabo. Kunokuba asulelwe ngumoya weli hlabathi, elizibetha ngoyaba izenzo ezininzi zokunganyaniseki, amaKristu anyanisekile, yaye oku kuba nemiphumo elungileyo.
Ngokomzekelo: Omnye wamaNgqina kaYehova eJapan wayefuna ukusebenza iiyure ezimbalwa veki nganye ukuze abe nexesha elingakumbi losukelo lwezinto zokomoya. Noko ke, xa wathi wenza esi sicelo, umqeshi wakhe wamgxotha emsebenzini. Akukuva oku, umama womqeshi wabuza esithi: “Ngaba ugxothe kanye eyona ndoda ithembekileyo?” Izinto zaba mbi ngakumbi kweli Ngqina xa lathi lenzakala emqolo lisenza omnye umsebenzi. Kamsinya emva koko, ladibana nomqeshi walo wangaphambili, owayebuhlungu emva nje kokufumanisa ukuba omnye wabaqeshwa bakhe wayesiba igolide, iplatinam nemisesane kwishishini lakhe lamatye anqabileyo. Kwangoko lo mqeshi wacela eli Ngqina ukuba libuyele emsebenzini, kodwa ngoku lisebenze ngokuvuma kweemeko zalo. Le ndoda yayifuna ukusetyenzelwa ngumntu onyanisekileyo.
Ngokutsho kompostile uPawulos, umKristu umele “abulaleke” ukuze anganyamekeli nje yena kuphela kodwa “abe nako ukwabela osweleyo.” (Efese 4:28) Ngamaxesha obunzima, amaKristu okwenyaniso asoloko ekulungele ukubanceda abanye. Intsapho ethile eFiji yakubona oku xa ikhaya layo lathi lonakaliswa kanobom yinkanyamba ngoxa yayikwindibano yamaKristu. Yathi yakufika ekhaya, yawubona loo monakalo wawubangeIwe yiloo ntlekele. Kodwa kwakhona yafumana amaKristu ekhonza nawo awathi ngovuyo asebenzisa ubuncwane bawo ukunceda le ntsapho ngendawo yokuhlala nokuyincedisa ukuba ivuse ikhaya layo. Utata wale ntsapho wathi: “Kuyathuthuzela ukwazi ukuba kukho amaKristu akukhathalele ngenene.”
UYesu Kristu wayenovelwano olunzulu ngabasweleyo. Izihlandlo ezininzi, ngandlel’ ithile wabanceda ngokobuqu ababandezelekileyo. Kakade ke, uYesu wayesazi ukuba lo gama nje le nkqubo yezinto yonakeleyo isavunyelwe ukuba ibekho, ubuhlwempu nezinye iingxaki zasekuhlaleni zazisaya kubakho. (Yohane 12:8) Ngoko ke, nangona wenza okuninzi ukunceda abantu ngezinto zokwenyama, injongo yokwenene yobulungiseleli bakhe yayikukwanelisa iintswelo zabo zokomoya.
Xa isihlwele esasihluthisiwe sathi samlandela uYesu ukuya eKapernahum, wathetha la mazwi abalulekileyo: “Anindifuni ngakuba nabona imiqondiso; nindifuna ngokuba nadla kwezaa zonka, nahlutha. Musani ukusebenzela ukudla okutshabalalayo; sebenzelani ukudla okuhlala kuse ebomini obungunaphakade, aya kunipha kona uNyana woMntu.” (Yohane 6:26, 27) Wayethetha ukuthini uYesu?
UYesu wayethetha ukuba kwakukho ingozi yokuba abantu banxulumane naye nabafundi bakhe kuphela ngenxa yokufuna izinto eziphathekayo. Kodwa wayesazi ukuba oku kwakungasayi kuzisa ngenelo zihlala zihleli. Ngoko wathi: “Banoyolo abangamahlwempu ngomoya; ngokuba ubukumkani bamazulu bobabo. Banoyolo abalambela banxanelwe ubulungisa; ngokuba baya kuhluthiswa bona.”—Mateyu 5:3, 6.
Ngaphandle kokulambela ukudla kwenyama, kukho nokulambela inyaniso nokwaneliswa ngokomoya. Ulonwabo oluyinyaniso lubakho xa eli phango lokomoya liphelisiwe. INgqobhoko iye yabangela abantu ukuba babe ngabathandi bezinto eziphathekayo. Iinkonzo zaseMpuma ziye zabashiya abantu bekubumnyama obungokomoya. Kodwa unqulo oluyinyaniso—lukaYesu Kristu—luzanelisile iintswelo zabantu zokomoya. Lunokwenza okufanayo nakuwe. Usenokuwanandipha la malungiselelo ukuba uya kuzenza uwafumane.
Ngokomzekelo, umfana othile eMauritius wamkela imibhalo yeMboniselo nolindixesha oliqabane layo uVukani! kumKristu owayenikela ubungqina esitratweni. Kwiveki elandelayo, waphinda waza kufuna amaphephancwadi angakumbi. Wachaza ukuba wayecinga ngokuzibulala ngenxa yeengxaki zemali awayenazo, kodwa la maphephancwadi amncedile ukuba aqonde ukuba kukho uThixo osikhathaleleyo. Indlala engokomoya eyayiphethe lo mfana yayiqalisa ukuphela.
Ngaba siya kuze silibone ixesha laxa zonke iintswelo zethu ziya kube zaneliswe ngokupheleleyo? IBhayibhile ithembisa ukuba siza kulibona. Kuyinyaniso ukuba, abantu bakruqukile kukuthenjiswa ngezinto eziza kulunga kwixesha elizayo. Baye badaniswa ngokufuthi. Kodwa sinokuba nentembelo kumadinga eBhayibhile. UMbhali wayo, uYehova uThixo, uzalisekisa zonke izithembiso azenzayo. UYoshuwa wakuvakalisa kakuhle oku xa wakhumbuza amaSirayeli angoowabo esithi: “Niyazi ngentliziyo yenu yonke, nangomphefumlo wenu wonke, ukuba akuwanga phantsi nalinye ilizwi emazwini onke alungileyo, abewathethile uYehova uThixo wenu ngani; onke enzekile kuni; akuwanga phantsi nalinye ilizwi kuwo.”—Yoshuwa 23:14.
Isicombululo sokwenene kuzo zonke iingxaki zethu sixhomekeke kwinzaliseko yamadinga kaThixo amangalisayo okucoca umhlaba wonke. (ISityhilelo 11:18) Zonke iintswelo zethu ziya kwaneliswa xa uBukumkani bakhe bubuyisela iParadisi emhlabeni, nto leyo eya kuzalisekisa injongo yakhe yantlandlolo ngoluntu. (Mateyu 6:9, 10) Ngoko asisayi kuliva “ilizwi lokulila nelizwi lokukhala” kubantu abangenakwaneliswa kwiintswelo zabo. Ngomsebenzi wokunyaniseka nangokusebenzisa imigaqo yokuhlonel’ uThixo, baya kunandipha ubomi obupheleleyo nobanelisayo.—Isaya 65:17-25.
UMaria, owayengunongendi ongumKatolika okhankanywe ngaphambilana, waba nayo le ntembelo. Waqonda ukuba wayesebumnyameni obungokomoya kangangeminyaka emininzi, ethwaxwa kukoyikela ikamva ibe engasaboni nenjongo yokwenene ebomini. Kodwa ukufunda ngenyaniso efumaneka eBhayibhileni kwayiguqula yonke loo nto. Wathi: “Ndaphuma ebumnyameni ndangena kokona kukhanya kuqaqambileyo.” (INdumiso 43:3; IMizekeliso 4:18) Oku akuzange kumncede nje kuphela ukuba ahlangabezane neentswelo zokwenyama zangoku kodwa kwakhona kwayiphelisa indlala nokunxanwa okungokomoya. Ewe, unqulo—unqulo oluyinyaniso—lunako ukuzanelisa iintswelo zethu.
[Umfanekiso okwiphepha 7]
Unqulo lokwenyaniso luya kuzanelisa zonke iintswelo zethu