Iimbalasane ZeBhayibhile INgoma yazo iiNgoma 1:1-8:14
Uthando Lokwenyaniso Luyoyisa!
Kukho uthando olungaze lutshitshe. Lunomonde, luyanyamezela, luyoyisa. Olo thando lunjalo ukungaxengaxengi lukho phakathi kukaYesu Kristu ‘nomtshakazi’ wakhe, okanye ibandla elizelwe ngomoya. (ISityhilelo 21:2, 9; Efese 5:21-33) Ibe hayi indlela oluboniswe kakuhle ngayo olu thando kwiiNgoma yazo iiNgoma!
Le “Ngoma yazo iiNgoma,” eyabhalwa kwiminyaka enokuba ngama-3 000 nguKumkani wakwaSirayeli osisilumko uSolomon (1:1), ibalisa ngothando olukho phakathi komalusi nentombi yasezilalini eyayihlala kwilali yakwaShunem (eShulami). Ngabo bonke ubutyebi nozuko awayenalo, lo kumkani wayengakwazi ukwenza ukuba uMshulamikazi amthande, kuba wayenyaniseke kumalusi wakhe awayemthanda.
Xa le ncwadi ibumbongo ifundwa ngenyameko nangoxabiso olufanelekileyo, kubakhonzi bakaYehova abatshatileyo nabangatshatanga inikela okuninzi abanokucinga ngako ngokuphathelele ukuba nyulu, ukuba nobuntu, ukunyaniseka, nokuba nothando olunyamezelayo zinto ezo ezifanele zibe ziimpawu zomtshato wamaKristu. Eneneni, sonke sinokungenelwa kule ngoma ethetha ngokoyisa kothando lokwenyaniso.
UMshulami Ententeni KaSolomon
Khawufunde INgoma yazo iiNgoma 1:1-14. Kwiintente zikakumkani, uMshulami wathetha ngokungathi wayekho umalusi wakhe amthandayo. USolomon wabuncoma ubuhle bakhe waza wathembisa ukumvathisa ngeempahla zegolide nesilivere. Kodwa le ntombi yazibhebhetha ezo mpahla zakhe zexabiso yaza yamxelela ukuba okuphela komntu eyayimthanda ngokwenyaniso yayingumalusi.
◆—Kutheni le nto ukuthelekiswa kwezi zinto newayini neoli kufanelana nje?
Iwayini iyayivuyisa intliziyo ibe inika amandla kumphefumio obandezelekileyo. (INdumiso 104:15; IMizekeliso 31:6) Ioli kwakuthanjiswa ngayo iindwendwe ezibalulekileyo ngenxa yokuba yiyo eyayinokusetyenziselwa ukuthambisa. (INdumiso 23:5; Luka 7:38) Ngaloo ndlela uMshulami owayebandezelekile wadlamka waza wathuthuzeleka akukhumbula “izincokoliso” ‘negama’ lomalusi. Ngokufanayo, intsalela yabalandeli bakaKristu abathanjisiweyo iyakhuthazeka ngokucamngca ngothando nangamadinga oMalusi wayo, uYesu Kristu, nangona isekweli hlabathi ibe yahluliwe kuye.
Esikufundayo Koku: USolomon ngewayevathise uMshulami ‘ngeengcaca zegolide’ ‘nangamaqhula esilivere,’ kodwa wazibhebhetha ezi mphla zokumhenda waza wabonisa ukuba wayenothando olungatshitshiyo awayenalo ngomalusi. (1:11-14) Ukukhangela isimo sakhe sengqondo kunokomeleza isigqibo sodidi ‘lomtshakazi’ sokuchasa izinto eziphathekayo ezinomtsalane zeli hlabathi luze luhlale l Ukuba sinamathemba okuphila kulo mhlaba ibe sicinga ngomtshato, ngamana umzekelo wale ntombi ungasishukumisela ukuba izilangazelelo zokomoya zibe yinto esiyixhalabele ngamandla kunezinto eziphathekayo.
Ukulangazelelana Kwababini
Funda 1:15–3:5. Umalusi wangena ententeni kakumkani waza wathetha ngendlela awayemthanda ngayo uMshulami olulamileyo, owayemxabise ngaphezu kwabo bonke abanye. Xa babohlukene, intombi yakhumbula amaxesha ovuyo axa yayikunye nesithandwa sayo yaza yabongoza isithi masikhawuleze ukuza kuyibona. Ebusuku, yayisilangazelela.
◆ 2:1-3—Kusingiselwe enini ngezi zafobe?
UMshulami wathi ‘ungumfiyo waseShafron’ kuba wayeyintombi eselula eyayithobekile, inesidima neyazigqala iyekuphela kwekhoyo kwiintombi ezininzi ezazikho. Noko ke, umalusi wayesazi ukuba ‘wayeyinyibiba phakathi kweminga,’ kuba wayecikiziwe, enengqondo yaye ethembekile kuYehova. Kule ntombi, lo malusi ‘wayenjengomthi weapile ophakathi kwemithi yehlathi’ kuba wayengumfana otyekele kwizinto zokomoya ngokufanayo ezinikele kuThixo ibe enezo mpawu kanye zinqwenelekayo. UmKristu ongatshatanga ofuna iqabane ebomini ufanele afune kuphela uwabo olikholwa elithembekileyo noneempawu ezinjengezo zoMshulami okanye zomalusi awayemthanda.
◆ —Kutheni le nto esi sifungo sanxulunyaniswa nezi zilwanyana?
Amabhadikazi namaxhamakazi zizilwanyana ezizolileyo, ezibukekayo, nezihle nezikhawulezayo ibe zinemilenze eyomeleleyo. Noko ke, ngokusisiseko le ntombi yayiqinisekisa “iintombi zaseYerusalem” ifunga ngazo zonke izinto ezibukekayo nezintle. Ngokusebenzisa ezi zidalwa, yayinyanzela ezi ntombi ukuba ziyeke ukuxhokonxa uthando lwayo ngaye nabani na ngaphandle komalusi eyayimthanda.
Esikufundayo Koku: Le ntombi yafungisa “iintombi zaseYerusalem,” okanye iintombi zakomkhulu ezazilungiselela ukudla ukumkani, ukuba ‘zingaluvuseleli uthando lwayo de lona luzivuselele.’ (2:7; 3:5) Oku kubonisa ukuba kuyinto engenakwenzeka ukuba ubani athandane naye nabani na. Le ntombi akuzange kubekho nto iyitsalayo kuSolomon. Ngoko, hayi indlela ekububulumko ngayo ukuba amaKristu angatshatanga acinga ngomtshato akhangele kuphela umnquli kaYehova ofanelekileyo nothembekileyo onokuthandwa ngokwenyaniso!—1 Korinte 7:39.
Le Ntombi EYerusalem
Funda 3:6–6:3. USolomon wabuyela eYerusalem enozuko olumangalisayo. Apho umalusi wadibana nale ntombi waza wayomeleza ngezincokoliso ezimnandi. Ephupheni, yeva othandekayo wayo enkqonkqoza ebusuku yaza yaphathwa kakubi ngabalindi njengoko yayimkhangela ngokucokisekileyo. Xa yabuzwa oko kwakubangela ukuba lo uthandekayo wayo abe ngobalaseleyo, ‘kwiintombi zaseYerusalem’ yanikela inkcazelo eqaqambileyo ngaye.
◆—Amehlo omalusi ayefana njani ‘namavukuthu ahlamba ngamasi’?
Ekuqaleni, amehlo oMshulami afaniswe nalawo evukuthu ngenxa yokuthandeka nokuba mahle kwawo. (1:15; 4:1) Ngenxa yoko, umalusi wayibiza le ntombi ngokuthi ‘livukuthu’ lakhe. (5:2) Apha le ntombi ifa luthando yafanisa amehlo omalusi namavukuthu ahobe ahlamba emifuleni yamasi. (5:8, 12) Kunokwenzeka ukuba, esi sifaniso sibhekisela kumbala omdaka weliso lomalusi ojikelezwe ngumbala omhlophe qhwa.
Esikufundayo Koku: UMshulami ‘wayenjengomyezo obiyelweyo.’ (4:12) Kwimihla yoSirayeli wamandulo umyezo wawusoloko uyindawo enjengepaki, iparadisi yokwenene enomthombo wamanzi omhle neentlobontlobo zemifuno, iintyatyambo nemithi. Ngokuqhelekileyo, wawubiyelwa ngemithi okanye ngodonga ibe kwakunokungenwa kuwo kuphela ngesango elitshixwayo. (Isaya 5:5) Kumalusi, ukuziphatha nyulu koMshulami nokuthandeka kwakhe kwakunjengomyezo onobuhle obunqabileyo, oneziqhamo ezihle, onevumba elimnandi nonobuhle obuhlaziyayo. Iimvakalelo zakhe zothando zazingafumaneki kuyo nayiphi na enye indoda, kuba wayenyulu, ‘enjengomyezo obiyelweyo’ ukuze kungangeni abatyhobozi ibe evulela kuphela umnini wawo ovunyelweyo. Kwimeko yokuziphatha okuhle nokunyaniseka ngaloo ndlela uMshulami wamisela umzekelo omhle kwiintombi ezingamaKristu ezingekatshati namhlanje.
“Amadangatye KaYehova”
Funda 6:4–8:14. USolomon wabuncoma ubuhle bale ntombi, kodwa yamala yaza yavakalisa uzinikelo lwayo kumalusi. Aliwe, uSolomon wayikhulula ukuba igoduke. Iphelekwe ‘yintanda’ yayo, yabuyela eShunem iyintombi evuthiweyo eyazingqina ingelowexuwexu. Uthando olwalukho phakathi kwayo nomalusi lwalunjengokufa, ibe amadangatye alo ‘ayenjengamadangatye kaYehova.’
◆—Sasiyintoni ‘Isixeko saseTirtsa’?
Eli binzana lithetha “Okubukekayo, Okuhle,” linokuguqulelwa ngokuthi “Isixeko Esihle,” [NW]. ITirtsa yayisisixeko esasidume ngobuhle esaba likomkhulu lobukumkani basentla bakwaSirayeli.—1 Kumkani 14:17; 16:5, 6, 8, 15.
◆ 6:4—Intamo yale ntombi yayifana njani ‘nenqaba yophondo lwendlovu’?
Kuyabonakala ukuba yayigudile njengophondo lwendlovu ibe yayinciphile njengenqaba. Ekuqaleni, intamo yayo ifaniswe ‘nenqaba kaDavide,’ mhlawumbi ekwakuyinqaba yeNdlu kaKumkani engakudonga lwaseYerusalem olwalungasempuma. Kulo ‘kwakuxhonywe amakhaka aliwaka amadoda angamagorha,’ okuthetha ukuba intamo yoMshulami ekuthethwa ngayo apha yayinxitywe intsimbi yomqala eyayenziwe ngezihombiso ezingqukuva zamatye anqabileyo.—4:4; Nehemiya 3:25-27.
◆ 8:6, 7—Uthando “lunjengokufa” njani?
Ukufa ngokungasileliyo kuye kwabulala abantu kuluntu olunesono, ibe uthando lokwenyaniso lunamandla ngolo hlobo. Ekubeni lukhuni kobukhwele balo, uthando olunjalo lunjengelabafileyo ukungayekeleli ekufuneni imizimba yabafileyo. Ekubeni uYehova uThixo ebeke imbilini yothando kubantu, olu phawu luvela kuye ibe ngokufanelekileyo lubizwa ngokuba “ngamadangatye kaYehova.” KwanoKumkani uSolomon owayesisityebi wayengenakuluthenga uthando olunjalo.
Esikufundayo Koku: Oko kwehlela uMshulami ngoKumkani uSolomon kwakuluvavanyo olucikidayo awathi waluphumelela emagqabini. Wayengenguye ongaqinanga eluthandweni nakubunyulu, njengocango olujika lula kwiihenjisi zalo olufuna ukuxhaswa ngeplanga lomsedare ukuze lungavuleki kuze kungene lowo ungamkelekanga okanye ogulayo. Le ntombi yazoyisa izihendo zokumkani, ime njengodonga kuzo zonke izinto eziphathekayo ezinomtsalane zeli hlabathi. Ngokuthembela ngoThixo nangokukhumbula umzekelo omhle woMshulamI, iintombi ezingamaKristu namhlanje ngokufanayo zinokungqina ubunyulu bazo ngokwabantu ngabanye ngokuyimela ngokuqinileyo imigaqo yokuziphatha okuhle ukuze kudunyiswe uYehova.—8:8-10.
Ngokuqinisekileyo, le “Ngoma yazo iiNgoma,” emxholo wayo ungothando, isenza siluxabise ngakumbi umanyano olukhoyo phakathi koYesu nabo banyuIwayo ukuba babe “ngumtshakazi” wakhe wasezulwini. Kodwa wonke umlisela nomthinjana kuquka amadoda nabafazi abazinikele kuYehova banokungenelwa ekufuneni ukuxelisa ingqibelelo yoMshulami nomalusi xa bejongene nezilingo nezihendo. Ibe le nxalenye izukileyo yeLizwi likaThixo ifanele sonke isishukumisele ekubeni sihlale sinyanisekile kuYehova, uMthombo wothando oloyisayo.