Hlala Umoyika UYehova
“Ndingukumkani omkhulu, utsho uYehova wemikhosi, negama lam liyoyikeka phakathi kweentlanga.”—MALAKI 1:14.
1, 2. (a) Sisiphi isigidimi esinamandla esikwincwadi kaMalaki? (b) Sisiphi isifundo esinikelwa ngamazwi asekuqaleni esigidimi sikaYehova?
“ISIHLABO selizwi likaYehova, esisingisele kuSirayeli, ngoMalaki.” (Malaki 1:1) Incwadi yeBhayibhile kaMalaki iqalisa ngala mazwi mafutshane nachukumisayo. EBhayibhileni isihlabo ngokuqhelekileyo sikukusingelwa phantsi kobungendawo. Ngokuqinisekileyo oku kunjalo kwincwadi kaMalaki enesigidimi esitsolileyo nesinamandla esisingiswe kuhlanga lwakwaSirayeli. Ukusiqwalasela kwethu kuya kubalaselisa imfuneko yokuhlala simoyika yaye simthanda uYehova.
2 lindinyana ezimbini zokuqala zale ncwadi zinesifundo esingokunikela isiluleko. UYehova uqinisekisa abaphulaphuli bakhe ngomnqweno wakhe wokubanceda: “Uthi uYehova, Ndinithandile.” Enjani yona ukuqinisekisa nokufudumez’ intliziyo intshayelelo kwabo babeneentliziyo ezinyanisekileyo kumaSirayeli awayeziinjubaqa. Eso sigidimi siqhubeka sisithi: “Ke nina nithi, Usithande ngokuthini na? UEsawu asingumkhuluwa kaYakobi na? utsho uYehova; ukanti ndathanda ke uYakobi; ndamthiya uEsawu; iintaba zakhe ndazenza kwaba senkangala, nelifa lakhe laba leleempungutye entlango.”—Malaki 1:2, 3.
3. Zaziyintoni izizathu zokuba uYehova avakaleIwe ngolo hlobo ngoYakobi noEsawu?
3 Kwakutheni aze uYehova athande uYakobi yaye, kamva, inzala kaYakobi, engamaSirayeli? Kwakungenxa yokuba uYakobi wayesoyika uThixo yaye ebahlonele abazali bakhe ababesoyika uThixo. Kwelinye icala, uEsawu, wayengumntu ozingcayo, engamoyiki uThixo. Kwakhona, wayengabahloneli abazali bakhe, ababenelungelo lemvelo ababelinikwe nguThixo lokulindela ukuba abathobele. Ngokufanelekileyo, uYehova wathanda uYakobi kodwa wamthiya uEsawu. Esi sisilumkiso kuthi. Simele siphephe ukuphulukana nokumoyika uYehova size sithande izinto eziphathekayo njengoEsawu, owathi wafuna nje ukwanelisa iminqweno yakhe yenyama.—Genesis 26:34, 35; 27:41; Hebhere 12:16.
4, 5. (a) Ikhondo lobomi likaYakobi nelikaEsawu layichaphazela njani inzala yabo? (b) Oku kufanele ukuba kwawachaphazela njani amaSirayeli?
4 Kanye njengokuba ikhondo likaYakobi langqineka liyintsikelelo kwinzala yakhe, engamaSirayeli, ngokunjalo nekhondo likaEsawu langqineka lahluke ngokupheleleyo kwelo kwinzala yakhe, engamaEdom. AmaEdom akazange ayinandiphe intsikelelo kaYehova. Kunoko, ngenxa yokuba ayebachase ngokukrakra abantu bomnqophiso wakhe, azenza ukuba athiywe nguYehova. Oyiswa yimikhosi kaNebhukadenetsare yaye kamva ngama-Arabhu. Ekugqibeleni, njengoko uYehova waprofetayo, yaphela into ekuthiwa luhlanga lwamaEdom.—Obhadiya 18.
5 Imigwebo kaThixo kumaEdom yaqala ngaphambi komhla kaMalaki. Oku kufanele ukuba kwawachaphazela njani amaSirayeli? UYehova wawaxelela esithi: “Amehlo enu aya kubona, nithi ke nina, Mkhulu uYehova phezu komda wakwaSirayeli.” (Malaki 1:5) Ukuhla ukutyhubela iinkulungwane, “amehlo” kaSirayeli aye abona uthando uYehova abenalo kuye njengohlanga.
Izenzo Zethu Ziya Kubonisa Ukuba Siyamoyika Na UThixo
6. UYehova wawamangalela ngantoni amaSirayeli?
6 Isihlabo siyaqhubeka: “Unyana uyambeka uyise, umkhonzi uyayihlonela inkosi yakhe; ukuba ndinguyihlo, kuphi na ke ukubekwa kwam? Ukuba ndiyinkosi, kuphi na ukoyikwa kwam? Utsho uYehova wemikhosi kuni, babingeleli, nina balidelileyo igama lam.” (Malaki 1:6; Eksodus 4:22, 23; Duteronomi 32:6) UYehova wayewalulekile amaSirayeli, wawalungiselela waza wawakhusela, njengokuba kanye uyise ebeya kwenjenjalo kunyana. Yintoni awathi ngokufanelekileyo walindela ukuba abuyiselwe yona? Kukuba abekwe yaye oyikwe. Uhlanga, kuquka nababingeleli, lwasilela ukwenza oku kodwa, kunoko, lwabonisa ukungalihloneli nokulidela igama likaYehova. Lwaba ‘ngoonyana abangamaphamba.’—Yeremiya 3:14, 22; Duteronomi 32:18-20; Isaya 1:2, 3.
7. AmaSirayeli aziva njani ngesi simangalo, ibe uYehova wawaphendula ngelithini?
7 AmaSirayeli abuza athi: “Silidele ngokuthini na igama lakho?” UYehova waphendula ngamandla esithi: “Nina nizisa esibingelelweni sam isonka esingcolileyo, nibe ke nisithi, Sikungcolise ngokuthini na? Ngokuthi oku kwenu, Isithebe sikaYehova sidelekile sona. Ukuba nizisa into eyimfama ukuba ibingelelwe, akunto imbi oko? Ukuba nizisa into esisiqhwala nento efayo, akunto imbi oko? Khawuyisondeze loo nto kwinkosi yakho, ukuba yokholiswa na nguwe; yokunonelela na? Utsho uYehova wemikhosi.”—Malaki 1:6-8.
8. Ngezenzo zawo ayebonisa ntoni amaSirayeli?
8 Ubani unokuba nomfanekiso-ngqondweni womSirayeli ondele umhlambi wakhe aze azenze ongaqondiyo xa enyula isilwanyana esingaboniyo okanye esiqhwalelayo ukuze anikele ngaso kuYehova. Ngale ndlela unokuzenza zonke iimfanelo zedini ukanti ngokuzingca uzigcinele ezona zibukekayo kumhlambi. Wayengenakuze azame nakancinane ukwenza into enjalo kumlawuli wakhe! Kodwa amaSirayeli akwenza oko kuYehova—ngokungathi wayengawaboni amacebo nokuqhatha kwawo. Ngokufanelekileyo, uYehova wawabuza esithi, “Kuphi na ukoyikwa kwam?” Ngamazwi awo, asenokuba athi ayamoyika uYehova, kodwa izenzo zawo zabonisa ngokucacileyo ukuba kwakungenjalo.—Duteronomi 15:21.
9. Ababingeleli bathini ngento eyayisenziwa ngabantu?
9 Ababingeleli bathini ngale mibingelelo icekisekayo? Bathi: “Akunto imbi oko.” Balithethelela ikhondo elibi lamaSirayeli. Ngoko nangona ababebuya ekuthinjweni eBhabhiloni bakuqalisa ngenzondelelo ukubuyiselwa konqulo lokwenyaniso, kamva baba ngabangakhathaliyo, abazikhukhumalisayo nabazibona bengamalungisa. Baphulukana nokumoyika uYehova. Ngenxa yoko, inkonzo yabo yasetempileni yaba yinto yokuhlekisa, yaye imisitho bayenza ngokwendlela yesithethe.—Malaki 2:1-3; 3:8-10.
10. (a) Liliphi idini alifunayo namhlanje uYehova? (b) Yiyiphi ekuphela kwendlela elinokuthi idini lethu limkholise ngayo uYehova?
10 Bambi basenokuchasa ngelithi: ‘Oku akusebenzi kuthi; asisanikeli madini ezilwanyana.’ Kodwa sinolunye uhlobo lwedini esinokulunikela. Phawula isibongozo esingxamisekileyo sikaPawulos: “Ndiyanivuselela ngoko, bazalwana, ngeemfefe zikaThixo, ukuba niyinikele imizimba yenu ibe lidini eliphilileyo, elingcwele, elikholekileyo kuThixo: inkonzo yenu ke leyo yasengqondweni.” (Roma 12:1) Idini alifunayo namhlanje uYehova nguwe! Oko kukuthi, amandla akho, ubuncwane nobuchule bakho. Idini lethu uya kukholiswa lilo kuphela ukuba lilelona lilungileyo. Ukumnika uYehova izinto esingasazifuniyo, njengedini lesilwanyana esiqhwalelayo nesigulayo, ngokuqinisekileyo kuya kuluchaphazela ulwalamano lwethu naye.
11. Kukuphi ukuzihlolisisa afanele umkhonzi ngamnye ozahluleleyo kaYehova akwenze?
11 Nakuba bambi kusenokufana nokungathi bathi, “Akunto imbi oko,” siyayazi indlela avakalelwa ngayo uYehova kuko. Ngoko ke, ngenyameko simele sihlolisise “idini” ‘lenkonzo engcwele’ esilinikelayo, eliquka isabelo esinaso ekushumayeleni, kufundisiso lobuqu, kumthandazo nasekuyeni kwiintlanganiso. Ngaba wanelisekile yinto yokuba umnika okona kulungileyo uYehova, okanye ngaba umnika izinto nje ongasazifuniyo? Kukho ingozi yokubandakanyeka gqitha ekuzonwabiseni okanye ekuzihlaziyeni ngeempelaveki kangangokuba ubani angabinalo ixesha okanye amandla okushumayela iindaba ezilungileyo zoBukumkani nokuya kwiintlanganiso. Indlela yethu yobomi iphela, ubomi bethu bemihla ngemihla, kuquka indlela esizijonga ngayo izinto neentshukumisa zethu, zimele zihambisane nedini esilinikela kuYehova. Malibe lelona lilungileyo!
Indlela Ababonakala Ngayo Abo Bamoyika Ngokwenyaniso UThixo
12. Sisiphi isiluleko esinikelwayo ngoku?
12 Esi siprofeto sithi: “Kaloku ke, khanimbongoze uThixo, ukuba asibabale.” (Malaki 1:9) UYehova ubongoza amaSirayeli ukuba enze oko kulungileyo, abonise ukumoyika okufanelekileyo uThixo aze amnike oko kumfaneleyo. Namhlanje simele senze okufanayo. Kuphela kungokuphila ngokuvisisana noko akufunayo uYehova esinokuthi sikholiseke kuye size sihlale sinjalo.
13. (a) Xa singamoyiki uThixo, nguwuphi umgibe esinokuwela kuwo? (b) Ukuba wa kwabachaphazela njani ababingeleli bakwaSirayeli?
13 Xa singamoyiki ngokufanelekileyo uThixo, inkonzo yethu kuye inokwenziwa nje ngokwesiqhelo ize yenzelwe inzuzo yokuzingca. Phawula indlela uYehova ababongoza ngayo ababingeleli bakwaSirayeli mayela nenkonzo yabo yasetempileni: “Akwaba bekukho umntu kuni ozivalileyo iingcango, anasibanekela ilize isibingelelo sam! Andininanze nganto, utsho uYehova wemikhosi, andikholiswa nangumnikelo ophuma esandleni senu.” (Malaki 1:10) Ewe, ababingeleli babelapho besenza imisebenzi yetempile, betshixa iingcango zendawo engcwele, bebanekisa izibingelelo. Kodwa oku babengakwenzeli ilize. Babefuna ukunyengezelwa nokunyotywa ngamaSirayeli awayesiza kwenza amadini etempileni. UYehova akazange akholiswe ngelo xesha, ibe akakholiswa nangoku, yinkonzo eyenziwa nje ngenxa yenzuzo yokuzingca. Ilisikizi kuye.
14. Kutheni le nto kusoloko kukho imfuneko yokulumkela ukubawa?
14 Imfuneko yokulumkela ukuzingca nokubawa ayikapheli nakumhla wethu. Ngokuphindaphindiweyo iZibhalo zisilumkisa ngokubawa, zibonisa ukuba abantu ababawayo abababalwa nguYehova. (1 Korinte 6:10; Efese 5:5) Ekuphumezeni ubulungiseleli bethu, ngamana uthando lwethu nokumoyika kwethu uYehova kungasigcina sikuphepha ukukwenzela inzuzo yokuzingca oku. Kufuneka siluphelise zisuka nje naluphi na utyekelo olunjalo olunokuvela entliziyweni yethu. Abadala nezicaka zolungiselelo balunyukiswa ngokukhethekileyo ukuba ‘bangabi ngabangxamela inzuzo embi.’ (Tito 1:7; 1 Timoti 3:8; 1 Petros 5:2) Bambi basenokuthi ngabom bahlakulele ulwalamano kuphela kunye nabazalwana abanokubanceda ngezinto eziphathekayo, nto leyo enokuphumela ekukhetheni ubuso nasekubeni madolw’ anzima ukululeka abo banjalo. Asifuni nanini na ukufana nababingeleli bakwaSirayeli ababengamabawa ababefuna ukunyengezelwa nokunyotywa ngamaSirayeli angoowabo.
15. (a) UMalaki wabonisa njani ukuba kwakuza kubakho abantu aboyika uYehova kuzo zonke iindawo zomhlaba? (b) Ziziphi ezinye izibhalo ezixhasa oku?
15 Namhlanje, ukuba uYehova ubuza umbuzo othi, “Kuphi na ukoyikwa kwam?” ngaba kukho nabaphi na abantu abanokuphendula besithi, ‘Sithi aba, sithi abakoyikayo’? Ngokuqinisekileyo bakho! Bangoobani? Ngamangqina kaYehova athembekileyo, afumaneka kuzo zonke iindawo zomhlaba. Eli qela labantu lifumaneka kwizizwe ngezizwe nomsebenzi elaliya kuwenza laxelwa kwangaphambili kuMalaki 1:11: “Ngokuba kuthabathela ekuphumeni kwelanga, kude kuse ekutshoneni kwalo, likhulu igama lam phakathi kweentlanga; nasezindaweni zonke kuqhunyiselwa, kunikelwe igama lam umnikelo ohlambulukileyo; ngokuba likhulu igama lam phakathi kweentlanga; utsho uYehova wemikhosi.”—Bona kwaneNdumiso 67:7; Isaya 33:5, 6; 41:5; 59:19; Yeremiya 32:39, 40.
16. Ukusuka ekuphumeni kuse ekutshoneni kwelanga bekungaba neziphi iintsingiselo ezahlukeneyo, ibe kuzaliseka njani oku?
16 Hayi indlela awuxela ngokuchane ngayo uMalaki umsebenzi omkhulu owenziwayo kumhla wethu wokushunyayelwa kweendaba ezilungileyo kuwo wonke umhlaba. (Mateyu 24:14; ISityhilelo 14:6, 7) Ukusuka ekuphumeni kwelanga kuse ekutshoneni kwalo, ngokwendlela esilibona ngayo, kuthetha ukusuka empuma ukusa entshona. Nokuba sikhangela phi na ehlabathini namhlanje, sifumana abo boyika uYehova besenza ukuthanda kwakhe. Ukusuka ekuphumeni kwelanga kuse ekutshoneni kwalo kukwathetha imini yonke. Ewe, indumiso iyaqhubeka inyuswa ngabakhonzi aboyika uThixo. Njengokuba uYehova wathembisayo, igama lakhe livakaliswa emhlabeni wonke ngabo bamoyika ngokwenyaniso.—Eksodus 9:16; 1 Kronike 16:23, 24; INdumiso 113:3.
Hlala Umoyika Ngokufanelekileyo UThixo
17. Unokuba yintoni umphumo wokuphulukana kwethu nokuhlonela uYehova kwanokumoyika?
17 Kwabo bangamhloneliyo nabangamoyikiyo uYehova, ukumnqula nokumkhonza kuba luxanduva. UYehova wathi kumaSirayeli: “Nina [niyandihlambela] ngokuthi oku kwenu, Isithebe sikaYehova singcolile, neziveliso zaso, ukutya kwaso kudelekile. Nabuya nathi ke, Yabonani, yindinisa yani na le!” (Malaki 1:12, 13) Kunokwenzeka okufanayo nakumaxesha anamhla. Kwabo bathi baphulukane nokumoyika uYehova, iintlanganiso, inkonzo yasentsimini neminye imicimbi yamaKristu inokuba luxanduva.
18. Ngamathuba athile, yintoni eye yenzeka kwabathile babakhonzi bakaThixo bezi mini?
18 Phawula indlela abo banjalo abachazwa ngayo kwiMboniselo (yesiNgesi) kaJanuwari 1, 1937: “Kwabo bangathembekanga ilungelo lokukhonza uThixo ngokuzisela abanye iziqhamo zobukumkani, njengoko iNkosi iyalele, liye laba lelidinayo nelisisithethe, nto leyo engabavuleli thuba lokuqaqamba emehlweni abantu. Ukuthwala isigidimi soBukumkani esibhaliweyo besisa kwindlu ngendlu nokusinikela ebantwini, kuyinto ebathoba isidima gqitha abo bazibona bebalulekile. Asibavuyisi . . . Ngoko bathe, ibe baqhubeka besithi: ‘Le nto yokuyabula sithwelene nezi ncwadi iyindlela nje yokuthengisa iincwadi. Onjani wona ukuba yindinisa umsebenzi!’” Nanamhlanje kukho abo bathi, ngamathuba athile, bafumanise ukuba inkonzo yasentsimini iyinto ekruqulayo yaye ukuya kwiintlanganiso kuyinto edinayo. Oku koko kunokwenzeka xa siphelelwa kukumoyika uYehova, naxa siphelelwa kukumthanda.
19. Sinokuqhubeka njani sibonisa uxabiso Iwethu ngamalungiselelo kaYehova?
19 Ukuhlala simoyika uYehova kuya kusigcina sithobekile phambi kwakhe yaye sisoloko sikuxabisa konke asenzela kona. Enoba yintlanganiso encinane eqhutyelwa ekhaya okanye yindibano enkulu ekwibala lemidlalo ekuze kuyo amashumi amawaka abantu, siyambulela uYehova ngelungelo lokuba kunye nabazalwana bethu abangamaKristu. Siya kubonisa ukuba siyabulela ngobukho bethu apho nangokuthi abanye abezileyo sibalole “eluthandweni nasemisebenzini emihle” ngencoko yethu eyakhayo nangamagqabaza esiwenza ebudeni beentlanganiso. (Hebhere 10:24, 25) Ukuba kuyenzeka sibe nelungelo lokunyamekela izabelo kwiintlanganiso, siya kukuphepha ukulungiselela ngomzuzu wokugqibela, ngokungxama siqokelela iingcamango. Masingaze sizijonge njengeziqhelekileyo izabelo ezinjalo. Zingamalungelo angcwele, ibe indlela esizinyamekela ngayo iyenye imbonakaliso yendlela esimhlonela nesimoyika ngayo uYehova.
20. (a) Yintoni esimele singaze siyilibale? (b) Sisiphi isigqibo esifikelela kuso?
20 Hayi indlela ombi ngayo umphumo kwabo baphelelwa kukumoyika uThixo! Abanambulelo ngelungelo elingabafanelanga lokuba nolwalamano noMongami wendalo iphela. “Ndingukumkani omkhulu, utsho uYehova wemikhosi, negama lam liyoyikeka phakathi kweentlanga.” (Malaki 1:14; ISityhilelo 15:4) Kwanga asingeze sikulibale oko. Ngamana ngamnye wethu anganjengomdumisi owathi: “Ndilidlelane labo bonke abakoyikayo.” (INdumiso 119:63) Emva kokuqwalasela lo mbandela, sifikelela kwisigqibo awafikelela kuso uSolomon xa wathi: “Yoyika uThixo, ugcine imithetho yakhe; ngokuba indawo leyo yimfanelo yoluntu lonke. Ngokuba izenzo zonke uThixo uya kuzizisa ekugwetyweni, izinto zonke ezifihlakeleyo, nokuba zilungile nokuba zimbi.”—INtshumayeli 12:13, 14.
Esikufunda Kwincwadi KaMalaki—
◻ Kwakutheni le nto amaSirayeli kwakufuneka emoyikile uYehova?
◻ Izenzo zethu zibonisa njani ukuba simoyika ngokwenyani uYehova?
◻ Yintoni engqina ukuba kukho abamoyikayo uYehova emhiabeni ngokubanzi namhlanje?
◻ Kutheni le nto simele sihlale simoyika ngokufanelekileyo uThixo?
[Amagama acatshuliweyo akwiphepha 18]
Ukusuka ekuphumeni kuse ekutshoneni, kwelanga, igama likaYehova liya kwenziwa likhulu
[Umfanekiso okwiphepha 17]
AmaSirayeli adela uYehova ngokwenza imibingelelo ngezilwanyana eziziimfama, eziqhwalelayo, okanye ezigulayo