IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w07 12/15 iphe. 26-iphe. 29 isiqe.¶ 6
  • Iimbalasane Zencwadi KaMalaki

No video available for this selection.

Sorry, there was an error loading the video.

  • Iimbalasane Zencwadi KaMalaki
  • IMboniselo Evakalisa UBukumkani BukaYehova—2007
  • Imixholwana
  • Amanqaku Afanayo
  • ABABINGELELI ‘BAKHUBEKISE ABANINZI’
  • (Malaki 1:1–2:17)
  • ‘INKOSI YOKWENYANISO IYA KUZA ETEMPILENI YAYO’
  • (Malaki 3:1–4:6)
  • “Yoyika UThixo Oyinyaniso”
  • Incwadi YeBhayibhile 39—Malaki
    “Sonke ISibhalo Siphefumlelwe NguThixo Kwaye Siyingenelo”
  • INkosi Yokwenyaniso Izela Ukugweba
    IMboniselo Evakalisa UBukumkani BukaYehova—1989
  • Ixesha Lokucikidwa Nelokuhluzwa
    IMboniselo Evakalisa UBukumkani BukaYehova—1987
  • Ngubani Oya Kusinda Ngemini KaYehova?
    IMboniselo Evakalisa UBukumkani BukaYehova—2002
Khangela Okunye
IMboniselo Evakalisa UBukumkani BukaYehova—2007
w07 12/15 iphe. 26-iphe. 29 isiqe.¶ 6

ILizwi LikaYehova Liphilile

Iimbalasane Zencwadi KaMalaki

SEKUYIMINYAKA engaphezu kwama-70 yakhiwe ngokutsha itempile yaseYerusalem. Noko ke, njengoko ixesha lihamba, amaYuda abuthathaka kakhulu ngokomoya. Kuqaqadeke nkqu nababingeleli. Ngubani oza kuwenza ayiqonde kakuhle imeko akuyo aze awahlaziye ngokomoya? UYehova usinika uMalaki esi sabelo.

Incwadi yokugqibela yeZibhalo ZesiHebhere, ebhalwe nguMalaki nengacengi ndolala phi inesiprofeto esiphefumlelwe nguThixo. Ukunikel’ ingqalelo kwilizwi lesiprofeto sikaMalaki kuya kusinceda siyilungele ‘imini kaYehova enkulu neyoyikekayo,’ xa le nkqubo ingendawo ifikelela esiphelweni.—Malaki 4:5.

ABABINGELELI ‘BAKHUBEKISE ABANINZI’

(Malaki 1:1–2:17)

UYehova uxelela uSirayeli indlela avakalelwa ngayo esithi: “Ndinithandile.” Kodwa ababingeleli baye balinyelisa igama likaThixo. Ngayiphi indlela? “Ngokunikela esibingelelweni [sakhe] isonka esingcolileyo,” ‘nangokunikela isilwanyana esisisiqhwala okanye esigulayo.’—Malaki 1:2, 6-8.

Ababingeleli ‘bakhubekise abaninzi emthethweni.’ Abantu ‘baqhubana ngobuqhophololo.’ Abanye bathabathe abafazi basemzini. Bambi baqhubene ngobuqhophololo ‘nabafazi bobutsha babo.’—Malaki 2:8, 10, 11, 14-16.

Iimpendulo Kwimibuzo YeZibhalo:

2:2—UYehova ‘wayiqalekisa njani intsikelelo’ yababingeleli abanxaxhileyo? Wabangela ukuba iintsikelelo zabo babingeleli zijike zibe ziziqalekiso.

2:3—Kuthetha ukuthini “ukuchithachitha umswane” ebusweni bababingeleli? Ngokutsho koMthetho, umswane wezilwanyana ekunikelwe ngazo wawumele ukhutshelwe ngaphandle kwenkampu uze utshiswe. (Levitikus 16:27) Ukuchithachitha umswane ebusweni bababingeleli kwakuthetha ukuba uYehova akawamkeli amadini abo yaye banezothe kuye abo babewanikela.

2:13—Ziinyembezi zikabani ezaziza kugubungela isibingelelo sikaYehova? Ziinyembezi zabafazi ababeze kuphalaza imbilini yabo kuYehova kwingcwele yetempile. Yintoni ebangela ukuba babe buhlungu ngolu hlobo? Abayeni babo abangamaYuda baqhawule imitshato ngokungekho mthethweni baza babashiya, mhlawumbi kuba befuna ukutshata nabafazana basemzini.

Oko Sikufundayo:

1:10. UYehova wayengakholiswa ngamadini abo babingeleli babawayo, ababehlawulisa abantu nangezinto ezingenamsebenzi ezinjengokuvala iingcango okanye ukubasa imililo yesibingelelo. Kubaluleke ngokwenene ukuba unqulo lwethu, oluquka ubulungiseleli bamaKristu, luqhutywe kukumthanda ngokungazingciyo uThixo nommelwane, kungekhona kuba sijonge ukufumana imali.—Mateyu 22:37-39; 2 Korinte 11:7.

1:14; 2:17. UYehova akalunyamezeli uhanahaniso.

2:7-9. Abo banikwe imbopheleleko yokufundisa ebandleni bafanele baqinisekise ukuba bafundisa ngokuvisisana neLizwi likaThixo, iZibhalo Ezingcwele, neempapasho ezisekelwe eBhayibhileni esizifumana ‘kwigosa elithembekileyo.’—Luka 12:42; Yakobi 3:11.

2:10, 11. UYehova ulindele ukuba abanquli bakhe bangasithabathi lula isiluleko sokutshata “kuphela eNkosini.”—1 Korinte 7:39.

2:15, 16. Abanquli bokwenyaniso bafanele basihlonele isifungo somtshato abasenze nabafazi bobutsha babo.

‘INKOSI YOKWENYANISO IYA KUZA ETEMPILENI YAYO’

(Malaki 3:1–4:6)

“Iya kuza ngequbuliso etempileni Yayo iNkosi yokwenyaniso [uYehova uThixo]” ikunye ‘nomthunywa womnqophiso [uYesu Kristu].’ UThixo ‘uza kusondela kubantu bakhe ukuze agwebe’ aze abe lingqina elikhawulezayo nxamnye nabo bonke abangendawo. Ngaphezu koko, “incwadi yokukhumbula” iya kubhalelwa abo bamoyikayo uYehova.—Malaki 3:1, 3, 5, 16.

Iya kuza “imini evutha njengeziko” ize ibatshabalalise bonke abangendawo. Ngaphambi kokuba loo mini ifike, kuya kuthunyelwa umprofeti ukuba “abuyisele intliziyo yooyise koonyana, nentliziyo yoonyana kooyise.”—Malaki 4:1, 5, 6.

Iimpendulo Kwimibuzo YeZibhalo:

3:1-3—‘INkosi yokwenyaniso nomthunywa womnqophiso’ beza nini etempileni, ibe ngubani owathunywa ukuba abahlahlele indlela? Ngokufuziselayo uYehova weza kucoca itempile yakhe ngoNisan 10, 33 C.E., xa uYesu wangena etempileni waza wagxotha bonke abo babethenga nababethengisa. (Marko 11:15) Xa kwakusenzeka oku uYesu wayesele eneminyaka emithathu enesiqingatha ethanjiswe njengoKumkani Omiselweyo. Ngendlel’ efanayo, kubonakala ngathi kwiminyaka emithathu enesiqingatha emva kokuba ebekwe etroneni njengoKumkani ezulwini, uYesu wahamba noYehova baya kwitempile yokomoya apho bafika abantu bakaThixo befuna ukucocwa. Ngenkulungwane yokuqala, uYohane umBhaptizi wathunywa kumaYuda ukuba aye kuwalungiselela ukuza kukaYesu Kristu. Nakula maxesha ethu, kwathunyelwa umthunywa ukuba alungise indlela yokuza kukaYehova kwitempile yakhe yokomoya. Ukususela ekuqaleni kweminyaka yee-1880, iqela labafundi beBhayibhile belixakeke ngumsebenzi wokufundisa abantliziyo zinyanisekileyo iinyaniso ezisisiseko zeBhayibhile.

3:10—Ngaba ukuzisa “zonke izishumi” kuthetha ukunikela kuYehova ngako konke esinako? Ukufa kukaYesu kwawutshitshisa uMthetho kaMoses, ngoko namhlanje akusafuneki mali yazishumi ukuze umntu anqule uThixo. Sekunjalo, ukunikela izishumi kufuzisela okuthile. (Efese 2:15) Akufuziseli ukunikela ngako konke esinako. Ngoxa zona izishumi zazisiziswa nyaka ngamnye, thina sinikela kuYehova ngako konke esinako kube kanye—ngokuzahlulela kuye, sifuzisela oko ngokubhaptizwa emanzini. Emva kokuba sibhaptiziwe, konke esinako iba kokukaYehova. Sekunjalo, uyasivumela ukuba sinikele ngokuzithandela okuthile kuloo nto sinayo—isishumi sokomfuziselo—ukuze sikusebenzise enkonzweni yakhe. Oko kukwenza nantoni na esemandleni ethu nesiqhutywa ziintliziyo zethu ukuba siyenze. Izinto esizinikela kuYehova lixesha, amandla nobuncwane bethu esibusebenzisa kumsebenzi wokushumayela ngoBukumkani nowokwenza abafundi. Oko kuquka ukuya kwiintlanganiso zamaKristu, ukutyelela amaKristu agulayo nawalupheleyo, nokuxhasa unqulo lokwenyaniso ngemali.

4:3—Abanquli bakaYehova baya “kubanyathela njani abangendawo”? Abantu bakaThixo abasemhlabeni abayi ‘kubanyathela ngokoqobo abangendawo,’ oko kukuthi, abayi kuba nanxaxheba xa begwetywa. Kunoko, oku kuthetha ukuba abakhonzi bakaYehova abasemhlabeni baya kukwenza ngokufuziselayo oku, ngokuba nenxaxheba ngeentliziyo ezipheleleyo kumbhiyozo woloyiso oya kuba semva kokupheliswa kweli hlabathi likaSathana.—INdumiso 145:20; ISityhilelo 20:1-3.

4:4—Kutheni sifanele ‘sikhumbule umthetho kaMoses’? AmaKristu akakho phantsi kwalo Mthetho, kunoko wona “unesithunzi sezinto ezilungileyo eziza kuza.” (Hebhere 10:1) Ngenxa yoko, ukunikel’ ingqalelo kuMthetho kaMoses kunokusinceda sibone indlela ezizaliseka ngayo izinto ezibhalwe kuwo. (Luka 24:44, 45) Ngaphezu koko, uMthetho ‘unentsobi yezinto ezisemazulwini.’ Kubalulekile ukuwufunda ukuze siqonde iimfundiso nendlela yokuziphatha yamaKristu.—Hebhere 9:23.

4:5, 6—“UEliya umprofeti” umela bani? Kwaprofetwa kwathiwa “uEliya” uya kwenza umsebenzi wokubuyisela, oko kukuthi ukulungisa iintliziyo zabantu. Ngenkulungwane yokuqala yeXesha Eliqhelekileyo, uYesu Kristu wabhekisela kuYohane umBhaptizi ngokuthi ‘nguEliya.’ (Mateyu 11:12-14; Marko 9:11-13) UEliya wanamhlanje uthunyelwa “ngaphambi kokufika kwemini kaYehova enkulu neyoyikekayo.” Lo Eliya ‘likhoboka elithembekileyo neliyingqondi.’ (Mateyu 24:45) Olu didi lwamaKristu athanjisiweyo belunceda abantu babuyele kuThixo.

Oko Sikufundayo:

3:10. Ukuba asimniki oko kusemandleni ethu uYehova sizibandeza iintsikelelo.

3:14, 15. Ngenxa yomzekelo ombi wababingeleli, amaYuda aqalisa ukungakunanzi ukukhonza uThixo. Abo banembopheleleko ebandleni lamaKristu bafanele babe ngumzekelo.—1 Petros 5:1-3.

3:16. UYehova akabalibali abo bamoyikayo nabathembekileyo kuye. Uyabakhumbula yaye uya kubasindisa xa ephelisa eli hlabathi lingendawo likaSathana. Ngoko ke, masingaze siyekelele umxakatho ekugcineni ingqibelelo yethu kuThixo.—Yobhi 27:5.

4:1. Ngosuku lokuziphendulela kuYehova, ‘ingcambu’ kunye ‘nesebe’ zifumana imiphumo efanayo—abantwana bagwetywa ngokufanayo nabazali babo. Abazali banembopheleleko enkulu ngabantwana babo abasebancinane. Ootata noomama abangamaKristu bamele bazame ngamandla ukukholisa uThixo ukuze abamkele.—1 Korinte 7:14.

“Yoyika UThixo Oyinyaniso”

Ngubani oya kusinda ‘ngemini kaYehova enkulu neyoyikekayo’? (Malaki 4:5) UYehova uthi: “Kuni ke baloyikayo igama lam, ilanga lobulungisa ngokuqinisekileyo liya kukhanyisa, linokuphilisa emaphikweni alo; yaye okunene niya kuphuma nize nidlobe njengamathole eenkomo atyetyisiweyo.”—Malaki 4:2.

“Ilanga lobulungisa,” uYesu Kristu, likhanyisela abo baloyikayo igama likaThixo, yaye bakholekile emehlweni kaYehova. (Yohane 8:12) Kubo, “linokuphilisa emaphikweni alo”—ngoku libaphilisa ngokomoya, ukanti kwihlabathi elitsha likaThixo liya kubaphilisa ngokupheleleyo emzimbeni, engqondweni nakwiimvakalelo. (ISityhilelo 22:1, 2) Ngemincili ‘badloba njengamathole eenkomo atyetyisiweyo.’ Ngoxa sikhangele ngamehlw’ abomvu kwezo ntsikelelo, masithobele esi sibongozo sikaKumkani uSolomon: “Yoyika uThixo oyinyaniso uze ugcine imiyalelo yakhe. Kuba oku kuyimbopheleleko yomntu.”—INtshumayeli 12:13.

[Umfanekiso okwiphepha 26]

Umprofeti uMalaki, umkhonzi kaThixo onenzondelelo nozinikeleyo

[Umfanekiso okwiphepha 29]

Oko sikufundisayo kufanele kuvisisane neBhayibhile

[Umfanekiso okwiphepha 29]

Abakhonzi bakaYehova bayasihlonela isifungo somtshato

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share