Imibuzo Evela Kubafundi
◼ Babengoobani ‘abalishumi elinababini’ awathi uYesu wabonakala kubo, njengoko kukhankanywe kweyoku-1 yabaseKorinte 15:5?
Ukubonwa okukhankanywe kweyoku-1 yabaseKorinte 15:5 kubonakala ikoko kubhalwe kuYohane 20:26-29, okuquka uTomas, Phofu ke, oku kubhekisela kubapostile njengeqela yaye mhlawumbi kwaquka noMatiya.
Ethetha ngovuko, uPawulos wabhala ngokubonakala kukaYesu ebantwini emva kokuvuswa Kwakhe. Umpostile wathi uKristu “wabonwa nguKefas, emva koko ngabalishumi elinababini. Emveni koko wabonwa ngaxesha linye ngabazalwana abangaphezu kwamakhulu amahlanu.”—1 Korinte 15:5, 6.
Phakathi kwabo bathi bamlandela njengabafundi, uYesu wakhetha abapostile abali-12. (Mateyu 10:2-5) UYuda Sikariyoti wayengomnye wabali-12, kodwa waba ngumngcatshi, wamngcatsha uYesu, waza emva koko wazixhoma, (Mateyu 26:20-25; 27:3-10) Ngoko ngexesha lokufa kukaKristu nokuvuka kwakhe, kwakukho abapostile abali-11 kuphela abathembekileyo kwabali-12 bokuqala, UYesu wabonakala kubafundi abahlukahlukeneyo phakathi kwexesha lokuvuka kwakhe nelokunyukela ezulwini. Emva koko abapostile babona kufuneka umntu wokuthabatha indawo kaYuda. Ngokhokelo lobuthixo, uMatiya wakhethwa, waza “wabalelwa ndawonye nabapostile abalishumi elinamnye.”—IZenzo 1:6-26.
Ngaloo ndlela bambi baye bazibuza ukuba kungani na ukuba uPawulos abe wabhala wathi uYesu wabonakala ‘kwabalishumi elinababini’ ekubeni ngelo xesha uYuda wayefile yaye uMatiya wayengekakhethwa. Ngeliphandle, ngelo xesha kwakukho ‘abapostile abalishumi elinamnye’ kuphela ababenyulwe kwangaphambili nguYesu waza wabathuma.—Luka 6:13-16.
Kuqhelekile ukuthetha ngeqela njengelipheleleyo nokuba ilungu elinye alikho. (“Iqumrhu labalathisi ligqibe . . . ” “Intlanganiso yabadala yadibana . . . ”) Ngoko ibinzana elithi “abalishumi elinababini” lisenokuba ngokufanelekileyo lasetyenziswa ngokusingisele kwiqela lonke labapostile, nokuba ilungu elinye okanye amabini ayengekho ngeso sihlandlo. (Thelekisa IZenzo 6:1-6.) Xa uYesu wabonakala okokuqala kubafundi kwigumbi elalivaliwe, “UTomas, omnye kwabalishumi elinababini, . . . wayengenabo.” Kwiintsuku ezisibhozo kamva wayekho ibe wathi wazinzisa nakuphi na ukuthandabuza ababenako. (Yohane 20:19-29) Nangona uMatiya wayengekanyulwa ukuze athabathe indawo kaYuda, wayengumfundi oligqala. (IZenzo 1:21, 22) Njengoko wayenxulumene ngokusondeleyo nabapostile bokuqala waza kamsinya emva koko “wabalelwa ndawonye” nabo, le ngxelo esicingisa emva engokubonakala kukaYesu ‘kwabalishumi elinababini’ mhlawumbi yayiquka noMatiya.