Amagunya Amakhulu Ehlabathi Akwimbali YeBhayibhile Aya Esiphelweni Sawo!
NGABA unokuyithelekelela imbali eyabhalwa ngaphambi kokuba iziganeko zayo zenzeke? ‘Yintsomi emini leyo,’ ngaba utsho? Kanti, kukho incwadi eyathi ngokwenene yayichaza kwangaphambili imbali—amakhulu, maxa wambi kwanamawaka eminyaka ngaphambi kokuba iziganeko zayo zenzeke! Loo ncwadi yiBhayibhile.
IBhayibhile ayizange iphelele nje ekubeni inikele ingxelo yeziganeko zamandulo ngokuchanileyo kodwa ngendlela emangalisa gqitha yakwaxela kwangaphambili okona kubalulekileyo kwimbali yehlabathi njengokuba kwakuza kuchaphazela abantu bakaThixo, ukususela kwixesha leBhabhiloni yamandulo, ngaphezu kweminyaka engama-2 500 eyadlulayo, ukuza kuthi ga kumhla wethu kwanangaphaya kwawo.
UDaniyeli, umprofeti owayephila ngethuba lenkulungwane yesithandathu ngaphambi kweXesha lethu Eliqhelekileyo, wanikwa izityhilelo ezine ezahlukahlukeneyo ezithetha ngekamva lembali yehlabathi. Wayifumana phi le nkcazelo wayenayo? UDaniyeli wathi: “Kukho uThixo emazulwini, ozityhilayo iimfihlakalo.” (Daniyeli 2:28) Abembi bezinto zakudala, bevumbulula izinto ezazisele nezazishiywe ngamagunya ehlabathi amandulo, baye bafumana ubungqina obukhwankqisayo bokunyanisa kwembali nokwesiprofeto esifunyanwa eBhayibhileni.
Amagunya amabini kumagunya amakhulu ehlabathi embali yeBhayibhile, iYiputa neAsiriya, ayekho kudala ngaphambi kwexesha likaDaniyeli. IBhabhiloni yayilawula ngomhla kaDaniyeli, ibe amagunya ehlabathi amabini awayeza kulandela ayetyhiliwe kumprofeti. (Daniyeli 2:47, 48; 8:20, 21) Amanye amabini ayeza kulandela la magunya, esizisa kweli xesha langoku.
Mangaphi La Magunya?
Ngokutsho kweBhayibhile, ayeza kuba mangaphi loo magunya ehlabathi? Impendulo yanikwa umpostile owayesele ekhulile uYohane kwaye ibonisa apho sikhoyo kumsinga wexesha. Isithunywa sezulu samxelela oku uYohane. “Zona zingookumkani abasixhenxe. Abahlanu bawa, omnye ukho, omnye akakafiki.”—ISityhilelo 17:10.
Ngawaphi amagunya ehlabathi amahlanu awayesele efikile aza adlula ngomhla kaYohane? YiYiputa, iAsiriya, iBhabhiloni, amaMedi namaPersi neGrisi. Liliphi eli laliselikho? YiRoma. Ibe liliphi igunya ‘elalingekafiki’? LiGunya Lehlabathi lamaNgesi namaMerika lomhla wethu. La ngamagunya ehlabathi lawo abantu bakaThixo, abamandulo nabanamhlanje, bebewaxhalabele ngokuyintloko.
Isibakala esibaluleke ngokukhethekileyo sesi: Kwakuza kubakho ungcelele lwaloo magunya asixhenxe kuphela! Igunya lesibhozo, elaliza kuquka amazwe ala magunya asixhenxe, laxelwa kwangaphambili ukuba lalingazi kuthabatha thuba lide likho ebudeni beentsuku zegunya lesixhenxe. (ISityhilelo 17:10, 11) Oku kuthetha ukuba siphila ebudeni bexesha lokugqibela lamagunya amakhulu ehlabathi alawulwa ngumntu. Akuyi kubakho wambi!
Kungekudala ngoku, amagunya ehlabathi aza kufikelela esiphelweni sawo. UDaniyeli waprofeta wathi ezi nkqubo zabantu ziya kucolwa zize ‘zimke nomoya.’ (Daniyeli 2:35) Ziya kuthatyathelw’ indawo yintoni? Yinto ethile elunge ngakumbi! UDaniyeli unikela le ngxelo: “Ngemihla yabo kumkani, uThixo wamazulu uya kumisa ubukumkani obungayi konakala naphakade. . . . Buya kuzicola buzigqibe zonke ezo zikumkani, bona bume ngonaphakade.” (Daniyeli 2:44) Ngoko ayikho enye into engaphandle koBukumkani bukaThixo eya kuthabathela indawo la magunya ehlabathi amiselwe ngabantu. Okunjani kona ukubalasela kokuphuculwa kwezinto kulawulo lwehlabathi!
Alithandabuzeki elokuba unento oyaziyo ngamagunya ehlabathi. Kodwa ngaba ulwazi olubhekele phaya ngamasiko awo, unqulo lwawo nolwalamano lwawo nabantu bakaThixo nesiprofeto seBhayibhile beluya kukunceda ukuba uyiqonde ngakumbi imbali yoluntu ngenxa yokukhanyiselwa ziZibhalo?
Eneneni kunjalo. Ngoko siyakuvuyela ukupapasha, ungcelele lwamanqaku asibhozo athetha ngamagunya ehlabathi, ukususela kule nkupho. La manqaku afanele akuncede weyiseke kukuba le mbali ichazwe eBhayibhileni inokuthenjwa ibe iqinisekile. Kwakhona afanele alomeleze ukholo lwakho kwisibakala sokuba iziprofeto zeBhayibhile zithembekile yaye ziyinyaniso!