Abavakalisi BoBukumkani Bayabalisa
Ukuzingisa Kuthumo Lwabo Olungokobuthixo
AMANGQINA KAYEHOVA aluthabatha nzulu kakhulu uthumo lwawo olungokobuthixo lokuya kushumayela iindaba ezilungileyo zoBukumkani bukaThixo. (1 Korinte 9:16; IZenzo 20:26, 27) Esinye isibini saseFransi saziva sishukunyiswe ngamandla olu thumo ngokufikelela wonk’ ubani ngeendaba ezilungileyo. Kummandla esasihlala kuwo kwakukho ihostele ekwakugcinwe kuyo iimbacu zezobupolitika nabasebenzi abaselula ababevela kwamanye amazwe. Esi sibini sicacisa sisithi: “Sasingayazi indlela esasinokungena ngayo ngaphakathi ngaphandle kokuba singeniswe ngomnye owayehlala apho. Ngoko sagqiba ekubeni sithethe nabantu abangaphandle kuphela yaye mhlawumbi babengasimema ukuba singene ngaphakathi. Elinye igatyana lomfana lawamkela ngolangazelelo amaphephancwadi laza lasicela ukuba silityelele.
“Salityelela eli gatyana lomfana, ibe saqalisa isifundo ngoko nangoko. Umhlobo walo mfana wayesibakho sihlandlo ngasinye siqhuba isifundo, kodwa wayengaze akhuphe nelimdaka. Xa, sathi ekupheleni kwesifundo sesibini, sambuza enoba naye wayengathanda na ukufunda okungakumbi ngeLizwi likaThixo, waphendula ngelithi: ‘Bendinganqandwa yintoni?’ Ngaloo ndlela saqalisa isifundo sesibini. Sabamemela ezintlanganisweni zisuka nje, ibe abazange baphoswe nayenye ukususela ngoko. Ukuba nenkqubela kwabo kwakubonakala ngokuphandle, ingakumbi ehostele, apho bathi ngoko nangoko baqalisa ukuthetha ngezinto ababezifunda, nto leyo eyaphumela ekubeni siqalise isifundo sesithathu kunye nesinye isibini. Ngaminazana ithile lonke eli qela lalimi esangweni, lilungele ukunduluka liye ezintlanganisweni, xa omnye umhlobokazi wathi wagqiba ekubeni ahambe nalo. Wayethabatheke kakhulu ibe wayefuna ukuba isithandwa sakhe sifunde ngako oku. Bobabini baqalisa ukufundisisa.
“Ukuya kuthi ga ngoko sasiqhuba izifundo ezihlanu. Isifundo ngasinye sasifana nentlanganiso! Abanye babebakho xa kuqhutyelwa abanye izifundo, ibe kwabakho abantu abatsha abangenelelayo. Bonke bathi bathetha ngenyaniso, yaye ngenxa yoko, sathi saqalisa isifundo sesithandathu kunye nenye indoda, eyathi nayo yaqalisa ukuya ezintlanganisweni yaza yanikela ubungqina kwisithandwa sayo.
“Kakade ke, konke oku yayibubungqina obumangalisayo obanikelwa ehostele. Kwakungeyondlwan’ iyanetha ngaba bantu baselula ukwambatha ubuntu obutsha. Kwakufuneka boyise ukutshaya, ukuba ngamakhoboka otywala, ugonyamelo, ukuziphatha okubi nonxulumano olubi. USathana wenza ukuba abahlobo babo bangaphambili baphazamisane nokwenza kwabo inkqubela, bebahendela ukuba batshaye okanye babe namatheko anengxolo. Enye indoda eyayinomdla yayithandana nentombazana eyayibambelele kwisithethe. Le ntombazana yazama ukuyityekisa enyanisweni. Phofu ke, ekugqibeleni yaqalisa ukufundisisa yaye ukususela ngoko iye yenza inkqubela entle.
Esi sibini sinikela ingxelo yokuba, “Iindaba zakutshanje ziye zabika ukuba omnye waba bafana uye wavalelwa entolongweni ngenxa yokuba ngundilele kwakhe. Kwithuba elingaphantsi konyaka, kwabhaptizwa abanye abathandathu, ekwathi abahlanu babo ngokukhawuleza bangenela inkonzo yobuvulindlela bobuncedani. Kulo lonke elo qela, abathandathu ngoku bangoovulindlela abathe ngxi, benosukelo lokuba ngoovulindlela abakhethekileyo.”
Hayi indlela esavuzwa ngokutyebileyo ngayo esi sibini ngenxa yokuzingisa kwaso ekuphumezeni uthumo lwaso olungokobuthixo lokufuna ababumvu! Ngokuqinisekileyo uYehova wayisikelela imigudu yaso yokuthembeka. Ngoxa sisenokuba asinawo amava abalaseleyo anjalo, sisoloko sifuna ukuluphumeza ngokuthembekileyo uthumo lwethu olungokobuthixo lokushumayela iindaba ezilungileyo zoBukumkani.—Mateyu 24:14.
[Umfanekiso okwiphepha 21]
Seso sibini siseFransi sikunye noovulindlela abathe ngxi abathandathu