Umqondiso—Ngaba Uyawuthobela?

“SIFUNA ukuba abantu bawo onke amazwe banandiphe ubuncwane, impilontle nolonwabo. Indlela ekhokelela kwimeko enjalo isekuveliseni ihlabathi elingenazixhobo zenyukliya nelingenalugonyamelo.”—Perestroika, yinkokeli yaseRashiya uMikhail Gorbachev.

Ngezizathu ezivakalayo, abaninzi bayathandabuza ukuba umntu anganako ngokwenene ukuzisa iimeko zehlabathi ezilolo hlobo. Enye inkokeli, uYesu Kristu, yathembisa ngento ethile ezuke ngakumbi—umhlaba oyiparadisi apho kuya kupheliswa nokufa. (Mateyu 5:5; Luka 23:43; Yohane 5:28, 29) Kambe ke, oku kuya kwenzeka ngokuthi kungenelele uThixo. Ephendula umbuzo wokuba ukungenelela okulolo hlobo kuya kufika “nini,” uYesu wathi: “Ubukumkani bukaThixo abufiki bunokulolongeka [abubonakali ukuthwasa kwabo, TE].” Okokuqala, kuphela ngabo bangabaphawuli abanomdla onzulu nabaneliso elifana nelokhozi abaya kukuqonda oku. (Luka 17:20, 37) Kutheni kunjalo nje?

Isizathu Sokuba Sifune Umqondiso

Ukususela ekunyukeleni kwakhe ezulwini, uYesu Kristu ube “ehleli ekukhanyeni okungenakusondelwa; ekungekho namnye kubantu owakha wambona, nonako ukumbona.” (1 Timoti 6:16) Ngaloo ndlela, amehlo okoqobo abantu awayi kuze ambone kwakhona. Kunjengokuba uYesu wathi ngosuku lokugqibela lobomi bakhe basemhlabeni: “Liselilifutshane ixesha, ukuze ihlabathi lingabi sandibona.” (Yohane 14:19) Unokubonwa kuphela ngendlela yokomfuziselo.—Efese 1:18; ISityhilelo 1:7.

Kanti, uYesu wathi kwakuya kwenzeka ukuba abafundi bakhe baqonde xa uBukumkani bukaThixo babuza kuqalisa ukulawula. Njani? Ngomqondiso. Ekuphenduleni umbuzo othi, “Uya kuba yini na umqondiso wokufika kwakho?” uYesu wandlala ubungqina obubonakalayo bokulawula kwakhe kwixesha elizayo ngokungabonakaliyo.—Mateyu 24:3.

Enye into eyayiqukiwe kumqondiso ngumzekeliso owawubonisa uhlobo lwabantu ababeya kungenelwa kuwo. UYesu wathi, “Apho sukuba sikhona isidumbu, ziya kuhlanganisana khona iinkozi.” (Mateyu 24:28, NW) Bonke abo bafuna ukusinda ekuphelisweni kwale nkqubo ikhoyo besindela kwihlabathi elitsha likaThixo bamele ‘bahlanganisane’ baze banandiphe ukudla kokomoya kunye ‘nabanyulwa’ bakaKristu abafaniswa neenkozi.—Mateyu 24:31, 45-47.

Kulumkele Ukungabi Namonde

Akukho mntu unokuwazi umhla wokupheliswa kwale nkqubo ingendawo ikhoyo. UYesu wathi, “Akukho bani uwaziyo loo mhla nelo lixa, azazi nezithunywa ezisemazulwini, akazi noNyana lo, kuphela nguYise.”—Marko 13:32, 33.

Ngoko, ngaba kunokwenzeka ukuba umqondiso ubonakale kungcelele lwezizukulwana ezininzi zabantu? Akunjalo. Umqondiso uza kubonakala ebudeni besizukulwana esinye. Kwaeso sizukulwana sinye sakubonayo ukuqalisa komqondiso kwakhona siya kuyibona incopho yawo ‘kwimbandezelo ekungazange kubekho injalo kwasekuqalekeni kwendalo.’ Ababhali-mbali abathathu, uMateyu, uMarko noLuka, bakubhala ukuqinisekisa kukaYesu ngalo mbandela.—Marko 13:19, 30; Mateyu 24:13, 21, 22, 34; Luka 21:28, 32.

Noko ke, kukho ingozi yokuphelelwa ngumonde. Sekudlule iminyaka engamashumi asixhenxe anesine ukususela ekuqhambukeni kweMfazwe Yehlabathi I ngowe-1914. Ngokwembono yabantu, oku kusenokubonakala kulixesha elide gqitha. Kodwa wambi amaKristu anamehlo afana naweenkozi awayibonayo iMfazwe Yehlabathi I asadl’ amazimba. Isizukulwana sawo asikadluli.

Xa wanikela umqondiso, uYesu walumkisa ngengozi yokuphelelwa ngumonde. Wathetha ngabathile ababeya kuthi entliziyweni yabo: “Inkosi yam ilibele.” UYesu wabonisa ukuba iimvakalelo ezilolo hlobo, ukuba azigqalwa, zinokukhokelela kwinyathelo lobudenge. (Mateyu 24:48-51) Abapostile bakaKristu babethetha okuninzi ngeli nyathelo.

“Abagxeki”

Ngokutsho kombhali weBhayibhile uYuda, abapostile bakaKristu bavakalisa esi silumkiso silandelayo: “Kuya kubakho abagxeki ngexesha lokugqibela, behamba ngokwezabo iinkanuko zokungahloneli Thixo.”—Yuda 17, 18.

Umnqweno wokuphila kwihlabathi elitsha elicocekileyo unokuthi ngokulula uthatyathelw’ indawo ‘ziinkanuko zokungahloneli Thixo.’ Oku kuyingozi ngokukodwa namhlanje ngenxa yeenkqubo zehlabathi zokuthetha nezonxibelelwano. Akuzange nanini na embalini yomntu kubekho ugonyamelo, ukukhafula nokuziphatha kakubi ngokwesini ukusa kumkhamo ololu hlobo. Ezi zinto zisoloko zingumxholo kanomathotholo namazwi engoma, ibe zibonwa kwiinkqubo ezininzi zikamabonwakude, kwiivideo, kwizibhengezo zentengiso, kwiincwadi nakumaphephancwadi.

Umqondiso walatha ekuphelisweni kwezenzo ezinjalo zokungahloneli Thixo. Ngoko, ngokuqhelekileyo, bambi abantu abanomnqweno wezinto zokungahloneli Thixo bayawugxeka umqondiso. Njengoko kwaxelwa kwangaphambili, baphikisa ngelokuba “izinto zonke zahlala zihleli zinjengokwasekuqalekeni kwendalo.”—2 Petros 3:3, 4.

‘Ukuphola Kothando’

Kutshanje, iphephancwadi iNewsweek liye ldlan’ indlebe nombhali ongumMerika oneminyaka engama-75 ubudala, uPaul Bowles. Ephendula umbuzo othi, “Iyintoni imbono yakho ngehlabathi?” lo kaBowles wathi: “Ihlabathi liwohlokile ngokwengqiqo yokuziphatha. Akukho bani unyanisekileyo konke konke ngendlela abantu ababeyiyo kwiminyaka engama-60 edluleyo. Ibisaziwa le nto ilinene; ibiluphawu oluxabisekileyo lwempucuko yethu yaseNtshona. Ngoku akukho kwamntu [ukhathalayo]. Kwakhona eyona nto ingamandla yimali.”

Le meko injengokuba kanye yachazwa kwangaphambili yiBhayibhile. UYesu wakuxela kwangaphambili oku: “Nangenxa yokwanda kokuchasa umthetho, luya kuphola uthando lwabaninzi.” (Mateyu 24:12; 2 Timoti 3:1-5) Njengoko ukuzingca nokubawa kusanda, uthando ngoThixo luyancipha. Abantu abangakumbi nangakumbi babonisa ukuba babeka kuqala iminqweno yabo kunemithetho kaThixo ngokubandakanyeka kwizenzo zolwaphulo-mthetho, ubugrogrisi, uqheliselo lokunganyaniseki kwezoshishino, ukuziphatha kakubi ngokwesini nokusebenzisa kakubi iziyobisi.

Bambi bayakuqonda ukuzaliseka komqondiso kodwa oko akubaphembeleli ekwenzeni okuhle ngenxa yokuba banomdla gqitha ekwenzeni oko kubakholisayo. Kwelinye icala, ukuthobela umqondiso kufuna ukunyamezela ekuboniseni uthando lokungazingci ngoThixo nangommelwane.—Mateyu 24:13, 14.

‘Amaxhala Obu Bomi’

Kwakhona uYesu walumkisa ngelithi, ngaphandle kokuzonwabisa ngokuzingcayo, iimfuno ezingokwasemzimbeni zokuphathekayo bezinokubabamba gqitha abanye kangangokuba babeya kuwutyeshela umqondiso. Wabongoza esenjenje: “Zilumkeleni ke, hleze zisindwe iintliziyo zenu kukuzingxala, nakukunxila, nangamaxhala obu bomi, ize loo mini inifikele ngebhaqo. Kuba iya kubazela njengomgibe bonke abahleliyo phezu kwehlabathi lonke.”—Luka 21:34, 35.

Kambe ke, iBhayibhile ikhuthaza ubomi bentsapho eyonwabileyo. (Efese 5:24–6:4) Ngokufuthi oku kufuna ukuba intloko-ntsapho ibandakanyeke kuhlobo oluthile lomsebenzi wengqesho okanye loshishino ukulungiselela umfazi nabantwana bayo. (1 Timoti 5:8) Kanti, bekuya kuba kukungabi nangqiqo ukuvumela ukuba ubomi bukabani busekelwe ngamandla entsatsheni, kwishishini nakwizinto eziphathekayo. Ngenxa yale ngozi, uYesu walumkisa: “Njengoko kwaye kuhle ngemihla kaNowa, koba njalo nangemihla yoNyana woMntu. Babesidla, babesela, babezeka, babesendisa, kwada kwayimini awangena ngayo uNowa emkhombeni; wafika unogumbe, wabatshabalalisa bonke. . . . Kuya kuba kwanjengoko ngemini atyhileka ngayo uNyana woMntu.”—Luka 17:26-30; Mateyu 24:36-39.

Ngaba ‘Uya Kwamkelwa’ Okanye Uya ‘Kushiywa’?

Ixesha liphelile. Kungekudala, uBukumkani bukaThixo buza kungenelela ukuze bulungise imicimbi. Ngoko wonk’ umntu uya kuchatshazelwa ngendlela enye kwezi zimbini. Njengoko uYesu wacacisayo: “Ngelo xesha ababini boba sentsimini, athi omnye amkelwe, omnye ashiywe. Abafazi ababini boba besila etyeni lokusila, athi omnye amkelwe, omnye ashiywe.”—Mateyu 24:40, 41.

Xa elo xesha libalulekileyo lifika, kuya kwenzeka ntoni kuwe? Ngaba uya kushiywa kwantshabalalo, okanye ngaba uya kwamkelelwa ekusindeni? Ukuze ufumane ukhokelo olusa kwicala elilungileyo, qwalasela umzekeliso uYesu awawunikelayo othi: “Apho sikhona isidumbu, ziya kuhlanganisana khona iinkozi.”—Luka 17:34-37; Mateyu 24:28, NW.

Ngaloo ndlela uYesu wagxininisa imfuneko yenyathelo lokuhlab’ ukhangele nelokumanyana. Abo bamkelelwa ekusindeni ngabo bathi rhoqo bahlanganisane kunye baze bangenelwe kukudla kokomoya okulungiselelwa nguThixo. Izigidi ziye zafumanisa ukuba ukondliwa okulolo hlobo ngokomoya kuza ngokunxulumana ngokusondeleyo nelinye lamabandla amaNgqina kaYehova angaphezu kwama-55 000 nangokufundisisa iimpapasho ezisekelwe eBhayibhileni ezinjengale uyifundayo.

AmaNgqina kaYehova angaphezu kwezigidi ezithathu abonisa ukholo kulo mqondiso ngokwabelana nabamelwane bawo ngezi “ndaba zilungileyo zobukumkani.” (Mateyu 24:14) Ngaba usabela kakuhle kwezi ndaba zilungileyo? Ukuba wenjenjalo, unokuchatshazelwa ngokunzulu sisithembiso sokusindela emhlabeni oyiparadisi.

[Umfanekiso okwiphepha 5]

Abaninzi banomdla gqitha ekuzonwabiseni kangangokuba bayawutyeshela umqondiso

[Umfanekiso okwiphepha 6]

Ukuthobela umqondiso kubandakanya ukuhlanganisana kunye ukuze sizondle ngeLizwi likaThixo