Ngaba Uyawubona Umqondiso Wobukho BukaYesu?

AKAKHO umntu ofuna ukugula okanye ukwehlelwa yintlekele. Ukuze aphephe intlekele, umntu olumkileyo uyaziphaphela iimpawu ezalatha ingozi aze enze loo nto ifanelekileyo. UYesu Kristu uchaza umqondiso othile esimele siwuqonde. Oko wayebhekisela kuko kwakuza kuchaphazela lonke uluntu olusemhlabeni kuquka wena nentsapho yakho.

UYesu wathetha ngoBukumkani bukaThixo obuya kususa ubungendawo buze buwenze ube yiparadesi lo mhlaba. Abafundi bakhe babenomdla befuna ukwazi ukuba buza kufika nini obo Bukumkani. Babuza: “Uya kuba yintoni na umqondiso wobukho bakho nowokupheliswa kwenkqubo yezinto?”—Mateyu 24:3.

UYesu wayesazi ukuba emva kokubulawa nokuvuswa kwakhe, kwakuza kudlula iinkulungwane ngaphambi kokuba amiselwe ezulwini aze alawule njengoKumkani onguMesiya. Ekubeni ukumiselwa kwakhe kwakungenakubonwa ngabantu, uYesu wachaza umqondiso owawuza kubangela ukuba abalandeli bakhe babubone ‘ubukho’ bakhe ‘nokupheliswa kwale nkqubo yezinto.’ Lo mqondiso uneenkalo eziliqela, ezithi xa zizonke zichaze umqondiso wobukho bukaYesu.

Ababhali beVangeli uMateyu, uMarko, noLuka bayibhala impendulo kaYesu. (Mateyu, isahluko 24 nesama-25; Marko, isahluko 13; Luka, isahluko 21) Abanye ababhali beBhayibhile bawucacisa ngakumbi lo mqondiso. (2 Timoti 3:1-5; 2 Petros 3:3, 4; ISityhilelo 6:1-8; 11:18) Asinakukwazi ukubhala zonke iinkcukacha, kodwa siza kuhlolisisa iimpawu ezintlanu ezithetha ngalo mqondiso wachazwa nguYesu. Uza kufumanisa ukuba lo mqondiso unentsingiselo yaye ubalulekile nakuwe.—Bona ibhokisi ekwiphepha 6.

“Utshintsho Olwaluchaza Ixesha Elithile”

“Uhlanga luya kuvukelana nohlanga nobukumkani buvukelane nobukumkani.” (Mateyu 24:7) Iphephandaba laseJamani iDer Spiegel lithi, ngaphambi kowe-1914 abantu “babekhangele phambili kwikamva ngethemba lokuba baza kukhululeka, baphumelele baze babe zizityebi.” Emva koko kwatshintsha yonke into. Iphephancwadi iGEO lithi: “Imfazwe eyaqalisa ngoAgasti 1914 yaza yaphela ngoNovemba 1918 yaba sisihlandlo esikhwankqisayo. Yabangela utshintsho olukhulu kwimbali yoluntu.” Kwangquzulana amajoni angaphezu kwezigidi ezingama-60 awayevela kumazwekazi amahlanu. Ngokomlinganiselo kwakubulawa amajoni angama-6 000 ngemini. Ukususela ngoko, ababhali-mbali bazo zonke izizukulwana baye baphawula “owe-1914 ukusa kowe-1918 njengotshintsho olwaluchaza ixesha elithile.”

IMfazwe Yehlabathi I yabangela iingxaki eziliqela olusajamelene nazo uluntu nangoku kule nkqubo yezinto. Yonke loo nkulungwane iye yaba neemfazwe ezingakumbi, iingxwabangxwaba nabanqolobi. Izinto azikhange zibe bhetele ekuqaleni kwale nkulungwane. Ngaphandle kwemfazwe, ezinye iinkalo zomqondiso ziyabonakala.

Indlala, Iindyikitya Zokufa Neenyikima

“Kuya kubakho ukunqongophala kokutya.” (Mateyu 24:7) Indlala yagqugqisa kwelaseYurophu ebudeni bemfazwe yehlabathi yokuqala, yaye isababhuqa nanamhlanje abantu ukususela ngoko. Umbhali-mbali uAlan Bullock wabhala wathi ngowe-1933 eRashiya naseUkraine, “kwakukho imiqodi yabantu eyayiphethwe yindlala eyayizula edolophini . . . Kwakuzele izidumbu nje ecaleni kwendlela.” Ngowe-1943, uT. H. White oyintatheli wazibonela ngawakhe amehlo indlala kwiphondo lamaTshayina laseHenan. Wabhala: “Xa kukho indlala abantu bangatya nantoni na baze bakwazi ukufumana amandla. Umntu utya nento engatyiwayo xa esoyika ukufa.” Okubuhlungu kukuba, eAfrika indlala iye yaxhaphaka gqitha kutshanje. Nangona umhlaba uvelisa ukutya okwaneleyo kwabantu bonke iUN Food and Agriculture Organization iqikelela ukuba abantu abazizigidi ezingama-840 emhlabeni wonke abanakutya kwaneleyo.

‘Iindyikitya zokufa kwiindawo ngeendawo.’ (Luka 21:11) ISüddeutsche Zeitung ithi: “Kuqikelelwa ukuba umbathalala wabulala abantu abaphakathi kwezigidi ezingama-20 ukusa kwezingama-50 ngowe-1918, ngaphezu kobhubhani okanye imfazwe yehlabathi yokuqala.” Ukususela ngoko, abantu abaninzi baye bahlaselwa zizifo ezinjengemalariya, ingqakaqha, isifo sephepha, ipoliyo nekholera. Nehlabathi limangaliswe kukubona indlela asasazeke ngayo uGawulayo. Ngoku sididekile ngenxa yezifo ezixhaphakileyo nangona kukho inkqubela emangalisayo kwezamayeza. Ezi ngxaki zisinceda sibone amaxesha angaqhelekanga esiphila kuwo.

‘Iinyikima.’ (Mateyu 24:7) Kule minyaka ili-100 idluleyo, iinyikima ziye zabulala abantu abangamakhulu amawaka. Ngokutsho komnye umthombo, iinyikima ezinamandla okonakalisa izakhiwo zize ziwucande phakathi umhlaba ziye zamalunga ne-18 ngonyaka ukususela ngowe-1914. Ezinye iinyikima ezibulalayo, ezinamandla ngakumbi okutshabalalisa izakhiwo ziye zabakho kanye ngonyaka. Nakuba kukho inkqubela kwezobugcisa, inani lokufa kwabantu lihlala liphezulu ngenxa yokuba izixeko ezininzi ezinabantu abaninzi zakhiwa kwiindawo ezithandwa yinyikima.

Iindaba Ezimnandi!

Iinkalo ezininzi zemiqondiso yemihla yokugqibela ziyaxhalabisa. Kodwa uYesu wathetha nangeendaba ezimnandi.

“Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga.” (Mateyu 24:14) Umsebenzi owaqaliswa nguYesu—wokushumayela iindaba ezilungileyo zoBukumkani—wawuza kufikelela incopho ngemihla yokugqibela. Bekusenzeka kanye oko. AmaNgqina kaYehova ashumayela isigidimi seBhayibhile yaye afundisa abantu ngokuzithandela ukuba baqhelisele oko bakufundayo ebomini babo. Sithethanje kukho amaNgqina angaphezu kwezigidi ezithandathu ashumayela kumazwe angama-235 nangeelwimi ezingaphezu kwama-400.

Phawula ukuba uYesu akazange athi eminye imisebenzi yemihla ngemihla ayinakwenziwa ngenxa yeemeko ezixhalabisayo zehlabathi. Kwakhona akazange athi lonke ihlabathi laliza kugutyungelwa yinkalo enye yalo mqondiso. Kodwa wachaza izinto eziliqela ezaziza kuba ngumqondiso owawuza kubonwa naphi na emhlabeni.

Kunokuba ujonge izinto ezenzekayo ezimbalwa, ngaba uyawubona umqondiso oyintlanganisela emhlabeni wonke? Oko kwenzekayo kuchaphazela wena nentsapho yakho. Kodwa sisenokuzibuza, kutheni bembalwa kangaka abantu abanikel’ ingqalelo?

Izinto Endizithandayo Zibalulekile

“Musa Ukuqubha,” “Umbane Uyingozi,” “Thob’ Isantya.” Ezi zezinye zezilumkiso esizibonayo kodwa siyazityeshela. Ngoba? Siphazanyiswa lula yinto esicinga ukuba isilungele. Ngokomzekelo, sisenokuvakalelwa kukuba sifuna ukuqhuba ngesantya esingaphezu kweso sivunyelwa ngumthetho, okanye sibe nomnqweno wokuqubha kwiindawo esalelweyo kuzo. Kodwa ukutyeshela izilumkiso asibobulumko.

Ngokomzekelo, imfumba yekhephu ekwiintaba zeAlpine zaseOstriya, eFransi, eItali naseSwitzerland ibulala abakhenkethi abaninzi ngenxa yokuba bayayityeshela imiyalelo yokuba badlale umtyibilizi kwiindawo ezikhuselekileyo kuphela. Ngokutsho kweSüddeutsche Zeitung, abakhenkethi abaninzi abatyeshela izilumkiso ezinjalo bathi, Akubi mnandi xa kungekho ngozi. Okubuhlungu kukuba, ukutyeshela izilumkiso kunokuba nemiphumo ebuhlungu.

Banasiphi isizathu abantu sokungawuthobeli umqondiso ochazwe nguYesu? Basenokuba bamfanyekiswe kukunqwenela ukuba zizityebi, benziwe buthuntu kukungabi nazimvakalelo, abakwazi kufikelela kwisigqibo, baxakeke bubomi bemihla ngemihla, okanye kukoyika ukuphulukana nodumo. Ngaba enye yezi zinto ingakwenza utyeshele isilumkiso somqondiso wobukho bukaYesu? Ngaba ibingayi kuba bubulumko ukuwubona umqondiso uze wenze kanye oko kufunekayo?

Ubomi Kwiparadesi Esemhlabeni

Inani elikhulu labantu liyawuthobela umqondiso wobukho bukaYesu. UKristian, indoda etshatileyo yaseJamani uthi: “La ngamaxesha anzima. Ngokuqinisekileyo siphila ‘kwimihla yokugqibela.’” Yena nenkosikazi yakhe bachitha ixesha elininzi bethetha nabanye ngoBukumkani obungoMesiya. UFrank naye uhlala kwelo lizwe. Ekunye nenkosikazi yakhe bakhuthaza abanye ngeendaba ezilungileyo ezivela eBhayibhileni. UFrank uthi: “Abantu abaninzi namhlanje banomdla kwikamva ngenxa yendlela eliyiyo ihlabathi. Sizama ukubakhuthaza ngeziprofeto zeBhayibhile zeparadesi esemhlabeni.” Ngaloo ndlela uKristian noFrank bazalisekisa enye inkalo yomqondiso kaYesu—bashumayela iindaba ezilungileyo zoBukumkani.—Mateyu 24:14.

Xa imihla yokugqibela ifikelela kuvuthondaba, uYesu uya kuyitshayela yonke le nkqubo yezinto nabantu abayixhasayo. Emva koko kuya kulawula uBukumkani obungoMesiya apha emhlabeni, yaye lo mhlaba uya kuba yiParadesi njengoko kwakuchaziwe ngaphambili. Abantu abasayi kugula bengasayi kufa, yaye abantu abafileyo baya kuvuselwa ebomini apha emhlabeni. La ngamathemba avuyisayo alindelwe ngabo bawuqondayo umqondiso wamaxesha. Ngaba ibingayi kuba bubulumko ukufunda okungakumbi ngomqondiso noko simele sikwenze ukuze sisinde kule nkqubo yezinto? Ngokuqinisekileyo lo mbandela ungxamisekile kuye wonke umntu.—Yohane 17:3.

[Amagama acatshulweyo akwiphepha 4]

UYesu wachaza iziganeko ezininzi ezaziza kuthi xa zizonke zibe ngumqondiso oyintlanganisela owawuza kubonwa naphi na emhlabeni

[Amagama acatshulweyo akwiphepha 6]

Ngaba uyawubona umqondiso oyintlanganisela emhlabeni wonke?

[Ibhokisi/Imifanekiso ekwiphepha 6]

IINKALO EZICHAZA IMIHLA YOKUGQIBELA

Iimfazwe ezingathethekiyo.—Mateyu 24:7; ISityhilelo 6:4

Indlala.—Mateyu 24:7; ISityhilelo 6:5, 6, 8

Iindyikitya zokufa.—Luka 21:11; ISityhilelo 6:8

Ukwanda kolwaphulo-mthetho.—Mateyu 24:12

Iinyikima.—Mateyu 24:7

Amaxesha amanqam ekunzima ukujamelana nawo.—2 Timoti 3:1

Ukuthanda imali ngokugqithisileyo.—2 Timoti 3:2

Abangathobeli bazali.—2 Timoti 3:2

Abangenamsa wemvelo.—2 Timoti 3:3

Abathandi beziyolo kunokuba bathande uThixo.—2 Timoti 3:4

Abangenakuzeyisa.—2 Timoti 3:3

Abangathandi kulunga.—2 Timoti 3:3

Abanganikeli ngqalelo kwingozi.—Mateyu 24:39

Abagculeli ababugatyayo ubungqina bemihla yokugqibela.—2 Petros 3:3, 4

Ukushunyayelwa koBukumkani bukaThixo emhlabeni wonke.—Mateyu 24:14

[Inkcazelo Ngemifanekiso ekwiphepha 5]

WWI soldiers: From the book The World War—A Pictorial History, 1919; poor family: AP Photo/Aijaz Rahi; polio victim: © WHO/P. Virot