Izifundo Ezivela KwiZibhalo: Hoseya 1:1–14:9
UYehova UThixo Wethu Unenceba
UYEHOVA “unguThixo wokuxolela, ubabala, unemfesane, uzeka kade umsindo, umninzi ngenceba.” (Nehemiya 9:17) Ngemilinganiselo yakhe yobulungisa uyanyamezela kodwa umema abenzi bobubi ukuba baguquke baze banandiphe ulwalamano olulungileyo naye. Hayi indlela okwakuboniswe kakuhle ngayo oku ngoko uThixo wakuthetha kumaSirayeli aneenkani ngomprofeti wakhe uHoseya!
Incwadi yeBhayibhile ethiywe ngoHoseya yagqitywa ukubhalwa ngulo mprofeti kwisithili saseSamariya emva kwenkonzo yakhe ende yeminyaka emalunga nama-59 (ukususela malunga nama-804 B.C.E. ukuya emva kwama-745 B.C.E.). UHoseya waprofeta kubukumkani bezizwe ezilishumi zakwaSirayeli ngemihla kaKumkani uYerobhoham II neyabalawuli bakwaYuda u-Uziya, uYotam, uAhazi noHezekiya. (Hoseya 1:1) Ngenxa yokuba uSirayeli wazityeshelayo izibongozo zokuba aguquke, olu hlanga lwawela kuma-Asiriya, ibe isixeko salo esilikomkhulu, iSamariya, satshatyalaliswa ngowama-740 B.C.E. Nangona isiprofeto sikaHoseya sasalathiselwe kubantu beenkulungwane ezadlulayo, siqulethe izifundo ezilungele thina mayela nenceba kaThixo wethu, uYehova.
Indlela Yeenkani KaSirayeli
UYehova ubonakalisa inceba ngenxa yenguquko yomoni esuka entliziyweni evakalelwayo. (INdumiso 51:17; IMizekeliso 28:13) Ukukulungela kukaThixo ukubonakalisa inceba kuSirayeli kwaboniswa kwiinkqubano zikaHoseya nomkakhe uGomere. Njengoko wayalelwayo, wathabatha “umfazi wobuhenyu.” Emva kokuba ezalele uHoseya umntwana omnye, kuyabonakala ukuba uGomere wazala abantwana ababini ngokukrexeza. Ukanti, lo mprofeti ngenceba wamthabathela kwakuye umkakhe. Ngokufanayo, uSirayeli wayenjengomfazi ongathembekanga kuYehova, ethandaza kuthixo wobuxoki uBhahali. Kodwa uYehova wayekulungele ukubonakalisa inceba kuye ukuba wayeguquka ekukrexezeni kwakhe ngokomoya.—1:1–3:5.
Aboni abanqwenela ukwenzelwa inceba nguThixo bamele babuye kwikhondo labo lesono baze benze ngokuvisisana nokwazi uThixo. (INdumiso 119:59, 66, 67) UYehova wayebambene nabemi bakwaSirayeli ngenxa yenyaniso, inceba yaye ukwazi uThixo kwakungekho kwilizwe labo. Ekubeni babekuchasile ukwazi, uYehova wayeza kubachasa naye. Kwakuza kubakho isihlandlo sokuba kwenziwe izinto ngokwemilinganiselo neenkqubo kuSirayeli noYuda onqula izithixo. Kodwa kwaxelwa kwangaphambili ukuba ezi ntlanga zaziza kufuna uThixo xa zazizifumanisa ‘zisekubandezelekeni.’—4:1–5:15.
Ukuvuna Umoya Woqhwithela!
Imisebenzi efanele inguquko ibalulekile ukuba abenzi bokubi baza kwenzelwa inceba nguThixo. (IZenzo 26:20) UHoseya wabongoza, ‘Masibuyele kuYehova.’ Kodwa inceba eyayisenzelwa uSirayeli (obizwa ngokuba nguEfrayim ngenxa yesizwe sakhe esiyintloko) nakuYuda ‘yayinjengombethe ophela kwakusasa.’ Abantu babewugqithile umnqophiso kaThixo ibe bengavelisi ziqhamo zifanele inguquko. ‘Njengevukuthu elimathileyo, elingenantliziyo,’ bafuna uncedo kwiYiputa neAsiriya. Kodwa ezi ndlela zobupolitika bazisebenzisayo zazingayi kubenzela nto ilunge ngakumbi ‘kunesaphetha esityeketyeke’ esingakwazi ukutola ixhoba ngeentolo.—6:1–7:16.
Ukuze bavune okulungileyo, abo bafuna inceba kaYehova bamele bahlwayele okulungileyo. (Galati 6:7, 8) Ngenxa yokuba amaSirayeli akutyeshelayo okulungileyo, avuna okubi. ‘Ayehlwayele umoya ibe ayeza kuvuna isaqhwithi.’ UThixo wayeza ‘kuzivelela izono zawo,’ ibe ayengayi kuvuna inceba yakhe kodwa umgwebo wakhe oqatha. Ayeza “kuphalaphala ezintlangeni,” ekunokwenzeka ukuba uloyiso lwama-Asiriya lwafak’ isandla kule meko.—8:1–9:17; Duteronomi 28:64, 65; 2 Kumkani 15:29; 17:1-6, 22, 23; 18:9-12; 1 Kronike 5:26.
Siya kuhlala singenelwa kwinceba kaThixo kuphela ukuba siqhubeka sizixabisa izinto ezingcwele. (Hebhere 12:14-16) AmaSirayeli asilela ukubonakalisa uxabiso olunjalo. Kunokuhlwayela imbewu yobulungisa aze ngokuvisisana nayo avune inceba, ahlwayela ububi aza avuna okungekuhle. UThixo wamkhupha uSirayeli eYiputa njengonyana, kodwa uthando Lwakhe lwabuyiselwa ngenkohliso. UYehova wamluleka, “Buyela kuThixo wakho; gcina inceba nokusesikweni.” Kodwa uEfrayim wabandakanyeka ekwenzeni okubi ngokugqithiseleyo waza wafanelwa ngumgwebo kunenceba.—10:1–12:14.
Buyela KuYehova
Kwanabo bona ngokunzulu banokubuyela kuYehova baze benzelwe inceba. (INdumiso 145:8, 9) Kwakhona uHoseya wathetha ngendlela uThixo awabonakalisa ngayo inkathalo enothando ngamaSirayeli. Nakubeni olu hlanga lwamvukelayo uYehova, waluthembisa ukuba lwalunokubuyela kuye, esithi: ‘Ndiya kubakhulula kwelabafileyo, ndibahlawulele ndibakhulule ekufeni.’ ISamariya (uSirayeli) kwakufuneka ifumane isohlwayo ngokuvukela. Kodwa amaSirayeli abongozwa ukubuyela kuThixo ngamazwi amahle athi, ‘iinkunzi zenkomo ezintsha zemilomo.’ Esi siprofeto saqukumbela ngembono ethuthuzelayo yokuba osisilumko nolilungisa ohamba ngeendlela zikaYehova zobulungisa wayeza kunandipha inceba nothando lwakhe.—13:1–14:9.
Izifundo zokukhunjulwa: UYehova umenzela inceba umoni xa eguquka ngokusuka entliziyweni. Kodwa aboni abanqwenela ukwenzelwa inceba nguye bamele benze ngokuvisisana nolwazi lukaThixo baze bavelise imisebenzi efanele inguquko. Kufuneka bahlwayele okulungileyo ibe bamele baqhubeke bebonakalisa uxabiso ngezinto ezingcwele. Ibe lunokuzisa intuthuzelo ulwazi lokuba kwanabo bona ngokunzulu banokubuyela koseNyangweni benethemba, kuba uYehova uThixo wethu unenceba.
[Ibhokisi ekwiphepha 14]
UKUHLOLISISWA KWEENDINYANA ZEBHAYIBHILE
○ 2:21-23—UYerezeli uthetha ukuba “UThixo Uya Kuhlwayela Imbewu.” UYehova wayeya kuhlanganisa intsalela ethembekileyo aze ayihlwayele njengembewu kwaYuda, apho kuya kubakho ingqolowa, iwayini entsha neoli. Ngenxa yentsalela esweleyo, ezi zinto zilungileyo zaziya kucela umhlaba ukuba ukhuphe iityuwa zawo zokondla iindiza zengqolowa, imithi yeediliya nemithi yomnquma. Umhlaba wona wawuza kucela imvula emazulwini, ibe wona ayeya kucela kuThixo ukuba avelise amafu awayeza kunisa imvula efunekayo.
○ 5:1—Ababingeleli nookumkani ababengabawexuki bakwaSirayeli baba ngumgibe nomnatha ebantwini ukubabambisela ekubeni babandakanyeke kunqulo lobuxoki. Kunokwenzeka ukuba, iNtaba yaseTabhore (esentshona Yordan) neMizpa (isixeko esikwicala lasempuma lalo mlambo) zazingamaziko onqulo lobuxoki. Kulo lonke elakwaSirayeli, abantu babeqhelisela unqulo lwezithixo ngenxa yomzekelo ombi weenkokeli zabo, ezaziza kufumana umgwebo oqatha kaThixo.
○ 7:4-8—AmaSirayeli angabakrexezi afaniswa nesitovu somoji wezonka, okanye iziko lomlilo, ngokucacileyo ngenxa yeminqweno emibi eyayitshisa ngaphakathi kuwo. Ngenxa yokuxubana neentlanga ngokuhamba ngeendlela zazo nokufuna ukumanyana nazo, kwakhona uEfrayim (uSirayeli) wayenjengeqebengwana lesonka elingaguqulwanga.
○ 9:10—AmaSirayeli ‘azahlulela entweni ezintloni’ xa athi anamathela kuBhahali-pehore kumathafa akwaMowabhi. (Numeri 25:1-5) UHoseya wasebenzisa isenzi sesiHebhere esithetha “ukuzibuyisela; ukuzahlulela.” AmaSirayeli ayezahlulele kuThixo kodwa ezahlulele nakuBhahali-pehore. Eso siganeko sisenokuba sabhalwa ngenxa yokuba unqulo lukaBhahali lwalusisono esikhulu kobo bukumkani bezizwe ezilishumi. (Hoseya 2:8, 13) Ngamana singasithobela esi silumkiso size singaze siluqhawule ulwalamano lokuzahlulela kwethu kuYehova.—1 Korinte 10:8, 11.
○ 10:5—IBeth-aven (ethetha “Indlu Yeentlungu”) yayisetyenziswa ngengqiqo egxekayo engayifanelanga iBheteli, ethetha “Indlu KaThixo.” IBheteli yayiyindlu kaThixo kodwa yaba yindlu yobuhlungu ngenxa yokunqulwa kwethole okwakuqheliselwa apho. (1 Kumkani 12:28-30) Xa esi sithixo silithole sasisiwa kwilizwe lokuthinjwa, abantu babeya kutyhwatyhwa nokuba sasikho. Eso sithixo singaphiliyo sasingenakuzikhusela, kungasathethwa ke ngokukhusela abo babesinqula.—INdumiso 115:4-8.
○ 13:14—UYehova wayengenakuwasindisa amaSirayeli awayenemvukelo ngokuwahlangula ngelo xesha kumandla elabafileyo okanye awasindise ekufeni. Wayengenakuwenzela imfesane, ngenxa yokuba ayengayifanelanga inceba. Kodwa umpostile uPawulos wabonisa ukuba uThixo wayeya kuthi ekugqibeleni akuginye ukufa ngonaphakade aze abhangise uloyiso lwako. UYehova wabonisa amandla akhe okwenjenjalo ngokuvusa uYesu Kristu ekufeni nakwelabafileyo, ngaloo ndlela enikela isiqinisekiso sokuba abantu abakwinkumbulo kaThixo baya kuvuswa nguNyana wakhe phantsi kolawulo loBukumkani.—Yohane 5:28, 29.