Umtshato Ozisa Iingenelo Kwizigidi Eziphilayo Ngoku
‘INkosi uThixo uSomandla inguKumkani. Masiyizukise; ngokuba ufikile umsitho weMvana, umfazi wayo uzilungisile.’—ISITYHILELO 19:6, 7.
1. Iya kuqaliswa nini ukuvunywa ingoma yesiprofeto yeSityhilelo 19:6-8, ibe kutheni kunjalo nje?
LA MAZWI achwayitisayo ayila inxalenye yengoma yoloyiso yesiprofeto. Iya kuqaliswa nini ukuvunywa? Emva kokutshatyalaliswa kotshaba lonqulo lukaYehova oluneminyaka emininzi lukho—“iBhabhiloni Enkulu,” “ihenyukazi elikhulu” lokomfuziselo elimela zonke iindidi zonqulo lobuxoki. Limele ligwetywe ngenxa yendlela eliye lammela kakubi ngayo uThixo. Hayi indlela eliye lalulahlekisa ngayo uluntu ngokubandakanyeka kwalo kwezobupolitika, ukubawela kwalo izinto eziphathekayo nokuthiya kwalo abanquli bokwenyaniso bakaYehova ngokokude libabulale!—ISityhilelo 17:1-6, NW; ISi 18:23, 24; 19:1, 2; Yakobi 4:4.
2. (a) UYehova uya kuyizisa njani intshabalalo kwiBhabhiloni Enkulu? (b) Endaweni yokudumisa uYehova, yintoni abaya kuyenza abatshabalalisi bonqulo lobuxoki?
2 Kungekudala, uYehova uya kubangela ukuba iinkokeli zehlabathi zobupolitika zicinge ngokulutshabalalisa. (ISityhilelo 17:12, 16, 17) Kodwa abatshabalalisi bonqulo lobuxoki abayi kuthelela ekuvumeni ingoma yoloyiso oluzukileyo. Endaweni yoko, phantsi kwempembelelo kaSathana, obizwa ngenye indlela ngokuba nguGogi, baya kuhlasela abo baqhelisela unqulo lokwenyaniso, abahleli ngoxolo nabazigcine bahlukile kubungendawo beli hlabathi.—Isaya 2:2-4; Hezekile 38:2, 8-12; Yohane 17:14; Yakobi 1:27.
3. Kungenxa yaziphi izizathu le nto abakhonzi bakaYehova abangabantu beya kuthelela kwingoma yasemazulwini?
3 Olu hlaselo lokudelel’ uThixo olwenziwa ngabalawuli bezobupolitika luya kuphumela kwidabi leArmagedon, eliya kuziphelisa ngokupheleleyo iintlanga ezinxamnye nonqulo. Ngokulandelayo, impembelelo engendawo kaSathana needemon zakhe iya kupheliswa emhlabeni. (ISityhilelo 16:14, 16; 19:11-21; 20:1, 2) Beneentliziyo ezizele ngumbulelo, bonke abantu abasindileyo baya kuthelela ekuvumeni le ngoma yasemazulwini: “Haleluya! ngokuba iNkosi uThixo uSomandla inguKumkani.” (ISityhilelo 19:6) Eneneni, iziganeko ezigungqisa ihlabathi ezinjalo ziya kuba ngumqondiso wokuqalisa kwelinye ixesha elitsha. UYehova uya kube eluthethelele ulongamo lwakhe ibe ebashenxisile emhlabeni bonke abacel’ umngeni ulawulo lwakhe. Ekugqibeleni kuya kube kufike ixesha lomtshato wasemazulwini. Kunjengokuba ingoma yesiprofeto ihlabela mgama isithi: “Masivuye sigcobe, [simzukise uYehova] ngokuba ufikile umsitho weMvana, umfazi wayo uzilungisile.”—ISityhilelo 19:7, 8.
4. (a) Ngoobani abafanekiselwa yiMvana ‘nomfazi’ wayo? (b) Yiyiphi imibuzo ebuzwayo apha, ibe sinokuzifumana njani iimpendulo?
4 IMvana nguYesu Kristu ozukisiweyo, yaye “umfazi” wayo ngabalandeli abathanjisiweyo nabathembekileyo abalinani elipheleleyo elili-144 000 abathe ngoku bamanyana kunye nayo ezulwini. Ewonke la maqabane omtshato wasezulwini abumba amalungu apheleleyo oBukumkani bukaThixo, obuya kwenza uluntu, kuquka abobe bevusiwe ukuba lufikelele emfezekweni. (ISityhilelo 5:8-10; 14:1-4; 20:4, 12, 13; 21:3-5, 9, 10; 22:1-3) Ngaba iziganeko ezikhokelela kuloo mtshato usikelelekileyo ziya kuba nempumelelo? Unokungenelwa njani kuloo mtshato? Ukuze ufumane iimpendulo kuloo mibuzo, makhe sihlolisise iziganeko ezenzeka ngethuba lokutshata kukaIsake, njengoko zibhalwe kwiGenesis isahluko 24.
Umtshakazi KaIsake Awayemkhethelwe NguThixo
5, 6. Kwakutheni ukuze uAbraham azingise kwelokuba uIsake angatshati nomKanan, ibe oku kulukhokelo olufanelekileyo koobani namhlanje? (1 Korinte 7:39)
5 Ingxelo iqalisa ngoAbraham enikela imiyalelo kumkhonzi olawula izinto zendlu yakhe, ngokucacileyo uEliyezere. (Genesis 15:2; 24:2) UAbraham wathi, “Ndikufungise uYehova ukuba akuyi kumzekela unyana wam umfazi ezintombini zamaKanan endihleli phakathi kwawo; ukuba woya ezweni lakowethu, nakwelokuzalwa kwam, umzekele unyana wam uIsake umfazi.”—Genesis 24:3, 4.
6 Kwakutheni ukuze uAbraham azingise kangaka kwelokuba unyana wakhe wayengafanele atshate nomKanan? Kungenxa yokuba amaKanan ayeyinzala kaKanan, owayeqalekiswe nguNowa. (Genesis 9:25) Ngaphezu koko, amaKanan ayesaziwa ngezenzo zawo ezibheke ecaleni, yaye okona kubalulekileyo kukuba, ayengamnquli uYehova. (Genesis 13:13; Levitikus 18:3, 17-28) Kuyaqondakala ukuba, uAbraham wayefuna ukuba unyana wakhe atshate uthile wentsapho yakowabo, wenzala kaShem, owafumana intsikelelo ephefumlelweyo kaNowa. (Genesis 9:26) Olunjani lona ukuba luhle ukhokelo okululo oku kumaKristu akhetha ukutshata namhlanje!—Duteronomi 7:3, 4.
7. UAbraham wamlungiselela njani uEliyezere isabelo sakhe?
7 Ngoko uEliyezere waqalisa uhambo lomgama ongaphezu kweekhilomitha ezingama-800 ukuya kwelakwa-Aram. Wahamba ezilungiselele kakuhle, eneenkamela ezilishumi ezazithwele izipho. (Genesis 24:10) Ukongezelela koku, waphonononga la mazwi omeleza ukholo enkosi yakhe: “UYehova uThixo wamazulu . . . wosithuma isithunywa sakhe phambi kwakho, umzekele umfazi unyana wam khona.”—Genesis 24:7.
8, 9. (a) Kwenzeka ntoni xa uEliyezere wafikayo kumzi kaNahore? (b) Kungaluphi uvavanyo awayeya kukhethwa ngalo umtshakazi ofanelekileyo?
8 Ekugqibeleni, wafika emzini kaNahore kumntla welakwa-Aram. UEliyezere waziyeka iinkamela ezazidiniwe zaguqa ukuze ziphumle equleni ngaphandle komzi. Kwakusemini ngethuba laxa iintombi zazisikha amanzi—eneneni, kwakulithuba elifanelekileyo lokuba uEliyezere akhangele leyo kwakunokwenzeka ukuba ibe ngumtshakazi! Kodwa kwakufanele kube luhlobo olunjani lwentombi? Ngaba kwakufanele kube yeyona iyimbelukazi? Akunjalo. Ngokuyintloko uEliyezere wayenomdla kwintombi eyayinobuntu bokuhlonela uThixo. Oku kwatyhilwa ngumthandazo wokuzithoba nowokholo awathi wawuvakalisa esithi: “Yehova, Thixo wenkosi yam uAbraham, mawundithamsanqele namhla, uyenzele inkosi yam uAbraham inceba. Yabona, ndimi ngasemthonjeni wamanzi; iintombi zabantu balo mzi ziyaphuma, ziza kukha amanzi. Ke intombi endothi kuyo, Khawuthobe umphanda wakho, ndisele; ize ithi, Sela, neenkamela zakho ndoziseza nazo; mayibe yiyo oyimisele umkhonzi wakho uIsake; ndazi mna ngoko, ukuba uyenzele inkosi yam inceba.”—Genesis 24:11-14.
9 Olo yayiluvavanyo ngokwenene. Ngokutsho kweThe New Encyclopœdia Britannica, inkamela enxanwe ngokugqithiseleyo inokusela ‘ama-95 eelitha zamanzi ngemizuzu elishumi.’ Kusenokwenzeka ukuba iinkamela zika-Abraham zazinganxanwanga kangako, kodwa ngokungathandabuzekiyo iintombi zelo xesha zazibazi ubungakanani bamanzi aselwa zezi zilwanyana. Ngokuqinisekileyo, kwakuya kufuneka intombi enobubele, engazingciyo, nekhuthele kakhulu ukuba ithi ngokuzithandela ikhelele amanzi iinkamela ezilishumi ezidiniweyo zaloo mntu ingamaziyo.
10, 11. (a) Yiyiphi indlela ephawulekayo awathi umthandazo kaEliyezere waphendulwa ngayo? (b) URebheka wazibonakalisa njani iimpawu ezazifuneka? (c) Wasabela njani uEliyezere?
10 Kwanangaphambi kokuba uEliyezere awugqibe umthandazo wakhe, waphendulwa, njengoko le ngxelo ibonisa: “Gqi uRebheka esiza, . . . intombi leyo ibe intle kunene imbonakalo, intombi eyintombi, engaziwanga ndoda; yehla, yeza emthonjeni, yawuzalisa umphanda wayo, yenyuka. Wagidima umkhonzi waya kuyikhawulela, wathi, Ndiphe ndisele intwana yamanzi emphandeni wakho. Yathi, Sela nkosi yam. Yakhawuleza, yawuhlisela esandleni umphanda wayo, yamseza. Yakugqiba ukumseza, yathi, Neenkamela zakho ndiya kuzikhelela, zide zigqibe ukusela. Yakhawuleza, yawugalela umphanda wayo emkhombeni wokuseza, yagidima yaya kukha futhi equleni, yazikhelela zonke iinkamela zakhe.”—Genesis 24:15-20.
11 UEliyezere ‘wathi nqa emangalisiwe’ njengoko wayebukele impendulo engummangaliso yomthandazo wakhe. Xa le ntombi inyulu nefanele kukunconywa yagqibayo, wayinika njengomvuzo ijikazi lempumlo legolide nezacholo ezibini zegolide zokufakwa ezingalweni waza wabuza wathi: “Uyintombi kabani na wena?” Ekufumaniseni ukuba yayingumtshana ongumzukulwana ka-Abraham, uEliyezere waqubuda kuYehova emnqula ngentlonelo, esithi: “Makabongwe uYehova, uThixo wenkosi yam uAbraham, ongayiyekelelanga inceba yakhe nenyaniso yakhe, imke enkosini yam: uthe ndisendleleni, uYehova wandikhokelela endlwini yabazalwana benkosi yam.”—Genesis 24:21-27.
12. Wasingathwa njani lo mcimbi kwikhaya likaRebheka?
12 Emaphikana, uRebheka wathi ngqee ukuya kuxelela intsapho yakowabo. Kamva, xa uyise kaRebheka nomntakwabo bazivela ngokuphuma ngqo kuEliyezere injongo yohambo lwakhe nendlela uYehova awayewuphendule ngayo umthandazo wakhe, bavuma ngaphandle kwamathandabuzo ukuba uRebheka ufanele abe ngumfazi kaIsake. “Kwathi, akuweva umkhonzi ka-Abraham amazwi abo, waqubuda emhlabeni kuYehova. Umkhonzi wavelisa impahla yesilivere, nempahla yegolide, nezambatho, wanika uRebheka; wanika umnakwabo nonina izinto ezinconywayo.”—Genesis 24:52, 53.
Intsabelo Yomtshakazi Neempelesi Zakhe
13. Ukhetho lukaYehova lwangqinwa njani njengolufanelekileyo?
13 URebheka walijonga njani ilungelo lokukhethwa nguThixo njengomtshakazi kaIsake? Ngosuku olulandelayo kwenzeka into eyatyhila iimvakalelo zakhe zokwenene zangaphakathi. Ekubeni uEliyezere wayeyifezile injongo yohambo lwakhe, wafuna ukubuyela kwinkosi yakhe ngaphandle kokulibazisa. Kodwa intsapho yakuloRebheka yafuna ukuba umtshakazi ahlale nabo ubuncinane iintsuku ezilishumi. Ngoko kwayekelwa kuRebheka ukuba agqibe enoba wayekulungele na ukuhamba ngoko nangoko. Wathi, “Ndohamba.” Ukuvuma ukushiya intsapho yakowabo ngoko nangoko nokuya kwilizwe elikude ukuze atshate nendoda awayengazange ayibone kwakuyimbonakaliso ebalaseleyo yokuba nokholo kulwalathiso lukaYehova. Oko kwangqina ukuba wayekhethwe ngokufanelekileyo.—Genesis 24:54-58.
14. (a) URebheka waphelekwa ngoobani? (b) Luhlobo luni lohambo ababejamelene nalo?
14 URebheka waphelekwa ngabathile kuhambo lwakhe. Kunjengokuba ingxelo ichaza: “URebheka nomthinjana wakhe, bakhwela ezinkameleni.” (Genesis 24:61) Ngoko ungcelele lweenkamela lwaqalisa uhambo oluyingozi lweekhilomitha ezingaphezu kwama-800 ukuya kummandla wasemzini. Incwadi ethi The Living World of Animals ithi, “umlinganiselo wesantya seenkamela ezithwele imithwalo umalunga neekhilomitha ezine ngeyure.” Ukuba iinkamela zika-Abraham zazihamba ngeso santya ngeeyure ezisibhozo ngosuku, makube zathabatha ngaphezu kweentsuku ezingama-25 ukufika apho zazisiya khona kwelasezantsi.
15. (a) Nguwuphi umzekelo omhle esiwubonayo kuEliyezere, kuRebheka nakwiimpelesi zakhe? (b) Yintoni le ngxelo eyifanekisela kwangaphambili?
15 UEliyezere, uRebheka nomthinjana oziimpelesi zakhe babethembele ngokupheleleyo kulwalathiso lukaYehova, nto leyo engumzekelo omhle kumaKristu namhlanje! (IMizekeliso 3:5, 6) Ukongezelela, le ngxelo isisiganeko esisisiprofeto esomeleza ukholo. Njengoko sibonile, uAbraham ufanekisela uYehova uThixo, owanikela ngoNyana wakhe amthandayo, uIsake Omkhulu, ukuze abantu abanesono babe nokuzuza ubomi obungunaphakade. (Yohane 3:16) Ukulungiselelwa komtshato kaIsake kwabakho kwixesha elithile emva kokuba esindiswe ekufeni kwisibingelelo sedini. Oku kwakusisiganeko esisisiprofeto sokulungiselelwa komtshato wasezulwini, okwaqaliswa ngokwenene emva kokuvuka kukaYesu.
Umtshato KaIsake Omkhulu
16. (a) Umkhonzi ka-Abraham uwufanekisela njani ngokufanelekileyo umoya kaThixo? (b) Nguwuphi umbuzo onokubuzwa ngokubhekisele kumoya nomtshakazi?
16 Igama likaEliyezere lithetha ukuba “UThixo Wam Ngumncedi.” Ngokwegama nangokwesenzo, uwufanekisela ngokufanelekileyo umoya oyingcwele ka-Abraham Omkhulu, uYehova uThixo, awawuthumela kweli lizwe likude, umhlaba wethu, ukuze unyule umtshakazi ofanelekileyo kaIsake Omkhulu, uYesu Kristu. (Yohane 14:26; 15:26) Udidi lomtshakazi ‘libandla,’ elibunjwa ngabafundi bakaYesu abaye bazalwa ngomoya oyingcwele njengoonyana bakaThixo. (Efese 5:25-27; Roma 8:15-17) Kanye njengokuba uRebheka wafumana izipho zexabiso eliphezulu, ngoko amalungu okuqala ebandla lamaKristu afumana izipho ezingummangaliso ngosuku lwePentekoste yowama-33 C.E. ezingqina ukuba ayebiziwe nguThixo. (IZenzo 2:1-4) NjengoRebheka, aye akuvumela ukuluqhawula lonke ulwalamano lwehlabathi nolokwenyama ukuze athi ekugqibeleni amanyane noMyeni wawo wasezulwini. Ukususela kwixesha laxa amalungu ngamanye odidi lomtshakazi ebizwa ukusa ekufeni kwawo, amele azigcine enyulu ngokomoya ngoxa ephila kwihlabathi likaSathana eliyingozi nelihendayo. (Yohane 15:18, 19; 2 Korinte 11:3; Yakobi 4:4) Luzaliswe ngumoya oyingcwele, ngokuthembekileyo udidi lomtshakazi lumema abanye ukuba babe nesabelo kwilungiselelo likaYehova losindiso. (ISityhilelo 22:17) Ngaba uyawuxelisa umzekelo walo ngokuthi nawe usabele ekwalathisweni ngumoya?
17. (a) Zifanekisela ntoni iinkamela ezilishumi? (b) Sifanele sibe njani isimo sethu sengqondo ngokubhekisele kwiBhayibhile nakwiimpapasho ezisekelwe eBhayibhileni ezilungiselelwa ludidi lomtshakazi? (IZenzo 17:11)
17 Udidi lomtshakazi lukuxabisa ngomlinganiselo ophakamileyo oko kufanekiselwa ziinkamela ezilishumi. EBhayibhileni inani leshumi lisetyenziselwa ukubonisa ukugqibelela okanye ukuphelela kwezinto zasemhlabeni. Iinkamela ezilishumi zisenokufaniswa nokuphelela kwanokugqibelela kweLizwi likaThixo, oluthi ngalo udidi lomtshakazi lufumane isixhaso sokomoya nezipho zokomoya. (Yohane 17:17; Efese 1:13, 14; 1 Yohane 2:5) Igqabaza ngokuseza kukaRebheka iinkamela, IMboniselo (yesiNgesi) kaNovemba 1, 1948, yathi ngodidi lomtshakazi: “Luliqwalasela ngokunothando iLizwi likaThixo eliluxhobisa ngomoya wakhe ongakumbi. Lunomdla kwiLizwi lakhe elibhaliweyo, lilisebenzisa yaye lilihlaziya ngokulifundisisa nangokubonakalisa inkxalabo enyanisekileyo ngesigidimi nenjongo yalo, lufuna ukulikholelwa.” Njengomzekelo woku, intsalela yodidi lomtshakazi iye ngokunothando yabangela ukuba izigidi zifumane iNew World Translation of the Holy Scriptures ehlaziyiweyo nesexesheni. Enoba le nguqulelo ifanelekileyo iyafumaneka na ngolwimi lwakho okanye akunjalo, ngaba uyalubonakalisa uxabiso ngokuyihlolisisa ngokuthe rhoqo iBhayibhile kunye namancedo okufundisisa alungiselelwa ludidi lomtshakazi?—2 Timoti 3:16.
Umtshato WeMvana Uyasondela
18. Kutheni le nto iimpelesi zikaRebheka ziwafanekisela ngokufanelekileyo amaqabane omtshakazi namhlanje?
18 Kule mihla yokugqibela yehlabathi likaSathana, intsalela yodidi lomtshakazi iye yathelelwa ‘sisihlwele esikhulu,’ esifaniswa “nomthinjana” kaRebheka. Njengakwimeko kaRebheka, aba balinani elingaphezulu lee kwinani elipheleleyo lodidi lomtshakazi elili-144 000. ‘Basisihlwele esikhulu’ ‘sezinye izimvu’ zikaYesu Kristu. (ISityhilelo 7:4, 9; Yohane 10:16) Njengeempelesi ezinyanisekileyo zomtshakazi, nabo bamele bazigcine bekude nokungcoliswa lihlabathi elingendawo likaSathana. Kwakhona bamele basabele kukhokelo lomoya kaYehova nolweLizwi lakhe njengoko beluchazelwa ludidi lomtshakazi. Kodwa umvuzo wabo wahlukile. Ukuba bayanyamezela ekumxhaseni ngokunyanisekileyo umtshakazi kaKristu, baya kusinda ekuphelisweni kwehlabathi likaSathana baze babe nethuba elimangalisayo lokuphila ngonaphakade kwiparadisi yasemhlabeni.—ISityhilelo 21:3, 4.
19. Kwenzeka ntoni xa uRebheka neempelesi zakhe bafikelela kwisiphelo sohambo lwabo?
19 Ngaba uRebheka “nomthinjana” wakhe balufikelela ngokunempumelelo usukelo lwabo? Ewe balufikelela. Kunjengokuba iBhayibhile inikela le ngxelo: “Waphuma uIsake, waya kucamngca entsimini, xa kuhlwayo; wawaphakamisa amehlo akhe, wabona nanzo iinkamela zisiza. URebheka wawaphakamisa amehlo akhe, wambona uIsake, waziphosa phantsi, wehla enkameleni.” Emva kokuba uEliyezere ebalise ngokuthunywa kwakhe okube nempumelelo, uIsake wamamkela uRebheka njengomfazi wakhe waza “wamthanda.”—Genesis 24:63-67.
20. Sisiphi isihlandlo sovuyo esifanekiselwa kwangaphambili ngumtshato kaIsake?
20 Ngokukwanjalo, injongo kaYehova ngokuphathelele umtshakazi kaKristu ayinakusilela. (Isaya 55:11) Kungekudala, yakuba iBhabhiloni Enkulu igwetyiwe yaza yatshatyalaliswa, abaseleyo bentsalela yomtshakazi baya kugqibezela uhambo lwabo. Kuya kube kufike ixesha lokuba bahlulwe kwiimpelesi ezingamaqabane abo baze bamanyane emtshatweni noIsake Omkhulu ezulwini. Esinjani sona ukuzuka isihlandlo sokuvuya kwendalo iphela ekuya kuba siso oko!—ISityhilelo 19:6-8.
21. Njengoko incopho yomtshato wasezulwini isondela, yintoni esifanele siyenze thina sonke?
21 Okwangoku, izigidi zizenza zisikeleleke ngokusabela kubulungiseleli bentsalela yomtshakazi enciphayo. Ngaphambi kokuba yonke iligqibe ikhondo layo lasemhlabeni ngokufa, ukutshatyalaliswa kobukhosi behlabathi bonqulo lobuxoki obunjengehenyukazi kuya kuphawula ukuqalisa ‘kwembandezelo enkulu ekungazange kubekho enjalo kwasekuqalekeni kwehlabathi.’ Ixesha eliseleyo lifutshane. Ukuba ufuna ukusinda, hayi indlela ekubaluleke ngayo ukuba ube nesabelo ekuphumezeni imiyalelo yobuthixo! (Mateyu 24:14, 21; Marko 13:10; Luka 21:15; Yohane 13:34) Imiyalelo enjalo isebenza ngokukhethekileyo kumaxesha ethu anomngcipheko. Ngoko, enoba ungowentsalela yomtshakazi okanye ‘ungowesihlwele esikhulu’ seempelesi zakhe, qhubeka uthobela uYehova nto leyo esa ekuzukisweni kwakhe nasekufumaneni kwakho ulonwabo lwanaphakade. Hayi indlela ekuya kuba kuhle ngayo ngesihlwele esikhulu, esele sichazwa njengabahlobo bakaThixo, ukuhlala siphila njengoko uYehova ‘esenza izinto zonke zibe ntsha’ nezigidi zifumana iingenelo zikanaphakade kumhlaba oyiparadisi!—ISityhilelo 21:5; 22:1, 2, 17.
Uyakhumbula Na?
◻ Ziziphi iziganeko ezichwayitisayo ezimele zenzeke kungekudala?
◻ Yintoni eqinisekisa ukuba umtshato wasezulwini uza kuphumelela ngokupheleleyo?
◻ Unokufaniswa nantoni uEliyezere neenkamela ezilishumi?
◻ Ngoobani namhlanje abafana noRebheka kunye neempelesi zakhe ezingumthinjana?
◻ Yintoni esiyifundayo kwiziganeko ezakhokelela kumtshato kaIsake?