Benza Ukuthanda KukaYehova

Ukufunela Uisake Umfazi

INDODA eseyikhulile eyayihleli ngasequleni yayidiniwe. Yona namaphakathi ayo bekunye neenkamela ezilishumi babehambe besuka kummandla waseBher-sheba besiya kumantla eMesopotamiya—umgama ongaphezu kweekhilomitha ezingama-800.a Ekufikeni kwabo apho babesiya khona, lo mhambi udiniweyo waphumla waza wacinga ngombandela onzima awayewuhambela. Yayingubani le ndoda, yaye kwakutheni ukuze ithabathe uhambo olunzima kangaka?

Le ndoda yayingumkhonzi ka-Abraham, “oyena mkhulu endlwini yakhe.” (Genesis 24:2) Nangona engabizwa ngagama kweli bali, kuyabonakala ukuba yayinguEliyezere, lowo uAbraham wakhe wamgqala ‘njengonyana wendlu yakhe’ owathetha ngaye njengowayeyakuba ‘yindlalifa yakhe.’ (Genesis 15:2, 3) Kakade ke, elo yayilixesha laxa uAbraham noSara babengenamntwana. Ngoku unyana wabo, uIsake, wayeneminyaka engama-40 ubudala, yaye nangona uEliyezere wayengaseyiyo eyona ndlalifa ka-Abraham, wayesengumkhonzi wakhe. Ngoko wavuma xa uAbraham wenza isicelo esinzima. Wacela ntoni?

Uthumo Olulucelomngeni

Ngomhla ka-Abraham umtshato wawungachaphazeli nje intsapho kuphela kodwa wawuchaphazela isizwe siphela, okanye oosolusapho. Ngoko ke kwakulisiko ukuba abazali babafunele iqabane abantwana babo. Noko ke, xa wayefunela unyana wakhe uIsake umfazi, uAbraham wajamelana nengxaki. Iindlela zokungahloneli Thixo zamaKanan asekuhlaleni zenza ukuba ingathi qatha nokuthi qatha ezingqondweni into yokutshata nomnye wawo. (Duteronomi 18:9-12) Yaye nangona kwakulisiko ukuba indoda itshate kwisizwe sayo kuphela, izalamane zika-Abraham zazihlala kumgama omalunga namakhulu eekhilomitha kumantla eMesopotamiya. Wayengenakumvumela uIsake ukuba aye kuhlala apho, kuba uYehova wamthembisa oku uAbraham: “Imbewu yakho ndiya kuyinika eli lizwe,” ilizwe laseKanana. (Genesis 24:7, akekeliswe sithi.) Ngenxa yoko, uAbraham wathi kuEliyezere: “Yiya ezweni lakowethu, nakwelokuzalwa kwam, umzekele unyana wam uIsake.”—Genesis 24:4.

Ekulugqibeni kwakhe olo hambo lude, uEliyezere waphumla ecaleni kwequla njengoko wayecamngca ngothumo lwakhe. Waqonda ukuba kungekudala amabhinqa ayeza kuza equleni eze kukha amanzi awayeza kusetyenziswa ebusuku. Ngoko wabongoza uYehova esithi: “Ke intombi endothi kuyo, khawuthobe umphanda wakho, ndisele; ize ithi, Sela, neenkamela zakho ndoziseza nazo: Mayibe yiyo oyimisela umkhonzi wakho uIsake; ndazi mna ngoko, ukuba uyenzele inkosi yam inceba.”—Genesis 24:14.

Ngoxa wayesathandaza, intombi entle kunene egama linguRebheka yeza. UEliyezere wathi kuyo: “Ndiphe ndisele intwana yamanzi emphandeni wakho.” URebheka wakwenza oko, yaye wathi: “Neenkamela zakho ndiya kuzikhelela, zide zigqibe ukusela.” Lo yayingumsebenzi ongelula, ekubeni inkamela enxaniweyo inokusela iilitha zamanzi ezingama-95 ngemizuzu nje elishumi! Enoba iinkamela zikaEliyezere zazinxaniwe okanye zazinganxanwanga, uRebheka umele ukuba wayesazi ukuba lo msebenzi wayelungele ukuwenza wawuza kuba nzima. Eneneni, ‘wakhawuleza, wagalela umphanda wakhe emkhombeni wokuseza, wagidima waya kukha futhi equleni, wazikhelela zonke iinkamela zakhe.’—Genesis 24:15-20.

Eqonda ukuba olu lulwalathiso lukaYehova, uEliyezere wanika uRebheka ijikazi lempumlo legolide nezacholo ezibini ezifakwa ezingalweni, ezixabisa malunga nama-R6 100 ngokwemali yanamhlanje. Xa uRebheka wamxelela ukuba ungumzukulwana kaNahore, umntakwabo Abraham, uEliyezere wathandaza ebulela uThixo. Wathi: “UYehova wandikhokelela endlwini yabazalwana benkosi yam.” (Genesis 24:22-27) UEliyezere wasiwa kwintsapho yakuloRebheka. Kungekudala, uRebheka waba ngumfazi kaIsake, yaye waba nelungelo lokuba ngukhokokazi kaMesiya, uYesu.

Esikufundayo Koku

UYehova wawusikelela umzamo kaEliyezere wokuthandaza ngokuzingisileyo ukuze amfumanele iqabane eloyika uThixo uIsake. Noko ke, khumbula ukuba umtshato kaIsake wawubandakanya injongo kaThixo yokuvelisa imbewu ngoAbraham. Ngoko le ngxelo ayimele isenze sicinge ukuba wonke umntu othandazela iqabane ngokuzenzekelayo uya kulinikwa. Sekunjalo, ukuba sibambelela kwimilinganiselo kaYehova, uya kusinika amandla ukuze sikwazi ukunyamezela iimvavanyo ezisifikelayo ebomini—enoba sitshatile okanye asitshatanga.—1 Korinte 7:8, 9, 28; thelekisa eyabaseFilipi 4:11-13.

UEliyezere kwakufuneka asebenze nzima ukuze enze izinto ngendlela kaYehova. Nathi sisenokufumanisa ukuba ukuphila ngokwemigaqo kaYehova akusoloko kulula. Ngokomzekelo, kusenokuba nzima ukufumana umsebenzi ongayi kukuthintela kumsebenzi wobuthixo, iqabane eloyika uThixo, izinxulumani ezakhayo, ukuzonwabisa okungathob’ isidima. (Mateyu 6:33; 1 Korinte 7:39; 15:33; Efese 4:17-19) Sekunjalo, uYehova unokubomeleza abo bangalalanisiyo kwimigaqo yeBhayibhile. IBhayibhile ithembisa oku: “Kholosa ngoYehova ngentliziyo yakho yonke, ungayami okwakho ukuqonda. Uze umazi yena ezindleleni zakho zonke; wowulungelelanisa umendo wakho.”—IMizekeliso 3:5, 6.

[Imibhalo esemazantsi]