Ngaba Ukulungele Ukuphulaphula UThixo?

XA SIFUNDA iBhayibhile, siqonda ngokukhawuleza ukuba imeko yabantu kwinkulungwane yokuqala yayifana ngeendlela ezininzi neyethu namhlanje. Kwakukho ukuziphatha okubi okuninzi nokunganyaniseki, ngokukodwa phakathi kwabamelwane bamaSirayeli ababezinikele eburheletyweni, apho ukuziphatha okubi kwakusoloko kuyinxalenye yonqulo. Amahlwempu ayebona nje kumana kusisa kusihlwa ephila, ibe kwakukho iingxaki zezobupolitika. Ngonyaka wama-66 C.E., elakwaSirayeli neRoma alwa imfazwe epheleleyo. Ngaloo mihla, abantu babefuna uncedo, njenganamhlanje.

Zininzi izinto olufana ngazo unqulo lwaloo mihla nolwemihla yethu. Iinkokeli zonqulo zamaYuda zazingabahanahanisi. (Mateyu 23:15; Luka 20:46, 47) Kwihlabathi labangengomaYuda, imeko yezonqulo yasusela ekubeni babe ngabagxeki ukuya kwinkolo ndawonye nemvakalelo eyeyempambano ngonqulo. (Thelekisa IZenzo 14:8-13; 19:27, 28.) Kwanakwibandla lamaKristu elitsha ngokwentelekiso, izinto zazingentle kwaphela. Ekupheleni kwaloo nkulungwane, umpostile uYohane walumkisa esithi: “Ngokuba kungene abalahlekisi abaninzi ehlabathini.” (2 Yohane 7) Ewe, kwamandulo phaya, amacebiso enkohliso ayenikelwa ngombandela wonqulo. Kanti uncedo olunokuthenjwa lwalukho.

Ngaba Ngewawumphulaphule UYesu?

UYesu wayengomnye owanikela icebiso elivakalayo ngaloo mihla. Lalinempembelelo kangangokuba sifunda oku ngemiphumo yalo: “Zakhwankqiswa iindimbane kukufundisa kwakhe.” (Mateyu 7:28) Kodwa bambalwa kwezo zihlwele abakuphulaphula ngokwenene oko uYesu wakuthethayo. UYesu wenza imimangaliso waza wamisela umzekelo omhle wokuphila ngekhondo lokuhlonel’ uThixo. Kanti, kwaneenkokeli ezazicingelwa ukuba zazifundile azizange zikubone ukuxabiseka koko uYesu wakuthethayo. Ngoba?

Ubukhulu becala kukuba, zazisenziwa likhethe. Zimbi zazimcaphukela uYesu kuba wayesuka eNazarete. Ezinye zazingamfuni kuba engazange aye kwizikolo zazo ibe wayengenalunxibelelwano nezo zodidi olwalulawula. (Yohane 1:46; 7:12, 15, 47, 48) Ngaphezu koko, uYesu wayengasoloko ethetha oko abantu babefuna ukukuva. Wayethetha inyaniso kuphela, ibe ngokomzekelo, abaFarisi babesoloko becatshukiswa ngamazwi akhe. (Mateyu 15:12-14) Enyanisweni, emva kokuba eshumayele iminyaka emithathu enesiqingatha, iinkokeli zonqulo zamaYuda zambulala. (Luka 23:20-35) Elinjani ilungelo azaziphosanisa nalo, ekubeni uYesu ‘wayenamazwi obomi obungunaphakade’!—Yohane 6:68.

Ukuba wawuhlala eYerusalem ngelo xesha, ngaba ngewawulandele iinkokeli zonqulo nesihlwele? Okanye ngaba ngowaba nengqondo ephangaleleyo ngokwaneleyo ukuze uqonde intsingiselo yamazwi kaYesu? Ukuba kunjalo, wawuya kuba njengomfazi ophawulekayo awathi uYesu wadibana naye ngoxa wayekumatyelelo akhe.

Omnye Owaphulaphulayo

Wadibana nalo mfazi ngoxa wayetyelela ukutyhubela iSamariya. Wahlala phantsi ngasequleni ukuze aphumle, ibe le ntokazi yeza kukha amanzi ngoxa wayelapho. Asilazi igama layo, kodwa iBhayibhile ibonisa ukuba uYesu phezu kwako nje ukudinwa kwakhe wasebenzisa eli thuba ukuthetha nayo ngonqulo.—Yohane 4:5-15.

Ngoku, kwakukho izizathu ezininzi ezazinokubangela ukuba le ntokazi ingaziphulaphuli izigidimi zikaYesu. Yayiyeyonqulu olwahlukileyo—indlela yokunqula yamaSamariya yayingafani neyamaYuda. Kwakhona, amaYuda ayewajongela phantsi amaSamariya ibe ayesala ukunxulumana nawo. Ibe, kwakhona, amadoda angamaYuda ayedla ngokungathethi namabhinqa asemzini. (Yohane 4:9, 27) Ngaphezu koko, yona le ntokazi yomSamariya yayiphila ubomi bokuziphatha okubi, ibe ngeyayiphethw’ emanyeni ukuba nje yayinokugxekwa okanye izono zayo zibhencwe.—Yohane 4:18.

Noko ke, leyo asiyondlela eyavakalelwa ngayo. Endaweni yoko, yabuza imibuzo esengqiqweni isabela kwisigidimi sikaYesu sobuchule nesasivus’ umdla. Njengokuba incoko yayiqhubeka, yangena kumbandela onzima, ithetha ngokwahluka konqulo okwakukho phakathi kwamaYuda namaSamariya. UYesu waphendula ngobubele kodwa ngokungqalileyo, eyixelela oku le ntokazi: “Nina ninqula eningakwaziyo; thina sinqula esikwaziyo.” (Yohane 4:19-22) Kodwa ayizange icaphuke. Ingqondo yayo ephangaleleyo yayikulungele ukuva okungakumbi.

Ngoko uYesu waqhubeka nesigidimi esibalulekileyo: “Kodwa kuza ilixa, nangoku selikho, xa abanquli abayinyaniso baya kumnqula uBawo ngoMoya nangenyaniso; kuba uBawo ufuna abanjalo ukumnqula. UThixo unguMoya; abo ke bamnqulayo bamelwe kukumnqula ngoMoya nangenyaniso.” (Yohane 4:23, 24) Kamva, le ntokazi inembono ephangaleleyo yabonakalisa uxabiso ngokuthi ngenzondelelo iye kuxelela abamelwane bayo oko yayikuvile. Nabo, bafumana inkcazelo engakumbi ngokuphulaphula kumazwi kaYesu.—Yohane 4:39-42.

Yintoni esinokuyifunda koku? Kaloku, ukuba sihlala kummandla apho kukho ikhethe lobuzwe okanye lonqulo, sisabela njani xa uthile wohlanga olwahlukileyo, isizwe okanye unqulo ethetha nathi? Ngaba sivala phezulu xa kuthethwa ngezinto ezisenokubonisa ukuphosakala koko sikwenzayo? Okanye ngaba, njengentokazi yomSamariya sikulungele ukuba ubuncinane sithethe?

Ngaba Ngewawumphulaphule UPawulos?

Omnye owanikela icebiso elihle ebudeni benkulungwane yokuqala yayingumpostile uPawulos. Ngasihlandlo sithile uPawulos naye wayenengqondo engaphangalelanga. Wavuma esithi: “Ngaphambili ndandingumnyelisi, nomtshutshisi, nomphathi kakubi; ndesuka ndenzelwa inceba, ngokuba ndakwenza oko ndingazi, ndisekungakholweni.” (1 Timoti 1:13) Phofu ke, wayamkela inyaniso engoYesu Kristu waze wahlukana nekhethe awayenalo. Umzekelo wakhe ubonisa ukuba iinyaniso zeBhayibhile zinokukunceda ‘uwise iinqaba’ entliziyweni ukuba izinto ezinjalo zonakalisa ukuma kwethu okuhle.—2 Korinte 10:4.

Akuba ngumKristu, uPawulos waqhubela phambili engafihlisi esasaza iindaba ezilungileyo awazifundayo. Ibe njengokuba bekuya kulindeleka oko, wadibana nohlobo olunye lwabantu abangqondo zingaphangalelanga awakhe walulo ngaphambili—kodwa kungekhona kuzo zonke iimeko. EBhereya, kumantla eGrisi, wafumana abantliziyo zilungileyo ababengumzekelo omhle wokuphulaphula icebiso. Aba bayiqonda inyaniso kumazwi kaPawulos. Ngenxa yoko, ‘balamkela ilizwi ngentumekelelo yonke.’ Kodwa babenengqondo ephangaleleyo, bengakhohliseki lula. ‘Babezincina iZibhalo imihla ngemihla, ukuba zingaba zinjalo yini na ezi zinto.’ (IZenzo 17:11) Bakuthanda oko bakuvayo ngaphambi kokuba bakwamkele ngokupheleleyo oko, nangona babesebenzisa iBhayibhile ukuhlolisisa ubunyaniso bako.

“Izinto Zonke Zicikideni”

Kumhla wethu, amaNgqina kaYehova achitha ixesha elininzi ezabalazela ukwabelana nabamelwane bawo abangabolunye unqulo ngeendaba ezilungileyo zoBukumkani. Afumana intsabelo enjani amaNgqina? Abantu abaninzi abanobubele bayakuvuyela ukuwamkela. Kodwa abaninzi abawamkeli, ibe bambi bade bacaphuke kuba amaNgqina ebatyelela.

Oku kulusizi, kuba oko amaNgqina kaYehova athetha ngako kubizwa ngokuba ‘ziindaba ezilungileyo’ eBhayibhileni. (Mateyu 24:14) Ngaphezu koko, akhuthaza isimo sengqondo umpostile uPawulos awayenaso, owathi: “Izinto zonke zicikideni, nibambe leyo intle.” (1 Tesalonika 5:21) Nokuba ubani weyisekile koko akukholelwayo, ngokuqinisekileyo, njengamaBhereya nentokazi yomSamariya, lowo ufanele abe nengqondo ephangalele ngokwaneleyo ukuthetha nabanye ngoThixo.

Kutheni Sifanele Sibe Nengqondo Ephangaleleyo?

Okuvuyisayo kukuba, amawaka ezigidi zabantu nyaka ngamnye enza kanye oko. Abaninzi bafunda ukuqonda ubulumko obuqulethwe yiBhayibhile, ibe umphumo ngowokwenene, iinguqulelo ezihlala zihleli kubomi babo. Bambi ngaphambili babefana noJanet, ibhinqa eliselula ekwakudala lisebenzisa kakubi iziyobisi neziselo ezinxilisayo ekwathi ekugqibeleni oko kwamqhubela ekubeni afune ukuzibulala. Namhlanje, uJanet ungumKristu owonwabileyo. Ukufunda kwakhe iBhayibhile kwamnceda ukuba afumane amandla okulandela isiluleko sikaPawulos esithi: “Masizihlambulule kuko konke ukudyobheka kwenyama nokomoya.”—2 Korinte 7:1.

UVernon wayelikhoboka lotywala, ibe umtshato wakhe wawusengozini yokuqhawuka. Kodwa ukulandela kwakhe icebiso leBhayibhile kwamenza wakwazi ukoyisa lo mkhwa mbi waza waphinda waxolelana nomfazi wakhe. (1 Korinte 6:11) UDebra wayeneemvakalelo ezinamandla zekhethe lobuzwe. Kodwa isifundo seBhayibhile nokunxulumana nabantu abangamaKristu kwamnceda ukuba ahlengahlengise kwindlela acinga ngayo. (IZenzo 10:34, 35) Ibe ngubani obenokukholelwa ngeenguqulelo ebeziya kwenzeka kubomi behenyukazi eliselula laseNetherlands xa, ngenye imini, lavuma ukufundisisa iBhayibhile namaNgqina kaYehova? Ngokukhawuleza, laba ngumKristu obhaptiziweyo ophila ubomi obucocekileyo nobanyamekela ngokunenkathalo abantwana bakhe.

Kusoloko kuthethwa ngokuphindaphindiweyo ngamava alolu hlobo njengoko abantu bephulaphula oko kuthethwa yiBhayibhile. Ubomi babo buyaphuculwa ngeendlela abaninzi babo babengacingi ukuba kunokwenzeka ngazo. Okubaluleke ngakumbi kukuba, baba nolwalamano olusondeleyo noThixo, ukuze babe nako ukuthandaza kuye ngokunyanisekileyo ‘njengoBawo wethu Osemazulwini.’ (Mateyu 6:9) Ibe baba nethemba eliqinisekileyo, nelingaxengaxengiyo lekamva njengokuba besiba namava obunyaniso bamazwi kaYesu athi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3.

Olu luhlobo lwenkcazelo amaNgqina kaYehova afuna ukuluxubusha xa ekubulungiseleli bawo aze atyelele abamelwane bawo. Ngokunokwenzeka, aza kukutyelela kwakhona kungekudala. Ngaba uya kuba nengqondo ephangalele ngokwaneleyo ukuze uwaphulaphule?

[Umfanekiso okwiphepha 7]

Intokazi yomSamariya ayizange ivumele ikhethe liyithintele ekuphula-phuleni uYesu. Ngaba nawe ngokufanayo unengqondo ephangaleleyo?