Abavakalisi BoBukumkani Bayabalisa
“Inyaniso Iya Kunikhulula”—Kwaye Izise Ulonwabo
EBRITANI, inyaniso yeBhayibhile iye yakhulula abantu abangaphezu kwe-113 000, ibe abangakumbi bayayamkela le nyaniso mihla le. Kuyinyaniso ukuba amazwi kaYesu ayazaliseka: “Naniya kuyazi inyaniso, yaye inyaniso iya kunikhulula.” (Yohane 8:32) Oku kukhululwa kuphumela kulonwabo, njengoko la mava alandelayo avela eBritani ebonisa.
◻ Iofisi yesebe ibalisa ukuba, ngoxa uPenny wayekubulungiseleli bendlu ngendlu, inenekazi elikhulileyo lamxelela ngendlela ekrwada lathi, “Ndixakekile.” UPenny waliphendula ngokuthi wayeya kulityelela kwakhona. Emva kweentsuku ezimbalwa, ngexesha awayengaqhelanga kutyelela ngalo, wayebuyela kwababengekho emakhaya yaye engaqondanga watyelela kwakulaa ndlu inye. Eli nenekazi likhulileyo lavula ucango laza lammemela ngaphakathi uPenny. Lathi, “Bendisazi ukuba uza kubuya, yaye bendikulindele.” Baxubusha ngethemba loBukumkani, yaye eli nenekazi lathi lalinethemba lokuba oku kwakuya kungqineka kuyinyaniso. Lalineminyaka engama-79 ubudala, ibe umyeni walo wayefe kwiminyaka emithathu ngaphambilana. Lalingazange lifumane ntuthuzelo kwicawa yalo ibe lalingaboni sizathu sakuphila. Lalifuna ukufa. Kamva, akuba uPenny eqalise isifundo seBhayibhile kunye nalo, laxelela uPenny ukuba lalizama ukuzibulala kodwa laye laqonda ukuba kwakuphosakele oko. Lalithandazile kuThixo ukuba alinike intuthuzelo aze alincede liphinde lifumane ithemba. Ngokuthe ngcembe, njengoko lalifundisisa, ukuphelelwa kwalo lithemba kwaguqukela ekubeni lithemba, linentembelo nombulelo onzulu kuYehova. Lazohlwaya ngokunxibelelana ithuba elide necawa, labhaptizwa linama-80 eminyaka ubudala, ibe ngoku lingumvakalisi othe rhoqo nonenzondelelo egqithiseleyo. Kuyinyaniso ukuba, inyaniso yeLizwi likaThixo iye yalikhulula yaza yalizisela ulonwabo olugqithiseleyo.
◻ Inyaniso engoBukumkani bukaThixo iyakhulula kumakhamandela onqulo lobuxoki. Kwakhona inokubuguqula ubuntu bukabani, ibe le nguqulelo ngokufuthi iyabachukumisa abanye ize ibancede ukuba bayibone inyaniso, njengoko la mava alandelayo ebonisa.
Ibhinqa eliselula lankqonkqoza emnyango kwindlu yeNgqina laza lacela ukuqhutyelwa isifundo seBhayibhile. Kwabangelwa yintoni oku? Abazali beli bhinqa babefundisisa iBhayibhile namaNgqina kaYehova, ibe umphumo oku okwaba nawo kubazali balo—ngokukodwa kuyise—wawucacile ibe wawuchukumisa gqitha kangangokuba le ntombazana ngokwenyaniso yayimangalisiwe. Uyise, owayetshaya imidiza engama-80 ngosuku, wakuyeka ngokupheleleyo ukutshaya xa yacaciswayo kuye into yokuba uYehova akakwamkeli. Kungabanga thuba lide emva koko wabuyisela kubaqeshi bakhe intlaninge yezinto awayezibile kubo ethubeni. Le ntombazana yavakalelwa kukuba nantoni na eyayichaphazele abazali bayo ngolo hlobo ngokuqinisekileyo kwakufuneka ukuba iqwalaselwe. Ngoku abazali babhaptiziwe, ibe le ntombazana iya kuzo zonke iintlanganiso.
Inyaniso uYesu awayivakalisayo izise ulonwabo kwaba bakhankanywe ngasentla nakwabanye abangenakubalwa. Inokwenza okufanayo kubo nabaphi na abamkela inyaniso yeBhayibhile baze bayisebenzise ebomini babo.—INdumiso 19:7, 8.