“Ndimelwe Kukuthini Na, Ukuze Ndisindiswe?”
“NDIMELWE kukuthini na, ukuze ndisindiswe?” Lo mbuzo wabuzwa emva phayaa ngonyaka wama-50 C.E. ngumgcini wamabanjwa waseFilipi, eMakedoni. Kwakusandul’ ukubakho inyikima enkulu, ibe zonke iingcango zentolongo zazivuleke genge phambi kwakhe. Ecinga ukuba amabanjwa ayesabile, lo mgcini wamabanjwa wayesele eza kuzibulala. Kodwa omnye wamabanjwa, umpostile uPawulos, wadanduluka wathi: “Ungazenzakalisi; kuba sikho sonke apha.”—IZenzo 16:25-30.
UPawulos nebanjwa elinguwabo, uSilas, babeze kushumayela isigidimi sosindiso eFilipi, ibe babesentolongweni ngenxa yezityholo zobuxoki abazibekwayo nxamnye nabo. Enombulelo omkhulu ngenxa yokuba amabanjwa engazange abaleke, umgcini wamabanjwa wafuna ukuva esi sigidimi sikaPawulos noSilas. Kwakuza kufuneka enze ntoni ukuze anandiphe iingenelo zosindiso olwalushunyayelwa ngala maKristu mabini angabavangeli basemazweni?
Namhlanje abantu basalufuna usindiso olwalushunyayelwa nguPawulos noSilas. Noko ke, okungonwabisiyo kukuba, abaninzi bawugqala lo mcimbi wokusindiswa njengothandabuzeka ngokunzulu. Batyhafiswa likratshi nakukunyoluka kwabahambi cawa abaninzi abathi babafundisa indlela yosindiso. Abanye bayahlehla kwiingcamango ezingekho ngqiqweni zeenkonzo ezininzi zobuvangeli ezigxininisa imbono yosindiso. Umhleli kalindixesha oliNgesi uPhilip Howard wathi abo bafane babizwe ngokuba ngabavangeli “baphembelela imvakalelo zabaphulaphuli ukuze banikele ngemali eninzi kunokuba baguqule iingqondo zabo.”—Thelekisa eyesi-2 kaPetros 2:2.
Sekunjalo abanye bothuswa ziinguqulelo ezithi maxa wambi zenzeke kwabanye abakholelwa kukuba bona ‘basindiswa.’ Kwincwadi yabo ethi Snapping, uFlo Conway noJim Siegelman baxubusha ngezinto ezininzi ezenzeka kunqulo—kuquka “umbandela wokusindiswa”—ezithe zaba ngundaba-mlonyeni kula mashumi ambalwa eminyaka edluleyo. Babhala ‘ngemeko engentle’ malunga nale meko baze bathi abantu “baqweqwediselwa” ukuba benze iinguqulelo zequbuliso kubuntu babo ezingababangeli bafumane ulwaneliseko nokhanyiselo oluthenjisiweyo kodwa kunoko zibangela udano, ukungaqiqi nokungakwazi ukujamelana nezinto zokwenene ebomini. Aba babhali balek’ umsundulo besithi: “Sinokuyichaza le nkqubo njengaleyo yokuyivala ingqondo neyokungacingi.”
Oko akuzange kube njalo ngexesha laxa amaKristu enkulungwane yokuqala athi afumana usindiso. Umgcini wamabanjwa waseFilipi akazange ‘ayivale ingqondo yakhe’ xa umpostile uPawulos waphendula umbuzo wakhe owawusithi, “Ndimelwe kukuthini na, ukuze ndisindiswe?” Ibe uPawulos noSilas abazange ‘baphembelele iimvakalelo zakhe’ baze bambongoze ukuba abanike isixa esikhulu somnikelo wemali. Kunoko, “balithetha kuye ilizwi leNkosi.” Beqiqa nale ndoda, bayinceda ukuba iwaqonde ngokucacileyo amalungiselelo kaThixo osindiso.—IZenzo 16:32.
“Kholwa Kuyo INkosi UYesu”
Loo maKristu angabavangeli basemazweni ayenza yaphangalala ingqondo yomgcini wamabanjwa kwinyaniso esisiseko engosindiso. Yayiyinyaniso ekwanye naleyo umpostile uPetros awayicacisayo xa kwasekwa okokuqala ibandla lamaKristu. UPawulos walatha kwindima eyintloko kaYesu Kristu kumbandela wosindiso, embiza ngokuba ‘yiMbangi yobomi.’ Kwakhona loo mpostile wathi: “Usindiso alukho kuwumbi; kuba akukho gama limbi phantsi kwezulu, linikiweyo phakathi kwabantu, esimele ukusindiswa ngalo.” (IZenzo 3:15; 4:12) UPawulos noSilas bamalathisela lo mgcini wamabanjwa waseFilipi kwakule Mbangi inye ukuze afumane usindiso xa bathi: “Kholwa kuyo iNkosi uYesu Kristu, wosindiswa.”—IZenzo 16:31.
Noko ke, kuthetha ukuthini ukukholwa kuyo iNkosi uYesu? Kutheni kungekho elinye igama ngaphandle kwelo likaYesu esinokusindiswa ngalo? Ngaba ekugqibeleni wonk’ ubani uya kulufumana olo sindiso? Ngaba abapostile bayikholelwa imbono yokuba “wakuba usindisiwe, uya kusoloko usindisiwe”? Le yimibuzo ebalulekileyo kuba, phezu kwaso nje isibakala sokuba amazwi nezenzo zabahambi cawa abaninzi banamhla ziye zatyekela ekukusingeleni phantsi ukubaluleka kweli binzana, thina sisalufuna usindiso. Sonke sifuna impendulo eyanelisayo nesengqiqweni kumbuzo othi: “Ndimelwe kukuthini na, ukuze ndisindiswe?”