Imibuzo Evela Kubafundi

◼ Izazinzulu zikholelwa ekubeni ezinye iinkwenkwezi ziyatsha okanye ziqhushumbe, ngoko kutheni le nto uIsaya 40:26 esithi “akusali [“akulahleki,” NW] nanye [inkwenkwezi]”?

Apha uYehova akachazi enoba ubangela iinkwenkwezi zithi shwaka kusini na. Ugxininisa ingongoma yobungakanani bobulumko namandla akhe.

Umprofeti uIsaya waphinda wavakalisa kuKumkani uHezekiya isilumkiso sikaThixo sokuba amaBhabhiloni ayeya kuthimba amaYuda. (Isaya 39:5-7) Ngaba amaBhabhiloni ayeya kukwazi ukugcina abantu bakaThixo kulo meko ngonaphakade? Hayi. UYehova akazange acebe nje ukubakhulula emva kweminyaka engama-70 kodwa wayeza kukwenza oko. Akukho nanye into eyayiza kumthintela Lowo ‘unokulinganisa amanzi esandleni sakhe aze alungise izulu ngomoluko weminwe.’ Kwakungayi kufuneka afune icebiso nakubani na, kuba “iintlanga zibalelwa ekubeni zinjengethontsi emphandeni” kuye. (Isaya 40:12-17) Ukuze abethelele amandla akhe angummangaliso, uYehova watsalela ingqalelo kumandla akhe abonakala kwindalo, awayethe uHezekiya wawabona kwixa elidluleyo. (Isaya 37:16, 17) UThixo wavakalisa oku:

“Niya kundifanisa nabani na, ndilingane naye? utsho oyiNgcwele. Phakamiselani amehlo enu phezulu, nibone: ngubani na owadala ezi zinto? Ngulokhupha umkhosi wazo ngamaqela, uzibiza zonke ziphela ngamagama, ngenxa yobukhulu bokomelela, ekhaliphile ngamandla; akusali [akulahleki] nanye.”—Isaya 40:25, 26.

Izazinzulu zithelekelela ukuba kukho amawaka ezigidi zeenkwenkwezi kuMnyele wethu Wezulu, yaye kukho iminyele emalunga nekhulu lamawaka ezigidi. Kanti, uThixo wazi inkwenkwezi nganye ngegama, igama layo nganye okanye isibizo esifana negama, mhlawumbi ngolwimi lobuthixo. Nguye olawula imeko yazo. Njengenjengele ekwaziyo ukuhlanganisa imikhosi, uYehova uyakwazi ukuzibiza iinkwenkwezi ukuze zihlangane. Ukuba uyakwenza oko, akukho nanye ‘enokuba yelahlekileyo.’ Eyazi imeko yenkwenkwezi nganye, nakubeni ezinye zazo zisuka zithi shwaka, akumangalisi oko kuLowo uyaziyo into eqhubekayo.—Thelekisa uIsaya 34:16.

Izazi ngeenkwenkwezi nezazinzulu ngezinto ezingaphiliyo zicinga ukuba iinkwenkwezi ziyatsha okanye ziqhushumbe. KwiRed Giants and White Dwarfs, uRobert Jastrow udlulisela ingcamango engendlela ekunokuba kwenzeka ngayo oku esithi: “Phakathi . . . enkwenkwezini kwenzeka ungcelele lweenkqubo ezithile zokungasebenzi ngendlela efanelekileyo kwamandla enyukliya, mandla lawo ekwathi ngawo kwaveliswa zonke ezinye iziqalelo zendalo iphela ngokusuka koyena thunywashe usisiseko, ihidrojini. Ekugqibeleni ezi nkqubo zamandla enyukliya ziyaphela, ize inkwenkwezi ithi shwaka. Ingasenawo umthombo wayo wamandla enyukliya, yaphelelwa bubunzima bayo, yaza emva kokuphelelwa yaqhushumba, isasaza emoyeni zonke izinto ezazidalelwe kuyo ngaphakathi ebudeni bobukho bayo.”

Kucingelwa ukuba ezinye iinkwenkwezi, ngokusebenzisa ihidrojini yazo, ziguqukela ekubeni zibe bomvu zize zibe nkulu emva koko zibe zizinto ezincinane okanye zibe ziinkwenkwezi ezidubulayo, ezinye zithi ekugqibeleni zibe ziinkwenkwezi ekuthiwa ziineutrons okanye, ngokwengcamango ethile kuthiwe ziiblack holes.

Ngoxa iinkcazelo ezinjalo zisamkeleka ngokubanzi, isigqibo ekufikelelwa kuso asikeviwa; kusenokufundwa okungakumbi. Ngokomzekelo, qwalasela ezi ngongoma zikwiThe New York Times kaJanuwari 24, 1989: “Izazinzulu zikholelwa ekubeni sele ziza kufumanisa izinto ezinkulu mayela nezinto ebezingaziwa ngendalo iphela, ithuba elinzima elisusela kwimizuzu emithathu emva kwexesha lokuqhushumba kwendalo kuse ekubonakaleni kweminyele emikhulukazi. . . . Zinobungqina obuncinane kangako obungqalileyo, izazinzulu ziye zadideka kakhulu ngokuqaleka kwale nto. UJames S. Trefil, osisazinzulu ngezinto ezingaphiliyo kwiYunivesithi iGeorge Mason yaseFairfax, Va., uye wabhala oku: ‘Ingxaki yokuchaza ubukho beminyele iye yangqineka iyenye yezona zinto zididayo kwizifundo ezingemvelaphi yendalo iphela. Ngokufanelekileyo, bekungafanele ukuba ikho, kanti ke nantsiya ikho.’”

Eli nqaku laxubusha ngoko kwakumele ukuba kwenzekile ebudeni “bemizuzu emithathu yokuqala,” njengoko kuchazwa nguGqr. John Mather, isazinzulu kwisebe lezifundo ngeenkwenkwezi. Kanti, sifunda oku: “UGqr. Mather, eqonda ukudideka okwakusanda kwalowo wayedlan’ indlebe naye, waphazamisa inkcazelo yakhe engengxelo yendalo eyamkelwa ngokubanzi ukuze athi, ‘Kakade ke, konke oku siyakucinga,’ nto leyo ethetha ukuba songezelela kwiingcamango ezisekelwe kwintelekelelo.”

Ewe, izazinzulu ezingabantu zisikelw’ umda kakhulu koko zikwazi ngenene noko zinokukwazi. Ngoko, hayi indlela okwahluke ngayo oku ngoMdali. Ngokuqinisekileyo sifanele siloyike ulwazi lwakhe namandla akhe amakhulu. Ngokufanelekileyo umdumisi wathi: “Ulobala inani leenkwenkwezi, ezibiza zonke ngamagama. Inkulu iNkosi yethu, inamandla amakhulu; ingqondo yayo ayiphele ndawo. . . . Haleluya!”—INdumiso 147:4, 5, 20.

[Inkcazelo Ngomfanekiso okwiphepha 31]

NASA photo