Iinkwenkwezi Zityhila Amandla KaThixo
“Phakamiselani amehlo enu phezulu nize nibone. Ngubani na odale ezi zinto? NguLowo uzisa umkhosi wazo kanye ngokwenani, uzibiza nangegama xa zizonke. Ngenxa yamandla amakhulu, kanjalo womelele ngamandla, akukho nanye esalayo.”—ISAYA 40:26.
ILANGA lethu lilingana nje nezinye iinkwenkwezi ezingekho nkulu kangako. Nangona kunjalo, umhlaba uwuphindaphinda izihlandlo ezingama-330 000 ngobukhulu. Inkoliso yeenkwenkwezi ezikufutshane emhlabeni zincinane kunelanga. Ezinye iinkwenkwezi ezinjengeV382 Cygni ziliphinda kangangezihlandlo ezingama-27 ngobukhulu.
Angakanani amandla aveliswa lilanga lethu? Khawuthelekelele indlela oshushu ngayo umlilo ukuba ubushushu bawo bunokuvakala umalunga neekhilomitha ezili-15. Ilanga limalunga neekhilomitha ezili-150 lezigidi ukusuka emhlabeni. Xa ilanga ligqats’ ubhobhoyi isikhumba siyobuza. Okumangalisayo kukuba buncinane kakhulu ubushushu belanga obufikayo emhlabeni. Nangona kunjalo, la mandla elanga ayakwazi ukulondoloza izinto eziphila emhlabeni.
Izazinzulu ziye zabala zafumanisa ukuba amandla elanga lethu anokukwazi ukuxhasa izijikelezi-langa ezingama-31 amawaka ezigidi njengomhlaba. ISpace Environment Center (SEC) Web site ithi: “Ukuba amandla elanga ebenokuqokelelwa ndawonye umzuzwana nje omnye, iUnited States ibinokuwasebenzisa kangangeminyaka engama-9 000 000.”
Amandla elanga avela kumbindi walo—inyukliya etshisa iiatom zelanga zize zivelise ubushushu. Ilanga likhulu kakhulu, umbindi walo unzongonzongo kangangokuba kuthabatha izigidi zeminyaka ukuze uvelise ukukhanya. ISEC Web site ithi: “Ukuba ilanga belinokuyeka namhlanje ukusebenza bekuza kufuneka kudlule iminyaka engama-50 000 000 ngaphambi kokuba ibonakale lo nto eMhlabeni!”
Makhe sihlolisise esi sibakala: Ukuba ujonga esibhakabhakeni ngobusuku obuzolileyo, ubona amawaka eenkwenkwezi, nganye kuzo ikhanyisa njengelanga. Izazinzulu zithi kukho amawaka angamawaka ezigidi zeenkwenkwezi kwindalo iphela.
Zivela phi zonke ezi nkwenkwezi? Ngezizathu ezingaqondakaliyo inkoliso yabaphandi ithi, indalo iphela yavela ngequbuliso malunga neminyaka eli-14 lamawaka ezigidi ezadlulayo. IBhayibhile ithi: “Ekuqaleni uThixo wadala amazulu nomhlaba.” (Genesis 1:1) Ngokungathandabuzekiyo lowo wadala iinkwenkwezi ezinkulu kunokuthiwa “womelele ngamandla.”—Isaya 40:26.
Indlela UThixo Awasebenzisa Ngayo Amandla Akhe
UYehova uThixo usebenzisa amandla akhe ukuze omeleze abo benza ukuthanda kwakhe. Ngokomzekelo, umpostile uPawulos wazibhokoxa efundisa abantu ngoThixo. UPawulos wayengengomntu unamandla angaphezu kwawabanye abantu, kodwa wakwazi ukwenza izinto ezininzi ezintle nangona wayechaswa. Wakwenza njani oko? Wavuma ukuba wafumana “amandla angaphaya koko kuqhelekileyo” kuThixo.—2 Korinte 4:7-9.
Kwakhona uYehova uThixo usebenzisa amandla akhe ukuze atshabalalise abo bophula imithetho yakhe ngabom. UYesu Kristu uthetha ngokutshatyalaliswa kweSodom neGomora nangoMkhukula womhla kaNowa njengemizekelo yokusebenzisa kukaYehova amandla akhe okutshabalalisa. UYesu waprofeta wathi kungekudala uYehova uza kusebenzisa amandla akhe ukuze atshabalalise abo bangayiseso imilinganiselo yakhe.—Mateyu 24:3, 37-39; Luka 17:26-30.
Uvakalelwa Njani?
Emva kokucamngca ngeenkwenkwezi ezityhila amandla kaThixo usenokuvakalelwa njengoKumkani uDavide owathi: “Xa ndibona amazulu akho, imisebenzi yeminwe yakho, inyanga neenkwenkwezi ozilungiseleleyo, uyintoni na umntu ofayo le nto umkhumbulayo, nonyana womntu wasemhlabeni le nto umnyamekelayo?”—INdumiso 8:3, 4.
Kuyasithoba ukwazi ukuba siyimicikwana xa sithelekiswa nobukhulu bendalo iphela. Nakuba kunjalo, awamele asoyikise amandla kaThixo. UYehova waphefumlela umprofeti uIsaya ukuba abhale la mazwi asiqinisekisayo: “[UThixo] unika odiniweyo amandla; nalowo ungenamandla makhulu umenza aphuphume ukomelela okupheleleyo. Amakhwenkwe aya kudinwa aze atyhafe, nabafana nakanjani na baya kukhubeka, kodwa abo bathembela kuYehova baya kufumana amandla kwakhona. Baya kunyuka ngamaphiko njengeenkozi. Baya kubaleka baze bangatyhafi; baya kuhamba bangadinwa.”—Isaya 40:29-31.
Ukuba ufuna ukwenza ukuthanda kukaThixo, unokuqiniseka ukuba uya kukunika umoya oyingcwele ukuze ukomeleze. Kodwa umele uwucele. (Luka 11:13) Ngoncedo lukaThixo unokunyamezela naluphi na uvavanyo ukuze wenze okulungileyo.—Filipi 4:13.
[Amagama acatshulweyo akwiphepha 7]
Ngoncedo lukaThixo uya kuba namandla okwenza okulungileyo
[Imifanekiso ekwiphepha 7]
Ngasentla ngasekhohlo: Umnyele obizwa ngokuba yiWhirlpool neAndromeda, iPleiades star cluster; iOrion Nebula
[Imifanekiso ekwiphepha 7]
Umhlaba uliphindaphinda ilanga kangangezihlandlo ezingama-330 000 ngobukhulu.
[Inkcazelo Ngemifanekiso ekwiphepha 7]
Pleiades: NASA, ESA and AURA/Caltech; all others above: National Optical Astronomy Observatories