Ngaba UThixo Uya Kuze Enze Nantoni Na Ngokungekho Sikweni?

“OKU kukundidlel’ indlala.” Umfundi oselula wabonakala ekhathazekile, ecaphukile emva kokuba yena ubuqu wathi wanamava okwaphulwa okucacileyo kwemigaqo yokusesikweni. Wahlabela mgama esithi, “Ukuba ngenene uThixo ukho, kutheni evumela okungekho sikweni ngolu hlobo?” Ngaba wawuya kuvelana neli nenekazi liselula? Kusenokuba kunjalo. Kodwa ngaba wawunokusisingatha isikhalazo salo?

Ngoxa wawusengumntwana, kusenokwenzeka ukuba maxa wambi wawuye uvakalelwe kukuba abazali bakho bavumela ukuba uphathwe ngokungekho sikweni. Kodwa oko kuphathwa ngokungekho sikweni ngokucacileyo akuzange kungqine ukuba abakho, akunjalo na? Ngokukwanjalo, ukuvumela kukaThixo okungekho sikweni akuyondlela yokungqina ukuba akakho.

Noko ke, lo mfundi uselula waphendula ngokuthi, oku kwakungumcimbi owahluke mpela. Walatha kwisibakala sokuba ubawo ongumntu ongafezekanga usenokuba yena ngokwakhe ubuncinane uyakwenza okungekho sikweni. Okanye ngenxa yokungazazi zonke izibakala, usenokungakuqondi ukwenziwa kokungekho sikweni xa ekubona. Ngapha koko, ngenxa yamandla asikelwe umda omntu, usenokuba akanamandla okwenza nto ngokungekho sikweni akubonayo. Eli nenekazi laphikisa ngelithi, akukho nanye kwezi zinto esebenzayo kuThixo osesikweni ekungekho nanye into emnqabeleyo nongumnini-mandla onke.

Usenokuba nawe uvakalelwa kukuba ukuvunyelwa kokungekho sikweni akuvisisani neempawu zikaThixo. Kanti, ngaba kunokwenzeka ukuba ekubeni ekrelekrele ngokugqithiseleyo, uThixo unesizathu esibambekayo sokuvumela okungekho sikweni kangangexesha elithile?

Ababhali beBhayibhile bamgqala uThixo ‘engumthandi wobulungisa nokusesikweni.’ UMoses wabhala wathi: “Zonke iindlela zakhe zisesikweni; nguThixo wentembeko, tu ubugqwetha [“akakwenzi okungekho sikweni,” NW].”—INdumiso 33:5; Duteronomi 32:4; Yobhi 37:23.

Ngaphezu kokumgqala uYehova enguThixo osesikweni ongakuvuyeliyo okungekho sikweni, ababhali beBhayibhile bakuvuma ukuba ngenye imini uya kukuphelisa oku. Ngokomzekelo, uIsaya wayixela kwangaphambili le meko, ngokuthi: “Yabona, ukumkani uya kulawula ngokobulungisa, abathetheli bathethele ngokwesiko [“ngokusesikweni,” NW]. Entlango ke kuya kuma okusesikweni, buhlale ubulungisa entsimini echumayo.” (Isaya 32:1, 16) Kodwa nini? Yaye ukuba uThixo unomnqweno wokuphelisa okungekho sikweni ehlabathini, kwakutheni ukuze akuvumele kwasekuqaleni?

Okungekho Sikweni—Kwakutheni Ukuze Kuvunyelwe?

Kwakukho ixesha apho okungekho sikweni kwakungekho kwindalo iphela. Kuphela kusemva kokuvukela kuka-Adam noEva phantsi kwengcinezelo kaSathana uMtyholi ekwathi okungekho sikweni kwaqala kwakho ebantwini. USathana akazange atshatyalaliswe ngoko nangoko ngexesha lale mvukelo. Ngenjongo yakhe efanelekileyo, uThixo wavumela ithuba laxa umntu wayeya kwenza okungekho sikweni, yaye oku kwakuya kuba ngenjongo yokuvavanya abo bazinikele Kuye, enoba babeya kungqineka bethembekile Kuye kusini na. Ukunyula kwabo ukuba ngabagcini bengqibelelo kwakuya kuba kukuwakhanyela amandla kaSathana okuguqula yonke indalo engabantu ukuze ichase uThixo. Ngaloo ndlela ngokuthethelelwa kolongamo lukaThixo, imisebenzi kaSathana yayiya kubhangiswa, konke okungekho sikweni kushenxiswe.

Okwangoku, ukuba uThixo ebeya kuthintela abantu ukuba bangaqhubani ngokungekho sikweni, wayeya kuba ubahlutha ilungelo labo lokuzikhethela. Ngaphezu koko, ngokuvumela abantu ukuba bave imiphumo yokungekho sikweni yezenzo eziphosakeleyo zabanye, uThixo ubonisa indlela ekwabangela umonakalo ngayo ukuba uAdam noEva ngokungafanelekileyo bavukele imigaqo yakhe, le migaqo ithatyathelw’ indawo yimilinganiselo yabo ephosakeleyo. Ngokuvumela abantu ukuba bavune oko bakuhlwayeleyo, uThixo unceda abo banyanisekileyo ukuze baqonde ukubaluleka kokwenza izinto ngendlela afuna ngayo.—Yeremiya 10:23; Galati 6:7.

Ukongezelela, izenzo zokusesikweni okanye zokungekho sikweni ezenziwa ngabantu zibubungqina obucacileyo. Ezi zenzo zinika uThixo isizinzi esichanileyo sokugweba abo bafanele ukuphila emhlabeni kwihlabathi elitsha xa okusesikweni kuya kube kubuyiselwe ngokupheleleyo. Ukungqina oku, sifunda oku: “Ongendawo ke, xa athe wabuya ezonweni zakhe zonke azenzileyo, wayigcina yonke imimiselo yam, wenza ngokwesiko [“ngokusesikweni,” NW] nangobulungisa, inene, uya kuphila.”—Hezekile 18:21.

Kuya Kuphela Nini Okungekho Sikweni?

Iinkqubano zikaYehova uThixo nabantu zisoloko zisesikweni yaye zibonakalisa uthando olunobubele. Ukuzekelisa oko, xa umkhonzi kaThixo othembekileyo uAbraham wayengasiqondi isizathu sokwenzeka kokuthile, wathi ngoThixo: “Makube lee kuwe ukwenza ngokwendawo enjalo ukubulala olilungisa kunye nongendawo, ilungisa libe njengongendawo; makube lee kuwe. Umgwebi wehlabathi lonke akayi kwenza okusesikweni yini na?” (Genesis 18:25) Ngokufika kukaKristu, iimpawu zikaThixo zokusesikweni nobubele obunothando zabonakaliswa ngokucacileyo. Ilungiselelo ledini lentlawulelo ngoYesu Kristu lavulela wonke umntu indlela, umYuda nongengomYuda ngokufanayo, ukuze afumane ubomi obungunaphakade. Oku kwakhokelela ekubeni umpostile uPetros athi: “Ndiyaqiqa okwenyaniso ukuba uThixo akamkhethi wabuso bamntu; kwiintlanga zonke, lowo umoyikayo, asebenze ubulungisa, wamkelekile kuye.”—IZenzo 10:34, 35.

AmaNgqina kaYehova akhuthele ekuvakaliseni ukuba uKumkani kaThixo onguMesiya seluqalisile ulawulo lwakhe yaye lisondele ixesha laxa okusesikweni kuya kubuyiselwa ngokupheleleyo kumhlaba wethu.a Oku kuya kuphunyezwa xa loo Kumkani etshabalalisa eli hlabathi langoku lingekho sikweni aze aphelise igunya lothixo walo ongabonakaliyo, uSathana uMtyholi. IBhayibhile ibonisa ukuba oku kuza kwenzeka kungekudala “emfazweni yaloo mini inkulu kaThixo, uSomandla,” ngokuqhelekileyo ebizwa ngokuba yiArmagedon.—ISityhilelo 16:14, 16.

“UThixo akenzi okungekho sikweni xa ekhupha umsindo wakhe,” ngoko iArmagedon iya kuba yimfazwe yokusesikweni. (Roma 3:5, NW) Emva koko, uKristu Yesu nabo aya kulawula nabo, njengabapostile, baya kulawula besezulwini kangangeminyaka eliwaka. (ISityhilelo 20:4) Izigidi zabantu eziye zathwaxwa kokungekho sikweni kwixesha elidlulileyo ziya kuvuselwa kwinkqubo yobulungisa yasemhlabeni, ikhaya loluntu lamandulo, ukuze zinandiphe okusesikweni okupheleleyo okokuqala kubomi bazo.

“Ngaba Oku Kuthetha Ukuba UThixo Akangosesikweni?”

Umpostile uPawulos wabuza oko mayela nenye yeenkqubano zikaThixo. Yathini impendulo? UPawulos wabhala wathi: “Nakanye.” Efanisa abantu nodongwe oluye lwaxonxwa ngumbumbi ekubeni lube zizitya ezifanelwe yingqumbo okanye yinceba, uPawulos wacacisa wathi: “Nangona uThixo ekulungele ukubonakalisa ingqumbo yakhe aze abonakalise amandla akhe, ukanti ngothantamiso uyabanyamezela abantu abamcaphukisayo, nangona befanelwe kukutshatyalaliswa. Uyabanyamezela ngenxa yabanye abantu, abo afuna ukuba nenceba kubo, afuna ukutyhila kubo ubutyebi bozuko lwakhe.”—Roma 9:14, 20-24, The Jerusalem Bible.

Njengomfundi oselula okhankanywe ngaphambilana, maxa wambi usenokukufumanisa kunzima ukusiqonda isizathu sokuvumela kukaThixo okungekho sikweni ngokubanzi okanye ubungendawo obuthile obungqalileyo. Kodwa singoobani thina—izinto ezixonxwe ngezandla zakhe—ukuba sithandabuze ukuzeka kade umsindo kwakhe nobulumko bakhe ngokwenza oko? UYehova uThixo wathi kuYobhi: “Kanene uya kwaphula nogwebo lwam na, undigwebe, ukuze ube lilungisa?”—Yobhi 40:8.

Asisayi kuze sifune ukuba netyala lokwenza oko. Kunoko, siya kufuna ukukuvuyela ukwazi ukuba nangona okungekho sikweni kusekho phakathi kwethu, uThixo osesikweni kungekudala uza kukushenxisa emhlabeni uphela.

[Umbhalo osemazantsi]

[Umfanekiso okwiphepha 23]

Ukuvunyelwa kokungekho sikweni nangayiphi na indlela akunakusetyenziselwa ukungqina ukungabikho kukaThixo

Ngaba uThixo unetyala ngokwala komqhubi onxilileyo ukusebenzisa amandla akhe okucinga, ukuzibamba nokuba nolwazelelelo?

Lisondele ixesha laxa okusesikweni kuya kubuyiselwa ngokupheleleyo kumhlaba wethu