Xa Wena Okanye Abanye Bephethwe Kakubi

1-2. Yintoni abayenzayo abantu abaninzi xa bebona indlela abaphethwe kakubi ngayo abanye abantu? Yeyiphi imibuzo esinokuzibuza yona?

IHLABATHI esiphila kulo ligcwaliswe ngabantu ababaphatha kakubi abanye. Babaphatha kakubi ngenxa yokuba besokola, ngenxa yeendawo abasuka kuzo, indlela ababonakala ngayo, nangenxa yezinye izizathu. Abanye baphatheke kakubi ngenxa yokunyoluka koosomashishini abazizityebi nokunganyaniseki kwamagosa karhulumente. Ezi zinto nezinye zinokusenza buhlungu xa sisonke, nokuba zenzeka kuthi okanye kwabanye abantu.

² Ayisimangalisi into yokuba abantu abaninzi becaphuka xa bephethwe kakubi, okanye xa bebona isenziwa kwabanye abantu loo nto. Sonke sifuna ukuphila kwihlabathi esiziva sikhuselekile kulo futhi siphethwe kakuhle. Abanye abantu bazama ukulungisa iingxaki abazibona zisenzeka ehlabathini okanye kwilizwe labo. Basayina izivumelwano eziya kurhulumente, batoyitoye, baxhase neenkokheli zepolitiki ezithembisa ukuba ziza kulwa nokuphathwa kakubi kwabanye abantu. Kodwa thina maKristu sifundiswa ukuba ‘singabi ngabo abehlabathi,’ nokuba masilinde ibe buBukumkani BukaThixo obuphelisa konke ukuphathwa kakubi kwabantu. (Yoh. 17:16) Sekunjalo, siba buhlungu side sicaphuke nokucaphuka xa sibona omnye umntu ephathwa kakubi. Xa kusenzeka loo nto usenokuzibuza: ‘Yintoni endimele ndiyenze? Ikhona into endinokuyenza ngoku ngokuphathwa kakubi kwabantu?’ Ukuze sikwazi ukuyiphendula le mibuzo, makhe siqale sifunde ngendlela uYehova noYesu abaziva ngayo ngokuphathwa kakubi kwabantu.

UYEHOVA NOYESU BAYAKUCAPHUKELA UKUPHATHWA KAKUBI KWABANTU

3. Kutheni siqondakala isizathu sokuba kusicaphukisa ukuphathwa kakubi nokubona abanye abantu bephethwe kakubi? (Isaya 5:7)

³ IBhayibhile iyasixelela ukuba kutheni singakuthandi ukuphathwa kakubi, okanye ukubona abanye abantu bephethwe kakubi. Ithi uYehova wasidala ngokomfanekiso wakhe futhi “uyabuthanda ubulungisa nokusesikweni.” (INdu. 33:5; Gen. 1:26) Akasoze abaphathe kakubi abantu, engamfuni nomntu oyenzayo loo nto. (Dut. 32:​3, 4; Mika 6:8; Zek. 7:9) Ngokomzekelo, ngemihla yomprofeti uIsaya uYehova weva ‘isikhalo sentlungu’ esasisenziwa ngamaSirayeli amaninzi awayephethwe kakubi ngamanye amaSirayeli. (Funda uIsaya 5:7.) UYehova wawohlwaya lawo ayengayithobeli iMithetho yakhe, ewaphatha kakubi amanye.​—Isa. 5:​5, 13.

4. Ibali elikwiincwadi zeVangeli libonisa ukuba uYesu uziva njani xa ebona abantu bephethwe kakubi? (Jonga nomfanekiso.)

⁴ UYesu uyafana noYehova, uyabuthanda ubulungisa, futhi kuyamcaphukisa ukubona abantu bephathwa kakubi. Ngenye imini, ngoxa wayeselapha emhlabeni, wabona indoda eyayinesandla esingasebenziyo. Waba nosizi waza wayiphilisa, kodwa abefundisi bamaYuda ababekhohlakele yabacaphukisa loo nto. Eyona nto yayibalulekile kubo yayikukunyanzela abantu ukuba bagcine iSabatha ngendlela bona ababeyibona ifanelekile, kunokuba kuncedwe le ndoda. Yamenza waziva njani uYesu loo nto? Waba ‘buhlungu kakhulu kukungabi nasizi kwabo.’​—Marko 3:​1-6.

5. Xa kusicaphukisa ukuphathwa kakubi kwethu nabanye abantu, yintoni esimele siyikhumbule?

⁵ Ekubeni kumcaphukisa uYehova noYesu ukubona abantu bephethwe kakubi, nathi asikho rongo xa siziva ngaloo ndlela. (Efe. 4:26) Kodwa nantsi into emasingayilibali, nokuba siyaqondakala isizathu sokuba sicaphuke, asinakukwazi ukuyiphelisa into yokuphathwa kakubi kwabantu. Enye into, ukuba sihlala sicaphukile, sinokukhathazeka kakhulu size sigule. (INdu. 37:​1, 8; Yak. 1:20) Ngoko yintoni esimele siyenze xa siphethwe kakubi, okanye sibona abanye abantu bephethwe kakubi? Sinokufunda kuYesu.

WAYESENZA NTONI UYESU XA EBONA ABANTU BEPHATHWA KAKUBI?

6. Zeziphi iindlela ababephethwe kakubi ngazo abantu xa uYesu wayelapha emhlabeni? (Jonga nomfanekiso.)

⁶ Xa wayelapha emhlabeni, uYesu wabona abantu abaninzi ababephethwe kakubi. Wabona nendlela abefundisi bamaYuda ababebaphilisa nzima ngayo abantu. (Mat. 23:​2-4) Wayeyibona nendlela abalawuli baseRoma ababebaphatha kakubi ngayo abantu. AmaYuda amaninzi ayekufuna nyhani ukukhululeka kumaRoma. Amanye, njengamaZealots, ayekulungele nokuyilwela loo nkululeko. Sekunjalo, uYesu wayengekho nakweliphi na iqela elalilwela ukuba kubekho utshintsho. Xa wabona ukuba kukho abantu ababefuna ukumenza ukumkani, wabashiya.​—Yoh. 6:15.

7-8. Xa uYesu wayelapha emhlabeni, kwakutheni ukuze angazami ukuphelisa ukuphathwa kakubi kwabantu? (Yohane 18:36)

⁷ Xa wayelapha emhlabeni, uYesu zange azame ukungena kwiipolitiki zemihla yakhe ukuze aphelise ukuphathwa kakubi kwabantu. Kwakutheni? Wayesazi ukuba abantu abakwazi ukuzilawula, futhi abalinikwanga negunya lokwenza loo nto. (INdu. 146:3; Yer. 10:23) Abanakukwazi nokumsusa oyena mntu ubangela ukuba abantu baphathwe kakubi. Eli hlabathi lilawulwa nguSathana uMtyholi, isidalwa somoya esingumbulali, esisebenzisa igunya laso ukuze senze abantu baphathwe kakubi. (Yoh. 8:44; Efe. 2:2) Nesono senza nabona bantu baneentliziyo ezintle bangakwazi ukusoloko bebaphatha kakuhle abantu.​—INtshu. 7:20.

⁸ UYesu wayesazi ukuba buBukumkani BukaThixo kuphela obuza kukwazi ukumsusa ngokupheleleyo oyena mntu ubangela ukuba abantu baphathwe kakubi. Ngenxa yaloo nto, wasebenzisa ixesha namandla akhe “eshumayela iindaba ezilungileyo ezingoBukumkani bukaThixo.” (Luka 8:1) Waqinisekisa abo “balambele nabanxanelwe ubulungisa” ukuba urhwaphiliso nokuphathwa kakubi kwabantu kuza kuphela. (Mat. 5:6; Luka 18:​7, 8) Kodwa loo nto ayizukwenziwa ngabantu abalwela utshintsho. Iza kwenziwa buBukumkani BukaThixo basezulwini, ‘obungebubo obeli hlabathi.’​—Funda uYohane 18:36.

LINGANISA UYESU XA UBONA ABANTU BEPHETHWE KAKUBI

9. Yintoni esenza siqiniseke ukuba buBukumkani BukaThixo kuphela obuza kuphelisa zonke iindlela abaphethwe kakubi ngazo abantu?

⁹ Kule mihla sibona iindlela ezininzi abaphethwe kakubi ngazo abantu, kunangexesha laxa uYesu wayelapha emhlabeni. Nakule ‘mihla yokugqibela,’ abantu ababangela ukuba baphathwe kakubi abanye abantu nguSathana nabantu abanesono abalawulwa nguye. (2 Tim. 3:​1-5, 13; ISityhi. 12:12) Nathi njengoYesu, siyazi ukuba buBukumkani BukaThixo kuphela obuza kutshabalalisa oyena mntu ubangela ukuba abantu baphathwe kakubi, uSathana. Ngenxa yokuba sixhasa obo Bukumkani, asitoyitoyi, asizifaki nakwiinzame ezenziwayo zokuphelisa ukuphathwa kakubi kwabantu. Cinga ngento eyenzeka kudade onguStacy.a Ngaphambi kokuba afunde inyaniso, wayesoloko etoyitoyela ukungaphathwa kakuhle kwabantu. Kodwa waqalisa ukuyithandabuza into awayeyenza. Uthi: “Xa sitoyitoya ndandiye ndizibuze ukuba le nto siyifunayo iza kuyilungisa nyhani na le ngxaki. Ngoku ndiyazi ukuba buBukumkani BukaThixo endibuxhasayo obuza kuyilungisa. Ndiyazi nokuba uYehova uza kubalwela bhetele kunam bonke abantu abaphethwe kakubi.”​—INdu. 72:​1, 4.

10. Ziintoni ezenziwa ngabantu abakwimibutho yehlabathi ezingavisisaniyo nento eyathethwa nguYesu kuMateyu 5:​43-48? (Jonga nomfanekiso.)

¹⁰ Abantu abakwimibutho yeli hlabathi elwela abantu badla ngokuba nomsindo, baze bangalawuleki. Ezo zinto ziyaphikisana nendlela awayephila ngayo uYesu neemfundiso zakhe. (Efe. 4:31) Umzalwana onguJeffrey uthi: “Ndiyazi ukuba xa abantu betoyitoya basenokusuka babe nomsindo, bamoshe izinto, babe, bade bonzakalise nabanye.” Kodwa uYesu usifundisa ukuba sibathande bonke abantu, nabo bangavumelaniyo nathi okanye basitshutshisayo. (Funda uMateyu 5:​43-48.) Thina maKristu, sizama ngamandla ethu onke ukungenzi nantoni na engavumelaniyo nezinto esizifunde kuYesu.

11. Yintoni enokwenza kube nzima ukungawuxhasi umbutho olwela abantu?

¹¹ Siyazi ukuba buBukumkani BukaThixo obuza kulungisa ingxaki yokuphathwa kakubi kwabantu, kodwa kusenokuba nzima ukulinganisa uYesu xa siphethwe kakubi. Cinga ngento eyenzeka kuJaniya owayecalulwa. Uthi: “Ndandicaphuka kakhulu. Ndandikhathazeke nokukhathazeka, ndifuna bohlwaywe abantu ababendicalula. Ngoko ndacinga ngokuxhasa umbutho owawutoyitoyela ubuhlanga nocalucalulo. Ndandicinga ukuba leyo yindlela efanelekileyo yokukhupha umsindo endandinawo.” Kodwa ekuhambeni kwexesha uJaniya wabona ukuba kufuneka ayitshintshe indlela acinga ngayo. Uthi: “Ndandivumele abanye batshintsha indlela endandicinga ngayo, ndathembela ebantwini kunokuthembela ngoYehova. Ndagqiba ekubeni ndiphume ndiphele kuloo mbutho.” Ngoxa siqondakala isizathu sokuba sibe nomsindo xa thina okanye abanye abantu bephethwe kakubi, masilumke loo nto ingasenzi sithath’ icala kwiipolitiki nakwiingxaki zasekuhlaleni.​—Yoh. 15:19.

12. Kutheni kubalulekile ukuba sizikhethe izinto esizifundayo, esizibukelayo nesizimamelayo?

¹² Yintoni enokusinceda sihlale sizolile xa thina okanye abanye abantu bephethwe kakubi? Abantu abaninzi bafumanise ukuba kuyabanceda ukuzikhetha izinto amabazifunde, amabazimamele namabazibukele. Ezinye izinto esizibona kwi-intanethi ziyayibaxa indlela abaphethwe kakubi ngayo abantu, zize zikhuthaze ukuba kukhalazelwe urhulumente. Amaxesha amaninzi amajelo eendaba awazichazi zinjengokuba zinjalo izinto ezenzekileyo. Masithi ke kuyenzeka achaze into eyinyani, ngaba ukusoloko sicinga ngayo kuza kusinceda? Ukuba sichitha ixesha elininzi simamele okanye sifunda iindaba ezinjalo, sinokucaphuka okanye sityhafe. (IMize. 24:10) Eyona nto imbi kukuba sinokulibala ukujonga kweyona nto iza kuphelisa zonke iindlela abaphathwa kakubi ngazo abantu, uBukumkani BukaThixo.

13. Ukuyifunda yonke imihla iBhayibhile kunokusinceda njani xa sibona abantu bephethwe kakubi?

¹³ Ukufunda iBhayibhile yonke imihla nokucingisisa ngezinto esizifundayo, kunokusinceda siyazi into emasiyenze xa thina okanye abanye abantu bephethwe kakubi. Omnye udade onguAlia yayimkhathaza kakhulu indlela ababephethwe kakubi ngayo abantu bendawo ahlala kuyo. Wayebona ngathi abo babebaphethe kakubi babengenziwa nto. Uthi: “Kwafuneka ndihlale phantsi ndizibuze, ‘Ngaba ndiyikholelwa nyhani into yokuba uYehova uza kuzilungisa ezi ngxaki?’ Ngelo xesha kanye, ndafunda uYobhi 34:​22-29. Ezo vesi zandikhumbuza ukuba uYehova ubona yonke into. Nguye kuphela onobulungisa ngokupheleleyo, ikwanguye yedwa noza kuzilungisa kakuhle zonke izinto.” Njengoko silinde uBukumkani BukaThixo ukuba bulungise zonke iingxaki, yintoni esinokuyenza ngoku?

YINTONI ESINOKUYENZA NGOKU?

14. Yintoni esinokuyenza ukuze singafak’ isandla kwindlela abaphethwe kakubi ngayo abantu? (Kolose 3:​10, 11)

¹⁴ Asinakuyitshintsha indlela abantu ababaphatha kakubi ngayo abanye, kodwa thina sinokuqiniseka ukuba sibaphatha kakuhle. Njengoko sesifundile, silinganisa uYesu ngokuba nothando. Olo thando lunokusenza sibahloniphe abantu, kwanabo basiphethe kakubi. (Mat. 7:12; Roma 12:17) UYehova uyavuya xa sinobubele kubo bonke abantu futhi sibaphatha kakuhle.​—Funda amaKolose 3:​10, 11.

15. Bancedakala njani abantu xa sibafundisa inyaniso eseBhayibhileni?

¹⁵ Eyona nto ibalulekileyo esinokuyenza ukuze sincede abantu, kukubafundisa inyaniso eseBhayibhileni. Kutheni sisitsho? Kuba ‘ukwazi uYehova’ kunokutshintsha umntu obendlongondlongo abe ngumntu onobubele nothanda uxolo. (Isa. 11:​6, 7, 9) Ngaphambi kokuba ifunde inyaniso, indoda egama linguJemal yaba kwiqela elalisilwa norhulumente eyayicinga ukuba ucinezela abantu. Uthi: “Awunakubanyanzela abantu ukuba batshintshe. Nam zange ndinyanzelwe ukuba nditshintshe, kodwa ndatshintshwa yinyaniso endandiyifunda eBhayibhileni.” Izinto awazifundayo uJemal zamenza wayeka ukulwa. Xa bebaninzi abantu abatshintshwa yinyaniso eseBhayibhileni, baza kutsho babe mbalwa abantu abaphatha abanye abantu kakubi.

16. Yintoni ekwenza ufune ukuxelela abantu ngethemba loBukumkani?

¹⁶ NjengoYesu, sizimisele ukuxelela abantu ukuba buBukumkani BukaThixo kuphela obunokuyiphelisa tu ingxaki yokuphathwa kakubi kwabantu. Elo themba linokubakhuthaza abantu abaye baphathwa kakubi. (Yer. 29:11) UStacy ekuthethwe ngaye kwiziqendu ezidlulileyo uthi: “Ukufunda inyaniso kundincede ndakwazi ukuzola xa ndiphathwa kakubi naxa ndibona abanye abantu bephathwa kakubi. UYehova usebenzisa umyalezo oseBhayibhileni ukuze asithuthuzele.” Ukuze ukwazi ukuxelela abantu ngomyalezo othuthuzelayo oseBhayibhileni othetha ngokupheliswa kokuphathwa kakubi kwabantu, kufuneka ulungiselele kakuhle. Xa uqinisekile ngeemfundiso zeBhayibhile ekuthethwe ngazo kweli nqaku, kuza kuba lula ukuzifundisa abanye esikolweni okanye emsebenzini xa kunokwenzeka kuthethwe ngokuphathwa kakubi kwabantu.b

17. UYehova usinceda njani sikwazi ukunyamezela xa siphethwe kakubi?

¹⁷ Siyazi ukuba ngoxa uSathana ‘esengumlawuli weli hlabathi,’ baseza kubakho abantu abaphatha abanye abantu kakubi. Kodwa okwangoku lingekafiki ixesha lokuba ‘agxothwe,’ uYehova akasiyekanga njee, uthembisa ukuba uza kusinceda. (Yoh. 12:31) KwiZibhalo uYehova usixelela isizathu sokuba abantu bephethwe kakubi kangaka, nokuba uziva njani xa ebona indlela okusenza buhlungu ngayo ukuphathwa kakubi kwabo. (INdu. 34:​17-19) Esebenzisa uNyana wakhe, uYehova usifundisa into esimele siyenze xa siphethwe kakubi naxa sibona abanye abantu bephethwe kakubi, nokuba kungekudala uBukumkani bakhe buza kuyiphelisa ngokupheleleyo le ngxaki yokuphathwa kakubi kwabantu. (2 Pet. 3:13) Masiqhubeke sikhuthele kulo msebenzi wokushumayela iindaba ezilungileyo ezingoBukumkani. Sikhangele phambili kwixesha laxa umhlaba uza kugcwaliswa ‘kokusesikweni nobulungisa.’​—Isa. 9:7.