Ukuvakaliswa Kweendaba Ezilungileyo Kwihlabathi Lonke
UBUKUMKANI bukaThixo buyalawula! Ezi zezona ndaba zilungileyo. Kungenxa yeso sizathu le nto ngowe-1989 amaNgqina kaYehova angaphezu kwe-3 700 000 kulo lonke ihlabathi athi ngehlombe avakalisa ‘iindaba ezilungileyo’ ezaprofetwa nguYesu ‘neendaba ezilungileyo’ ezavakaliswa sisithunywa sezulu kumbono kaYohane. (Mateyu 24:14; ISityhilelo 14:6) Kunjengokuba umpostile uPawulos wathi: “Intlokoma yabo yaphuma, yaya kulo lonke ihlabathi, namazwi abo aya eziphelweni zelimiweyo.” (Roma 10:18) Ibe abantu ngabanye phantse bazo zonke iintlanga nezizwe neelwimi nabantu baye basabela ngovuyo kwisimemo esithi “Moyikeni uThixo, nimzukise.”—ISityhilelo 14:7.
Akusekho Mfuneko Ye-Inshorensi Yobomi
Omnye owaba njalo yaba yindoda yaseNgilani eyayiphila kwimeko yobomi engaqinisekanga. UKen wayengumthengisi we-inshorensi, ibe xa wathi watyelela intsapho yamaNgqina kaYehova, yambuza oku: “Ubungathanda na ukuphila kwihlabathi apho i-inshorensi yobomi iya kube ingeyomfuneko khona?” Yayithetha ukuthini? Yayithetha ukuba ngokweBhayibhile, phantsi koBukumkani bukaThixo izinto ezininzi ezenza ubomi bangoku bungaqiniseki, kuquka ukugula nokufa, ziya kube zingasekho.
Ngaba into elolo hlobo inokwenzeka? Ewe, uThixo ngokwakhe uye wakuthembisa oko. Ngokomzekelo, iBhayibhile ithi: “Yena uThixo abe nabo [uluntu], enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.” (ISityhilelo 21:3, 4) Yintoni eya kubangela inguqulelo enjalo? BuBukumkani bukaThixo. NgokweLizwi likaThixo, ngokukhawuleza obu “buya kuzicola buzigqibe zonke ezo zikumkani [zanamhlanje zobupolitika], bona bume ngonaphakade.”—Daniyeli 2:44.
IZibhalo ezifana nezi zeziswa kwingqalelo yamakhulu ezigidi zabantu ngamaNgqina kaYehova ebudeni bephulo lokushumayela kwawo kulo lonke ihlabathi. Abaninzi, njengoKen, bayiqonda into yokuba le asiyontetho nje yomlomo. Ubungqina budandalazile. La madinga kaThixo athembekile ibe ngokukhawuleza aza kuzalisekiswa.
Imilinganiselo Yokuphila Eguqukileyo
Abo bawaphulaphulayo amaNgqina kaYehova njengokuba ehlokomisa isigidimi esivuyisayo sesithunywa sezulu bayakuqonda ukuba ukoyika uThixo nokumzukisa kuquka okungaphezulu kunokukholelwa nje kumadinga eBhayibhile. Kuyayiguqula yonke indlela abazijonga ngayo izinto ibe kukhulula abaninzi kwiinkxwaleko zobomi.
URafael nomfazi wakhe bakufumanisa oku kuyinyaniso. Bahlala eArgentina, ibe xa bathi batshata kwiminyaka engaphezu kwama-40 eyadlulayo, bakwenza usukelo lwabo ebomini ukusebenza nzima baze babeke into ethe vetshe ukulungiselela ikamva elinqabisekileyo. Noko ke, kwiminyaka engama-21 kamva, abakufumanayo ngomsebenzi wabo onzima yaba likhaya elincinane elalisoloko lifuna ukulungiswa. Abazange bazive benqabisekile ngaphezu kokuba babenjalo ukutshata kwabo.
Emva koko beva ngeendaba ezilungileyo kumaNgqina kaYehova baza bafunda ngohlobo olulunge ngakumbi lobutyebi nohlobo olulunge ngakumbi lonqabiseko. UYesu, kwiNtshumayelo yakhe yaseNtabeni, wathetha ngako oku xa wathi: “Ningaziqwebeli ubutyebi emhlabeni, apho konakalisa inundu nomhlwa, nalapho amasela agqobhozayo ebe; ziqwebeleni ke ubutyebi emazulwini, apho kungonakalisi nundu namhlwa, nalapho amasela angagqobhoziyo ebe.”—Mateyu 6:19, 20.
Ngoxa iBhayibhile ingasifundisi ukuba sibe ngabantu abangacingiyo ngobutyebi bezinto eziphathekayo, iyasibongoza ukuba singathembeli kwizinto ezinjalo. (INtshumayeli 7:12) Kunoko, sifanele sisebenzele ukuzuza ubutyebi bokomoya ngokufundisisa iBhayibhile, ngokufunda ngokuthanda kukaThixo, size sikwenze ukuthanda kwakhe kube yeyona nto yokuqala ebomini bethu. (Mateyu 6:33) URafael nomfazi wakhe baqalisa ukuzifumbela ubutyebi bokomoya, ibe ngoku bavakalelwa benobutyebi bokwenene, kungekhona ngenxa yemeko yabo engokwemali, kodwa ngenxa yolwalamano abanalo noThixo. (ISityhilelo 3:17, 18) Isigidimi soBukumkani bukaThixo sasiziindaba ezilunge ngokwenene kubo.
Umtshato Olungisiweyo
Indaba ezilungileyo zinamandla okwenene okuphembelela ukwenza okulungileyo. Ngokomzekelo, uJohn, ohlala eNgilani, wayengenamdla eBhayibhileni, kodwa umfazi wakhe nabantwana babenomdla. Ngoko baqalisa ukuya kwiintlanganiso zamaNgqina kaYehova ngoxa uJohn wayesiya kusela nabahlobo bakhe. Ngenxa yoko, wabandakanyeka ekuseleni ngokugqithiseleyo, ekutshayeni, ibe, kungekudala, ekuziphatheni okubi. Ekugqibeleni, wamshiya umfazi wakhe waya kuhlala nomnye umfazi.
Amalungiselelo okuqhawulwa komtshato aqalisa. Kodwa uJohn wamangaliswa kukubona umfazi wakhe—owayefunde indlela yokuziphatha yobuKristu ekufundisiseni kwakhe ngeendaba ezilungileyo—eqhubeka emphatha ngentlonelo. UJohn akazange asiqonde isizathu soku. Kwiiveki ezintathu ngaphambi kokuba uqhawulo-mtshato luphumelele, ukuziphatha kobuKristu komfazi kaJohn kwaba nomphumo wako. Wavakalisa ukuzisola ngokwenene ngehambo yakhe, ibe amalungiselelo oqhawulo-mtshato ayekwa. Ngoku uJohn waqalisa ukuzifunela iindaba ezilungileyo ibe wafundisisa iBhayibhile namaNgqina kaYehova. Ngoku ungumKristu nomfazi wakhe, yaye uxelela abanye ngeendaba ezilungileyo zoBukumkani.
Kule mihla yokuwohloka kwemilinganiselo yobomi bentsapho, abaninzi bafuna uncedo olunokunikelwa ziindaba ezilungileyo ezisekelwe eBhayibhileni. Omnye wamaNgqina kaYehova ePeru wayehleli kufutshane nomphathi womkhosi kuhambo ngenqwelo-moya. Baqalisa incoko ibe umphathi lowo waqalisa ukuphalaza iingxaki zakhe zentsapho, kuquka isibakala sokuba umfazi wakhe wayekhotyokiswe ziziyobisi ibe wayesele eza kumshiya aye komnye umfana. INgqina lathi ngobuchule lambonisa ukuba iBhayibhile inikela icebiso elilungileyo neliphilileyo ngemicimbi yentsapho nokuba lona ubuqu lancedwa yiyo ekucombululeni iingxaki zentsapho yalo.—Efese 5:21–6:4.
Umphathi womkhosi walibulela iNgqina ngamazwi alo athuthuzelayo waza warhumela iphephancwadi IMboniselo noVukani! ukuze akwazi ukufunda okungakumbi ngeendaba ezilungileyo. Kwandula ke, xa iNgqina lalishiya inqwelo-moya, isibini esiselula saxhabasha ukuya kulo saza sacela ukuba sithethe nalo. Sathi, “Besihleli kanye ngasemva kwenu ibe sinivile ngoxa benincokola nela nene. Besingathanda ukuwarhumela loo maphephancwadi nathi.” Naso sasifuna ukufunda ngeendaba ezilungileyo ezinako ukubuphucula ubomi.
Ubomi Obuguqukileyo
Ngokubhekele phaya, iindaba ezilungileyo ezisekelwe eBhayibhileni ziyabaguqula abantu. Kunjengokuba umpostile uPawulos wathi: “Ilizwi likaThixo liphilile, lisebenza.” (Hebhere 4:12) Oku kwaba yinyaniso kwimeko yomfana waseMakedoni, eGrisi. Wayemangalisiwe kukufunda ukuba, ngokweBhayibhile, igama likaThixo nguYehova. Ngoko wacela umhlobo wakhe ukuba amdibanise namaNgqina kaYehova ngokukhawuleza kangangoko kunokwenzeka. Kwalungiselelwa amathuba amabini eengxubusho namaNgqina, ekwathi ngalinye kuwo lathabatha malunga neeyure ezine. Wandula ke lo mfana waqalisa ukuqhutyelwa isifundo seBhayibhile esithe rhoqo, esokuqala esaqhutywa kwade kwayintsimbi yesibini ekuseni!
Ukususela kweso sifundo sokuqala, lo mfana ngokukhawuleza wabuvisisanisa ubomi bakhe nemilinganiselo yeBhayibhile. Waya kwiintlanganiso zokunqula namaNgqina kaYehova waza wamthanda uMdali ngendlela egqithiseleyo. Ibe uYehova ngembuyekezo wamsikelela. Kwiveki yokuqala yofundisiso lwakhe lweBhayibhile, wacheba iinwele zakhe ezinde. Kwiveki yesibini, wayeka ukuya ezikhefi nakwiidisco ukuya kufuna ubuqabane obuyolisayo. Kwiveki yesithathu, wawulahla umdiza wakhe wokugqibela. Emva kokufundisisa iinyanga ezimbini, waqalisa ukuthelela amaNgqina ekuxeleleni abanye ngeendaba ezilungileyo zoBukumkani. Ewe, wayevuya kuba amaNgqina kaYehova athi ezisa iindaba ezilungileyo kule nxalenye yomhlaba akuyo.
Iindaba Ezilungileyo Entolongweni
Neengcango zentolongo azingomqobo wokuthintela iindaba ezilungileyo. ESpain umfana ogama linguJosé utsala ithuba elide entolongweni ngenxa yokuhlasela ngompu nangenxa yezinye izenzo zolwaphulo–mthetho. Noko ke, amaNgqina kaYehova aba nako ukumchazela ngeendaba ezilungileyo, ibe isigidimi seBhayibhile sayiguqula ngokupheleleyo imbonakalo yakhe. UYehova ‘wamomeleza’.—Filipi 4:13.
UJosé uthi usenokuchitha bonke ubomi bakhe kule nkqubo indala engaphaya kwezitshixo zentolongo ngenxa yekhondo lakhe lobomi bangaphambili. Kodwa uye wabhaptizwa ibe ngoku ungumKristu. Umfazi wakhe umxhasa ngokupheleleyo, ibe uzama ukukhulisa unyana wabo oselula ngendlela yobuKristu. Sithetha nje, uJosé wabelana ngeendaba ezilungileyo nabo basentolongweni kunye naye, abantu ekunzima ukuba bafikelelwe ngabo bangekho ntolongweni. Ngoku lowo ahlala naye kwisisele sentolongo naye ungumKristu obhaptiziweyo.
Le yimizekelo nje embalwa yokubonisa imiphumo yephulo lokushumayela eliphunywe ngamaNgqina kaYehova kulo lonke ihlabathi. Enyanisweni, iindaba ezilungileyo ezavakaliswa sisithunywa sezulu esingabonakaliyo ziye zahlokonyiswa ngamaNgqina kaYehova ‘njengeendaba ezilungileyo kwabo bemiyo phezu komhlaba, nakuzo zonke iintlanga nezizwe neelwimi nabantu.’
Zizezona ndaba zilungileyo, ibe zikuphela kwethemba loluntu. Siyakubongoza ukuba uzibekele iindlebe. Ngokufana noKen noJohn baseNgilani, njengoRafael nomfazi wakhe baseArgentina, ngokufana noJosé waseSpain, ibe njengezigidi zabanye, sithelela isithunywa sezulu ekubongozeni bonke abantu ukuba ‘bamoyike uThixo, baze bamzukise; ngokuba lifikile ixa lokugweba kwakhe; ukuba bamnqule lowo wenze izulu, nomhlaba, nolwandle, nemithombo yamanzi.’—ISityhilelo 14:7.