Iindawo Ezithile ZeLizwe Ledinga

Intlambo YakwaEla—Apho UDavide Wabulala Khona Isigebenga!

ZIMBALWA iingxelo zeBhayibhile ezichwayitisa ngakumbi kunaleyo ichaza indlela ‘uDavide awasoyisa ngayo ngenkwitshi nangelitye’ isigebenga esingumFilisti, uGoliyati. (1 Samuweli 17:50) Oku kwenzeka kwiNtlambo yakwaEla.

Kodwa iphi loo ntlambo, kwaye injani? Ukwazi oku kuya kukwenza ube nombono wolu loyiso ludumileyo lo mfana owayethanjiswe njengokumkani wakwaSirayeli wexesha elizayo. Kamva uThixo wenza umnqophiso wobukumkani noDavide onokusizisela iingenelo zikanaphakade, ibe oku kufanele kusinike isizathu esongezelelekileyo sokufunda ngoko kwenzekayo kule Ntlambo yakwaEla.

AmaFilisti ayehlala kufutshane nonxweme lwakwaKanan. AmaSirayeli ayelawula ummandla okwiintaba zakwaYuda (ezisemazantsi eYerusalem). Ngoko ilapho le ntlambo—iintshaba zikummandla ongasezantsi xa usiya ngasentshona, abakhonzi bakaThixo bakwilizwe eliphakamileyo kwicala langasempuma. Phakathi kwabo kwakukho ummandla ababebangisana ngawo, iinduli ezisemazantsi ezibizwa ngokuba kuseziHlanjeni (Shefela). AmaFilisti ayenokuwahlasela njani amaSirayeli? Indlela echuliweyo yayiyinkalo engasempuma-ntshona yomlambo, eyona ntlambo inkulu yiNtlambo yakwaEla. Loo ntlambo yayinaba ukusuka kumathafa akufutshane nezixeko zawo, esaseGati nesase-Ekron, ukunyuka ukutyhubela iShefela, ukuya kutsho ezintabeni ezimalunga neekhilomitha ezingama-24 ukuphakama kumzantsi-ntshona weYerusalem neBhetelehem. Lo mfanekiso (ubonwa kwicala langasemzantsi-mpuma) ubonisa isiphelo esisemantla sale ntlambo. Elundini phayaa ubona iintaba zakwaYuda.a

Ujonge kulo mfanekiso, khawuthelekelele amaFilisti esiza kule ntlambo inabileyo ukuya ngasezintabeni. Ukuze awabangele angabi saqhubeka, amaSirayeli eza evela ngasemzantsi-ntshona esuka kwelakwaYuda. Apha kwakhiwa uluhlu. Ngoba? “AmaFilisti ema ngasentabeni ngapha, amaSirayeli ema ngasentabeni ngapha, umfula uphakathi kwawo.”—1 Samuweli 17:3.

Nangona singayazi ngokuthe ngqo indawo ekwenzeka kuyo oku apha ngasentlanjeni, yiba nombono wamaFilisti asendulini ezantsi kwicala langasekunene. Umkhosi kaSawule usenokuba wawungaphesheya phayaa endulini engaphaya kwedlelo elibumdakana ngebala. Kwakungekho mkhosi wawuza kwehla, unqumle intlambo, uze uhlasele umkhosi olwa nawo kwisigxina sawo esiphakamileyo, esikhuseleke ngokunqabisekileyo. Imikhosi yahlala izezo zintlu ithuba elingaphezu kwenyanga. Yintoni eyayiza kukuchithachitha oko?

Ngentsasa nangorhatya ngalunye uGoliyati, ingqwayingqwayi yamaFilisti eyayingaphezu kweemitha ezisisi-2,7 ubude, wayesima kule ntlambo agculele intente kaSawule ukuba igqibe ukukhupha umntu omnye alwe naye. Kodwa akakho umSirayeli owaba nobuganga bokumphendula. Ekugqibeleni, umalusi oselula ogama linguDavide weza evela eBhetelehem ephathele abantakwabo ababesententeni ukutya. Wasabela njani kolu celomngeni lungcikivayo? “Ungubani na umFilisti, le nto ingalukileyo, ukuba ade angcikive izintlu zikaThixo ophilileyo?” (1 Samuweli 17:4-30) Ngokucacileyo uDavide wayenembono eboniswe kumxholo wonyaka wamaNgqina kaYehova we-1990: “Khalipha Uze Uthi: ‘UYehova Ungumncedi Wam.’”—Hebhere 13:6, NW; INdumiso 56:11; 118:6.

Xa uKumkani uSawule wevayo ukuba lo mfana, nangona wayengaxhobanga ibe engaqeqeshwanga njengejoni, wayeza kujamelana ubuso ngobuso nalo Goliyati woyikekayo, wamnika izikrweqe zakhe. UDavide wala, ekulungele ukulwa nxamnye nesi sigebenga ngomsimelelo wakhe wokwalusa, inkwitshi eyenziwe ngethwathwa, namatye amahlanu awawafumana entlanjeni. Ayenjani la matye? Akunakwenzeka ukuba ayeziingqalutye nje ezilingana neediliya okanye isiqhamo somthi womnquma. Amatye afakwa kwinkwitshi kuye kwafunyaniswa ukuba anobukhulu obususela kwiisentimitha ezi-5 ukuya kwezisi-8, ubukhulu obo obulingana neorenji elincinane. Inkwitshi inokuliphosa ilitye elingako kangangesantya esisusela kwiikhilomitha ezili-160 ukuya kwezingama-240 ngeyure.

Ngokungathandabuzekiyo uye wafunda ngento eyenzekayo kuloo ntlambo, emehlweni ayo yomibini le mikhosi. UDavide wadanduluka esithi: “Wena uza kum unekrele, nentshuntshe, nomkhonto; ke mna ndiza kuwe egameni likaYehova wemikhosi, uThixo wezintlu zakwaSirayeli omngcikivileyo.” Wandula ke uYehova walunikela kuye uloyiso. Lo mfana walijula eli litye ngamandla kangangokuba latshona ebunzini likaGoliyati, lambulala. Wandula ke lo malusi wabaleka waza wanqumla intloko yesigebenga ngekrele laso.—1 Samuweli 17:31-51.

Omelezwe lukholo nokukholosa kukaDavide ngoThixo, amaSirayeli azicela umngeni iintshaba zawo ezaziphelelwe ngamandla, azileqa ukwehlisa iShefela ezidudulela eFilisti.—1 Samuweli 17:52, 53.

Cinga ngovuyo olumele ukuba lwabakho kwaYuda! Abantu bakaThixo ababesezintabeni babenokukhangela kwicala langasemzantsi-ntshona ukwehlela eNtlanjeni yakwaEla naseShefela, njengoko oku kubonakala kule mihla xa umi kummandla ongezantsi kweHebron. Ukudubula kweentyantyambo ezimhlophe zomthi wom-amangile, kuyinto entle ephawulekayo, kodwa uvuyo lokoyiswa kweentshaba zikaThixo kwakukwayinto entle nangakumbi. Kwakuyinto efanelekileyo ngabafazi bamaSirayeli ukuthi: “USawule ubulele amawaka akhe, uDavide ubulele amawaka akhe angamashumi,” kuquka neso sigebenga awasilalisa ngophotho kwiNtlambo yakwaEla.—1 Samuweli 18:7.

[Umbhalo osemazantsi]

[Inkcazelo Ngomfanekiso okwiphepha 16]

Pictorial Archive (Near Eastern History) Est.