Ubomi Nobulungiseleli BukaYesu
UYesu Ukhalimela Abachasi Bakhe
UYESU uye wabadida ngokupheleleyo abachasi bakhe abangokonqulo kangangokuba bayoyika ukumbuza nantoni na ngokubhekele phaya. Ngoko uyaqalisa ukubhenca ukungabi nalwazi kwabo. Uyabuza, “Nithini na nina ngaye uKristu? Ungunyana kabani na?”
AbaFarisi bayaphendula, “KaDavide.”
Nangona uYesu engalikhanyeli elokuba uDavide nguyisemkhulu wokwenyama kaKristu, okanye kaMesiya, uyabuza: “Yini na phofu ukuba uDavide ngoMoya [kwiNdumiso 110] ambize ngokuthi, Nkosi, esithi, Yathi iNkosi eNkosini yam, Hlala ngasekunene kwam, ndide iintshaba zakho ndizenze isihlalo seenyawo zakho?” AbaFarisi bayathula, kuba abazi ukuba ngokwenyaniso uKristu ungubani na, okanye lowo uthanjisiweyo. Umesiya akangomntu nje oyinzala kaDavide, njengokuba kubonakala ukuba abaFarisi bakholelwa njalo, kodwa wayephila ezulwini yaye emkhulu kunoDavide, okanye eyiNkosi yakhe.
Ngoku ebhekisa kwizihlwele nakubafundi bakhe, uYesu ulumkisa ngababhali nabaFarisi. Ekubeni aba befundisa uMthetho kaThixo, ‘behleli esihlalweni sikaMoses,’ uYesu uyabongoza: “Konke ngoko abasukuba besithi kuni kugcineni, zenikugcine nikwenze.” Kodwa walek’ umsundulo esenjenje: “Ningenzi ngokwemisebenzi yabo; kuba bathetha baze bangenzi.”
Bangabahanahanisi, ibe uYesu ukubakhalimela usebenzisa amazwi afana nalawo wawathethayo ngoxa wayesitya kwindlu yomFarisi kwiinyanga ezithile ngaphambili. Uthi, “Yonke imisebenzi yabo ke bayenza ngokunga bangabonwa ngabantu.” The unikela imizekelo, esithi:
“Bawenze banzi amaqhaga abo ezikhumbuzo.” La maqhaga mancinane ngokwentelekiso, anxitywa ebunzi okanye engalweni, aneenxalenye ezine zoMthetho: Eksodus 13:1-10, 11-16; neDuteronomi 6:4-9; 11:13-21. Kodwa abaFarisi bayabandisa ubukhulu bala maqhaga ukuze babonakale ngathi bayawuzondelela uMthetho.
UYesu uhlabela mgama esithi “bayandise imiqukumbelo yeengubo zabo.” KwiNumeri 15:38-40 amaSirayeli ayalelwa ukuba enze imiqukumbelo kwiingubo zawo, kodwa abaFarisi eyabo bayenza mikhulu kuneyakhe nabani na ongomnye. Yonke into bayenza ukuze babonwe! UYesu uyabagxeka esithi, “Bathanda izilili zobukhulu.”
Kulusizi ukuthi, abafundi bakhe baye bachatshazelwa ngulo mnqweno wokufuna udumo. Ngoko uyabaluleka: “Ke nina maningabizwa kuthiwe Rabhi; kuba mnye uMkhokeli wenu, uKristu; nina ke nonke ningabazalwana. Ningabizi mntu ngokuba nguyihlo emhlabeni apha; kuba mnye uYihlo wenu, lowo usemazulwini. Kananjalo maningabizwa ngokuba ningabakhokeli; kuba mnye uMkhokeli wenu, uKristu.” Abafundi bamele bahlukane nomnqweno wokuba ndim kuqala! UYesu uyaluleka, “Omkhulu ke kuni makabe ngumlungiseleli wenu.”
Ngokulandelayo uvakalisa ungcelele looyeha kubabhali nabaFarisi, ngokuphindaphindiweyo ebabiza ngokuba ngabahanahanisi. Uthi, ‘Bayabuvala ubukumkani bamazulu phambi kwabantu,’ ibe ‘badla izindlu zabahlolokazi, baze ngokunyhwalaza bathandaze uzungu.’
UYesu uthi, “Yeha, nina bakhokelindini baziimfama!” Uyakugweba ukuswela kwabaFarisi iimpawu ezixabisekileyo zokomoya, njengoko oku kuboniswa ngunothanda abamenzayo obonakalisa ukuzikhukumalisa. Ngokomzekelo, bathi, ‘Akunto ukufunga ngetempile, kodwa othe wafunga igolide yetempile, unetyala.’ Ngokugxininisa ngokungakumbi kwigolide yetempile kunokuxabiseka kwezinto zokomoya zalo ndawo yonqulo, batyhila ukumfameka kwabo okungokokuziphatha.
Uyandula ke, njengoko wenzayo ngaphambili, uYesu abagwebe abaFarisi ngokutyeshela “ezona ndawo zinzima zomthetho, umgwebo nenceba nokholo” ngoxa benikela ingqalelo egqithiseleyo ekunikelweni kwezishumi, okanye isahlulo seshumi kwizityalo ezingabalulekanga.
UYesu ubabiza abaFarisi ngokuthi ‘ngabakhokeli abaziimfama, abahluza imbuzane, baze ke baginye inkamela.’ Bahluza iimbuzane kwiwayini yabo, kungengenxa nje yokuba isisinambuzane, kodwa kuba iyinqambi. Ukanti, ukuzityeshela kwabo ezona ndawo zinzima zoMthetho kuthelekiswa nokuginya kwabo inkamela, ekwayinqambi. Mateyu 22:41-23:24, Marko 12:35-40; Luka 20:41-47; Levitikus 11:4, 21-24.
◆ Kutheni le nto abaFarisi bengaphenduli xa uYesu ebabuza ngoko uDavide wakuthethayo kwiNdumiso 110?
◆ Kutheni le nto abaFarisi bewandisa amaqhaga abo ezikhumbuzo baze bayandise nemiqukumbelo yeengubo zabo?
◆ Sisiphi isiluleko uYesu asinikela kubafundi bakhe?
◆ Nguwuphi unothanda obonakalisa ukuzikhukumalisa okwenziwa ngabaFarisi, ibe uYesu ubagweba njani ngokutyeshela ezona ndawo zinzima?